മീറ്റ് അനിമൽസ് അസംബിൾ – Meat Animals Assemble

37

മനുഷ്യൻ ഭക്ഷണത്തിനായി ഉപയോഗിക്കുന്ന മൃഗങ്ങൾ ഒത്തുകൂടിയിരിക്കുകയാണ്. അവർ രൂപീകരിച്ച സംഘടനയുടെ ഭാരവാഹികൾ സംസാരിച്ചു തുടങ്ങി

പശു : ക്ഷണം സ്വീകരിച്ചു എത്തിയ കാളക്കും, എരുമയ്ക്കും, പോത്തിനും, ഒട്ടകത്തിനും, കോഴിക്കും നന്ദി.

കേട്ടപാടെ മുറുമുറുത്തുകൊണ്ടു പോത്ത് : മനുഷ്യൻ ഭക്ഷണത്തിനായി ഉപയോഗിക്കുന്ന മൃഗങ്ങളുടെ കൂട്ടായ്മ അല്ലെ ഇത്.
ഇവിടെ എന്താ ഈ ഒട്ടകത്തിന് കാര്യം?

മറുപടി ഒട്ടകം തന്നെ പറഞ്ഞു : ചില പഹയന്മാര് ഞമ്മളേം ഫ്രൈ അടിക്കാറുണ്ട്. എന്തിന്, ഞമ്മടെ പുള്ളാരേം വിടാറില്ല.
അങ്ങനെ സഹികെട്ട് ഈ സംഘടനയിൽ എത്തിയതാണ്.

എരുമ : അല്ലേലും ഈ പോത്തിന്‍റെ ചെവിയിൽ വേദം ഓതിയിട്ട് ഒരു കാര്യവും ഇല്ല. നിങ്ങൾ ചർച്ചയിലേക്ക് വാ.

പശു : ഇന്ത്യക്കു സ്വാതന്ത്ര്യം ലഭിച്ചിട്ടു വർഷം 70 ആയി. ഇപ്പോഴും ഇവിടുത്തെ മനുഷ്യർക്കേ സ്വാതന്ത്ര്യം ഉള്ളു.
നമ്മൾ മൃഗങ്ങൾ അസ്വസ്ഥരാണ്, ഇപ്പോഴും അടിമത്വത്തിലാണ്.

കാള : നമ്മൾ കഷ്ടപ്പെട്ടു അവർക്കു നൽകുന്നത് കൃഷി-വിളവ്-നൂറുമേനി.
തിരിച്ചു അവർ നമുക്ക് തരുന്നതോ, പിണ്ണാക്ക്-കാടിവെള്ളം-പഴത്തൊലി.

എരുമ : ആനകളെ കൊണ്ട് അവര്‍ തടിമില്ലിൽ തടി എടുപ്പിക്കുന്നു, അമ്പലത്തിൽ തിടമ്പ് ഏറ്റുന്നു. ഈ ആനകൾ പിന്നീട്…

പോത്ത് വീണ്ടും വട്ടം ഉടക്കി : ആനമൊട്ട ! മനുഷ്യർ തിന്നുന്ന മൃഗങ്ങളുടെ കാര്യം പറയണം മിസ്റ്റർ…

ഇതിനു മറുപടി പറഞ്ഞത് കോഴിയാണ് : മനുഷ്യർ തിന്നുന്ന മൃഗങ്ങളുടെ കാര്യമേ പറയാവൂ അല്ലേ…
അങ്ങനെ എങ്കിൽ കൂടുതൽ മൃഗങ്ങൾ ഇവിടെ എത്തേണ്ടതല്ലേ… പന്നി എവിടെ, ആട് എവിടേഡോ പാപ്പാനെ…

പശു : അങ്കമാലി ഡയറീസ് എന്ന സിനിമയുടെ നൂറാം ദിന ആഘോഷങ്ങളുടെ ഭാഗമായി അങ്കമാലിയിലുണ്ട് പന്നി.
ആട് 2 എന്ന സിനിമയുടെ ചിത്രീകരണവുമായി ബന്ധപ്പെട്ടു ഇടുക്കിയിലാണ് ആട്. ടൈറ്റ് ഷെഡ്യൂൾ ആയതിനാൽ വരാനാകില്ല എന്ന് ഇവർ നേരത്തെ തന്നെ സംഘടനയെ അറിയിച്ചിരുന്നു.

കോഴി : സിനിമാക്കാരുടെ ഇത്തരം താര ജാടകൾ നമ്മൾ വെച്ചുപൊറുപ്പിക്കാതിരിക്കുക.

എരുമ : ചർച്ചയിലേക്ക് തിരിച്ചു വരൂ.

പശു : ഒരു ആഴ്ച മുൻപ് നമ്മുടെ സങ്കടങ്ങളും ആവശ്യങ്ങളും ട്വിറ്ററിലൂടെ ഭരണാധികാരിയെ നമ്മൾ അറിയിച്ചിരുന്നു.
ഏകദേശം ഒരു മണിക്കൂറിനുള്ളിൽ തന്നെ ആവശ്യങ്ങൾ അംഗീകരിച്ചു, വേണ്ട നടപടികൾ കൈക്കൊള്ളും എന്ന് റിപ്ലൈ വന്നു.
അതിന്‍റെ ഫലമായി വന്ന പുതിയ നിയമങ്ങൾ നിങ്ങൾ പത്രങ്ങളിലൂടെ അറിഞ്ഞുകാണുമല്ലോ ?

എരുമ : ഇല്ല…

കാള : എടോ… പശു, കാള, എരുമ, പോത്ത്, ഒട്ടകം… ഈ മൃഗങ്ങളുടെ കശാപ്പു സർക്കാർ നിരോധിച്ചു എന്ന്…

അപ്പോൾ സദസ്സിൽ കയ്യടികൾ മുഴങ്ങി…
കേട്ടപാടെ മുറുമുറുത്തുകൊണ്ടു വീണ്ടും പോത്ത് എത്തി : സംഭവം കൊള്ളാം, പക്ഷെ ഈ ഒട്ടകം എങ്ങനെ ലിസ്റ്റിൽ കേറി ?
സത്യം പറയെടാ, നിനക്ക് റിസർവേഷൻ ഇല്ലേ… നീ ഏതാ ജാതി.

ഒട്ടകം : ജാതിയാ ? നീ അത് വിട്ടു പിടി. ഞമ്മക്ക് ഡൽഹിയില് മാത്രമല്ലാ, അങ്ങ് ഗൾഫിൽ വരെ ഉണ്ടെടാ പിടി.

പെട്ടന്നു അതാ ഒരു വശത്തുനിന്നു ഒരു കരച്ചിൽ കേട്ടു.
പ്രാണവേദനയെന്നപോലെ വലിയ വായിൽ കരയുകയാണ് കോഴി

എരുമ : നീ പക്ഷിയായത് കൊണ്ടല്ലേടാ ഈ ലിസ്റ്റിൽ കയറാത്തെ… സമാധാനിക്ക്…

കോഴി : ഉണ്ട… നിങ്ങളെപോലെ ഞാനും നടക്കും, ഓടും… പക്ഷെ മൃഗമല്ല, വേണേൽ നീന്തും… പക്ഷെ മീനല്ലാ…
ചിറകു വീശി പറന്നാൽ പാകിസ്ഥാൻ വിട്ട റോക്കറ്റ് പോലെ പൊരപ്പുറത്തു വന്നു വീഴും.
എന്നിട്ടും ഞാൻ പക്ഷിയായി. എന്ത് വിരോധാഭാസം ആണിത് !

പശു : നിന്‍റെ പേര് ലിസ്റ്റിൽ ഇല്ലാത്തതിനു ഞങ്ങൾ എന്ത് ചെയ്യാനാ ?

കോഴി : താൻ വലിയ വർത്താനം ഒന്നും പറയേണ്ട… തനിക്കു കേന്ദ്രത്തിലും സ്വാമിമാരുടെയും ഇടയിൽ വലിയ പിടിയില്ലേ…
അങ്ങനെ അല്ലെടോ താൻ ആ ലിസ്റ്റിൽ കയറിക്കൂടിയത്…

പശു : സ്വാമിമാരുമായി നിനക്കുമില്ലെടാ കോഴീ ബന്ധം. നിങ്ങൾ കേട്ടിട്ടില്ലേ ‘ചുട്ട കോഴിയെ പറപ്പിക്കുന്ന സ്വാമി എന്നൊക്കെ’

കോഴി : ചുട്ടു കഴിഞ്ഞിട്ട് പറന്നിട്ടെന്തിനാടാ പട്ടി !

പശു : പട്ടിയെന്നോ, മര്യാദക്ക് സംസാരിക്കണം !

മനുഷ്യൻ ഭക്ഷിക്കുന്ന മൃഗങ്ങളുടെ ഉന്നമനത്തിനായി രൂപീകരിച്ച സംഘടനയിൽ അങ്ങനെ തർക്കം മൂക്കുകയാണ്.

കോഴി ‘കശാപ്പു ഫ്രീ’ ലിസ്റ്റിൽ ഉൾപ്പെടുമോ ?
മുറുമുറുപ്പുമായി പോത്ത് വീണ്ടും എത്തുമോ ?
പശു എങ്ങനെയായിരിക്കും ഈ തർക്കത്തിന് തടയിടുന്നത് ?

ഇതെല്ലാം അറിയാൻ Meat Animals Assemble 2 – The Conclusion’നായി കാത്തിരിക്കുക…

(തുടരും)

ഫെജോ | FEJO
@officialFejo
#MeatAnimalsAssemble

Write Your Valuable Comments Below