29 Shares 251 Views

കുഞ്ഞുങ്ങള്‍ക്കെന്താണ് ഇത്ര ഭംഗി?

why-kids-are-this-much-beautiful

ലോകത്ത് എല്ലാ മനുഷ്യരും ഏതെങ്കിലും സൌന്ദര്യസങ്കല്‍പ്പത്തില്‍ ഒന്നിക്കുന്നു എങ്കില്‍ അത് ഒരേ ഒരു കാര്യത്തിലാണ്- കുഞ്ഞുങ്ങളെ കാണാന്‍ നല്ല ഭംഗിയാണ്. അത് നമ്മുടെ കുഞ്ഞായാലും അയല്‍പ്പക്കത്തെ ചേച്ചിയുടെ കുഞ്ഞായാലും, ബസില്‍ വെച്ചു കണ്ട ചേച്ചിയുടെ കൈയില്‍ ഇരുന്ന കുഞ്ഞായാലും, കോവളത്ത് കണ്ട മദാമ്മ ചേച്ചിയുടെ കുഞ്ഞായാലും ഇനി കാക്കക്കറുമ്പിയായ ഒരു നീഗ്രോ ചേച്ചിയുടെ കുഞ്ഞായാലും അവരെ കാണാന്‍ ഒരു പ്രത്യേക ചന്തമുണ്ട്. കുഞ്ഞുങ്ങളെ ഇഷ്ടമല്ലാത്ത ആരും ഉണ്ടാവില്ല, പ്രകടിപ്പിക്കുന്ന രീതി ചിലപ്പോള്‍ വ്യത്യസ്തമായി എന്നുവരാം. ചിലര്‍ക്ക് ദൂരെ നിന്നു നോക്കി രസിക്കാനായിരിക്കും ഇഷ്ടം, ചിലര്‍ക്ക് അവരെ ഒന്ന് തലോടിയോ, ഒന്നെടുത്ത് ഉമ്മ വെച്ചോ ഒന്ന് ചുറ്റിക്കറക്കിയോ ഒക്കെയായിരിക്കും സന്തോഷം വരിക. ഫെയിസ്ബുക്കില്‍ ഒരു സുന്ദരന്‍/സുന്ദരി വാവയുടെ ചിത്രം കണ്ടാല്‍ ഏത് കഠോരഹൃദയനും ഒരു ലൈക്ക് അടിച്ചുപോവും, അതാണ് കുഞ്ഞുങ്ങളുടെ പവര്‍.

ഇനിയാണ് ചോദ്യം. കുഞ്ഞുങ്ങളിലെ എന്തു പ്രത്യേകതയാണ് അവര്‍ക്ക് ഇത്രയും സൌന്ദര്യം കൊടുക്കുന്നത്? നമ്മള്‍ എല്ലാവരും ഒരുകാലത്ത് നല്ല Cute Babies ആയിരുന്ന സ്ഥിതിക്ക് ചോദ്യം ഇങ്ങനെയും ചോദിക്കാം, അന്ന് ഉണ്ടായിരുന്ന എന്താണ് നമുക്ക് ഇന്ന്‍ നഷ്ടമായിരിക്കുന്നത്? യഥാര്‍ത്ഥത്തില്‍ മനുഷ്യക്കുഞ്ഞുങ്ങള്‍ക്ക് മാത്രമല്ലല്ലോ, എല്ലാ മൃഗങ്ങളുടെയും കുഞ്ഞുങ്ങള്‍ക്ക് ഈ ഒരു ഓമനത്തം ഉണ്ടല്ലോ. അത് വീട്ടില്‍ വളര്‍ത്തുന്ന നായ്ക്കുട്ടി ആയാലും നമ്മളെ വിറപ്പിക്കാന്‍ പോന്ന സിംഹത്തിന്റെ കുട്ടിയായാലും അവരുടെ കളികള്‍ നോക്കി നില്ക്കാന്‍ ഒരു പ്രത്യേക ഭംഗിയുണ്ട്. അപ്പോ ഈ കുഞ്ഞായിരിക്കുമ്പോള്‍ ഉള്ള അഡീഷണല്‍ സൌന്ദര്യം മനുഷ്യന്റെ മാത്രമല്ലാത്ത പ്രത്യേകതയാണ്. ശാസ്ത്രജ്ഞന്‍മാര്‍ ഇതിനെക്കുറിച്ച് പണ്ടേ ആലോചിച്ചിട്ടുണ്ട്. നമ്മള്‍ ഇവിടെ ഓര്‍ക്കേണ്ട ഒരു കാര്യം, പ്രകൃതി സൌന്ദര്യം ഉണ്ടാക്കുന്നില്ല എന്നതാണ്. അവള്‍ സൌന്ദര്യസങ്കല്‍പ്പം മാത്രമാണ് ഉണ്ടാക്കുന്നത്. പ്രകൃതിയില്‍ ഇതിനകം ഉള്ള വസ്തുക്കളില്‍ ചില പ്രത്യേക രൂപങ്ങളുടെ ദൃശ്യം നമുക്ക് സന്തോഷം ഉണ്ടാക്കും. സംഗീതത്തിന്റെ ശബ്ദം സന്തോഷമുണ്ടാക്കുന്ന പോലെ തന്നെ. (നമ്മുടെ കോളേജുകളിലും ബസ് സ്റ്റോപ്പുകളിലുമൊക്കെ നടക്കുന്ന നിഷ്കളങ്കമായ വായ്നോട്ടങ്ങള്‍ക്ക് പിന്നിലും ഈ സന്തോഷം തന്നെയാണ്). അതുകൊണ്ട് അവയോട് നമുക്ക് ആകര്‍ഷണം തോന്നും. ആ ആകര്‍ഷണം തോന്നിക്കുന്ന, നമ്മുടെ തലച്ചോറില്‍ ഉള്ള ഒരു കോഡ് ആണ് നമ്മുടെ സൌന്ദര്യസങ്കല്‍പ്പം. ഇന്നത്തെ സൌന്ദര്യസങ്കല്‍പം അനുസരിച്ചു കുഞ്ഞുങ്ങളുടെ പ്രത്യേകതകളായ, ശരീരത്തെ അപേക്ഷിച്ച് അല്പം വലിപ്പമുള്ളതും ഉരുണ്ട് സമമിതി (symmetry) ഉള്ളതുമായ തല, വലിയ കണ്ണുകള്‍, ചെറിയ വായ്, ചെറിയ മൂക്ക്, വീര്‍ത്ത കവിളുകള്‍, നീളം കുറഞ്ഞ കൈകാലുകള്‍ എന്നിവ ചേര്‍ന്ന രൂപത്തോട് അടിസ്ഥാനപരമായി മനുഷ്യന് ആകര്‍ഷണം തോന്നും എന്നാണ് ശാസ്ത്രജ്ഞര്‍ പറയുന്നത്. കുഞ്ഞുങ്ങളുടെ ഈ രൂപത്തോട് നമുക്കുള്ള ഈ ആകര്‍ഷണത്തിന്റെ കാരണം, ഡാര്‍വിന്‍റെ പരിണാമസിദ്ധാന്തത്തിലേക്ക് ആണ് ശാസ്ത്രജ്ഞന്‍മാര്‍ ബന്ധിപ്പിക്കുന്നത്. നമ്മുടെ മുന്‍തലമുറകളില്‍ എപ്പോഴോ ഏതോ ഒരു സ്ത്രീ Mutation വഴി അതിന് മുന്‍പുള്ള തലമുറയില്‍ നിന്നും വ്യത്യസ്ഥമായ രൂപവിശേഷങ്ങളോടെ ജനിച്ചിട്ടുണ്ടാകും എന്നും ഇന്ന് നമ്മള്‍ Cute എന്നു വിശേഷിപ്പിക്കുന്ന കുഞ്ഞുങ്ങളുടെ രൂപത്തോട് അവള്‍ക്ക് ഒരു പ്രത്യേക മമത ഉണ്ടായതാവാം എന്നും കരുതുന്നു. ഈ മമത അവള്‍ പിന്‍തലമുറകള്‍ക്ക് കൈമാറി. അതുകൊണ്ട് ആ സൌന്ദര്യസങ്കല്‍പം അനുസരിച്ചു Cute ആയ കുഞ്ഞുങ്ങള്‍ക്ക് കൂടുതല്‍ ശ്രദ്ധയും പരിഗണനയും കിട്ടുകയും, അവര്‍ക്ക് നിലനില്‍പ്പിനും പ്രത്യുല്‍പ്പാദനത്തിനും കൂടുതല്‍ അവസരങ്ങള്‍ ഉണ്ടാവുകയും ചെയ്തു. അങ്ങനെ ആ സൌന്ദര്യസങ്കല്‍പ്പം വരും തലമുറകള്‍ക്ക് കൈമാറി കൈമാറിയാണ് നമ്മുടെ ഇന്നത്തെ സൌന്ദര്യസങ്കല്‍പ്പം ഉണ്ടായത് എന്നും വിശ്വസിക്കുന്നു. മറ്റൊരു കാരണം കൂടി ഒപ്പം പറയുന്നുണ്ട്. ജൈവചരിത്രം കണ്ട ഏറ്റവും മികച്ച വേട്ടക്കാരന്‍ ആയിരുന്നു മനുഷ്യന്‍. ഇതുപോലെ മറ്റ് പല ജീവികുലത്തെയും അപ്പാടെ തുടച്ചുമാറ്റിയ മറ്റൊരു സ്പീഷീസ് ഇല്ല. കുഞ്ഞുങ്ങള്‍ (ഏത് ജീവിയുടേത് ആയാലും) ദുര്‍ബലരാണെന്നതുകൊണ്ട് അവരാണു ഏറ്റവും എളുപ്പത്തില്‍ വേട്ടയ്ക്ക് ഇരയാകാന്‍ സാധ്യത. പക്വതയെത്തി പ്രത്യുല്‍പ്പാദനത്തിന് കഴിവുണ്ടാകും മുന്പ് വേട്ടയാടപ്പെടുന്ന ഒരു സാഹചര്യം വന്നാല്‍, ആത്യന്തികമായി സകലജീവികളുടെയും ഉന്‍മൂലനാശമായിരിക്കും ഫലം. ഇതൊഴിവാക്കാന്‍ പ്രകൃതി നടത്തിയ കളിയാണ് കുഞ്ഞുങ്ങളുടെ രൂപത്തോട് മനസില്‍ ഉണ്ടാക്കിയ ആകര്‍ഷണം എന്നും കരുതപ്പെടുന്നു. ഒരു കുഞ്ഞിന്റെ ശരീരത്തില്‍ ചര്‍മ്മവും, അസ്ഥികളും, മസിലുകളും ഏതാണ്ട് ഒരേ അളവില്‍ ഉണ്ടായിരിക്കും. അതാണ് അവന്റെ സവിശേഷമായ രൂപത്തിന്റെ കാരണം. എന്നാല്‍ വളരുന്നതിനനുസരിച്ച് ചര്‍മവും അസ്ഥികളും ശരീരഭാരത്തില്‍ ചുരുങ്ങുകയും മസിലുകളുടെ ഭാരം ഏതാണ്ട് ഇരട്ടിയാവുകയും ചെയ്യുന്നു. കാരണം ഇനി അവന് സ്വന്തം കാലില്‍ നില്ക്കാന്‍ കഴിയും, സ്വന്തം Cuteness -ന്റെ പേരില്‍ കിട്ടുന്ന സൌജന്യം ആവശ്യമില്ല. ഇങ്ങനെ തലമുറകളായി നമുക്ക് പൂര്‍വികരില്‍ നിന്ന് കിട്ടിയ സൌന്ദര്യസങ്കല്‍പ്പമാണ് നമ്മളെ ഇപ്പൊഴും കുഞ്ഞുങ്ങളിലേക്ക് ആകര്‍ഷിക്കുന്നതത്രേ.

ഇത്രയും പറഞ്ഞ സ്ഥിതിക്ക് ഒരു കാര്യം കൂടി പറയാം. നമ്മുടെ സൌന്ദര്യസങ്കല്‍പ്പത്തിന്റെ അടിസ്ഥാനപരമായ ഒരു മാനദണ്ഡമാണ് സമമിതി അഥവാ Symmetry. നല്ല സൌന്ദര്യമുള്ള ഒരു രൂപത്തില്‍, അതൊരാളുടെ മുഖമായാല്‍ പോലും, തീര്‍ച്ചയായും ഒരു symmetry ഉണ്ടാവും. കുഞ്ഞുങ്ങളുടെ മുഖത്ത് അത് പ്രത്യേകിച്ചും ഉണ്ടാവും. സൌന്ദര്യമുള്ള വസ്തുക്കളില്‍ കണ്ണുവെക്കുക, കണ്ണേറു കൊള്ളുക തുടങ്ങിയ (അന്ധ)വിശ്വാസങ്ങളുടെ ഫലമായി അതൊഴിവാക്കാന്‍ പണ്ടുള്ളവര്‍ കണ്ടുപിടിച്ച മാര്‍ഗമാണ് കുഞ്ഞിന്റെ മുഖത്തെ symmetry ഇല്ലാതാക്കുക എന്നത്. അതിനാണ് കുഞ്ഞിന്റെ ഒരു കവിളത്ത് മാത്രം ഒരു കുത്തിടുക, നെറ്റിയില്‍ പൊട്ട് വെക്കുമ്പോള്‍ symmetrical ആവാതെ നെറ്റിയുടെ മദ്ധ്യഭാഗത്ത് നിന്നും മാറ്റി വെക്കുക തുടങ്ങിയ പതിവുകള്‍ നമ്മുടെ ആളുകള്‍ തുടങ്ങിയത്. പലപ്പോഴും എന്തിനെന്ന് പോലും അറിയാതെ അത് നമ്മള്‍ ഇപ്പൊഴും തുടരുന്നു.

Write Your Valuable Comments Below