രാജീവ് ഗാന്ധി വധക്കേസിൽ ശിക്ഷയനുഭവിച്ചുപോന്നപേരറിവാളനെ 31 കൊല്ലത്തെ ജയിൽ വാസത്തിനു ശേഷം സുപ്രീം കോടതി സ്വതന്ത്രനാക്കുമ്പോൾ നമ്മുടെ മുന്നിൽ അനവധി ചോദ്യങ്ങളുണ്ട്. ഒരാളെ എങ്ങനെ ഭരണകൂടം പ്രതിചേർക്കുന്നു എന്നുനോക്കിയാൽ ഇന്ത്യയിലെ എക്കാലത്തെയും അവസ്ഥകൾ ഭീകരമാണ്. പേരറിവാളന് നഷ്ടപ്പെട്ട 31 കൊല്ലങ്ങൾ അയാൾക്ക് ആര് തിരിച്ചുനല്കും ? അറ്റാളുടെ ജീവിതം തന്നെയായിരുന്നു ആ മൂന്നു പതിറ്റാണ്ടിലേറെയുള്ള ജയിൽവാസം. അഡ്വ പ്രമോദ് പുഴങ്കര സോഷ്യൽ മീഡിയയിൽ പങ്കുവച്ച കുറിപ്പ് വായിക്കാം.

 

Adv. Pramod Puzhankara

രാജീവ് ഗാന്ധി വധക്കേസിൽ ജീവപര്യന്തം ശിക്ഷ അനുഭവിക്കുന്ന പേരറിവാളനെ 31 കൊല്ലത്തെ തടവുശിക്ഷയ്ക്കു ശേഷം സുപ്രീം കോടതി ഇന്ന് സ്വതന്ത്രനാക്കിയിരിക്കുന്നു. കേസിൽ സമാനശിക്ഷ അനുഭവിക്കുന്ന മറ്റ് ആറ് തടവുകാരുടെ മോചനത്തിനും ഇതോടെ വഴിതെളിയുകയാണ്. അത് മാത്രമല്ല, സംസ്ഥാന മന്ത്രിസഭ തടവുകാരുടെ മോചനത്തിനായി നൽകുന്ന ശുപാർശകൾ മനപൂർവ്വം വെച്ചുതാമസിപ്പിക്കാനും മോചനം മുടക്കാനും വേണ്ടി രാഷ്ട്രപതിക്ക് അയച്ചുകൊടുക്കുന്ന ഭരണഘടനാവിരുദ്ധമായ നടപടിയെക്കൂടിയാണ് സുപ്രീം കോടതി തടഞ്ഞുനിർത്തിയത്. പലതവണയായി തമിൾനാട് സർക്കാർ രാജീവ്ഗാന്ധി വധക്കേസിലെ തടവുകാരെ മോചിപ്പിക്കാൻ നൽകിയ ശുപാർശകൾ പല ഗവർണർമാരും ഇത്തരം തൊടുന്യായങ്ങൽപ്പറഞ്ഞുകൊണ്ട് വൈകിപ്പിക്കുകയായിരുന്നു.

 

ഭരണഘടനയുടെ ആർട്ടിക്കിൾ 161 അനുസരിച്ച് ഇത്തരത്തിൽ തടവുകാരുടെ മോചനമടക്കമുള്ളവക്കുള്ള ഗവർണറുടെ അധികാരങ്ങൾ കോടതിക്ക് പുനഃപരിശോധന (Judicial Review ) നത്താവുന്നതാണെന്നും കോടതി പറയുന്നു. രാഷ്ട്രപതിക്ക് ഇത്തരം അധികാരങ്ങൾ നൽകുന്ന Article -72-ഉം ഗവർണറുടെ അധികാരങ്ങളും തമ്മിൽ കൃത്യമായിത്തന്നെ വേർതിരിക്കാമെന്നും ഗവർണർക്ക് ഈ അധികാരങ്ങളിൽ സമ്പൂർണ്ണമായ അധികാരമുണ്ടെന്നും കോടതി വ്യക്തമാക്കുന്നുണ്ട്. അതുകൊണ്ടുതന്നെ സംസ്ഥാന സർക്കാരിന്റെ തടവുകാരുടെ മോചനത്തിനായുള്ള ശുപാർശകൾ രാഷ്ട്രപതിക്കയക്കുന്ന തമിൾനാട് ഗവർണറുടെ നടപടി നിലനിൽക്കില്ലെന്ന സുപ്രധാനമായ തീർപ്പ് ഭാവിയിൽ ഫെഡറൽ അധികാരഘടനയിലെ തർക്കങ്ങളിൽ സംസ്ഥാനങ്ങൾക്ക് ഗുണകരമാകും.

 

 

1998-ലാണ് പേരറിവാളൻ രാജീവ് ഗാന്ധി വധക്കേസിൽ മറ്റ് ആറു പേർക്കൊപ്പം വധശിക്ഷയ്ക്ക് വിധിക്കപ്പെടുന്നത്. പേരറിവാളനെ കള്ളക്കേസിൽ കുടുക്കിയതാണെന്ന് കേസ് അന്വേഷിച്ച പോലീസ് മേധാവിയായിരുന്ന ത്യാഗരാജൻ തന്നെ പിന്നീട് സമ്മതിച്ചു. ഫ്‌ളാഷ് ക്യാമറയിലിടാൻ 9 വോൾട്ടിന്റെ രണ്ടു ബാറ്ററി ഒരു കടയിൽ നിന്നും വാങ്ങി നൽകി എന്നതായിരുന്നു പേരറിവാളനെ ഗൂഢാലോചനയിൽ ഉലപ്പെടുത്താൻ കെട്ടിച്ചമച്ച കുറ്റം. രണ്ടു ബാറ്ററിക്ക് ബില്ല് നൽകിയ തമിഴ്‌നാട്ടിലെ പെട്ടിക്കട വരെ അന്വേഷണ ഏജൻസി ഉണ്ടാക്കിയെടുത്തു.

 

1998-ൽ വധശിക്ഷയ്ക്ക് വിധിക്കപ്പെട്ട പ്രതികളുടെ ശിക്ഷ ദയാഹർജി തീർപ്പാക്കുന്നതിൽ വരുത്തിയ കാലതാമസം കണക്കിലെടുത്ത് സുപ്രീം കോടതി ജീവപര്യന്തം തടവായി ചുരുക്കുകയായിരുന്നു. എന്നാൽ 14 വർഷങ്ങൾ കഴിഞ്ഞാൽ Remission സാധ്യമാക്കാൻ ഒരു തടസവുമില്ലെന്നിരിക്കെ 31 കൊല്ലങ്ങൾ കഴിഞ്ഞിട്ടും ഈ തടവുകാരുടെ മോചനം തടയാനുള്ള വഴികളാണ് കേന്ദ്ര സർക്കാർ അന്വേഷിച്ചുകൊണ്ടിരുന്നത്. മാത്രവുമല്ല ഇക്കാര്യത്തിൽ സംസ്ഥാന സർക്കാരിന്റെ ഫെഡറൽ അധികാരങ്ങളെ ഭരണഘടനാവിരുദ്ധമായി നിഷേധിക്കാൻ ഗവർണറെ ഉപയോഗിച്ചുകൊണ്ട് ശ്രമിക്കുകയും ചെയ്തു.

2018 സെപ്റ്റംബറിൽ സംസ്ഥാന സർക്കാർ പേരറിവാളന്റെ മോചനത്തിനായി നൽകിയ ശുപാർശ ഗവർണർ അംഗീകാരം നൽകാതെ മാറ്റിവെച്ചു. കേസ് വീണ്ടും സുപ്രീം കോടതിയുടെ പരിഗണനയിൽ വന്നപ്പോൾ-2020-ൽ കോടതി ഇക്കാര്യത്തിൽ അനിഷ്ടം പ്രകടിപ്പിച്ചു. 2021 ജനുവരിയിൽ വീണ്ടും സോളിസിറ്റർ ജനറൽ ഗവർണർ പെട്ടന്നുതന്നെ തീരുമാനമെടുക്കുമെന്ന് കോടതിക്ക് ഉറപ്പുനൽകി. എന്നാൽ ഇക്കാര്യത്തിൽ തീരുമാനമെടുക്കാൻ പ്രസിഡണ്ടിനാണ് അധികാരമെന്ന നിലപാടാണ് ആഭ്യന്തര മന്ത്രാലയം പിന്നീടെടുത്തത്. പേരറിവാളൻ 31 വര്ഷം ജയിലിൽ കഴിഞ്ഞു എന്നത് പരിഗണിച്ച് കോടതി അദ്ദേഹത്തെ ഇക്കഴിഞ്ഞ മാർച്ച മാസത്തിൽ ജാമ്യത്തിൽ വിട്ടിരുന്നു.

 

 

സംസ്ഥാന സർക്കാർ നൽകുന്ന ശുപാർശകൾ അംഗീകരിക്കാൻ ഭരണഘടനാപാരമായി ഗവർണർ ബാധ്യസ്ഥനാണ് എന്ന ഫെഡറൽ തത്വം ഒന്നുകൂടി ഊട്ടിയുറപ്പിക്കുന്നു ഈ കേസിലെ സുപ്രീം കോടതി. ഇന്ത്യൻ ശിക്ഷാനിയമത്തിൽ നിന്നും വധശിക്ഷ എടുത്തുകളയണമെന്ന ആവശ്യത്തിന് ശക്തിപകരാൻ കൂടി ഈ വിധിയുടെ സന്ദർഭം ഉപയോഗിക്കണം. ഭരണകൂടം കൂടുതൽ സമഗ്രാധിപത്യസ്വഭാവം പ്രദർശിപ്പിക്കുന്ന സമയങ്ങളിലെല്ലാം ജനങ്ങളെ ശിക്ഷിക്കാനുള്ള അതിന്റെ ശേഷിയുടെ മുകളിൽ നിരന്തരമായി പൗരസമൂഹം ആക്രമണം നടത്തിക്കൊണ്ടിരിക്കണം.!

Leave a Reply
You May Also Like

ലോകത്തെ ഞെട്ടിച്ച ഇന്ത്യയുടെ അത്ഭുത മഷി

ലോകത്തെ ഞെട്ടിച്ച ഇന്ത്യയുടെ അത്ഭുത മഷി അറിവ് തേടുന്ന പാവം പ്രവാസി ????‘ചില വിഭവങ്ങൾ നമുക്ക്…

ലോകത്തിലെ ഏറ്റവും ഉയരത്തില്‍ സ്ഥിതി ചെയ്യുന്ന പോസ്റ്റ് ഓഫീസ്

വർഷത്തിൽ ആറ് മാസം മാത്രമെ ഈ പോസ്റ്റ് ഓഫീസ് ‌പ്രവർത്തിക്കുകയുള്ളു.

രമ്യതയിലൂടെ നീങ്ങണമെങ്കിൽ ആദ്യം പാകിസ്ഥാൻ ഇന്ത്യ വിരുദ്ധ ഭീകരവാദികളെ നിർവീര്യമാക്കണം

ഇന്ത്യയും പാകിസ്ഥാനും മുൻകാല വൈരാഗ്യം മറന്ന് കശ്മീർ പ്രശ്നം പരിഹരിച്ച് മുന്നോട്ട് നീങ്ങണം എന്ന പാക് സൈനിക മേധാവിയുടെ പ്രസ്താവന ഇന്ത്യൻ മാധ്യമങ്ങൾ

കശ്മീരിലെ ടുലിപ് പൂന്തോട്ടം സഞ്ചാരികൾക്കു അത്ഭുതമാണ്

ഏഷ്യയിലെ ഏറ്റവും വലിയ ടുലിപ് പൂന്തോട്ടം കാശ്മീരിലെ പ്രസിദ്ധമായ ദാൽ തടാകക്കര യിലാണ് . ഏതാണ്ട് അറുപത് ലക്ഷം രൂപയാണ് തോട്ടത്തിന്റെ പരിപാലനത്തിനായി ചെലവിടുന്നത്