കേരളകോൺഗ്രസ് തീർച്ചയായും ക്രിസ്ത്യൻ പ്രീണന രാഷ്ട്രീയ ഉൽപ്പന്നം തന്നെയാണ്

48

Ajith Neervilakan

കേരള കോൺഗ്രസ്സ്, അതിൻ്റെ ഇന്നത്തെ രാഷ്ട്രീയ പ്രസക്തി, ഇവയൊക്കെ ചർച്ചയ്ക്കെടുക്കുന്നത് തന്നെ കേരള മോഡൽ മതജാതി ചേരിതിരിവ് രാഷ്ട്രീയത്തിൽ അപ്രസക്തമാണ് . രണ്ടു വ്യാഴവട്ടത്തിന് മുമ്പ് നിലനിന്നിരുന്ന മാടമ്പി രാഷ്ട്രീയ സംസ്കാരത്തിലെ ഉപഉൽപ്പന്നമായ പി ടി ചാക്കോയും മാണിയും ഒന്നും ഇന്നത്തെ മതജാതി രാഷ്ട്രീയത്തിൽ അപ്രസക്തമാണ്. അതെ.. കേരളകോൺഗ്രസ് തീർച്ചയായും ക്രിസ്ത്യൻ പ്രീണന രാഷ്ട്രീയ ഉൽപ്പന്നം തന്നെയാണ്. എന്നാൽ അന്നത്തെ രാഷ്ട്രീയ സാഹചര്യങ്ങളിൽ നിന്ന് ഇന്നിന് കാതലായ ഒരു വ്യത്യാസമുണ്ട്. അന്ന് നിലവിലുള്ള മതേതര ജൽപ്പകരായ കേരളത്തിലെ ആൾക്കൂട്ട പാർട്ടികൾ, തങ്ങൾ മതേതരാണന്ന് ഊട്ടിയുറപ്പിക്കാനും എന്നാൽ തങ്ങൾക്ക് കിട്ടാതെ പോയേക്കാവുന്ന അധികാരം നിലനിർത്താനുമായി, ജാതിമത സൈക്കോസിസുകളെ കൂടി ആവശ്യമുണ്ടന്ന തിരിച്ചറിവിലും, കരുതിക്കൂട്ടി വളമിട്ട് കുരുപ്പിച്ചെടുത്ത കേരള കോൺഗ്രസ്, മുസ്ലീം ലീഗ് തുടങ്ങി ഈർക്കിൽ ചുള്ളികളായ മറ്റു ഹിന്ദുജാതി പാർട്ടികൾ എല്ലാം തന്നെ ഇന്ന് അപ്രസക്തമാണ് അല്ലങ്കിൽ വരുന്ന ഒരു വ്യാഴവട്ടത്തിനുള്ളിൽ കർട്ടന് പിന്നിലെ നിലവിളി ശബ്ദങ്ങളായി മാത്രം മാറാൻ വിധിക്കപ്പെട്ടവരാണ്. കാരണം അതേ ആൾക്കൂട്ട പാർട്ടികളുടെ ഇന്നത്തെ നേതാക്കന്മാർക്ക് മതജാതി ഭ്രാന്തുകളെ തണുപ്പിക്കാൻ മറ്റ് ഉപാധികളുടെ ആവശ്യമില്ലാത്തവരായി മാറിയിരിക്കുന്നു. നേരിട്ട് കിട്ടുന്ന കുളിർ കാറ്റിൻ്റെ അത്ര തണുപ്പും കുളിരും ഇത്തരം കൃത്രിമ കുളിരോപാധികൾക്ക് കിട്ടില്ല എന്ന സത്യം മതജാതി തലതൊട്ടപ്പന്മാർക്കും ബോധ്യമായിരിക്കുന്നു.

അന്ന് സ്വാധീന രാഷ്ട്രീയമായിരുന്നങ്കിൽ ഇന്ന് പ്രീണന രാഷ്ട്രീയമാണ്. അവിടെ ചെറുപാർട്ടി ഇടനാഴി ചർച്ചകളുടെ ആവശ്യമില്ലാതെ നേരിട്ട് മതജാതി സ്വീകരണമുറികളിൽ എത്താനുള്ള ഉളുപ്പില്ലായ്മ എല്ലാ ആൾക്കൂട്ട പാർട്ടികളിലും പ്രകടമായി കഴിഞ്ഞു. അതിനാൽ തന്നെ ഇത്തരം ചെറു പാർട്ടികൾക്ക് പ്രസക്തമായ ഒരു സ്ഥാനവും ഇന്നിൻ്റെ രാഷ്ട്രീയത്തിൽ ഇല്ല എന്ന് നിസംശയം പറയാം. പൊട്ടിത്തെറിച്ച് ചെറു കഷ്ണങ്ങളായി ഇനി വരുന്ന തിരഞ്ഞെടുപ്പ് ചൂടുകളിൽ ഉരുകി ഒലിച്ച് തേഞ്ഞു പോകാനുള്ളതാണ് ജോസും ജോസഫും ജോർജും തുടങ്ങി മറ്റെല്ലാ ഞാഞ്ഞൂലുകളും.

Advertisements