Share The Article

(ഇപ്പോഴത്തെ കുട്ടികള്‍ അങ്ങനെയാ………….)

വൃശ്ചിക മാസത്തോടറ്റുക്കുമ്പോള്‍ കാലാവസ്ഥയില്‍ വരുന്ന മാറ്റം ഈയുള്ളവനില്‍ അല്പംചില ആരോഗ്യപ്രശ്‌നങ്ങള്‍ ഉണ്ടാക്കാറുണ്ട്. അത് വരാതിരിക്കാന്‍ എന്തെങ്കിലും മുന്‍ കരുതലുകള്‍ എടുക്കണമെന്ന് എല്ലാ വര്‍ഷവും വിചാരിക്കും. ഓരോ വര്‍ഷവും ഈ സമയത്ത് എന്തെങ്കിലും ശാരീരികാസ്വസ്ഥതകള്‍ വന്നുകൂടുമ്പോള്‍ മാത്രമാകും വൃശ്ചികമാസമായി എന്ന് മനസിലാകുക. സാധാരണ ഒരു മൂക്കടപ്പും ജലദോദോഷവും തൊണ്ടയില്‍ ഒരു തരം കിരുകിരുപ്പുമൊക്കെയായിട്ടാണ് ഈ ‘വൃശ്ചികമാസത്തിലെ അസ്വസ്ഥത’ കടന്നുവരിക. ഇത്തവണ പക്ഷെ അത് ജലദോഷമായിട്ടല്ല, അല്പം കൂടി കടുത്ത ചില പ്രതികരണങ്ങളാണ് ശരീരത്തിലുണ്ടാക്കിയത്. ഒരു ദിവസം തിരുവനന്തപുരത്ത് ഒരു പരിപാടി കഴിഞ്ഞ് ബസിലിരുന്ന് കാറ്റും തണുപ്പുമൊക്കെക്കൊണ്ട് രാത്രി ഏറെ ഇരുട്ടി വീട്ടില്‍ വന്നു കിടന്നതിന്റെ അന്നാണ് ഇത്തവണത്തെ ദേഹാസ്വാസ്ഥ്യം പ്രകടമായത്. വല്ല്‌ലാത്തൊരു ശരീര വേദനയും മറ്റും. ശരീരം ഒരുമാതിരി വറട്ടിയെടുക്കുന്നതുപോലെയും. പക്ഷെ ഇത് കാലാവസ്ഥയിലെ മാറ്റം കൊണ്ടാണെന്നോ വൃശ്ചികമാസത്തിലെ അസ്വസ്ഥതയാണെന്നോ മനസിലായില്ല. പിന്നെയും രണ്ടുമൂന്നു ദിവസം കഴിഞ്ഞിട്ടാണ് അത് മനസിലായത്.

പറഞ്ഞതുപോലെ ഇത്തവണ ചെറിയൊരു ജലദോഷമായല്ല, ചുണ്ടിനടുത്ത് രണ്ട് കുരുക്കള്‍, ഞരമ്പുകളടക്കം ശരീരമാസകലം പടരുന്നപോലത്തെ ഒരു വേദന, വയറില്‍ ഒരു വല്ലാത്ത നൊമ്പലം, വയറു മുടക്ക്, മൂക്കിലും തൊണ്ടയിലുമൊക്കെ അല്പമാത്രം കിരുകിരുപ്പ്, പനിയുടെ ചില സൂചനകള്‍ അങ്ങനെ പലപല രോഗലക്ഷണങ്ങള്‍ ഒരുമിച്ച് ബാധിച്ചു. ഇതൊന്നും സഹിക്കാന്‍ കഴിയുന്നതിനപ്പുറം ആയിട്ടില്ലെങ്കിലും ചെറുതായി ഒന്നു പേടിപ്പെടുത്തുന്നുണ്ട്. ഒന്നു രണ്ടു ദിവസമായി വീട്ടില്‍ ഇടവിട്ടിടവിട്ട് കിടന്ന് റെസ്റ്റ് എടുക്കുകയാണ്. കുറച്ചു ദിവസം കൂടി ഈ ബെഡ് റെസ്റ്റും ചെയര്‍ റെസ്റ്റും നീട്ടേണ്ടി വരുമെന്നു തോന്നുന്നു. നാട്ടിലാകെ മഞ്ഞക്കാമല പടര്‍ന്നു പിടിക്കുന്നതായി ഇതിനകം മനസിലാക്കാന്‍ കഴിഞ്ഞിരുന്നു. അതുകൊണ്ട് ആ വഴിയ്ക്ക് ഒരു ഉല്‍ക്കണ്ഠ പിടി കൂടാതിരുന്നില്ല. കഴിഞ്ഞ ദിവസം സുഹൃത്തായ അമ്പുവിനെയും കൊണ്ട് അടുത്തുള്ള ഒരു സ്വകാര്യ മെഡിക്കല്‍ കോളേജ് ആശുപത്രിയില്‍ ചെന്നപ്പോള്‍ ഡോക്ടര്‍ ഷേണായി നമ്മുടെ പ്രദേശത്തുനിന്ന് പലരും മഞ്ഞക്കാമല ബാധിച്ച് അവിടെ ആ ആശുപത്രിയില്‍ എത്തിയിട്ടുള്ളതായി പറയുകയും മഞ്ഞക്കാമല ഈ പ്രദേശങ്ങളില്‍ വ്യാപകമാകുന്നതായി ഉല്‍ക്കണ്ഠ പ്രകടിപ്പിക്കുകയും ചെയ്തിരുന്നു. വെള്ളത്തില്‍ നിന്നുണ്ടാകുന്ന മഞ്ഞല്‍ക്കാമലയാണെന്നും ഡോക്ടര്‍ പറഞ്ഞു. ഞാന്‍ അപ്പോള്‍ നമ്മുടെ അറിവില്‍ നമ്മുടെ വീടുകള്‍ക്കടുത്തൊന്നും ഈ രോഗം ആര്‍ക്കെങ്കിലും വന്നാതായി അറിയില്ലെന്നാണ് പറഞ്ഞത്.

എന്നാല്‍ അതിനുശേഷം അമ്പുവിനു ചില ടെസ്റ്റുകളൊക്കെ നടത്താന്‍ ആശുപത്രിയില്‍ കറങ്ങി നടക്കുമ്പോഴുണ്ട് നമ്മുടെ പരിസരത്തൊക്കെയുള്ള പലരും അവിടെ അഡ്മിറ്റാണെന്ന് അറിഞ്ഞു. ഒരാളെ കയറി കാണുമ്പോള്‍ തൊട്ടടുത്തും സമീപ വാര്‍ഡുകളിലും ഒക്കെ പരിചയക്കാരും നാട്ടുകാരുമായ പലരും കിടക്കുന്നു. മിക്കവര്‍ക്കും മഞ്ഞക്കാമല. ഈ രോഗം കൂടുതലായി ബാധിച്ചത് നമ്മുടെ അടുത്ത പ്രദേശത്ത് കൊല്ലം ജില്ലയില്‍ ഉള്‍പ്പെടുന്ന ചില പ്രദേശങ്ങളിലാണ്. പ്രത്യേകിച്ചും നിലമേല്‍ പ്രദേശം. തിരുവനന്തപുരംകൊല്ലം ജില്ലകള്‍ അതിര്‍ത്തി പങ്കിടുന്ന സ്ഥലമാണ് നമ്മുടെ വാസസ്ഥലം. നിലമേല്‍ ജംഗ്ഷനിലുള്ള ഒരു കിണര്‍ ആരോഗ്യ വകുപ്പ് അധികൃതര്‍ വന്ന് പരിശോധിച്ച് അടച്ചിട്ട് സീലും വച്ചു പോയതായും പിന്നീടറിഞ്ഞു. ആ കിണറില്‍ നിന്നായിരുന്നു ചില ഹോട്ടലുകളില്‍ വെള്ളം എടുത്തിരുന്നത്. തട്ടത്തുമലയിലും പലര്‍ക്കും ഈ രോഗം ഉണ്ടായി പല ആശുപത്രികളില്‍ ആയി. പോരാത്തതിന് കാലാവസ്ഥാ വ്യതിയാനം കൊണ്ടുണ്ടാകുന്ന മറ്റ് ചില അല്ലറ ചില്ലറ രോഗങ്ങളും.

എന്തായാലും ഞാന്‍ രണ്ടു ദിവസമായി ആശുപത്രിയില്‍ പോകണോ പോകണ്ടെയോ, ഇന്നു പോകണോ നാളെ പോകണോ മറ്റന്നാള്‍ പോകണമോ എന്ന ആലോചനയില്‍ വീട്ടില്‍ വിശ്രമത്തിലും അല്പംചില സ്വന്തം ചികിത്സകളിലുമാണ്. സ്വന്തം മരുന്നുകളൊക്കെ അവനവന്റെ ശരീരത്തില്‍ തന്നെ പരീക്ഷിക്കുന്നതാണല്ലോ അതിന്റെ ഒരു മര്യാദ! സ്വയം കുറിപ്പടി എഴുതിനല്‍കി വാങ്ങിയ പാരസൈറ്റാമോള്‍, വയറിന്റെ ഐശ്വര്യത്തിന് ഉപ്പും പഞ്ചസാരയുമിട്ട ചൂടുവെള്ളംകുടി, കട്ടന്‍ ചായയില്‍ നാരങ്ങാ പിഴിഞ്ഞൊഴിച്ച് കഴിക്കല്‍, ഗ്ലൂക്കോസു കലക്കിക്കുടിക്കല്‍ , ആവി പിടിയ്ക്കല്‍, കിടപ്പ്, എഴുന്നേല്‍ക്കല്‍ ഇങ്ങനെയൊക്കെയാണ് സ്വയംചികിത്സ. അയ്യുര്‍വ്വേദവും അലോപ്പതിയും ഹോമിയോയും ഒക്കെക്കൂടി സമം ചേര്‍ത്ത ഒരു സ്വയംചികിത്സാ പദ്ധതിയാണിത്. പേറ്റെന്റൊന്നും ഇല്ല. പാരമ്പര്യമായി പകര്‍ന്നുകിട്ടിയ നാട്ടറിവുകളാണ്. ആര്‍ക്കും പരീക്ഷിക്കാം. സ്വയം ചികിത്സയായതുകൊണ്ട് അസുഖം കുറഞ്ഞതായി തോന്നാതിരിക്കാന്‍ പറ്റില്ലല്ലോ. അതുകൊണ്ട് അല്പം ആശ്വാസമുണ്ടെന്ന് സ്വയം മനസിനെക്കൊണ്ട് സമ്മതിപ്പിച്ച് കഴിയുകയായിരുന്നു.

അങ്ങനെ ഇന്ന് ( 2011 നവംബര്‍ 12) സന്ധ്യകഴിഞ്ഞും അല്പം കിടപ്പിന്റെ സുഖം അനുഭവിച്ചുകൊണ്ട് കിടക്കുമ്പോള്‍ സന്ധ്യ ഇരുട്ടുന്ന സമയത്ത് വീട്ടിനു മുമ്പില്‍ റോഡില്‍ ചില അടിയും വിളിയുമൊക്കെ കേട്ട് ചാടിയെഴുന്നേറ്റു. കാര്യം എനിക്ക് പിടികിട്ടിയിരുന്നു. റോഡില്‍വച്ച് ഒരു പാമ്പിനെക്കണ്ട് അതിനെ ആരോ നിഷ്‌കരുണം അടിച്ചു കൊല്ലുകയാണ്. പല ദിവസവും എന്റെ കണ്ണുവെട്ടിച്ച് കടന്നുകളഞ്ഞ ആ പാമ്പ് തന്നെയാകണം. എന്റെ കൈകൊണ്ട് സമാധാനപരമായി തല്ലും തലോടലും ഏറ്റ് സുഖമായി മരിക്കാനായിരുന്നില്ല അതിന്റെ വിധി; കണ്ണില്‍കണ്ട നാട്ടുകാരുടെ കൂട്ടത്തല്ലുകൊണ്ട് കിടന്ന് പുളഞ്ഞ് മരിക്കാനായിരുന്നു! ഏതായാലും ഞാന്‍ ഉടന്‍ തന്നെ ടോര്‍ച്ചുമെടുത്ത് അങ്ങോട്ടേയ്ക്കു കുതിച്ചു. അപ്പോള്‍ ഒരു ആട്ടോയില്‍ വരികയായിരുന്ന നമ്മുടെ നാട്ടുകാര്‍തന്നെയായ സുരേഷും ആട്ടോെ്രെഡവര്‍ ബാബുവും കൂടി സംയുക്തമായി പാമ്പിനെ അടിച്ച് ചതച്ച് മുക്കാലും കൊന്നിരുന്നു.

ഒന്നു രണ്ട് മൂര്‍ഖന്‍പാമ്പിനെ ഈ ഭാഗത്തു നിന്ന് അടുത്തിടെ തന്നെ അടിച്ചു കൊന്നിട്ടുള്ളതാണ്. അവര്‍ ഇവിടെ കൂട്ടു കുടുംബമായി കഴിയുന്നുണ്ട്. രണ്ടുവട്ടം റോഡില്‍ വച്ച് ഒരു കൂറ്റാനെ കാണുകയും കമ്പും കൊല വിളിയുമായി നമ്മള്‍ എത്തുമ്പോഴേയ്ക്കും അതി വിദഗ്ദ്ധമായി രക്ഷപ്പെടുകയും ചെയ്തിരുന്നു. ആ സാധനം തന്നെയാകണം ഇത. പക്ഷെ ഇത് വേറെ ഒരു ഒന്നൊന്നാംതരം സാധനം.ചേനത്തണ്ടനാണെന്നാണ് ആദ്യം കരുതിയത്. എന്നാല്‍ സാക്ഷാല്‍ അണലിയാണ് ചത്തു മലച്ച് കിടക്കുന്നതെന്ന് പിന്നെ സ്ഥിരീകരിച്ചു. ആദ്യം നടന്നുവന്ന ഒരു യാത്രക്കാരനും തൊട്ടു പുറകേ വന്ന ഒരു ആട്ടോ റിക്ഷയ്ക്കും കുറുക്കുവയ്ക്കുകയായിരുന്നു ഈ പാമ്പ് കൂറ്റന്‍ (അതോ കൂറ്റാത്തിയോ). നടയാത്രക്കാരന്‍ പേടിച്ച് പിന്നോട്ടോടി. ആട്ടോ നിര്‍ത്തി അതില്‍ വാന്നിരുന്നവര്‍ സുരേഷും ആട്ടോ െ്രെഡവര്‍ ബാബുവും കൂടിയാണ് സാധനത്തിനെ വകവരുത്തിയത്. ചുറ്റുമുള്ള ആളുകളും അതു വഴി പോയ വാഹനങ്ങള്‍ നിര്‍ത്തി അവയിലെ യാത്രക്കാരുമൊക്കെ ആരവത്തോടെ ആ അണലിയ്ക്ക് ആദരാഞ്ജലികള്‍ അര്‍പ്പിച്ചു കടന്നുപോയി.

ഇതിനിടയില്‍ അവനെ ഒന്നു കുഴിച്ചിടാന്‍ ഞാന്‍ പോയി മണ്‍ വെട്ടിയെടുത്തുകൊണ്ടുവന്നു. അത് ഊരിപോയതിനാല്‍ കുന്താലി എടുത്തുകൊണ്ടു വരാന്‍ ഞാന്‍ അവിടെ ഉണ്ടായിരുന്ന അടുത്ത വീട്ടിലെ ഒരു എട്ടാം ക്ലാസ്സുകാരന്‍ പയ്യനോട് പറഞ്ഞു. അവന്‍ ‘ഒരു മിനുട്ട് പ്ലീസ്’ എന്നു പറഞ്ഞ് ഓടികയറിയത് അവന്റെ വീട്ടിലേയ്ക്ക്. ഞാന്‍ കരുതി അവിടെ നിന്ന് കുന്താലി എടുക്കാനായിരിക്കുമെന്ന്! അല്ല, അവന്‍ ക്യാമറാമൊബൈല്‍ എടുക്കാന്‍ പോയതാണ്. എന്നിട്ട് പിന്നെ നമ്മുടെ വീട്ടില്‍ കയറി കുന്താലിയുമായി വന്നു. അപ്പോഴേയ്ക്കും ‘വണ്‍ മിനുട്ട് പ്ലീസ്’ എന്നും പറഞ്ഞ് അടുത്ത വീട്ടിലെ സഹോദരങ്ങളായ ഒരു നാലാം ക്ലാസ്സുകാരിയും, ഒരു പ്ലസ്ടൂക്കാരിയും വീഡിയോയും സ്റ്റില്ലും ഒക്കെ എടുക്കാന്‍ അവരവരുടെ മൊബെയില്‍ ഫോണുകളുമായി രക്ഷകര്‍ത്താക്കളെയും കൂട്ടി എത്തുകയായി. പിന്നെ അടുത്ത വേറെയും ചില വീടുകളില്‍ നിന്ന് ഒരു കുട്ടിപ്പടതന്നെ ഇറങ്ങിവന്നു. എല്ലാവരുടെ കൈയ്യിലും മൊബെയിലുകള്‍! ഇപ്പോഴത്തെ കുട്ടികള്‍ അങ്ങനെയാ!

പിന്നെ ചില മുതിര്‍ന്നവരും കുട്ടികളെ അനുകരിക്കുവാനായി അവരുടെ മൊബെയിലുകള്‍ കൈയ്യിലെടുത്തു. അതുവഴി വന്ന് നിര്‍ത്തിയ ഏതാനും ആട്ടോകള്‍ ബൈക്കുകള്‍, കാറുകള്‍ എന്നിവയില്‍ ഒരു അട്ടൊയുടെയും ഒരു ബൈക്കിന്റെയും ലൈറ്റുകള്‍ പാമ്പിനുനേരേ തെളിച്ചു. ഒപ്പം ഞാനടക്കം ചിലര്‍ തങ്ങളുടെ ടോര്‍ച്ചുകളും പാമ്പിനോടടുത്ത് നിന്ന് തെളിച്ചുകൊടുത്തു. പാമ്പിനെ അടിച്ചുകൊന്ന സുരേഷ് അതിനെ കമ്പിനു കുത്തിയെടുത്തും തറയില്‍ തിരിച്ചും മറിച്ചും ഇട്ടും കുട്ടികളുടെ നിര്‍ദ്ദേശങ്ങള്‍ അനുസരിച്ച് ഷൂട്ടിംഗ് വിജയിപ്പിച്ചു. ശേഷം ഇതെല്ലാം ഒരാഘോഷമാക്കിയ സുരേഷ്തന്നെ റോഡരികില്‍ കുന്താലിക്ക് ഒരു ചെറുകുഴിയെടുത്ത് വന്‍ജനാവലിയുടെയും അവരില്‍ ചിലരുടെ ആചാര വെടികളുടെയും (കമന്റുകള്‍) അകമ്പടിയോടെ അണലിയുടെ മൃതുദേഹം സംസ്‌കരിച്ചു.