കേരളത്തിന്റെ തൊഴിൽ മേഖലയ്ക്ക് ലഭിക്കാൻ പോകുന്ന ഏറ്റവും തിളക്കമുള്ള മൂലധനമാണ് തിരിച്ചു വരുന്ന ഓരോ പ്രവാസിയും

    117

    Basheer Vallikkunnu

    ഏഷ്യാനെറ്റിലെ ചർച്ചയിൽ ഫസൽ ഗഫൂർ പറയുന്നത് കേട്ടു, ഗൾഫിൽ നിന്ന് തിരിച്ചു വരുന്നവരൊക്കെ വൈറ്റ് കോളർ ജോലിക്കാരായിരിക്കും, നമ്മുടെ നാട്ടിലെ പണികൾക്ക് അവരെ കിട്ടാൻ പാടാണ്. അന്യസംസ്ഥാന തൊഴിലാളികളെ തന്നെ നാം തിരിച്ചു കൊണ്ട് വരേണ്ടി വരും എന്ന്.

    ഗൾഫിൽ ജോലി ചെയ്യുന്നവരെക്കുറിച്ചും തിരിച്ചു വരാൻ പോകുന്ന ലക്ഷക്കണക്കിന് തൊഴിലാളികളെക്കുറിച്ചുമൊക്കെയുള്ള നമ്മുടെ ധാരണകൾ തിരുത്തേണ്ട കാലമായി എന്ന് തോന്നുന്നു. ഏത് ജോലിയും എടുക്കാൻ തയ്യാറുള്ള വളരെ അദ്ധ്വാന ശീലരായ ഒരു വർക്ക് ഫോഴ്സ്സാണ് ഗൾഫിൽ ജോലി ചെയ്യുന്ന പ്രവാസികൾ.. 555 സിഗരറ്റ് വലിച്ച് അത്തറ് പൂശി നടക്കുന്ന ഗൾഫുകാരനെക്കുറിച്ചുള്ള പഴയ സങ്കൽപമൊക്കെ മാറ്റി വെക്കേണ്ട കാലമായി.

    Gulf Arab blue-collar workforce continues to grow: UN | Saudi ...പന്ത്രണ്ടും പതിനാലും മണിക്കൂറുകൾ വിശ്രമമില്ലാതെ കഠിന ജോലി ചെയ്യുന്നവരാണ് ഗൾഫ് മേഖലയിലെ പ്രവാസികളിൽ ബഹുഭൂരിപക്ഷവും.. വൈറ്റ് കോളർ എക്സിക്യൂട്ടീവ് ജോലിക്കാരൊക്കെ വളരെ കുറഞ്ഞ ശതമാനമാണ്.. തിരിച്ചു വരുന്നവരിൽ അത്തരക്കാർ വളരെ കുറവായിരിക്കും. സാധാരണ തൊഴിലാളികളാണ് തിരിച്ചു വരാൻ പോകുന്നവരിൽ ഭൂരിപക്ഷവും.

    കൃത്യമായ പരിഗണകൾ നൽകി വേണ്ടത്ര തൊഴിലവസരങ്ങൾ തിരിച്ചു വരുന്ന പ്രവാസികൾക്ക് നല്കുന്നതിനെക്കുറിച്ച് ഗൗരവമായി ആലോചിക്കേണ്ട സമയമാണിത്.. ഗൾഫ് മേഖലയിലെന്നല്ല, എല്ലായിടത്തും തൊഴിൽ രംഗം വലിയ തിരിച്ചടികളെ നേരിടാൻ പോവുകയാണ്.. അന്യസംസ്ഥാന തൊഴിലാളികൾ തിരിച്ചു പോകുന്ന വാക്വം പൂർണ്ണമായല്ലെങ്കിലും ഒരളവു വരെ ഫിൽ ചെയ്യുവാൻ പല സ്ഥലങ്ങളിൽ നിന്നായി കേരളത്തിലേക്ക് തിരിച്ചു വരുന്ന തൊഴിലാളികൾക്ക് സാധിക്കും. അതിനൊരു പ്ലാൻ നമുക്കുണ്ടാകുക എന്നതാണ് പ്രധാനം. ഷോപ്പുകൾ, സൂപ്പർ മാർക്കറ്റുകൾ, മാളുകൾ തുടങ്ങി പലയിടങ്ങളിൽ അവർക്ക് തൊഴിലവസരങ്ങൾ ഉണ്ടാക്കാൻ കഴിയും. സമാനമായ തൊഴിലുകൾ തന്നെയാണ് ഗൾഫിലും പലരും ചെയ്യുന്നത്.. ഗൾഫിൽ നിന്ന് വരുന്നവർ മാത്രമല്ല, അന്യ സംസ്ഥാനങ്ങളിൽ നിന്ന് വരുന്നവരെക്കൊണ്ടും കേരളം നിറയാൻ പോവുകയാണ്.

    തിരിച്ചു വരുന്നവരിൽ ഒരു “ഗൾഫ് കോംപ്ലക്സ്” കുറച്ച് കാലം ഉണ്ടായേക്കും.. എന്നാൽ കോവിഡിന് ശേഷമുള്ള തകരുന്ന സാമ്പത്തിക അവസ്ഥയിൽ അത്തരം കോംപ്ലക്സുകൾക്ക് വലിയ ആയുസ്സുണ്ടാവില്ല. ഇപ്പോൾ വേണ്ടത് തിരിച്ചു വരുന്നവരെ പരിഗണിക്കുന്നുണ്ട് എന്ന വിശ്വാസം പകർന്ന് നൽകുക എന്നതാണ്. ആർക്കും വേണ്ടാത്ത ഒരു വിഭാഗമായി ഞങ്ങൾ മാറിയല്ലോ എന്ന സങ്കടപ്പെരുമഴയാണ് പ്രവാസികളിൽ ഇപ്പോഴുള്ളത്. അതെങ്കിലും ഇല്ലാതാക്കാനുള്ള സമീപനപരമായ മാറ്റങ്ങൾ വേണം.

    ഒരു കാര്യം ഉറപ്പാണ്, ഗൾഫിൽ നിന്ന് തിരിച്ചു വരുന്നവരെ ജോലിക്ക് വെക്കുന്ന ഒരു സ്ഥാപനമുടമയും ഖേദിക്കേണ്ട അവസ്ഥ വരില്ല.. അത്ര അച്ചടക്കമുള്ള ഒരു ജോബ് കൾച്ചറും കൊണ്ടാണ് അവർ തിരിച്ചു വരുന്നത്. അനാവശ്യ അവധികൾ എടുക്കാതെ കൃത്യമായി ജോലിക്കെത്തുന്ന ഒരു സംസ്കാരവും കൊണ്ടാണ് അവരുടെ മടങ്ങി വരവ്.. വളരെ പരിമിതമായ ജീവിത സാഹചര്യങ്ങളിലും ആരോടും പരാതി പറയാതെ ജോലിയെടുക്കുന്ന ഒരു വിഭാഗമാണവർ. കേരളത്തിന്റെ തൊഴിൽ മേഖലയ്ക്ക് ലഭിക്കാൻ പോകുന്ന ഏറ്റവും തിളക്കമുള്ള മൂലധനമാണ് തിരിച്ചു വരുന്ന ഓരോ പ്രവാസിയും.