ഇന്ത്യൻ ഇസ്ലാമിക അന്തരീക്ഷവും മുത്വലാഖും ❗️മുച്ചൂടും മുടിഞ്ഞ മുസ്ലീം സ്ത്രീകളും

56

Adv Sreejith Perumana

ഇന്ത്യൻ ഇസ്ലാമിക അന്തരീക്ഷവും മുത്വലാഖും ❗️മുച്ചൂടും മുടിഞ്ഞ മുസ്ലീം സ്ത്രീകളും

ഈ അടുത്ത കാലത്ത് വരെ നമ്മുടെ രാജ്യത്ത് നിലനിന്നിരുന്ന ഇസ്ലാമിക അന്തരീക്ഷമായിരുന്നു “മുത്വലാഖ്‌ “സുപ്രീംകോടതി ആ അന്തരീക്ഷത്തെ ക്രിമിനൽ കുറ്റമായി പ്രഖ്യാപിച്ചു. അത്തരം അന്തരീക്ഷത്തിൽ പഠിച്ചവർ ഇനി ആ പണിക്ക് നിന്നാൽ ജാമ്യമില്ലാത്ത കേസാകുകയും ചെയ്യും. അതുകൊണ്ട് മത അന്തരീക്ഷങ്ങൾ ഒന്ന് സൂക്ഷിക്കുക…

തീവ്ര മുസ്‌ലിം രാഷ്ട്രമായ പാകിസ്താനിലും ഇറാനിലും നിരോധനമുള്ള അനിസ്ളാമികവും മനുഷ്യത്വ രഹിതവുമായ ഇസ്ലാമിക് അന്തരീക്ഷമായിരുന്നു നമ്മുടെ നാട്ടിലെ മുത്വലാഖ്‌
മുഹമ്മദ് നബിയോളം സ്ത്രീ സമൂഹത്തെ ആദവരോടെയും സ്നേഹത്തോടെയും ഉത്തരവാദിത്വത്തോടെയും പരിരക്ഷിച്ച മറ്റൊരു പ്രവാചകനുമുണ്ടാകില്ല മനുഷ്യ സമൂഹത്തിന്. എന്നാൽ മുസ്‌ലിം വ്യക്തി നിയമത്തിന്റെ അടിസ്ഥാനത്തിൽ ഇന്ത്യയിൽ കാലങ്ങളായി പിന്തുടർന്നു വരുന്ന മുത്വലാഖ്‌ എന്ന വിവാഹമോചന രീതി ഇസ്ലാമിക വിശ്വാസങ്ങൾക്ക് തന്നെ കളങ്കമാണ് എന്ന് പരിഷ്കൃത സമൂഹം തിരിച്ചറിഞ്ഞത് അടുത്ത കാലത്താണ്.
ശബരിമല പ്രവേശനത്തിന് കേസ് കൊടുത്തത് ഹിന്ദു സ്ത്രീകളാണ് എന്നതുപോലെ മുത്വലാഖിനെതിരെ കേസ് കൊടുത്തത് മുസ്‌ലിം സ്ത്രീകളും സംഘടനകളുമായിരുന്നു എന്നത് മറ്റൊരു സത്യം

ഇസ്‌ലാം മൂന്ന് ത്വലാഖ് കൊണ്ട് വിവക്ഷിക്കുന്നത് വിവധ ഘട്ടങ്ങളിലായി മൂന്നു തവണ വിവാഹം കഴിച്ചു ഭാര്യയെ മോചിപ്പിക്കുന്നതിനാണ്. ഒരു മരുന്ന് മൂന്നു തവണ കഴിക്കണമെന്ന് ഡാക്ടര്‍ പറഞ്ഞാല്‍ ഒരേ ഇരിപ്പില്‍ മൂന്നു ഇറക്കി അകത്തേക്കാക്കുക എന്നതല്ല എന്ന സിംപിൾ ലോജിക്ക് മാത്രം കണക്കിലെടുത്താൽ ഈ വിഷയത്തെ അതിന്റെ അസ്തിത്വത്തെ മനസിലാക്കാൻ സാധിക്കും. എന്നാൽ നേരിട്ടോ അല്ലാതെയോ വി. ഖുർആനിൽ പരാമർശിക്കാത്ത മുത്വലാഖ്‌ തീർത്തും നീതി നിഷേധവും മനുഷ്യാവകാശ ലംഘനവുമാണ് എന്ന് ഇസ്ലാമിക് അന്തരീക്ഷത്തിൽ പഠിച്ചവരും ജീവിച്ചവരും ഇപ്പോൾ തിരിച്ചറിയുന്നു.

ലളിതമായൊരു ചടങ്ങിലൂടെ സ്ത്രീയും പുരുഷനും ഒരുമിക്കുന്ന ദാമ്പത്യ കരാറാണ് വിവാഹമെന്നതിലൂടെ ഇസ്‌ലാം നിഷ്കർഷിക്കുന്നത്. മീസാഖുന്‍ ഗലീള്- സുദൃഢമായ കരാര്‍ എന്നാണ് വി.ഖുര്‍ആന്‍ വിശേഷിപ്പിച്ചിരിക്കുന്നത്. എന്നുവെച്ചാല്‍ ഒരിക്കല്‍ നിലവില്‍ വന്നുകഴിഞ്ഞാല്‍ വിവാഹബന്ധം അത്ര സുദൃഢമാണ്. തീര്‍ത്തും ഒഴിവാക്കാന്‍ കഴിയാത്ത, ഒത്തുതീര്‍പ്പിന് ഒരു പഴുതുമില്ലാത്ത ഘട്ടത്തിലല്ലാതെ വിവാഹബന്ധം വിഛേദിക്കാവതല്ല. അത്തരം സന്ദര്‍ഭങ്ങളില്‍ ദൈവികസിംഹാസനം കുലുങ്ങുമെന്നും പരമകാരുണികനായ ദൈവംതമ്പുരാന്‍ അത്യന്തം കോപിഷ്ഠനായിരിക്കുമെന്നും പ്രവാചകന്‍ പഠിപ്പിക്കുന്നു. ദൈവകോപത്തിന്റെ ഫലം സര്‍വനാശമായിരിക്കുമെന്ന ഇസലാമികാധ്യാപനം പ്രത്യേകം ഓര്‍ക്കേണ്ടതുണ്ട്. ഇനി വല്ല അനിവാര്യ സാഹചര്യത്തിലും ബന്ധം വിഛേദിക്കേണ്ടി വന്നാല്‍ വിവാഹമുക്തയായ സ്ത്രീക്ക് ഭര്‍തൃഗൃഹം ഉപേക്ഷിക്കാതെ അതേ വീട്ടില്‍ താമസിച്ചുകൊണ്ട് ഒരിക്കല്‍ ഉപേക്ഷിച്ച ഭര്‍ത്താവിന് തന്നോടുളള മനോഭാത്തില്‍ മാറ്റംവരുത്താനുളള സാഹചര്യം സംജാതമാക്കാന്‍ അവസരം ഒരുക്കുന്നു ഇസലാം. നിശ്ചിത ദീക്ഷകാലം(ഇദ്ദ) കഴിയും മുമ്പാണെങ്കില്‍ പുതിയൊരു നിക്കാഹ് കൂടാതെ തന്നെ ഭര്‍ത്താവിന് അവളെ തിരിച്ചെടുക്കാം. അതായത് അപൂർവ്വങ്ങളിൽ അപൂർവ്വമായി മാത്രം സംഭവിക്കാൻ പാടുള്ള ഒന്നായി മാത്രമാണ് വി. ഖുർആനും ഇസ്‌ലാമും വിവാഹമെന്ന പവിത്ര ബന്ധത്തെ കണ്ടിട്ടുള്ളത്. സംഭവിക്കാൻ പാടില്ലാത്ത കാര്യങ്ങളിൽ ഏറ്റവും പ്രധാനപ്പെട്ടതും ത്വലാഖ് ആണെന്ന് വി. ഖുർആൻ പഠിപ്പിക്കുന്നു.

ത്വലാഖ് എന്നത് ഘട്ടംഘട്ടമായിരിക്കണമെന്ന ഖുര്‍ആന്റെ ശാസന പരസ്യമായി ലംഘിക്കാൻ ആഹ്വാനം ചെയ്യുന്ന മുത്വലാഖ്‌ എന്ന ഏര്‍പ്പാടിനെ ഖുര്‍ആനില്‍ വിശ്വസിക്കുന്ന സൊ കോൾഡ് വിശ്വാസികൾക്ക് വിശ്വാസിക്കു എങ്ങനെയാണ് ഇത്രയും കാലം സ്വീകരിക്കാൻ സാധിച്ചത് ❓️
ഇന്ത്യയുമായി അതിർത്തി പങ്കിടുന്നതും, നമ്മുടെ ഭാഷയും വേഷങ്ങളും സംസ്ക്കാരവും ഉൾപ്പെടെ നമ്മുടെ സംസ്ക്കാരങ്ങളെല്ലാം പിന്തുടരുന്ന Islamic Republic of Pakisthan എന്ന തീവ്ര മുസ്‌ലിം രാജ്യമായ പാകിസ്ഥാനും, ലോകത്തിലെ ഏറ്റവും വലിയ മുസ്‌ലിം രാജ്യമായ ഇന്തോനേഷ്യയും, അഫ്‌ഗാനിസ്ഥാനും , ഇറാനും, തുർക്കിയും, സൈപ്രസും, ബംഗ്ലദേശും, ട്യുണീഷ്യയും, അൾജീരിയയും മലേഷ്യയുമുൾപ്പെടെ ലോകത്തിലെ 21 മുസ്‌ലിം ഭൂരിപക്ഷ രാജ്യങ്ങളോ മുസ്‌ലിം റിപ്പബ്ലിക്കുകളോ മുത്വലാഖ്‌ എന്ന അനാചാരം നിരോധിച്ചിട്ടുണ്ട് എന്ന വസ്തുത പരിശോധിക്കുമ്പോഴാണ് ലോകത്തിലെ ഏറ്റവും വലിയ ജാനാധിപത്യ രാജ്യം ഇങ്ങനൊരു ഇസ്ലാമിക അന്തരീക്ഷത്തിൽ സ്ത്രീകളെ ബലിയാടുകളാകുന്നത്. മേൽ പറഞ്ഞിരിക്കുന്ന നിരോധനം ഏർപ്പെടുത്തിയിട്ടുള്ള രാജ്യങ്ങളിലെല്ലാം യഥാർത്ഥ മുസ്ലീങ്ങളല്ല ജീവിക്കുന്നതും അവയൊന്നും ഇസ്ലാമിക രജ്യങ്ങളല്ല എന്ന് പറയാൻ സാധിക്കുമോ ?
പാകിസ്ഥാനിലെ Muslim Family Law Ordinance in 1961. Section 7 ത്വലാഖിനെ സംബന്ധിക്കുന്നതാണ്. ആ വകുപ്പിൽ 6 ഉപവകുപ്പുകളുണ്ടെങ്കിലും 7(6) പ്രകാരമാണ് മുത്വലാഖിന്റെ നിരോധനം. സെക്ഷൻ 7(6) “Nothing shall debar a wife whose marriage has been terminated by talaq effective under this section from marrying the same husband, without an intervening marriage with a third person, unless such termination is for the third time, so effective.”
പത്തു ശതമാനം മുസ്ലീങ്ങൾ അധിവസിക്കുന്ന അയൽരാജ്യമായ ശ്രീലങ്കയിൽ നിലവിലുള്ള Sri Lanka’s Marriage and Divorce (Muslim) Act, 1951 നു 2006 ൽ വരുത്തിയ ഭേദഗതി പ്രകാരം മുത്വലാഖ്‌ നിരോധിച്ചിരിക്കുന്നു എന്നതും നാം പരിശോധിക്കേണ്ട വസ്തുതയാണ്.
ഇന്ത്യയിലെ ഹിന്ദു മത വിശ്വാസികൾ തങ്ങളുടെ ദൈവങ്ങളായി ആരാധിക്കുന്ന ഗണപതിക്ക് രണ്ടു ഭാര്യമാരുണ്ട്, ശ്രീകൃഷ്ണന് ഒന്നല്ല രണ്ടല്ല പതിനാറായിരത്തി എട്ട് ഭാര്യമാരോ/കാമുകിമാരോ ഉണ്ടായിരുന്നു. എന്നാൽ ഹിന്ദു മതത്തിൽ പെട്ട ഒരാൾക്ക് നമ്മുടെ നാട്ടിൽ ബഹുഭാര്യത്വം നിരോധിക്കപ്പെട്ടിട്ടുണ്ട് എന്ന വസ്തുത നാം യുക്തിപരമായി പരിശോധിക്കേണ്ടതാണ്. അതായതു ഏത് വിശ്വാസ പ്രമാണത്തിന്റെ ഭാഗമായാലും യുക്തിക്ക് നിരക്കുന്നതും ഭരണഘടനയ്ക്ക് വിധേയമായതുമായ ആചാരങ്ങളോ സമ്പ്രദായങ്ങളോ മാത്രമാണ് നാം പിന്തുടരേണ്ടത്.
അഡ്വ ശ്രീജിത്ത് പെരുമന