ഓര്‍മ്മയുണ്ടോ ഈ റപ്പായി ചേട്ടനെ..??

    0
    346

    Untitled-1

    വടക്കും നാഥനെ പ്രദക്ഷിണം വച്ചുകിടക്കുന്ന സ്വരാജ് റൗണ്ടില്‍ ഒരുകാലത്തെ സ്ഥിരം കാഴ്ചയായിരുന്നു കുറ്റിത്താടിയും ചീകിയൊതുക്കാത്ത മുടിയുമായി വരുന്ന സാധാരണയില്‍ കവിഞ്ഞ് ഒരല്പം മാത്രം വണ്ണമുള്ള ഒരു മനുഷ്യന്‍. കൈയ്യില്‍ എപ്പോളും ഒരു സഞ്ചിയുമുണ്ടാകും. അയാളെ അറിയാത്തവരായി അന്ന് തൃശ്ശൂരില്‍ ആരുമുണ്ടായിരുന്നില്ല. കാണുന്നവരോടെല്ലാം കളിപറഞ്ഞു നടക്കുന്ന ആ മനുഷ്യന്റെ ഉള്ളില്‍ എപ്പോഴും തീയായിരിക്കും. മനസ്സിനെ പുകക്കുന്ന ചിന്തകളുടെ തീയല്ല, ആമാശയത്തെ എരിയ്ക്കുന്ന വിശപ്പിന്റെ തീ. ഒരിക്കലുമൊടുങ്ങാത്ത വിശപ്പുമായായിരുന്നു റപ്പായി ജീവിച്ചത്.തൃശ്ശൂരുകാരുടെ സ്വകാര്യ അഭിമാനമായിരുന്നു തീറ്റ റപ്പായി, തൃശ്ശൂര്‍ പൂരം പോലെത്തന്നെ. അതു കൊണ്ടായിരുന്നല്ലോ നാട്ടുകാരില്‍ പലരും റപ്പായിയുടെ ഭക്ഷണം സ്‌പോണ്‍സര്‍ ചെയ്തിരുന്നത്.

    ഇനി ഒരല്‍പ്പം ചരിത്രം 

    സാധാരണക്കാര്‍ക്ക് അസാദ്ധ്യമായ തരത്തില്‍ ഭക്ഷണം കഴിക്കുന്നതിലൂടെ പ്രശസ്തനായ മലയാളിയാണ് റപ്പായി. കേരളത്തിനകത്തും പുറത്തും നടന്ന തീറ്റമത്സരങ്ങളിലെ വിജയങ്ങളിലൂടെയാണ് റപ്പായി പേരെടുത്തത്. കിഴക്കുംപാട്ടുകര പൈനാടന്‍ കുര്യപ്പന്റേയും താണ്ടമ്മയുടേയും ഏഴുമക്കളില്‍ മൂത്തവനായി 1939ല്‍ ജനിച്ചു. ഒമ്പതാം ക്ലാസ്സുകൊണ്ട് പഠനം നിര്‍ത്തി. പിന്നീട് ഓട്ടുകമ്പനികളില്‍ ജോലി നോക്കി. അതിനുശേഷം ഹോട്ടലുകളില്‍ ജോലിനോക്കി അവിടെനിന്നു കിട്ടുന്ന ഭക്ഷണം കൊണ്ടായി ജീവിതം. യൌവനാരംഭത്തില്‍ തന്നെ തീറ്റമത്സരങ്ങളില്‍ പ്രശസ്തനായി. ഒരു വയറുതന്നെ കഴിയാന്‍ ബുദ്ധിമുട്ടാണെന്നവകാശപ്പെട്ട് വിവാഹം കഴിച്ചിരുന്നില്ല. 140 കിലോഗ്രാം തൂക്കം, അഞ്ചേമുക്കാലടി ഉയരം, 130 സെന്റിമീറ്റര്‍ ചുറ്റളവുള്ള ശരീരം എന്നിങ്ങനെയായിരുന്നു ശരീരപ്രകൃതി. മാതാവിനോടൊപ്പം കിഴക്കുംപാട്ടുകരയിലെ തറവാട്ടുവീട്ടിലായിരുന്നു താമസം.

    മസ്തിഷ്‌കത്തിലെ ഹൈപ്പോതലാമസിലെ തകരാറുമൂലമുണ്ടായ അമിതവിശപ്പായിരുന്നു റപ്പായിയുടെ അമിതഭക്ഷണത്തിന്റെ കാരണം. രാവിലെ 75 ഇഡ്ഢലി, ഉച്ചക്ക് കിട്ടുന്നത്രയും എന്തെങ്കിലും ഭക്ഷണം, വൈകിട്ട് അത്താഴം അതിനിടയില്‍ കിട്ടുന്നതെന്തും എന്നിങ്ങനെയായിരുന്നു ഭക്ഷണക്രമം.

    750 ഇഢലി, 25 കിലോ അപ്പം, നാലുകുല വാഴപ്പഴം, അഞ്ച് ബക്കറ്റ് പായസം എന്നിങ്ങനെ തീറ്റമത്സരങ്ങളില്‍ റിക്കോര്‍ഡ് സൃഷ്ടിച്ചിട്ടുണ്ട്. ഈ റിക്കോര്‍ഡുകളുടെ പേരില്‍ ലിംക ബുക്ക് ഓഫ് റിക്കോര്‍ഡ്‌സിലും പേര് വന്നിട്ടുണ്ട്.

    രക്തസമ്മര്‍ദ്ദവും പ്രമേഹവും വര്‍ദ്ധിച്ചതുമൂലം 2006 നവംബര്‍ അവസാനം മുതല്‍ ആശുപത്രിയില്‍ കിടപ്പിലായിരുന്നു. 2006 ഡിസംബര്‍ 9നു അന്തരിച്ചു.