ഈ തെരുവ് ഗായകരെ ഒരു നിമിഷം ശ്രദ്ധിക്കൂ

1

നമ്മുടെ കണ്ണുകളെ മയക്കുന്ന പ്രകാശതോരണങ്ങളാല്‍ അലംകൃതമായ രംഗ വേദികളില്‍ നടക്കുന്ന വര്‍ണ്ണാഭമായ സംഗീത റിയാലിറ്റി ഷോകള്‍ ഒരു പാട് കണ്ടവരാണ് നാം. സമ്പന്നത ഒന്ന് കൊണ്ട് മാത്രം റിയാലിറ്റി ഷോകളിലും മറ്റും പങ്കെടുക്കാന്‍ കഴിയുന്ന അത്തരക്കാര്‍ക്ക് മുകളിലും ഒരു ലോകമുണ്ടെന്ന സത്യം നമ്മള്‍ മറക്കുന്നുവോ ? പ്രതിഭാധനരായ ഒരു പാട് ഗായകരുടെ സംഗീത “റിയാലിറ്റി” അരങ്ങേറുന്നത് തെരുവോരങ്ങളിലാണ്. അവിടെ ശ്രുതിയിടുന്നത് വിശപ്പാണ്.. താളമിടുന്നത് കേള്‍വിക്കാരുടെ കൈകളില്‍ നിന്നും ഊര്‍ന്നു വീഴുന്ന നാണയത്തുട്ടുകളാണ്..

തെരുവില്‍ പാട്ടുപാടി നടന്നിരുന്ന സബീര്‍ ബാബു എന്ന ബാലനെ മനുഷ്യസ്നേഹിയായ, സംഗീത പ്രേമിയായ. ഒരാള്‍ കണ്ടെടുക്കുന്നിടത്താണ്‌ നാമറിയുന്ന എം. എസ്‌. ബാബുരാജ് എന്ന മഹാ സംഗീതകാരന്റെ ചരിത്രം തുടങ്ങുന്നത്‌. എന്നാല്‍ ഒരു ജന്മം മുഴുവന്‍ തെരുവില്‍ പാടിനടന്നിട്ടും ഒന്നും സമ്പാദിക്കാനാവാതെ ആരാലും അറിയപ്പെടാതെ എവിടെയുമെത്താതെ സംഗീത സാഗരത്തില്‍ സ്വയം അലിഞ്ഞില്ലാതായി പോയ എത്ര മഹാ ഗായകര്‍ കാണും ?

തെരുവില്‍ ആള്‍ക്കൂട്ടത്തിനു നടുവിലില്‍ വിയര്‍ത്ത്‌, തളര്‍ന്ന്‌, തൊണ്ടകീറി പാടുന്ന തെരുവുഗായകരുടെ ലക്ഷ്യം കേള്‍വിക്കാരണ്റ്റെ കാതിനിമ്പം കൂട്ടുക എന്നതു മാത്രമാവില്ല, മറിച്ച്‌ അവരെ പാടിയുണര്‍ത്തി തണ്റ്റെ വയറിന്റെ വിളിയെ അവരെ അറിയിക്കുക എന്നതു കൂടെയാവും …..

അവര്‍ പാടുന്നത്‌ സംഗീതത്തോടൊപ്പം തങ്ങളുടെ ദൈന്യതയെയും കേള്‍വിക്കാരന്റെ ഹൃദയത്തിലേക്ക് തുളച്ചു കയറ്റാനായിരിക്കാം. വയറും മനസ്സുമെരിയുമ്പോള്‍ അവര്‍ ഒരു പക്ഷെ തങ്ങളുടെ പാട്ടിനെ ഒരു നിലവിളിയായി പരിണമിപ്പിക്കുകയാവാം, അല്ലെങ്കില്‍ തങ്ങളുടെ ഉള്ളിലെ നിലവിളിയെ പാട്ടാക്കി മാറ്റി പുറത്തുവിടുകയാവാം .

കാത് കൂര്‍പ്പിച്ചു കേള്‍ക്കുക ഈ പാമരനാം പാട്ടുകാരുടെ സംഗീതം…..

അറിയുക, സംഗീതം സിരകളെ ത്രസിപ്പിക്കുന്ന കേവലം വാദ്യ ഘോഷങ്ങളല്ലെന്ന്,

അനുഭവിക്കുക, യഥാര്‍ത്ഥ സംഗീതം നമ്മള്‍ പോലുമറിയാതെ നമ്മുടെ ആത്മാവിനെ തൊട്ടുണര്‍ത്തുന്നതെങ്ങിനെയെന്ന്….

Courtesy: an FB post