തോമസുകുട്ടീ വിട്ടോടാ !

510

Augustus Morris

തോമസുകുട്ടീ വിട്ടോടാ

( 1 ) മലയാളികളുടെ അന്യപ്രജാക്ഷേമ തല്പരത കണ്ടിട്ടുണ്ടോ ? …കാണണം .സർക്കാരാശുപത്രിയിലേക്ക് വരൂ . കടുത്ത ഹൃദയാഘാതമോ വണ്ടിയപകടമോ ആസ്മയോ എന്തുമാകട്ടെ , കാഴ്ചക്കാരെ വകഞ്ഞു മാറ്റി മാത്രമേ ഡോക്റ്റർക്കും നഴ്‌സിനും അവിടെത്താൻ പറ്റൂ . ചില രോഗികളോടൊപ്പം ഒരു പഞ്ചായത്ത് മുഴുവൻ ഇടിച്ചുകേറും . ലോക്കൽ നേതാക്കളുടെ കളിവിളയാട്ടങ്ങൾ കണ്ടാൽ പെറ്റ മാതാവ് സഹിക്കില്ല .വാർഡുകളിൽ ചെന്ന് നോക്കണം . അതൊരു ഫ്രൂട്ട് സ്റ്റാൾ ആയി തോന്നിയാൽ അത്ഭുതപ്പെടേണ്ട .

( 2 ) നന്നേ ചെറിയ X – ray കെട്ടിടം . ചെന്നുനോക്കിയപ്പോ ഉത്സവ പറമ്പിൽ ആളുനിൽക്കുന്നതുപോലെ ന്യൂ ജെൻ പിള്ളേർ .കൂട്ടത്തിൽ ഒരുവന് പന്തുകളിയ്ക്കിടെ പരിക്ക് പറ്റിയപ്പോ എക്സ്റേ എടുക്കാൻ കൊണ്ടുവന്നതാ . ആകെബഹളമയം .തിരക്ക് . ജലപീരങ്കി പ്രയോഗിക്കാൻ പറ്റില്ലല്ലോ . മറ്റുള്ള രോഗികൾക്ക് അടുക്കാൻ പറ്റുന്നില്ല .എന്തുചെയ്യും ? ..ഡിങ്കോയിസ്റ്റായ ഒരു ഡോക്റ്റർ ധാരാവി ഒഴിപ്പിക്കൽ ദൗത്യം ഏറ്റെടുത്തു. ന്യൂ ജെൻ പിള്ളേരോടായി അദ്ദേഹം പറഞ്ഞു ; ” എടാ മക്കളേ , നിനക്കൊന്നും കെട്ടിക്കഴിഞ്ഞ് പിള്ളേർ ഉണ്ടാകണമെന്ന് ആഗ്രഹമില്ലേ ? ഇത്രയും റേഡിയേഷൻ ഉള്ള കെട്ടിടത്തിനുമുന്നിൽ നിന്നാൽ വൃഷണം അടിച്ചുപോകും ”. പിന്നെ നോക്കുമ്പോൾ ആട് കിടന്നിടത്ത് പൂട പോലുമില്ല . റേഡിയോഗ്രാഫർ അച്ചു ചോദിച്ചു ” എന്റെ സാറേ ,ഇതൊക്കെ എങ്ങനെ സാധിക്കുന്നു ? ”

വൈദ്യൻ സ്റ്റെത്ത് കൊണ്ട് മാത്രമല്ല ജീവിക്കുന്നത് ,പിന്നെയോ ഡിങ്കാനുഗ്രഹം ഉള്ള നാവ് കൊണ്ട് കൂടിയാണ് എന്ന വചനം [ വി .ബാല മംഗളം 95 : 64 ] പറഞ്ഞു കൊടുത്തു .

( 3 ) വികിരങ്ങൾ രണ്ടു തരം — ഇലക്ട്രോണുകളെ തട്ടിത്തെറിപ്പിക്കാൻ കഴിവുള്ള IONISING RADIATION ഒന്നാമത്തേത് . പ്രശ്നകാരി . കാൻസർ ഉൾപ്പെടെയുള്ള രോഗങ്ങൾ സമ്മാനിക്കുന്നു . എക്സ്റേ , കോസ്മിക് രശ്മികൾ, ഗാമാ രശ്മികൾ ഒക്കെ ആ വിഭാഗത്തിൽ പെടുന്നു . അവ ഉന്നതോർജ്ജം വഹിക്കുന്നു . എന്നാൽ INFRA RED കിരണങ്ങൾ , മൈക്രോ വേവ് തരംഗങ്ങൾ , വൈദ്യുത ലൈനിലെ തരംഗങ്ങൾ ,റേഡിയോ തരംഗങ്ങൾ , ദൃശ്യപ്രകാശം തുടങ്ങിയവ നിരുപദ്രവകാരികളായ NON IONISING വികിരണങ്ങൾ , അവ പ്രശ്നകാരികളല്ല . പക്ഷേ മൊബൈൽ ഫോൺ രണ്ടരയടി അകലെ മാത്രമേ വയ്ക്കാൻ പാടുള്ളൂ എന്ന് പഠിപ്പിക്കുന്ന സൈബർ വിദഗ്ധരുള്ള നാട്ടിൽ , മൊബൈൽ ടവറിനെതിരെ സമരിക്കുന്ന എൻജിനീയറിങ് വിദ്യാർഥികളുള്ള നാട്ടിൽ റേഡിയേഷൻ എന്ന് കേട്ടാലേ ആൾക്കാർ ജീവനും കൊണ്ടോടും .

( 4 ) ജനത്തിനെ അകാരണമായി ഭീതിപ്പെടുത്തി , അതിൽ നിന്നും ലാഭം കൊയ്യുന്ന ചിലരുണ്ട് . ഏതെങ്കിലും കമ്പനി മെബൈൽ ടവർ സ്ഥാപിക്കാൻ വന്നാൽ അതിനെതിരെ യുവജന സംഘടനകളുടെ പേരിൽ ഫ്‌ളെക്‌സും ബാനറും പ്രത്യക്ഷപ്പെടും . ഒന്ന് രണ്ടു ജാഥകളും അരങ്ങേറും . പക്ഷേ പിന്നീട് ടവർ പൊങ്ങും .ചെയ്യേണ്ടത് ഇത്രമാത്രം , അമ്പതിനായിരത്തിന്റെയോ ഒരുലക്ഷത്തിന്റെയോ ഒരു വഴിപാട് ലോക്കൽ ചോട്ടാ നേതാവിന്റെ പേരിൽ അർപ്പിക്കുക .ഒപ്പം മുന്തിയ ഒരു മൊബൈൽ ഫോണും …മെയ്യനങ്ങാതെ ആമാശയ വികസനം നടത്തുന്നവർ ….കബാലി ഡാ

Advertisements