മതവിഭ്രമം

മതത്തിന്റെ പേരില്‍ , ദൈവത്തിന്റെ പേരില്‍ , കുലത്തിന്റെ പേരില്‍, വിഭാഗങ്ങളുടെ പേരില്‍ ഘോരഘോരം വാചാലരാവുന്ന വിഭാഗീയതയുടെ വിഷവിത്തുകള്‍ പാകി വരും തലമുറയെക്കൂടി അക്ഷരാര്‍ഥത്തില്‍ കെണിയിലാക്കുന്ന വിഭാഗീയതയുടെ പുത്തന്‍ തലങ്ങള്‍ കണ്ടുപിടിക്കാന്‍ ജന്മസിദ്ദവാസനയുള്ള വിഭാഗീയതയുടെ മേലാളന്മാര്‍ക്കും അതിനു ഓശാന പാടുന്ന കീഴാളന്മാര്‍ക്കും എതിരെയുള്ള മരണം വരെ മനുഷ്യനായി ജീവിക്കുക എന്ന ഒടുങ്ങാത്ത ആഗ്രഹം നടക്കാത്ത എന്റെ രോഷമാണ് ഈ എഴുത്ത്.

പണ്ട് ഞാന്‍ സ്‌കൂളില്‍ പടിക്കുന്ന കാലത്ത് അര്‍ച്ചന ടീചര്‍ക്ക് ഒരു ക്ലാസ്സ് മുറി വിനോദമുണ്ടായിരുന്നു. ടീചര്‍ ഒരു ദിവസം ഏറ്റവും മുന്നിലെ ബെഞ്ചില്‍ ഇരുന്ന ഒരു കുട്ടിയുടെ കാതില്‍ ആരും കേള്‍ക്കാതെ my name is Archana എന്നു പറഞ്ഞു. രണ്ടാമത് ആവര്‍ത്തിക്കാതെ അത് അടുത്ത കുട്ടിയുടെ കാതില്‍ പറയുവാന്‍ ആ കുട്ടിയോട് ആവശ്യപ്പെട്ടു. അങ്ങനെ ആ പ്രവര്‍ത്തി അവസാനത്തെ കുട്ടിയിലെത്തിയപ്പോള്‍ ടീച്ചര്‍ ആ കുട്ടിയോട് താന്‍ കേട്ടത് ഉച്ചത്തില്‍ വിളിച്ച് പറയുവാന്‍ ആവശ്യപ്പെട്ടു. ആ കുട്ടി പറഞ്ഞത് ടീച്ചര്‍ പറഞ്ഞ my name is Archana എന്ന പദത്തിനോട് യാതൊരു ബന്ധവുമില്ലാത്ത the dog bites rice എന്നായിരുന്നു. വെറും നാല്പത്തി എട്ട് കുട്ടികളിലൂടെ കടന്നു പോയപ്പോളാണ് my name is Archana എന്നത് the dog bites rice എന്നായി മാറിയത്. ഇവിടെ നാം മനസ്സിലാവുന്നത് എന്താണ്?? ആദ്യം ടീച്ചര്‍ പറഞ്ഞത് ശരിയായി കേട്ടത് ആദ്യത്തെ ഒന്നോ രണ്ടോ കുട്ടി മാത്രമാണ്. അകലേക്ക് പോകുംതോറും അതിലെ സത്യസന്ധത നശിച്ച് ടീച്ചര്‍ മനസ്സില്‍ പോലും കരുതാത്ത ഒന്നായി മാറി. ഇതു തന്നെയാണ് മതത്തിനും ദൈവത്തിനുമൊക്കെ സംഭവിച്ചിരിക്കുന്നത്. യഥാര്‍ത്ഥ യേശു ക്രിസ്തുവും മുഹമ്മദ് നബിയും നാരായണനുമൊക്കെ തലമുറകളിലൂടെ നശിച്ചു.ഇന്നു കാണുന്നത് ഇവരുടെയൊക്കെ പ്രാക്രുത രൂപങ്ങളാണ് പ്രത്യയ ശാസ്ത്രങ്ങളല്ല. കച്ചവട സംസ്‌കാരത്തിന്റെ ഭീമാകാരമായ പാദങ്ങള്‍ക്ക് അടിയില്‍പ്പെട്ട് മനുഷ്യന്റെ സര്‍വസ്വവും ഞെരിഞ്ഞമര്‍ന്നു. മതവും, സംസ്‌കാരങ്ങളും ആചാരങ്ങളും എല്ലമെല്ലാം വില്പനച്ചരക്കുകളായി മാറി. ഇന്നത്തെ മതമേലധ്യക്ഷന്മാരും വര്‍ഗ്ഗ നേതാക്കളുമൊക്കെ മതത്തെയും സംസ്‌കാരത്തെയും മനുഷ്യ സ്വാതന്ത്രങ്ങളെയും ഒക്കെ വില്പനച്ചരക്കുകളാക്കി ലാഭം കൊയ്ത് കൊഴുക്കുന്നു. മനുഷ്യന്‍ വര്‍ഗീയതയുടെ പേരില്‍ തമ്മിലടിക്കുമ്പോള്‍ തന്റെ വ്യാപാര തന്ത്രങ്ങളുടെ വിജയം വര്‍ഗീയതയുടെ നേതാക്കള്‍ തന്റെ ചില്ലുമേടകളില്‍ ഇരുന്നു അഘോഷിക്കുന്നു.ദംഷ്ട്രകളിലെ അവസാന തുള്ളി രക്തവും നക്കിത്തുടച്ച് അവര്‍ പുതിയ കച്ചവട തന്ത്രങ്ങള്‍ മെനയുമ്പോള്‍ മൂര്‍ത്തികളേക്കാള്‍ വലിയ പൂജാരികള്‍ ഉണ്ടാകുന്നു. ദൈവങ്ങളെ പിന്തള്ളി മനുഷ്യ ദൈവങ്ങള്‍ വിശ്വാസികളെ മത്സരിച്ച് സമ്പാദിച്ച് കൊണ്ടിരിക്കുന്നു.

രാമായണവും മഹാഭാരതവും മനസ്സിരുത്തി വായിച്ച എത്ര ഹിന്ദുക്കള്‍ ഉണ്ട്?? തന്നെപ്പോലെ തന്റെ അയല്‍കാരനെ സ്‌നേഹിക്കുന്ന എത്ര ക്രിസ്ത്യാനികള്‍ ഉണ്ട്? അയല്‍കാരന്‍ പട്ടിണി കിടക്കുന്ന കാരണത്താല്‍ വയറ് നിറയെ കഴിക്കാതെ ധാന ധര്‍മ്മങ്ങള്‍ ചെയ്യുന്ന എത്ര മുസല്‍മാന്മാരുണ്ട്?

മനുഷ്യന്റെ മനസ്സുകളില്‍ നിന്ന് സ്‌നേഹത്തിന്റെ വെള്ളരിപ്രാവുകളെ കഴുത്തറുത്ത് കൊന്ന് തന്റെ ഇംഗിതങ്ങള്‍ക്കനുസരിച്ച് പ്രവര്‍ത്തിക്കുന്ന യന്ത്രങ്ങളാക്കി മാറ്റിയ ഈ വിഭാഗീയതയുടെ നേതാക്കള്‍ക്ക് അന്ത്യകൂദാശ കൊടുക്കുവാന്‍ ആരും ധൈര്യപ്പെടാത്ത വിധം എല്ലാവരെയും വശംവദരാക്കി സാത്താന്റെ സാമ്രാജ്യം പണിത് അവിടെ അവരവരുടെ കഴിവിനനുസരിച്ച് വലിയ സിംഹാസനങ്ങള്‍ പണിത് ചുറ്റും തോഴന്മാരുമായി മദിച്ചിരിക്കുന്നു. ചില ഒറ്റപ്പെട്ട ശബ്ദങ്ങള്‍ അവിടവിടെ ഇവര്‍ക്കെതിരെ ഉയര്‍ന്നിട്ടുണ്ട് പക്ഷെ കടിച്ചാല്‍ പൊട്ടാത്ത സധാരണക്കാരന്റെ അജ്ഞതയെ ചൂഷണം ചെയ്യുന്ന വാക്കുകള്‍ ഉപയോഗിച്ച് അതൊക്കെ അവര്‍ അടിച്ചമര്‍ത്തി.

പ്രിയപ്പെട്ടവരെ… നൂറു പേര്‍ ഒരുമിച്ച് പറഞ്ഞാലും തെങ്ങിലെ തേങ്ങ മാങ്ങ ആകില്ല, നൂറ് പേര്‍ക്ക് നടുവില്‍ ‘അത് തേങ്ങയാണ് ‘ എന്ന സത്യസന്ധമായ ശബ്ദം ആരും ശ്രദ്ദിക്കാതെ പോയേക്കാം. എന്നാല്‍ സത്യം ജയിക്കും അല്പം വൈകിയാണെങ്കിലും എന്ന വിശ്വാസത്തോടെ നമുക്ക് മുന്നേറാം . ആരെയും വേദനിപ്പിക്കാനല്ല, മനസിന്റെ ദുഖതളങ്ങള്‍ അണപൊട്ടി ഒഴുകിയതിന്റെ ഒരു തുള്ളി മാത്രമായി ഇതിനെ കാണുക.

 99 total views,  1 views today