0 Shares 407 Views

കളിയില്‍ അല്പം കാര്യം – സുനില്‍ എം എസ് എഴുതുന്നു

Oct 27, 2015
0 408

പെലെയ്ക്കു ശേഷമുള്ള ഏറ്റവും വലിയ ഫുട്‌ബോള്‍ മാന്ത്രികന്‍ അര്‍ജന്റീനയുടെ ഡിയഗോ മാറഡോണയായിരുന്നിരിയ്ക്കണം. ഇരുപതാം നൂറ്റാണ്ടിലെ ഏറ്റവും മനോഹരമായത് എന്നു വിശേഷിപ്പിയ്ക്കപ്പെടുന്ന ഗോള്‍ മാറഡോണയുടേതാണ്. 1986ലെ ലോകകപ്പില്‍ ഇംഗ്ലണ്ടിനെതിരേയുള്ള ക്വാര്‍ട്ടര്‍ ഫൈനലില്‍ 21നു ജയിച്ച അര്‍ജന്റീനയുടെ രണ്ടു ഗോളുകളും മാറഡോണയായിരുന്നു അടിച്ചത്. അവയില്‍ രണ്ടാമത്തേതായിരുന്നു, ‘നൂറ്റാണ്ടിലെ ഏറ്റവും മനോഹരമായ ഗോള്‍’: ഇംഗ്ലണ്ടിന്റെ ഗോള്‍കീപ്പറുള്‍പ്പെടെയുള്ള അഞ്ചു കളിക്കാരെ വെട്ടിച്ചുകൊണ്ടായിരുന്നു, കളിയുടെ അമ്പത്തഞ്ചാം മിനിറ്റില്‍, മാറഡോണ ആ ഗോള്‍ ഇംഗ്ലണ്ടിന്റെ വലയില്‍ അടിച്ചു കയറ്റിയത്. ‘ഡ്രിബ്ലിംഗ് അറ്റ് ഇറ്റ്‌സ് ഗ്രേറ്റസ്റ്റ്!’ യൂട്യൂബില്‍ ഇതിന്റെ വീഡിയോ ഉണ്ട്. ഫുട്‌ബോള്‍ പ്രേമികള്‍ക്ക് അതെത്ര കണ്ടാലും മതിവരാനിടയില്ലാത്തതുകൊണ്ട് അതിന്റെ യൂ ആര്‍ എല്‍ താഴെക്കൊടുക്കുന്നു:

നാലുമിനിറ്റു മുമ്പു മാറഡോണ മറ്റൊരു ഗോളടിച്ചിരുന്നു. ഉയര്‍ന്നു വന്നൊരു പന്തിനു വേണ്ടി ഇംഗ്ലണ്ടിന്റെ ഗോള്‍കീപ്പര്‍ പീറ്റര്‍ ഷില്‍റ്റനും മാറഡോണയും ഒപ്പം ചാടി. ഷില്‍റ്റന്റെ കൈകള്‍ പന്തിലേയ്‌ക്കെത്തുന്നതിനു മുമ്പു മാറഡോണ പന്തിനെ കൈകൊണ്ടിടിച്ചു ഗോളാക്കി. ഹാന്റ് ബോളെന്നു വിധിയ്‌ക്കേണ്ടതിനു പകരം, അതു ഹെഡറായിരുന്നെന്ന ധാരണയില്‍, ടുണീഷ്യക്കാരനായ റഫറി, അലി ബിന്‍ നാസര്‍ ഗോളെന്നു വിധിച്ചു. കണ്ടുനിന്ന മാറഡോണയുടെ കൂട്ടുകാരാരും മാറഡോണയെ അഭിനന്ദിയ്ക്കാന്‍ ഓടിയെത്തിയില്ല. ‘വന്നെന്നെ ആശ്ലേഷിയ്ക്കൂ, അല്ലെങ്കില്‍ റഫറി ഗോളനുവദിയ്ക്കില്ല’ എന്നു കൂട്ടുകാരെ മാറഡോണ ആഹ്വാനം ചെയ്തു. കളിയ്ക്കു ശേഷം നടന്ന പത്രസമ്മേളനത്തില്‍ ‘ആ ഗോള്‍ അല്പം തല കൊണ്ടും, അല്പം ദൈവത്തിന്റെ കരം കൊണ്ടും’ ഉള്ളതായിരുന്നെന്നു മാറഡോണ വിശദീകരിച്ചു. അങ്ങനെയത് ‘ഹാന്റ് ഓഫ് ഗോഡ് ഗോള്‍’ ആയി അറിയപ്പെട്ടു. മാറഡോണയ്ക്കു വര്‍ഷങ്ങള്‍ വേണ്ടി വന്നു, കൈകൊണ്ടിടിച്ച കാര്യം തുറന്നു സമ്മതിയ്ക്കാന്‍. ഗോളായ ഉടന്‍ അതു ഹെഡറല്ല, ഹാന്റ് ബോളായിരുന്നെന്നു മാറഡോണ റഫറിയെ അറിയിച്ചിരുന്നെങ്കില്‍ ‘മനുഷ്യത്വം’ കളങ്കപ്പെടുത്താത്ത ‘ദൈവം’ തന്നെയായേനേ, മാറഡോണ.

‘ഫുട്‌ബോള്‍ദൈവ’ത്തിന്റേതില്‍ നിന്നു വ്യത്യസ്തനായിരുന്നു, നമ്മുടെ സ്വന്തം ‘ക്രിക്കറ്റ്‌ദൈവം’. സച്ചിന്‍ ടെണ്ടുല്‍ക്കറിന്റെ മാഹാത്മ്യം ഏകദിനങ്ങളില്‍ നിന്നു വാരിക്കൂട്ടിയ 18426 റണ്‍സിലോ നൂറു സെഞ്ചുറികളിലോ മാത്രം ഒതുങ്ങുന്ന ഒന്നല്ല. 2011ല്‍ ചെന്നൈയില്‍ വച്ചു വെസ്റ്റ് ഇന്‍ഡീസുമായി നടന്ന ഒരു കളിയില്‍, വെസ്റ്റ് ഇന്‍ഡീസിന്റെ രവി രാംപാല്‍ ബൌള്‍ ചെയ്ത പന്തു സച്ചിന്റെ ബാറ്റില്‍ നേരിയതായൊന്ന് ഉരസിയശേഷം വിക്കറ്റ്കീപ്പര്‍ ഡെവണ്‍ തോമസിന്റെ ഗ്ലൌസിലൊതുങ്ങി. പക്ഷേ, അമ്പയര്‍ സ്റ്റീവ് ഡേവിസ് നിഷേധാര്‍ത്ഥത്തില്‍ തല കുലുക്കി: ‘ഔട്ടല്ല’. പന്തു തന്റെ ബാറ്റിലുരസിയിരുന്നെന്ന് അറിയാമായിരുന്ന സച്ചിന്‍ അമ്പയറുടെ വിധിയെന്തെന്നു നോക്കുക പോലും ചെയ്യാതെ, സ്വന്തം മനസ്സാക്ഷിയുടെ വിധി മാനിച്ച്, കളിക്കളത്തിനു പുറത്തേയ്ക്കു നടന്നു കഴിഞ്ഞിരുന്നു.

ഇതു പോലുള്ളൊരു സന്ദര്‍ഭത്തില്‍ ആസ്‌ട്രേലിയന്‍ ക്യാപ്റ്റനായിരുന്ന റിക്കി പോണ്ടിംഗിന്റെ നിലപാടു സച്ചിന്റേതിനു നേര്‍വിപരീതമായിരുന്നു. ആസ്‌ട്രേലിയയും പാകിസ്ഥാനുമായി 2011ല്‍ നടന്ന കളിയായിരുന്നു അത്. പന്തു തന്റെ ബാറ്റില്‍ ഉരസിയിരുന്നെന്നു പോണ്ടിംഗിന് ഉറപ്പായിരുന്നു. പാകിസ്ഥാന്റെ വിക്കറ്റ്കീപ്പര്‍ കമ്രാന്‍ അക്മല്‍ ബോള്‍ പിടിച്ചെങ്കിലും പോണ്ടിംഗ് അനങ്ങിയില്ല. പോണ്ടിംഗ് ഔട്ടല്ലെന്നു അമ്പയര്‍ വിധിയ്ക്കുകയും ചെയ്തു. തെറ്റെന്നുറപ്പായിരുന്ന ആ വിധിയെ പാകിസ്ഥാന്‍ മൂന്നാം അമ്പയറെക്കൊണ്ടു പരിശോധിപ്പിച്ചു. പോണ്ടിംഗ് ഔട്ടാണെന്നു റീപ്ലേയില്‍ തെളിയുകയും ചെയ്തു. മൂന്നാം അമ്പയറുടെ വിധി വന്ന ശേഷമേ പോണ്ടിംഗ് പുറത്തേയ്ക്കു പോയുള്ളു.

കളിക്കളത്തില്‍ മാന്യത പുലര്‍ത്തുന്ന കാര്യത്തില്‍ ആസ്‌ട്രേലിയക്കാര്‍ക്കു വലിയ താത്പര്യമില്ല. അന്യടീമുകളിലെ കളിക്കാരെ ചീത്ത പറഞ്ഞു തളര്‍ത്തുന്നത് – സ്ലെഡ്ജിംഗ് അവരുടെ പതിവുമാണ്. ഈ ചീത്ത പറച്ചിലിനെ അവരുടെതന്നെ ക്യാപ്റ്റനായിരുന സ്റ്റീവ് വോ വിമര്‍ശിച്ചിരുന്നു. ആസ്‌ട്രേലിയക്കാര്‍ക്കിടയിലും മഹത്വത്തിന്റെ വെള്ളിരേഖയുണ്ടെന്നു വോയുടെ വിമര്‍ശനം തെളിയിച്ചു. മറ്റൊരു വെള്ളിരേഖ കൂടിയിതാ: 2003ലെ ലോകകപ്പിന്റെ സെമിഫൈനലില്‍ ആസ്‌ട്രേലിയയുടെ ആഡം ഗില്‍ക്രിസ്റ്റ് ശ്രീലങ്കയ്‌ക്കെതിരേ ബാറ്റു ചെയ്യുകയായിരുന്നു. അരവിന്ദ ഡിസില്‍വ ബൌള്‍ ചെയ്ത ഒരു പന്ത് ഗില്‍ക്രിസ്റ്റിന്റെ ബാറ്റിലുരസി. ശ്രീലങ്കന്‍ വിക്കറ്റ് കീപ്പര്‍ കുമാര്‍ സങ്കക്കാര കൃത്യമായി പന്തു പിടിച്ചു. ഗില്‍ക്രിസ്റ്റ് ഔട്ടല്ലെന്നു അമ്പയര്‍ റൂഡി കൊവേട്‌സന്‍ വിധിച്ചു. താന്‍ ഔട്ടാണെന്നു ബോദ്ധ്യമായിരുന്ന ഗില്‍ക്രിസ്റ്റ് ഇതിനകം നടന്നു കഴിഞ്ഞിരുന്നു, സച്ചിന്‍ ചെയ്ത പോലെ. മനസ്സാക്ഷിയുള്ളയാളായിരുന്നു ഗില്‍ക്രിസ്റ്റ്. അദ്ദേഹം ഇന്ത്യക്കാരിഷ്ടപ്പെടുന്ന ചുരുക്കം ചില ആസ്‌ട്രേലിയന്‍ കളിക്കാരില്‍ ഒരാളായിത്തീര്‍ന്നതില്‍ അതിശയമില്ല.

കര്‍ണാടകക്കാരനായ ജി ആര്‍ വിശ്വനാഥ് 91 ടെസ്റ്റുകളില്‍ നിന്നു 6080 റണ്ണുകള്‍ നേടിയിട്ടുണ്ട്. ടെസ്റ്റുകളില്‍ നിന്ന് ഏറ്റവുമധികം റണ്ണുകളെടുത്തിരിയ്ക്കുന്നവരുടെ ലിസ്റ്റില്‍ വിശ്വനാഥിനു ഒമ്പതാം സ്ഥാനം മാത്രം. പക്ഷേ, വിശ്വനാഥ് ഇന്ത്യയിലെ മാത്രമല്ല, ലോകക്രിക്കറ്റിലെത്തന്നെ ഏറ്റവും മാന്യനായ കളിക്കാരനായിരുന്നെന്നു പറയാനെനിയ്ക്കു മടിയില്ല. 197980 കാലഘട്ടത്തില്‍ രണ്ടു ടെസ്റ്റുകളില്‍ വിശ്വനാഥ് ക്യാപ്റ്റനായിരുന്നു. അവയിലൊന്ന്, 1980 ഫെബ്രുവരിയില്‍ മുംബൈയിലെ വാംഖേഡെ സ്റ്റേഡിയത്തില്‍ വച്ച് ഇംഗ്ലണ്ടുമായി നടന്ന ടെസ്റ്റായിരുന്നു. ഇയാന്‍ ബോഥമും ബോബ് ടെയ്‌ലറും ബാറ്റു ചെയ്തുകൊണ്ടിരിയ്‌ക്കെ, കപില്‍ ദേവിന്റെ ബൌളിംഗില്‍ വിക്കറ്റ് കീപ്പര്‍ കിര്‍മാണി ടെയ്‌ലറെ പിടിച്ച് ഔട്ടാക്കി. പക്ഷേ, പന്തു ബാറ്റിന്മേല്‍ സ്പര്‍ശിച്ചിരുന്നില്ലെന്നു ഫസ്റ്റ് സ്ലിപ്പില്‍ത്തന്നെ ഫീല്‍ഡു ചെയ്തിരുന്ന വിശ്വനാഥിന് ഉറപ്പായിരുന്നു. അദ്ദേഹം അക്കാര്യം അമ്പയര്‍ ഹനുമന്തറാവുവിനെ ഉടന്‍ ബോദ്ധ്യപ്പെടുത്തുകയും, ടെയ്‌ലര്‍ ഔട്ടായെന്ന വിധി തിരുത്തിയ്ക്കുകയും ചെയ്തു. പരാജയഭീതി കൂടാതെ മനസ്സാക്ഷിയുടെ ആഹ്വാനത്തെ ശ്രവിച്ചിരുന്നൊരു കളിക്കാരനായിരുന്നു, വിശ്വനാഥ്.

മാറഡോണ കൈകൊണ്ടിടിച്ചു നേടിയ ഗോള്‍ മൂലം അര്‍ജന്റീനയിലെ നാലരക്കോടി ജനത്തിന്റെ വിശ്വാസ്യതയ്ക്ക് അന്താരാഷ്ട്രവേദിയില്‍ കോട്ടം തട്ടി: ‘ഹാന്റ് ഓഫ് ഗോഡ് ഗോള്‍’ നേടിയ നാട്ടുകാര്‍! ഗില്‍ക്രിസ്റ്റിന്റെ സത്യസന്ധത ആസ്‌ട്രേലിയക്കാര്‍ക്ക് അഭിമാനകരമായിരുന്നെങ്കിലും, ആ അഭിമാനം പോണ്ടിംഗ് ഭാഗികമായെങ്കിലും നഷ്ടപ്പെടുത്തി. നമുക്കിവിടെ ദാരിദ്ര്യമുണ്ടെങ്കിലും, പതിനഞ്ചു ലക്ഷം കോടി രൂപയുടെ നികുതിവെട്ടിപ്പു നാം പ്രതിവര്‍ഷം നടത്തുന്നുണ്ടെന്നാണു കണക്കെങ്കിലും, സച്ചിന്റേയും വിശ്വനാഥിന്റേയും സദ്പ്രവൃത്തികള്‍ ഇന്ത്യയുടെ അഭിമാനമുയര്‍ത്തി. അന്താരാഷ്ട്രവേദികളില്‍ നാം സത്യസന്ധരാണെന്ന് ഇന്നു ലോകം ചെറുതായെങ്കിലും വിശ്വസിയ്ക്കുന്നുണ്ടാകും. ലക്ഷ്യത്തോളം തന്നെ മാര്‍ഗവും നമുക്കു പ്രധാനമാണ്. ലക്ഷ്യസാദ്ധ്യത്തിനു വേണ്ടി, വിജയത്തിനു വേണ്ടി നാം തെറ്റായ മാര്‍ഗങ്ങളില്‍ക്കൂടി ചരിയ്ക്കുകയില്ലെന്നു വിശ്വനാഥും സച്ചിനും തെളിയിച്ചു. ‘ബൈ ഹുക്ക് ഓര്‍ ക്രൂക്ക്’ എന്ന സമീപനം നമുക്കു വേണ്ട.

200607 കാലഘട്ടത്തില്‍ നമ്മുടെ ശ്രീശാന്ത് ഒന്നാന്തരമൊരു ബൌളറായിരുന്നു. ഇംഗ്ലണ്ടിനെതിരെ ഒരു ടെസ്റ്റില്‍ പത്തു വിക്കറ്റെടുത്ത ശ്രീശാന്തിന്റെ പ്രകടനം അവിസ്മരണീയമായിരുന്നു. സൌത്ത് ആഫ്രിക്കയെഅവരുടെ മണ്ണില്‍ വച്ച് ആദ്യമായി തോല്‍പ്പിച്ചതിന്റെ പിന്നിലും ശ്രീശാന്തുണ്ടായിരുന്നു. 2007ലെ ട്വെന്റിട്വെന്റി ലോകകപ്പിലും ശ്രീശാന്ത്, ഇടയ്ക്കിടെയെങ്കിലും, മിന്നുന്ന പ്രകടനം കാഴ്ച വച്ചു.

Chithram 1
(ചിത്രം 1)

ഇതൊക്കെയാണെങ്കിലും, ആവേശം കൂടിക്കഴിയുമ്പോള്‍ ശ്രീശാന്ത് പലപ്പോഴും നിയന്ത്രണം വിട്ടിരുന്നു. അപ്പീല്‍ ചെയ്യുമ്പോഴുള്ള രൌദ്രഭാവവും ശബ്ദകോലാഹലവും ശ്രീശാന്തിനു വിനയായി. വിക്കറ്റെടുത്ത ശേഷമുള്ള ഹാവഭാവാദികള്‍ അതിരു കടന്നതായി മാദ്ധ്യമങ്ങള്‍ അഭിപ്രായപ്പെട്ടു. വിദേശടീമുകളിലെ കളിക്കാരുമായി ഉണ്ടായ ഉരസലുകളും വിമര്‍ശിയ്ക്കപ്പെട്ടു.


(ചിത്രം 2)

കളിക്കളത്തിലെ വികാരവിക്ഷോഭങ്ങള്‍ക്കു കടിഞ്ഞാണിടാന്‍ കഴിയാത്ത ശ്രീശാന്തിനെ നിരോധിയ്ക്കണം എന്നു മുന്‍ ഇംഗ്ലണ്ട് ക്യാപ്റ്റന്‍ മൈക്ക് ആതര്‍ട്ടണ്‍ ആവശ്യപ്പെട്ടു. ശ്രീശാന്തിനു പിഴശിക്ഷയും താക്കീതും ഒന്നിലേറെത്തവണ നല്‍കപ്പെട്ടു. ശ്രീശാന്തിനെ വാത്സല്യത്തോടെ നോക്കിക്കണ്ടിരുന്ന മുതിര്‍ന്ന കേരളീയ വനിതകള്‍ പോലും ‘ചെക്കന് കുറെ കൂടിപ്പോണ് ണ്ട്’ എന്നു പറഞ്ഞു. വിക്കറ്റെടുത്തയുടനെ ബൌളര്‍ ആഹ്ലാദം പ്രകടിപ്പിയ്ക്കുന്നതു സാധാരണയാണ്. വീരരസവും ഒരു പരിധി വരെയാകാം. എന്നാല്‍, രൌദ്രവും ബീഭത്സവുമൊക്കെ അന്താരാഷ്ട്രവേദികളില്‍ സ്വീകാര്യമല്ലാത്ത ഭാവങ്ങള്‍ തന്നെ. ശ്രീശാന്ത് കളിക്കളത്തില്‍ സംയമനം പാലിച്ചിരുന്നെങ്കില്‍ വാതുവയ്പുകാരോടു സൌഹൃദം കാണിച്ചെന്ന ആരോപണത്തെത്തുടര്‍ന്നുണ്ടായ കഷ്ടപ്പാടുകളില്‍ അല്പം കൂടി സഹതാപം കിട്ടുമായിരുന്നു എന്നു തോന്നുന്നു. അന്താരാഷ്ട്രവേദികളില്‍ മാന്യത കൈവെടിയുന്നതു കളിക്കാരന്റെ രാഷ്ട്രത്തിനെതിരേയും പ്രതികൂലാഭിപ്രായം ഉയരാനിടയാക്കും.

മര്യാദക്കാരുടെ കളിയാണു ക്രിക്കറ്റ് എന്നായിരുന്നു മുന്‍കാലങ്ങളില്‍ പൊതുവിലുണ്ടായിരുന്ന ചിന്താഗതി. കഴിഞ്ഞ ഒന്നു രണ്ടു ദശാബ്ദങ്ങളായി ആ വീക്ഷണത്തിനു കാര്യമായ മാറ്റം സംഭവിച്ചിട്ടുണ്ട്. ചില വിദേശരാജ്യങ്ങളിലെ ഫുട്ബാള്‍ഭ്രാന്തന്മാരുടെ അക്രമപ്രവൃത്തികള്‍ ക്രിക്കറ്റ് പ്രേമികള്‍ ഇതുവരെ ആവര്‍ത്തിച്ച ചരിത്രമുണ്ടായിട്ടില്ലെങ്കിലും, ക്രിക്കറ്റ് മൈതാനമദ്ധ്യത്തിലെ സൌഹൃദത്തിനു ഏതാനും പതിറ്റാണ്ടുകളായി മങ്ങലേറ്റിട്ടുണ്ട്. എങ്കിലും, അതൊന്നും അല്പംപോലും ബാധിയ്ക്കാത്ത, മഹാനായൊരു ഇന്ത്യന്‍ കളിക്കാരനായിരുന്നു വര്‍ഷങ്ങള്‍ക്കു മുമ്പു കളി നിര്‍ത്തിയ രാഹുല്‍ ദ്രാവിഡ്. സെഞ്ചുറി നേടിക്കഴിഞ്ഞാല്‍ ആഹ്ലാദപ്രകടനമൊന്നുമില്ലാതെ, ബാറ്റ് അല്പമൊന്നുയര്‍ത്തി ദ്രാവിഡ് കാണികളെ അഭിവാദ്യംചെയ്യും; അത്ര മാത്രം. കോലാഹലങ്ങളൊന്നുമില്ലാതെ, ശാന്തമായി ബാറ്റു ചെയ്ത്, ടെസ്റ്റു മാച്ചുകളില്‍ നിന്ന് ഏറ്റവുമധികം റണ്ണുകളെടുത്ത ലോകത്തിലെ മൂന്നാമത്തെ ബാറ്റ്‌സ്മാനായിത്തീര്‍ന്നു ദ്രാവിഡ്.മിതഭാഷിയായ ദ്രാവിഡ് ഒരിയ്ക്കല്‍ പോലും പ്രകോപിതനായി കണ്ടിട്ടില്ല. ശാന്തത മുഖമുദ്രയായുള്ള സച്ചിനെ തെല്ലും വിസ്മരിച്ചുകൊണ്ടല്ല ഇതു പറയുന്നത്.


(ചിത്രം 3)

2011ല്‍ ദ്രാവിഡിന്റെ അവസാന ഏകദിനത്തില്‍ ദ്രാവിഡിനെ ബൌള്‍ ചെയ്തു പുറത്താക്കിയത് ഇംഗ്ലണ്ടിന്റെ ഗ്രേയിം സ്വാന്‍ ആയിരുന്നു. ദ്രാവിഡിന്റെ വിക്കറ്റു കിട്ടിയ ഉടനെ സ്വാന്‍ ആ സന്തോഷം ആഘോഷിയ്ക്കുകയല്ല, ദ്രാവിഡിന്റെ കൈ പിടിച്ചു കുലുക്കുകയാണു ചെയ്തത്. തുടര്‍ന്ന് ഇംഗ്ലണ്ടിന്റെ എല്ലാ കളിക്കാരും വരിയായി വന്ന്, ആദരപൂര്‍വ്വം ദ്രാവിഡിന്റെ കൈ പിടിച്ചു കുലുക്കി. അവരില്‍ ജൊനാഥന്‍ട്രോട്ട് ദ്രാവിഡിനോടുള്ള ആദരസൂചകമായി തൊപ്പി മാറ്റിയ ശേഷമാണു ദ്രാവിഡിന്റെ കൈ പിടിച്ചു കുലുക്കിയത്. ദ്രാവിഡിന് ഇംഗ്ലണ്ടില്‍ കിട്ടിയ ആദരവു കണ്ടുകൊണ്ടിരുന്ന ഭാരതീയരെയെല്ലാംവികാരഭരിതരാക്കിയിരുന്നിരിയ്ക്കണം, ആ രംഗം. രാഷ്ട്രങ്ങള്‍ തമ്മിലുള്ള ബന്ധം ഊട്ടിയുറപ്പിയ്ക്കാനും ക്രിക്കറ്റിനു കഴിയുമെന്നതിനു വേറെ തെളിവു വേണ്ട.

ഏകദേശം ഇന്ത്യയും പാകിസ്ഥാനും തമ്മിലെന്ന പോലെയാണ് ഇംഗ്ലണ്ടും ആസ്‌ട്രേലിയയും തമ്മിലുള്ള ‘ആഷസ്’ മത്സരപരമ്പര. ക്രിക്കറ്റിന്റെ കാര്യത്തില്‍ അവര്‍ ശത്രുക്കളാണ്. ഫുട്‌ബോളില്‍ പെലെയ്ക്കുള്ള പ്രശസ്തി ക്രിക്കറ്റില്‍ ആസ്‌ട്രേലിയക്കാരനായ ഡോണ്‍ ബ്രാഡ്മാനുണ്ട്. ബ്രാഡ്മാന്റെ കാലത്തു മുന്‍തൂക്കം ആസ്‌ട്രേലിയയ്ക്കായിരുന്നു. തോല്‍വികൊണ്ടു സഹികെട്ട ഇംഗ്ലണ്ടിന് ക്രൂരതന്ത്രങ്ങള്‍ പ്രയോഗിച്ചാണെങ്കില്‍പ്പോലും ആസ്‌ട്രേലിയയെ തോല്പിയ്ക്കണമെന്ന ത്വര അക്കാലത്തുണ്ടായി. ഇംഗ്ലണ്ടിന്റെ ക്യാപ്റ്റനായിരുന്ന ഡഗ്ലസ് ജാര്‍ഡീന്‍ ആയിരുന്നു അത്തരമൊരു തന്ത്രത്തിന്റെ ഉപജ്ഞാതാവ്. ടീമിലെ ബൌളറായിരുന്ന ഹാരോള്‍ഡ് ലാര്‍വുഡിനെക്കൊണ്ട് ആസ്‌ട്രേലിയന്‍ ബാറ്റ്‌സ്മാന്മാര്‍ക്കു പരിക്കേല്‍ക്കുന്ന തരത്തില്‍ പന്തെറിയിപ്പിച്ചു. ആസ്‌ട്രേലിയന്‍ കളിക്കാരില്‍ പലര്‍ക്കും പരിക്കു പറ്റി. ലാര്‍വുഡിന്റെ പന്തുകൊണ്ട് ആസ്‌ട്രേലിയന്‍ കളിക്കാരനായ ബെര്‍ട്ട് ഓള്‍ഡ്ഫീല്‍ഡിന്റെ തലയോടില്‍ പൊട്ടലുകളുണ്ടാകുക പോലും ചെയ്തു. ഈ ക്രൂരത കണ്ടു കുപിതരായ ആസ്‌ട്രേലിയന്‍ കാണികള്‍ കളിക്കളം കയ്യേറുന്നതു തടയാന്‍ വേണ്ടി പോലീസുകാര്‍ ബൌണ്ടറിയ്ക്കു ചുറ്റും നിരന്നു നിന്നു. ‘ബോഡിലൈന്‍ ബൌളിംഗ്’ എന്ന പേരില്‍ കുപ്രസിദ്ധമായിത്തീര്‍ന്ന, ക്രൂരമായ ആ പന്തേറ്, ബ്രിട്ടനും ആസ്‌ട്രേലിയയും തമ്മിലുള്ള ബന്ധങ്ങളെ പിടിച്ചുലയ്ക്കുകയും ചെയ്തു.

ലോകത്തില്‍ ഏറ്റവുമധികം ആരാധകരുള്ള ഫുട്‌ബോള്‍ ടീം ബ്രസീലിന്റേതായിരുന്നു. കഴിഞ്ഞ ലോകകപ്പു കഴിഞ്ഞപ്പോള്‍, ബ്രസീലിന് ഒട്ടേറെ ആരാധകര്‍ നഷ്ടമായിട്ടുണ്ടാകണം. സെമിഫൈനലില്‍ ജര്‍മ്മനിയ്‌ക്കെതിരേ 17 എന്ന ദയനീയ സ്‌കോറിനു ബ്രസീല്‍ നിലം പൊത്തിയതല്ല മുഖ്യകാരണം. ആ പരാജയം സങ്കടമുണ്ടാക്കി, സംശയമില്ല. പക്ഷേ, ബ്രസീലിനെതിരേ എനിയ്ക്കുള്ള പരാതി മറ്റൊന്നാണ്. ലോകകപ്പില്‍ ഏറ്റവുമധികം തവണ ഫെയര്‍ പ്ലേയ്ക്കുള്ള കപ്പു നേടിയിരിയ്ക്കുന്നതു ബ്രസീലാണ്: നാലു തവണ. ഫൌളുകള്‍ ഏറ്റവും കുറവുള്ള ടീം. ദയവുള്ള രാക്ഷസന്‍ ജെന്റില്‍ ജയന്റ് – എന്ന ചിത്രമാണു ബ്രസീലിനെപ്പറ്റി നമ്മുടെ മനസ്സിലുണ്ടായിരുന്നത്. എന്നാലിത്തവണ, ബ്രസീല്‍ സ്വന്തം ചിത്രത്തില്‍ കരി വാരിത്തേച്ചു: ഏറ്റവുമധികം ഫൌളുകള്‍ ചെയ്ത ടീമുകളിലൊന്നായിരുന്നു ബ്രസീല്‍. ഇതു തീരെ പ്രതീക്ഷിച്ചതല്ല. മുകളില്‍ സൂചിപ്പിച്ചതുപോലെ, അന്താരാഷ്ട്രവേദികളില്‍ ടീമുകള്‍ രാഷ്ട്രങ്ങളുടെ പ്രതിനിധികളാണ്. സ്വന്തം രാഷ്ട്രത്തിന്റെ സ്വഭാവം ഓരോ ടീമിലും പ്രതിഫലിയ്ക്കും. ഫെയര്‍ പ്ലേ അവാര്‍ഡു നേടാതിരുന്ന കഴിഞ്ഞ പതിറ്റാണ്ടിനിടയില്‍ ബ്രസീലിന്റെ രാഷ്ട്രസ്വഭാവത്തിന് അക്രമത്തിലേയ്‌ക്കൊരു ചായ്‌വുണ്ടായിരിയ്ക്കുന്നതായി ലോകം ധരിച്ചുപോയാല്‍ അതില്‍ തെറ്റു പറയാനാവില്ല.


(ചിത്രം 4)
റോജര്‍ മില്ല

അന്താരാഷ്ട്ര ഫുട്ബാള്‍ മത്സരങ്ങളില്‍ ഗോളടിച്ച ശേഷം കളിക്കാര്‍ നടത്തുന്ന ആഹ്ലാദപ്രകടനങ്ങള്‍ കാണാന്‍ രസമുള്ളവയാണ്. 1990ലെ ലോകകപ്പില്‍ റൊമേനിയയ്‌ക്കെതിരെ വിജയം നേടിയ കാമറൂണിന്റെരണ്ടു ഗോളുകളും നേടിയത് റോജര്‍ മില്ലയായിരുന്നു. ആ ടൂര്‍ണ്ണമെന്റില്‍ മില്ല ആകെ നാലു ഗോളുകള്‍ നേടി. ഓരോ ഗോളും നേടിയ ഉടനെ റോജര്‍ മില്ല കോര്‍ണര്‍ ഫ്‌ലാഗിനടുത്തേയ്‌ക്കോടുകയും, അതില്‍ പിടിച്ചുനിന്നുകൊണ്ട് നൃത്തം ചെയ്യുകയും ചെയ്തു. ഈ നൃത്തം അക്കാലത്തു വളരെ പ്രസിദ്ധമായിത്തീര്‍ന്നു, വളരെയധികം ആസ്വദിയ്ക്കപ്പെടുകയും ചെയ്തു.


(ചിത്രം 5)
മസിഞ്ഞോ, ബെബറ്റോ, റൊമാറിയോ (ബ്രസീല്‍)

ബ്രസീലിന്റെ റൊമാറിയോ ഗോളടിച്ചയുടനെ കാണികളുടെ മുമ്പില്‍ ചെന്നു നിന്നുകൊണ്ട് ഇരുകൈകളിലുംഒരു കുഞ്ഞിനെ താരാട്ട് ആട്ടുന്ന പോലെ അഭിനയിച്ചു കാണിച്ചിരുന്നു. ആവേശഭരിതരായ ബ്രസീലിന്റെ ആരാധകര്‍ എഴുന്നേറ്റു നിന്ന്, വലിയ ആരവത്തോടെ റൊമാറിയോയെ അനുകരിയ്ക്കുകയും ചെയ്യുമായിരുന്നു.


(ചിത്രം 6)
ജൂലിയസ് ആഘഹോവ (നൈജീരിയ)

കളിക്കളത്തില്‍ പല അഭ്യാസങ്ങളും കാണിയ്ക്കുന്നവരായിരുന്നു നൈജീരിയന്‍ കളിക്കാര്‍. അവരിലൊരാളായിരുന്നു, ജൂലിയസ് ആഘഹോവ. ഒരിയ്ക്കല്‍ ഗോളടിച്ചയുടനെയുള്ള ആഘോഷത്തിന്റെ ഭാഗമായി ആഘഹോവ പുറകോട്ടു തുടര്‍ച്ചയായി മലക്കം മറിഞ്ഞു; മറിഞ്ഞുമറിഞ്ഞങ്ങനെ പോയി! അത്ഭുതകരമായിരുന്ന ആ മലക്കം മറിയല്‍ കണ്ടു കാണികള്‍ ആര്‍ത്തുവിളിച്ചു. എത്ര അനായാസമായാണു ആഘഹോവ പുറകോട്ടു മലക്കം മറിഞ്ഞത്!

കളികള്‍ക്കിടയില്‍ ആഹ്ലാദകരമല്ലാത്ത സന്ദര്‍ഭങ്ങളും ഉണ്ടാകാറുണ്ട്. 2009ലെ യൂ എസ് ഓപ്പണ്‍ ടെന്നീസ് ടൂര്‍ണ്ണമെന്റിന്റെ സെമിഫൈനല്‍. സെറീന വില്യംസും കിം ക്ലൈസ്റ്റേഴ്‌സും തമ്മിലാണു ‘യുദ്ധം.’ പല പുരുഷന്മാരേക്കാളും ശക്തമായിടെന്നീസ് കളിയ്ക്കുന്ന വനിതകളാണിരുവരും. ഏയ്‌സുകളുതിര്‍ക്കാനും, തീപാറുന്ന ഫോര്‍ഹാന്‍ഡും ബാക്ക് ഹാന്‍ഡും ഷോട്ടുകള്‍ പായിയ്ക്കാനും കഴിവുള്ളവര്‍. രണ്ടു പേരും മികച്ച കളിക്കാര്‍. ആദ്യസെറ്റു ക്ലൈസ്റ്റേഴ്‌സ്എടുത്തു. രണ്ടാമത്തെ സെറ്റിലും ക്ലൈസ്റ്റേഴ്‌സു തന്നെ മുന്നിട്ടു നില്‍ക്കുന്നു. ക്ലൈസ്റ്റേഴ്‌സിനു ജയിയ്ക്കാന്‍ കേവലം ഒരു പോയിന്റു മാത്രം മതി. സെറീന സെര്‍വു ചെയ്യുന്നു. ടെന്നീസില്‍ സെര്‍വു ചെയ്യുമ്പോള്‍പാദം വരകളില്‍ സ്പര്‍ശിയ്ക്കാന്‍ പാടില്ല. സെറീനയുടെ പാദം വരയില്‍ സ്പര്‍ശിച്ചുപോയി. പുറകിലുണ്ടായിരുന്ന ലൈന്‍ ജഡ്ജ് (ലൈന്‍സ് വുമന്‍) സെര്‍വീസു തെറ്റെന്നു വിധിച്ചു. സെറീന കുപിതയായി ലൈന്‍ജഡ്ജിയുടെ നേരേ ചെന്ന്, എന്തൊക്കെയോ പറഞ്ഞു. ‘നിങ്ങളുടെ തൊണ്ടയില്‍ പന്തു കുത്തിയിറക്കും…’ എന്നു സെറീന ഭീഷണിപ്പെടുത്തിയെന്ന് ആ രംഗത്തിനു സാക്ഷ്യം വഹിച്ച ചില പത്രങ്ങള്‍ റിപ്പോര്‍ട്ടു ചെയ്തു. സെറീന പറഞ്ഞതില്‍ അസഭ്യവുമുണ്ടായിരുന്നുവത്രേ.


(ചിത്രം 7)
സെറീന വില്യംസ്, യു എസ് ഏ

അമ്പയര്‍ ലൈന്‍ ജഡ്ജിയെ വിളിച്ചു സംസാരിച്ചു. അതിനല്പം മുമ്പു റാക്കറ്റ് നിലത്തടിച്ചൊടിച്ചതിന് അമ്പയര്‍ സെറീനയെ താക്കീതു ചെയ്തിരുന്നു. രണ്ടാമതും കുറ്റം ചെയ്തതു കണക്കിലെടുത്ത്അമ്പയര്‍ പെനാല്‍റ്റിയായി ഒരു പോയിന്റു ക്ലൈസ്റ്റേഴ്‌സിനു നല്‍കി. ആ പോയിന്റു കിട്ടിയതോടെ ക്ലൈസ്റ്റേഴ്‌സ് വിജയിച്ചു. പിന്നീടു സെറീന പത്രങ്ങള്‍ക്കു നല്‍കിയ ഒരു പ്രസ്താവനയിലൂടെ, ചൈനീസ് വംശജയായിരുന്ന ലൈന്‍ജഡ്ജിയോടു ക്ഷമായാചനം ചെയ്‌തെങ്കിലും, ടെന്നീസ് പ്രേമികള്‍ക്കു സെറീനയോടുണ്ടായിരുന്ന ആരാധനയ്ക്കു വലുതായ ഇടിവു സംഭവിച്ചു. യു എസ് ടെന്നീസ് അസോസിയേഷന്‍ സെറീനയ്ക്ക് ഏകദേശം നാല്പത്തഞ്ചു ലക്ഷം രൂപയോളം വരുന്ന പിഴയും, രണ്ടു വര്‍ഷത്തെ ‘ടെന്നീസ് നല്ലനടപ്പും’ വിധിയ്ക്കുകയും ചെയ്തു.

പണ്ടേ തന്നെ, അമേരിക്കയിലെ ടെന്നീസു കളിക്കാരെപ്പറ്റി ലോകത്തിനു നല്ല അഭിപ്രായമില്ല. ജോണ്‍ മക്കെന്‍ റോയും ജിമ്മി കോണേഴ്‌സുമായിരുന്നു, അതിനുള്ള പ്രധാന കാരണം. കലഹപ്രിയരായിരുന്നു, ഇരുവരും. അസഭ്യവചനങ്ങളും അവരുച്ചരിയ്ക്കുമായിരുന്നു. അവരുണ്ടാക്കിയ ദുഷ്‌പേരു പില്‍ക്കാലത്തു വന്ന പീറ്റ് സാമ്പ്രസ്സും ആന്ദ്രെ ആഗസിയും ആന്‍ഡി റോഡിക്കും ഭാഗികമായെങ്കിലും നീക്കം ചെയ്തിരുന്നു. സെറീനയുടെ ചെയ്തി അമേരിക്കന്‍ കളിക്കാരുടെ ജനപ്രിയതയില്‍ വീണ്ടും ഇടിവു വരുത്തി.

ലോക ഒന്നാം നമ്പര്‍ ടെന്നീസ് താരമായിരുന്ന റഫേല്‍ നഡാല്‍ സ്‌പെയിന്‍കാരനാണ്. സ്‌പെയിനിന്റെ തലസ്ഥാനമായ മാഡ്രിഡില്‍ വച്ചു വര്‍ഷങ്ങള്‍ക്കു മുമ്പു റഫേല്‍ നഡാലും, ചെക് റിപ്പബ്ലിക്കുകാരനായ തോമസ് ബേര്‍ഡിച്ചും തമ്മിലുള്ള മത്സരം നടന്നു കൊണ്ടിരിയ്‌ക്കെ, നാട്ടുകാരനായ നഡാലിന്നു വേണ്ടി ആരവമുയര്‍ത്തിക്കൊണ്ടിരുന്ന കാണികളോടു നിശ്ശബ്ദരായിരിയ്ക്കാന്‍ ബേര്‍ഡിച്ച് ചുണ്ടത്തു വിരല്‍ വച്ച് ആവശ്യപ്പെട്ടു. അന്നു മുതല്‍ കാണികള്‍ക്കു ബേര്‍ഡിച്ചിനോടു താത്പര്യക്കുറവുണ്ട്. 2012ലെ ആസ്‌ട്രേല്യന്‍ ഓപ്പണില്‍ നഡാലിന്റെ നാട്ടുകാരനായ നിക്കൊളാസ്അല്‍മാഗ്രോവുമായി ബേര്‍ഡിച്ച് കളിച്ചു കൊണ്ടിരിയ്‌ക്കെ, അല്‍മാഗ്രോ ഓട്ടത്തിന്നിടയില്‍ അടിച്ച പന്ത് ബേര്‍ഡിച്ചിന്റെ ശരീരത്തില്‍ കൊള്ളുകയും, ബേര്‍ഡിച്ച് താഴെ വീഴുകയും ചെയ്തു. അല്‍മാഗ്രോ ഓടിച്ചെന്നുബേര്‍ഡിച്ചിനോടു ക്ഷമായാചനം ചെയ്‌തെങ്കിലും ബേര്‍ഡിച്ചിന്റെ പരിഭവം മാറിയില്ല.


(ചിത്രം 8)
അല്‍മാഗ്രോ (ഇടത്ത്), ബേര്‍ഡിച്ച്

കളിയില്‍ ബേര്‍ഡിച്ച് ജയിച്ചു. കളി കഴിയുമ്പോള്‍ കളിക്കാര്‍ പരസ്പരം കൈ പിടിച്ചു കുലുക്കുന്ന പതിവുണ്ട്. അതിനായിഅല്‍മാഗ്രോ കൈ നീട്ടിക്കൊണ്ടു ചെന്നെങ്കിലും, ബേര്‍ഡിച്ച് അതു നിരസിച്ചു. കാണികള്‍ ബേര്‍ഡിച്ചിനെ കൂവിവിളിച്ചു. തുടര്‍ന്നു നടന്ന അഭിമുഖത്തില്‍, ‘കോര്‍ട്ടില്‍ ധാരാളം സ്ഥലം ഒഴിഞ്ഞു കിടന്നിരുന്നു,എന്നിട്ടും അങ്ങോട്ടൊന്നും അടിയ്ക്കാതെ അല്‍മാഗ്രോ എന്റെ ശരീരത്തെത്തന്നെ, മനപ്പൂര്‍വ്വം ലക്ഷ്യമാക്കി’ എന്നു ബേര്‍ഡിച്ച് പരാതിപ്പെട്ടു. അതും കാണികളുടെ അപ്രീതിയ്ക്കിടയാക്കി. അന്നു മുതല്‍ബേര്‍ഡിച്ചിനു വേണ്ടി കരഘോഷം മുഴക്കുന്നവരുടെ എണ്ണം വളരെക്കുറഞ്ഞു.

ഇതൊക്കെയാണെങ്കിലും, എതിരാളി മികച്ച കളി പുറത്തെടുക്കുമ്പോള്‍ കാണികളോടൊപ്പം ഇടയ്‌ക്കെങ്കിലും കരഘോഷം മുഴക്കുന്ന ഒരു കളിക്കാരനെങ്കിലും അന്താരാഷ്ട്ര ടെന്നീസിലുണ്ട്: സെര്‍ബിയയില്‍നിന്നുള്ള, ഇപ്പോഴത്തെ ലോക ഒന്നാം നമ്പര്‍ താരമായ നൊവാക് ജ്യോക്കോവിച്ച്. 2009ലെ യൂ എസ് ഓപ്പണിന്റെ ക്വാര്‍ട്ടര്‍ ഫൈനലില്‍ റോജര്‍ ഫെഡററുമായി കളിയ്ക്കുമ്പോള്‍, ജ്യോക്കോവിച്ച് ഫെഡററുടെ ശിരസ്സിനു മുകളിലൂടെകോര്‍ട്ടിന്റെ പുറകിലേയ്ക്കു പന്തു ലോബ് ചെയ്തു. പന്തെടുക്കാന്‍ വേണ്ടി ഫെഡറര്‍ പുറംതിരിഞ്ഞോടുകയും, ഓട്ടത്തിന്നിടയില്‍ത്തന്നെ കാലുകള്‍ക്കിടയിലൂടെ, അതിവിദഗ്ദ്ധമായി ആ പന്തു മടക്കിയടിയ്ക്കുകയും ചെയ്തു. നെറ്റിന്നടുത്തേയ്ക്കു വന്നു കഴിഞ്ഞിരുന്ന ജ്യോക്കോവിച്ചിനു സ്പര്‍ശിയ്ക്കാന്‍ പോലും പറ്റാത്ത അകലത്തില്‍ ആ പന്തു വീഴുകയും, ആ പോയിന്റു ഫെഡറര്‍ക്കു ലഭിയ്ക്കുകയും ചെയ്തു. സ്തബ്ധനായിപ്പോയ ജ്യോക്കോവിച്ച്, എഴുന്നേറ്റു നിന്നു കരഘോഷം മുഴക്കിക്കൊണ്ടിരുന്ന കാണികളോടൊപ്പം ചേര്‍ന്ന്, മടി കൂടാതെ കൈയടിച്ചു. എതിരാളികളെ അഭിനന്ദിയ്ക്കുന്ന ഇത്തരം കളിക്കാര്‍ അന്താരാഷ്ട്ര ടെന്നീസില്‍ വിരളമാണ്.


(ചിത്രം 9)
ജ്യോക്കോവിച്ച്, ഫെഡറര്‍

ഒരു പോയിന്റു നേടിയ ഉടന്‍ എതിരാളിയുടെ നേരെ മുഷ്ടി ചുരുട്ടി അലറുന്നവര്‍ അന്താരാഷ്ട്ര ടെന്നീസില്‍ മാത്രമല്ല, ഷട്ടില്‍ ബാഡ്മിന്റണിലുമുണ്ട്. ഷട്ടിലിലെ മിക്ക ചൈനീസ് കളിക്കാരും, വനിതകളുള്‍പ്പെടെ, ഈ അലറല്‍നടത്താറുണ്ട്. പലപ്പോഴും അത് അരോചകവുമാണ്. ഇന്ത്യന്‍ കളിക്കാര്‍ ഇക്കാര്യത്തില്‍ ഭേദമാണ്. പ്രകാശ് പഡുകോണും വിമല്‍കുമാറും ഗോപീചന്ദുമൊന്നും അങ്ങനെ ചെയ്തു കണ്ടിട്ടില്ല. ഇന്നിപ്പോള്‍മുന്‍പന്തിയിലുള്ള കെ ശ്രീകാന്ത്, പി കശ്യപ്, മലയാളിയായ എച്ച് എസ് പ്രണോയ്, അജയ് ജയറാം, സായി പ്രണീത് എന്നിവരൊന്നും അത്തരം രൌദ്രഭാവം പ്രകടിപ്പിച്ചു കാണാറില്ല. നമ്മുടെ വനിതകളുടെ കാര്യവും വ്യത്യസ്തമല്ല. ലോകറാങ്കിംഗില്‍ രണ്ടാം സ്ഥാനത്തുള്ള സൈന നെഹ്‌വാളും, പതിമൂന്നാം സ്ഥാനത്തുള്ള പി വി സിന്ധുവും രൌദ്രഭാവം പ്രകടിപ്പിയ്ക്കാതെയാണു കളിയ്ക്കാറ്. എന്നിരുന്നാലും അന്താരാഷ്ട്രതലത്തില്‍ ഷട്ടില്‍ ബാഡ്മിന്റണ്‍ കളിക്കാര്‍ പൊതുവില്‍ വിനയം പ്രകടിപ്പിച്ചു കാണാറില്ല. അതുകൊണ്ട്, അവരില്‍ നിന്നു വേറിട്ട, തികച്ചും വ്യത്യസ്തയായ ഒരു കളിക്കാരിയെപ്പറ്റിപ്പറയാം.


(ചിത്രം 10)
റെച്ചനോക്ക്, വാങ്ങ് ഷിക്‌സിയാന്‍

തായ്‌ലന്റുകാരിയായ റെച്ചനോക്ക് ഇന്തനോണ്‍ ആണ്, ആ കളിക്കാരി. ലോക ഏഴാം നമ്പര്‍ താരം. 2010ല്‍ മലേഷ്യയില്‍ നടന്ന ലോക ജൂനിയര്‍ ചാമ്പ്യന്‍ഷിപ്പില്‍ 14 വയസ്സു മാത്രംപ്രായമുള്ളപ്പോള്‍ കപ്പു നേടി. രണ്ടു തവണ കൂടി റെച്ചനോക്ക് ആ കപ്പു നേടി. ആകെ പത്ത് അന്താരാഷ്ട്ര ടൂര്‍ണമെന്റുകളില്‍ റെച്ചനോക്ക് ഇതിനകം വിജയിയായിട്ടുണ്ട്. സൈന നെഹ്‌വാളും റച്ചനോക്കും തമ്മില്‍ പത്തു തവണ ഏറ്റുമുട്ടിയിട്ടുണ്ട്. ആറു തവണ സൈനയും നാലു തവണ റെച്ചനോക്കും വിജയിച്ചിട്ടുണ്ട്. ദിവസങ്ങള്‍ക്കു മുമ്പു നടന്ന ഫ്രെഞ്ച് ഓപ്പന്‍ ക്വാര്‍ട്ടര്‍ ഫൈനലില്‍ റെച്ചനോക്കിനായിരുന്നു വിജയം. പക്ഷേ, സെമിയില്‍ ചൈനയുടെ വാങ്ങ് ഷിക്‌സിയാനോടു പരാജയപ്പെട്ടു. മുകളിലെ ചിത്രത്തില്‍, തൊഴുന്ന റെച്ചനോക്കിനെ നോക്കിനില്‍ക്കുന്നതു വാങ്ങ് ആണ്. 20 വയസ്സു മാത്രം പ്രായമായ റെച്ചനോക്ക് മുന്നോട്ടു പൊയ്‌ക്കൊണ്ടിരിയ്ക്കുകയാണെന്ന കാര്യത്തില്‍ സംശയമില്ല.


(ചിത്രം 11)

ഷട്ടില്‍കോക്കു തരുന്ന ഒഫീഷ്യലിനെ റെച്ചനോക്ക് ഇരുകൈയും കൂപ്പി, വിനയത്തോടെ തൊഴുന്നതു കണ്ടപ്പോള്‍ റെച്ചനോക്കിനെ അതിനു പ്രേരിപ്പിച്ച തായ്‌ലന്റിനെപ്പറ്റി കൂടുതലറിയാന്‍ താത്പര്യം തോന്നി. കൈകൂപ്പിത്തൊഴല്‍ ഭാരതത്തിനു മാത്രംസ്വന്തമായുള്ളൊരു വിനയപ്രകടനമാണെന്നായിരുന്നു അതുവരെയുണ്ടായിരുന്ന വിശ്വാസം. ആ വിശ്വാസം റെച്ചനോക്കു തിരുത്തി. ഭാരതത്തിലെപ്പോലെ തന്നെ തായ്‌ലന്റിലും പരസ്പരം അഭിവാദ്യം ചെയ്യുന്നതു തൊഴുതുകൊണ്ടാണെന്നു വിക്കിപ്പീഡിയ പറയുന്നു. തായ് ഭാഷയില്‍ ഇതിനു ‘വായ്’ എന്നു പറയുന്നു. ഭാരതത്തിന്റെ അഞ്ജലീമുദ്രയില്‍ നിന്ന് ഉരുത്തിരിഞ്ഞുണ്ടായതാണു വായ്. തൊഴുമ്പോള്‍ അവര്‍ ‘സവാസ്ദീ’ എന്നുപറയുക കൂടി ചെയ്യുന്നുണ്ടത്രേ. സംസ്‌കൃതത്തിലെ സ്വസ്തിയില്‍ നിന്നുണ്ടായതാണു സവാസ്ദീ. ബുദ്ധമതത്തിനും അതില്‍ പങ്കുണ്ട്. തായ്‌ലന്റിലെ ജനതയുടെ 94 ശതമാനവും ബുദ്ധമതാനുയായികളാണ്. തായ്‌ലന്റില്‍മാത്രമല്ല ഈ തൊഴല്‍ നിലവിലുള്ളത്. ഇന്തൊനേഷ്യ, ലാവോസ്, കമ്പോഡിയ, മലേഷ്യ, ബ്രൂണൈ, എന്നീ രാജ്യങ്ങളിലും സമാനമായ അഭിവാദ്യം നിലവിലുണ്ട്. 4000 വര്‍ഷങ്ങള്‍ക്കു മുമ്പ്,സിന്ധുനദീതടത്തിലാണു ‘നമസ്‌തേ’ ഉത്ഭവിച്ചതെന്നും വിക്കിപ്പീഡിയ പറയുന്നു.

ആരാധനാലയങ്ങള്‍ക്കുള്ളിലെ പതിവു മാറ്റിനിര്‍ത്തിയാല്‍, കൈകൂപ്പി പരസ്പരം അഭിവാദ്യം ചെയ്യുന്ന പതിവ്, ‘നമസ്‌തേ’യ്ക്കു ജന്മം കൊടുത്ത ഭാരതത്തില്‍പ്പെട്ട സാക്ഷരകേരളത്തില്‍ വേരറ്റു പോയെന്നാണു തോന്നുന്നത്. തെരഞ്ഞെടുപ്പുകാലത്തൊഴികെ, ഈപതിവു കേരളത്തില്‍ അന്യംനിന്നുകഴിഞ്ഞുവെന്നു വേണം പറയാന്‍. പണ്ടു ദില്ലി ദൂരദര്‍ശന്‍ സംപ്രേഷണം ചെയ്തിരുന്ന ഹിന്ദി സീരിയലുകളില്‍ ആദരപൂര്‍വം ‘നമസ്‌തേ’ പറയുന്നതും, മുതിര്‍ന്നവരുടെ പാദം സ്പര്‍ശിയ്ക്കുന്നതുമെല്ലാം കാണാറുണ്ടായിരുന്നു. ചില ഹിന്ദി സീരിയലുകളില്‍ ഇപ്പോഴുമവ, വിരളമായെങ്കിലും, കാണാറുണ്ട്. ഹിന്ദി സീരിയലുകളിലെ പല കുനുഷ്ടുകളും വക്രതകളും മലയാളം സീരിയലുകളിലേയ്ക്കും പകര്‍ത്തിയിട്ടുണ്ടെങ്കിലും, നമസ്‌തേയും പാദസ്പര്‍ശവും മലയാളസീരിയല്‍ സംവിധായകര്‍ കണ്ട മട്ടില്ല.

കൈകള്‍ നെഞ്ചോടു ചേര്‍ത്തു കൂപ്പി, ശിരസ്സല്പം കുനിച്ച്, വിനയപൂര്‍വം ‘നമസ്‌തേ’: ‘നിങ്ങള്‍ക്കു പ്രണാമം’. രാഷ്ട്രത്തിന്റെ അഭിമാനമായി നാം കരുതാറുള്ള നമ്മുടെ ക്രിക്കറ്റ് ടീം ഒരിയ്ക്കല്‍ പോലും കാണികളെ ഇങ്ങനെ, വിനയത്തോടെ കൈകൂപ്പി അഭിവാദ്യം ചെയ്യുന്നതായി കണ്ടിട്ടില്ല. കളിക്കളത്തിലേയ്ക്കു പ്രവേശിയ്ക്കുമ്പോഴും കളിക്കളത്തില്‍ നിന്നു പുറത്തേയ്ക്കുപോകുമ്പോഴും നമ്മുടെ ടീമംഗങ്ങള്‍ പ്രേക്ഷകരുടെ നേരേ വിനയത്തോടെ കൈകൂപ്പിയിരുന്നെങ്കില്‍ എത്ര നന്നായേനേ! അതു കൈകൂപ്പല്‍ പ്രചരിയ്ക്കാനുള്ള പ്രചോദനവും തുടക്കവുമായേനേ. നെഞ്ചില്‍ കൈവയ്ക്കാന്‍ഉപദേശിച്ചതിനു പകരം, വിനയത്തോടെ കൈകൂപ്പാന്‍ ആഹ്വാനം ചെയ്യാമായിരുന്നു, ശശി തരൂരിന്. ഭാരതാംബയ്ക്കു സല്യൂട്ടിനേക്കാളിഷ്ടം കൈകൂപ്പി വണങ്ങലായിരുന്നേനേ, തീര്‍ച്ച.

വിനയത്തോടെ ശിരസ്സുകുനിച്ചു തൊഴുതുകൊണ്ടു പരസ്പരം ആദരവു പ്രകടിപ്പിയ്ക്കുന്ന പതിവു ജനമദ്ധ്യത്തില്‍ നിന്ന് അപ്രത്യക്ഷമായിക്കൊണ്ടിരിയ്ക്കുകയാണോ!


(ചിത്രം 12)

Write Your Valuable Comments Below