ഒരേ കോണകം സിദ്ധീഖ് കാപ്പൻ ഇടുമ്പോൾ വള്ളി ട്രൗസറായും, ഗോസ്വാമിയിടുമ്പോൾ ബർമുഡയായും പരിഗണിക്കുന്ന കോടതി എന്ത് നീതിയാണ് ഉയർത്തിപ്പിടിക്കുന്നത് ❓️

125

അഡ്വ ശ്രീജിത്ത്‌ പെരുമന

ഒരേ കോണകം സിദ്ധീഖ് കാപ്പൻ ഇടുമ്പോൾ വള്ളി ട്രൗസറായും, ഗോസ്വാമിയിടുമ്പോൾ ബർമുഡയായും പരിഗണിക്കുന്ന കോടതി എന്ത് നീതിയാണ് ഉയർത്തിപ്പിടിക്കുന്നത് ❓️

പാർലമെന്റിലെ മൃഗീയ ഭൂരിപക്ഷത്തിന്റെ മറവിൽ ഭരണഘടനയെ അപ്രസക്തമാക്കികൊണ്ട് രാജ്യത്തെ ഭിന്നിപ്പിച്ചു ഭരിക്കാനും, ന്യുനപക്ഷങ്ങളെ ഉന്മൂലനം ചെയ്ത് ഹിന്ദു രാഷ്ട്രം നിർമ്മിക്കാനുമുള്ള ഫാസിസ്റ്റ് ഭരണകൂടത്തിന്റെ നടപടികൾ അതിന്റെ മൂർദ്ധന്യാവസ്ഥയിൽ എത്തി നിൽക്കുകയാണ്. ഭരണഘടനയുടെ അടിസ്ഥാന തത്വങ്ങളെ വെല്ലുവിളിച്ചുകൊണ്ട് നിയമനിർമ്മാണം നടത്തി പ്രാദേശികമായും, വംശീയമായും, മതാധിഷ്ഠിതമായും ജനങ്ങളെ ഭിന്നിപ്പിച്ചുകഴിഞ്ഞിരിക്കുന്നു. രാജ്യത്താകമാനം നടക്കുന്ന പ്രക്ഷോഭങ്ങളെ ഇന്റർനെറ്റും, സഞ്ചാരവും , അഭിപ്രായ സ്വാതന്ത്ര്യവും ഉൾപ്പെടെയുള്ള മൗലികാവകാശങ്ങൾ നിഷേധിച്ചുകൊണ്ട് അടിച്ചമർത്താനുള്ള ഭരണകൂട ശ്രമങ്ങൾ ജനാധിപത്യത്തിന്റെ ആണിക്കല്ലിളക്കുന്നതാണ്.

സംഘപരിവാറിനെ വിമർശിച്ചതിന്റെ പേരിൽ സാമൂഹിക പ്രവർത്തകരും, എഴുത്തുകാരും, മാധ്യമപ്രവർത്തകരും, വിദ്യാർത്ഥികളുമെല്ലാം കഴിഞ്ഞ ഒരുപാട് നാളുകളായി ജയിലുകളിൽ തളക്കപ്പെട്ടിരിക്കുകയാണ്. വന്ദ്യ വയോധികരായ 83 വയസ്സ് കഴിഞ്ഞവരുടെ ജാമ്യപേക്ഷപോലും കേൾക്കാതെ അതിന് മുകളിൽ അടയിരിക്കുന്ന ഭരണഘടനയുടെ കാവലാളായ സുപ്രീംകോടതി സംഘ വിരുദ്ധരായവരുടെ വിഷയത്തിൽ കുറ്റകരമായ മൗനം പുലർത്തുകയും സംഘപരിവാറിന് ഓശാന പാടുന്നവരുടെ അവകാശങ്ങൾ ഉയർത്തിപ്പിടിക്കുകയും ചെയ്യുന്നത് വിരോധാഭാസമാണ്.രാഷ്ട്രതാത്പര്യത്തെയും, വലിയ പൊതുജനതാത്പര്യത്തെയും മുൻ നിർത്തി ഭരണഘടനയുടെ നഗ്നമായ ലംഘനത്തിൽ സ്വമേധയാ ഇടപെടേണ്ടിയിരുന്ന കോടതി കേവലം നോട്ടീസ് അയച്ച ശേഷം കോടതിയുടെ വാതിലും പൂട്ടി അവധി ആഘോഷത്തിന് പോകുന്നത് കാണാൻ വിധിക്കപ്പെട്ട ജനതയാണ് നമ്മൾ

വധശിക്ഷ വിധിക്കപ്പെട്ടവർ പോലും അകാരണമായി ജീവപര്യന്തം കാലഘട്ടം ജയിലിൽ കിടക്കേണ്ടി വരുന്നവരുടെയും , വിചാരണ തടവുകാരായി പത്തും പതിനഞ്ചും വർഷം ജയിലിൽ കിടക്കണേണ്ടി വരുന്ന മനുഷ്യരുടെയും നാടാണിത്. കോടിക്കണക്കിനു കേസുകൾ വിവിധ കോടതികളിൽ കെട്ടികിടക്കുമ്പോഴും മാസങ്ങളോളം അവധിദിനങ്ങൾ ആഘോഷിക്കാൻ കോടതി പൂട്ടിയിടുന്ന നാടാണെന്ന വിരോധാഭാസം ചൂണ്ടിക്കാണിച്ചുകൊണ്ട് പറയട്ടെ… പൗര സ്വാതന്ത്ര്യത്തിനായി സാധാരണ മനുഷ്യർ സർവ്വതും വിറ്റു പെറുക്കിയ പണം കൊണ്ട് ഹര്ജികൾ ഫയൽ ചെയ്യുമ്പോഴും അതിന് മുകളിൽ കാലങ്ങളോളം അടയിരിക്കുന്ന കോടതി ഗോസ്വാമിമാരുടെ കേസുകൾ യുദ്ധകാല അടിസ്ഥാനത്തിൽ തീർപ്പാക്കുന്നു.

പൗരത്വ നിയമത്തിനെതിരായ കേസിലും, പൗരവകാശ ലംഘനങ്ങളുള്ള കേസുകളിലും കക്ഷികളായവർക്ക് നോട്ടീസ് അയക്കുക എന്ന മറ്റേതൊരു കേസിലേതും നടക്കുന്നതുപോലെയുള്ള സാധാരണ നടപടിക്രമം മാത്രമാണ് കോടതികൾ നടത്താറുള്ളത്. പാതിരാത്രിക്ക് കേസ് പരിഗണിച്ച് വിധി പുറപ്പെടുവിച്ച് നേരം വെളുക്കുന്നതിനു മുൻപ് പൗരന്മാരെ തൂക്കിക്കൊന്ന് സംസ്കരിക്കുന്ന നാടാണ് നമ്മുടേത് എന്നതുകൂടി ഓർമ്മവേണം.തെരുവിൽ ജനങ്ങൾ മരിച്ചു വീണപ്പോൾ..”റെയിൽവെ ട്രാക്കിൽ അവർ ഉറങ്ങാൻ തീരുമാനിച്ചാൽ ആർക്കാണ് തടയാൻ കഴിയുക?

അവർ നടക്കണോ വേണ്ടയോ എന്നെല്ലാം സംസ്ഥാനങ്ങൾ തീരുമാനിക്കട്ടെ. കോടതികൾ എന്തിനാണ് ഇക്കാര്യം ചർച്ച ചെയ്യുന്നത് ”
മഹാരാഷ്ട്രയിൽ പാളത്തിലുറങ്ങിക്കിടന്ന 16 തൊഴിലാളികൾ ട്രെയിൻ കയറി മരണമടഞ്ഞത് ചൂണ്ടിക്കാണിച്ചപ്പോൾ രാജ്യത്തെ ഏറ്റവും പരമോന്നതമായ കോടതി നടത്തിയ അഭിപ്രായപ്രകടനമാണിത്.മനുഷ്യന്റെ ജീവിക്കാനുള്ള മൗലികാവകാശം ഏറ്റവും വലിയ അവകാശമായി അനുവദിച്ചു നൽകുന്ന ഭരണഘടനയുടെ കാവൽക്കാരാണ് സുപ്രീംകോടതി . അതുകൊണ്ടുതന്നെ നൂറു കണക്കിന് പട്ടിണിപ്പാവങ്ങളുടെ ജീവനുകൾ തെരുവിൽ പൊലിഞ്ഞിട്ടും അത് ചൂണ്ടിക്കാണിച്ച് ഒരു ഹർജ്ജി വരുന്ന സാഹചര്യത്തിൽ തങ്ങളുടെ മുന്നിലേക്ക് വന്ന ഹർജികൾ പരിഗണിച്ച് അങ്ങേയറ്റം നിരുത്തരവാദിത്വപരവും, മരിച്ചുവീണ മനുഷ്യജീവനുകളെ അപമാനിക്കുന്ന രീതിയിലും പരാമർശങ്ങൾ നടത്തി ഹർജ്ജി നൽകിയ അഭിഭാഷകനെ ശകാരിച്ചുകൊണ്ട് ഹർജ്ജി തള്ളിയ നടപടിയെ അംഗീകരിക്കാൻ സാധ്യമല്ല.

പട്ടിണി പാവങ്ങൾക്ക് ഒരു നേരത്തെ അന്നം കിട്ടാൻപോലും കോടതി ഉത്തരവുണ്ടാകേണ്ട സാഹചര്യത്തിൽ ഗോസ്വാമിമാരിടുമ്പോൾ ബർമുഡയും, മറ്റുള്ളവരിടുമ്പോൾ വള്ളി ട്രൗസറുമാകുന്ന കോടതികളിൽ ജനങ്ങൾക്കുള്ള വിശ്വാസ്യതയ്ക്ക് കോട്ടം തട്ടിയാൽ അത് കർമ്മഫലമായി കരുതേണ്ടിവരും.