Share The Article

Women’s Garden എന്ന പേജിൽ ഷെയർ ചെയ്ത പോസ്റ്റ്

പത്രക്കുറിപ്പ്
സാമൂഹ്യ മാധ്യമങ്ങളിലെ ചതിക്കുഴികളില്‍ വീഴാതിരിക്കാന്‍ കുട്ടികളും രക്ഷകര്‍ത്താക്കളും ശ്രദ്ധിക്കാന്‍ കോട്ടയം ജിലാ പോലിസ് മേധാവി ഹരിശങ്കര്‍ ഐ പി എസ് നല്‍കുന്ന മുന്നറിയിപ്പ്

ഓപ്പറേഷന്‍ ഗുരുകുലം പദ്ധതിയുടെ ഭാഗമായി അടുത്തിടെ റിപ്പോര്‍ട്ട് ചെയ്യപ്പെട്ട നിരവധി സംഭവങ്ങളുടെ വെളിച്ചത്തില്‍ സാമൂഹ്യ മാധ്യമങ്ങളുടെ വര്‍ണ്ണ പൊലിമയില്‍ ആകൃഷ്ടരായി ഈയാം പാറ്റകളെ പോലെ സ്വജീവിതം നഷ്ടപ്പെടുത്തുന്ന കുമാരീകുമാരന്മാര്‍ക്ക് എന്താണ് സംഭവിച്ചത്. സമൂഹ്യമാധ്യമങ്ങളും കമ്പ്യൂട്ടറും ഉപയോഗിക്കുമ്പോള്‍ എന്തെല്ലാം ശ്രദ്ധിക്കണം. കഴിഞ്ഞ ദിവസം പിടിയിലായ ജിന്സു തന്റെ ഇരകളായ പെണ്‍കുട്ടികളുടെ വീട് തന്നെയാണ് പീഡനത്തിനായി ഉപയോഗിച്ചിരുന്നത്. പെണ്‍കുട്ടികളുടെ കയ്യില്‍നിന്നും സ്വര്‍ണ്ണാഭരണങ്ങളും പണവും കൈപ്പറ്റുന്ന കാമുകന്മാരുടെ എണ്ണം പെരുകിക്കൊണ്ടിരിക്കുകയാണ്. കോട്ടയം ടൌണില്‍ കഴിഞ്ഞ ദിവസം കോളേജ് കുമാരനായ കാമുകന്‍ കാമുകിയുടെ കരണത്ത് പല പ്രാവശ്യം ആഞ്ഞടിച്ചത് കണ്ടുനിന്ന ഒരാള്‍ ഗുരുകുലം ടീമിനെ അറിയിക്കുകയുണ്ടായി. അന്വേഷിച്ച പോലീസിനോട് കാമുകന്റെ ചോദ്യം അടി കൊണ്ടയാള്‍ക്ക് പരാതി ഇല്ലെങ്കില്‍ നിങ്ങള്‍ക്കെന്താ പരാതി. സ്വന്തം അച്ഛന്‍ ഇതുവരെ തല്ലിയിട്ടില്ലാത്ത പെണ്‍കുട്ടി എന്തിനാണ് കാമുകനെ ഭയപ്പെട്ട് എന്റെ മുഖത്ത് തലോടുക മാത്രമാണ് കാമുകന്‍ ചെയ്തത് എന്ന് പറഞ്ഞത്.

1. വിദ്യാര്‍ഥികളായ കുട്ടികള്‍ക്ക് ഒരു കാരണവശാലും മൊബൈല്‍ ഫോണ്‍ വാങ്ങി നല്‍കരുത്.
2. അത്യാവശ്യം രക്ഷിതാക്കളുടെ മൊബൈല്‍ ഫോണ്‍ നല്‍കാം. രക്ഷിതാക്കളുടെ സാമീപ്യത്തില്‍ മാത്രം.
3. പെണ്‍കുട്ടികള്‍ കൂട്ടുകാരായ പെണ്‍കുട്ടികളുടെ പേരില്‍ സേവ് ചെയ്തിരിക്കുന്ന നമ്പരുകള്‍ അവരുടേത് തന്നെ ആണെന്ന് ഉറപ്പു വരുത്തുക.
4. അലാറം വയ്ക്കാന്‍ രക്ഷിതാക്കളുടെ മൊബൈല്‍ ഫോണുകള്‍ കുട്ടികള്‍ക്ക് നല്‍കേണ്ടതില്ല. കുറഞ്ഞ ചിലവില്‍ ഒരു അലാറം വാങ്ങി നല്‍കുക.
5. രക്ഷിതാക്കള്‍ അറിയാതെ കുട്ടികള്‍ ഫേസ് ബുക്ക്‌, ഇന്‍സ്റ്റാ ഗ്രാം അക്കൗണ്ട്‌ തുടങ്ങിയവ ഉണ്ടാക്കുന്നില്ല എന്ന് ഉറപ്പു വരുത്തുക. ഫ്രണ്ട്സ് ലിസ്റ്റ് പരിശോധിക്കുക. പരിചയമില്ലാത്തവര്‍ ഫ്രണ്ട് ലിസ്റ്റില്‍ ഇല്ല എന്ന് ഉറപ്പു വരുത്തുക. മെസന്ജ്ജറിലെ ചാറ്റുകള്‍ ഇടയ്ക്കിടെ പരിശോധിക്കുക.
6. കുട്ടികള്‍ അറിയാതെ തന്നെ അവരുടെ ബാഗുകള്‍ അലമാരകള്‍ എന്നിവ ഇടയ്ക്കിടെ പരിശോധിക്കുക.
7. പെണ്‍കുട്ടികളുടെ ചിത്രങ്ങള്‍ ഫേസ് ബുക്കിലും വാട്സ് ആപ്പിലും ഉപയോഗിക്കുന്ന പ്രവണത നിരുത്സാഹപ്പെടുത്തുക.
8. തന്റെ കൂടെ സെല്‍ഫി എടുക്കാന്‍ ശ്രമിക്കുന്ന ആണ്‍കുട്ടിയെ പ്രോത്സാഹിപ്പിക്കേണ്ടതില്ല എന്ന് പെണ്‍കുട്ടിയെ പറഞ്ഞു ബോധ്യപ്പെടുത്തുക. കഴിഞ്ഞ ദിവസം 27 ലധികം പെണ്‍കുട്ടികളെ ദുരുപയോഗം ചെയ്ത ജിന്സു ഫേസ് ബൂക്കിലൂടെ പരിചയപ്പെട്ട പെണ്‍കുട്ടിയെ സ്വാധീനിച്ച് സ്കൂളിനടുത്ത് വരികയും ഒരു സെല്‍ഫി എടുക്കുകയും ചെയ്തു. വൈകുന്നേരമായപ്പോള്‍ ഫോണില്‍ വിളിച്ച് ഒന്നിച്ചു നില്‍ക്കുന്ന സെല്‍ഫി ഫേസ് ബുക്കില്‍ ഇടുമെന്നും അല്ലെങ്കില്‍ നഗ്നഫോട്ടോ അയച്ചു നല്‍കണമെന്നും പറഞ്ഞു ഭീഷണിപ്പെടുത്തി. പേടിച്ചരണ്ട പെണ്‍കുട്ടി നഗ്നഫോട്ടോ അയച്ചു നല്‍കി. തുടര്‍ന്ന് നഗനഫോട്ടോ പരസ്യപ്പെടുത്തുമെന്നും ഇന്റര്‍നെറ്റില്‍ അപ്പ്‌ ലോഡ് ചെയ്യും ഇല്ലെങ്കില്‍ രാത്രി വീട്ടില്‍ വരാന്‍ സമ്മതിക്കണം എന്നും തുടര്‍ന്ന് ഭീഷണിപ്പെടുത്തി വിദ്യാര്‍ഥിനിയുടെ വീട്ടില്‍ എത്തിയ ഇയാള്‍ ഭീഷണിപ്പെടുത്തി ലൈംഗിക ബന്ധത്തില്‍ ഏര്‍പ്പെടുകയും വീഡിയോയില്‍ പകര്‍ത്തുകയും ചെയ്തു. പിന്നീട് നിരവധി തവണ ഭീഷണി ആവര്‍ത്തിക്കുകയും പലപ്രാവശ്യം രാത്രി വീട്ടില്‍ ചെല്ലുകയും ചെയ്തു.
9. രാത്രികാലങ്ങളില്‍ വീടിനു പുറത്തേയ്ക്കുള്ള വാതിലുകള്‍ പൂട്ടി താക്കോലുകള്‍ രക്ഷിതാക്കള്‍ സൂക്ഷിക്കുക.
10. അസൈന്‍മെന്റുകള്‍, നോട്ടുകള്‍ എന്നിവ വാട്സ്അപ്പ് വഴി കൂട്ടുകാര്‍ അയച്ചു നല്‍കുന്നതും കൂട്ടുകാര്‍ക്ക് അയച്ചു കൊടുക്കുന്നതും പ്രോത്സാഹിപ്പിക്കേണ്ടതില്ല.
11. രക്ഷിതാക്കളുടെ മൊബൈല്‍ ഫോണുകളുടെ ലോക്ക് പാറ്റെണ്‍ , പാസ്‌ വേര്‍ഡ്‌ എന്നിവ കുട്ടികള്‍ക്ക് നല്‍കാതിരിക്കുക. ആവശ്യമുള്ളപ്പോള്‍ അവര്‍ കാണാതെ തന്നെ അണ്‍ ലോക്ക് ചെയ്ത് നല്‍കുകയും ചെയ്യുക.
12. കുട്ടികളുടെ സാധാരണ പെരുമാറ്റത്തില്‍ നിന്നും വ്യത്യസ്തമായി എന്തെങ്കിലും കാണപ്പെട്ടാല്‍ അവരെ സൂക്ഷ്മമായി നിരീക്ഷിക്കുകയും കാരണം കണ്ടെത്താന്‍ ശ്രമിക്കുകയും ചെയ്യുക
13. കുട്ടികളുടെ മുന്‍പില്‍ വച്ച് രക്ഷിതാക്കള്‍ വഴക്കിടാതിരിക്കുക. ഒരാള്‍ ശാസിക്കുമ്പോള്‍ മറ്റൊരാള്‍ ഇടപെടാതിരിക്കുക. അഭിപ്രായ വ്യത്യാസം ഉണ്ടെങ്കില്‍ പങ്കാളി മാത്രമുള്ളപ്പോള്‍ തെറ്റ് ചൂണ്ടിക്കാണിക്കുക. രക്ഷിതാക്കളുടെ ഇടയിലുള്ള മാനസീകമായ വിയോജിപ്പ് കണ്ടെത്തി കുട്ടികള്‍ അത് ചൂഷണം ചെയ്യാന്‍ സാധ്യത ഉണ്ട്.
14. തങ്ങളുടെ നഗ്ന ഫോട്ടോ ചോദിക്കുന്ന ഒരാളുടെയും ഉദ്ദേശം നന്നല്ല എന്ന് പെണ്‍കുട്ടികളെ പറഞ്ഞ് ബോധ്യപ്പെടുത്തുക
15. നല്ല സ്പര്‍ശത്തിന്‍റെയും മോശം സ്പര്‍ശത്തിന്റെയും അര്‍ത്ഥം പെണ്‍കുട്ടികളെ മനസ്സിലാക്കി കൊടുക്കുക.
16. മാതാവും പിതാവും ഒന്നിച്ചിരുന്ന് കുട്ടിക്ക് സ്ത്രീ പുരുഷ ലൈഗികതയെ കുറിച്ച് വ്യക്തമായ ധാരണ ഉണ്ടാക്കി നല്‍കുക.
മദ്യം മയക്കുമരുന്ന് എന്നിവ ഉപയോഗിക്കുന്ന കുട്ടികളെ കുറിച്ചും ലൈഗിക ചൂഷണങ്ങള്‍ക്ക് വിധേയരായിക്കൊണ്ടിരിക്കുന്ന പെണ്‍കുട്ടികളെ കുറിച്ചും വിവരം ലഭിച്ചാല്‍ ആയവരെ ഈ വിപത്തുകളില്‍ നിന്നും രക്ഷിക്കുന്നതിനും പുനരധിവാസം നടത്തുന്നതിനും ഗുരുകുലം ടീം സദാ സന്നദ്ധരായി പ്രവര്‍ത്തിച്ചുകൊണ്ടിരിക്കുന്നു. ജിലാ പോലിസ് മേധാവിയുടെ കീഴില്‍ ഡെപ്യൂട്ടി സൂപ്രണ്ട് ഓഫ് പോലിസ് (അഡ്മിന്‍ )കോട്ടയം വിനോദ് പിള്ള നോഡല്‍ ഓഫീസറായും , ഡെപ്യൂട്ടി സൂപ്രണ്ട് ഓഫ് പോലിസ് കോട്ടയം ആര്‍ ശ്രീകുമാര്‍ ഓപ്പറെഷനല്‍ ഹെഡ് ആയുമാണ് കോട്ടയം ജില്ലയില്‍ ഈ പദ്ധതി പ്രവര്‍ത്തിക്കുന്നത്. ഇത്തരത്തില്‍ ചൂഷണം ചെയ്യപ്പെടുന്ന കുട്ടികളെ കുറിച്ചുള്ള വിവരങ്ങള്‍ ലഭിക്കുന്ന പക്ഷം കോട്ടയം ഡി വൈ എസ് പി ഓഫീസിലെ 0481-2564103 എന്ന നമ്പരിലേയ്ക്കോ കോട്ടയം ഡി വൈ എസ് പിയുടെ 9497990050 , ഡെപ്യൂട്ടി സൂപ്രണ്ട് ഓഫ് പോലിസ് (അഡ്മിന്‍ )കോട്ടയം 9497990045, ഓപ്പറേഷന്‍ ഗുരുകുലത്തിന്റെ കോ- ഓര്‍ഡിനേറ്റര്‍മായ കോട്ടയം ഡി വൈ എസ് പി ഓഫീസിലെ സീനിയര്‍ സിവില്‍ പോലിസ് ഓഫീസര്‍ അരുണ്‍ കുമാര്‍ കെ. ആര്‍ ന്റെ 9447267739 , വനിതാ സിവില്‍ പോലിസ് ഓഫീസര്‍ മിനിമോള്‍ കെ. എം ന്റെ 9497931888 എന്നീ നമ്പരുകളിലേയ്ക്ക് ഏതൊരാള്‍ക്കും വിവരങ്ങള്‍ നല്‍കാവുന്നതാണ്.

  • 19
    Shares
ടീം ബൂലോകം. നിങ്ങള്‍ക്കും എഴുതാം, Boolokam.com - ല്‍. നിങ്ങളുടെ ബ്ലോഗിങ്ങ് അഭിരുചി പുറം ലോകം കാണട്ടെ.