യാഥാസ്ഥിതികതയുടെ കണ്ണാടികളെ തച്ചുടയ്ക്കുന്ന ഛായാമുഖി

സുഷോബ് കെവി രചനയും സംവിധാനവും നിർവഹിച്ച ഒരു സൈക്കോളജിക്കൽ ത്രില്ലർ ഷോർട്ട് ഫിലിം ആണ് ഛായാമുഖി. ബൂലോകം ടീവി ഒടിടി പ്ലാറ്റ്ഫോം ഷോർട്ട് ഫിലിം കോണ്ടസ്റ്റിൽ മത്സരവിഭാഗത്തിൽ ഉൾപ്പെടുത്തിയിരിക്കുന്ന ഷോർട്ട് ഫിലിം കൂടിയാണ് ഇത്. ഫൈസൽ പികെ മടിക്കൈ ആണ് ഛായാമുഖി നിർമ്മിച്ചിരിക്കുന്നത്. രേഷ്മയും നീരജ് രാമകൃഷ്ണയും പ്രധാനവേഷങ്ങളിൽ അഭിനയിച്ചിരിക്കുന്നു. ഈ ഷോർട്ട് ഫിലിം വളരെ പുരോഗമനപ്രദമായ ആശയത്തെയാണ് ചർച്ചയ്ക്കു വയ്ക്കുന്നത്.

പാട്രിയാർക്കിയും മതബോധ യാഥാസ്ഥിതികതകളും സ്ത്രീകളുടെ സ്വതന്ത്ര ജീവിതത്തിന് എന്നും വിലങ്ങുതടിയായിരുന്നു. സ്ത്രീയെ കെട്ടിപ്പൂട്ടിവയ്‌ക്കേണ്ട ഒരു വസ്തുവായി മാത്രം പരിഗണിക്കുന്ന അധമബോധങ്ങൾ നാടിൻറെ മുന്നോട്ടുള്ള പോക്കിന് പോലും നാണക്കേടായി ഇന്നും നിലനിൽക്കുകയാണ്. യാഥാസ്ഥിതികർക്കു പറയാൻ ഒരുപാട് കാരണങ്ങൾ ഉണ്ട് .  സ്ത്രീയുടെ കന്യകാത്വം, ചാരിത്ര്യം, ശാരീരികക്ഷമത…തുടങ്ങി പലകാര്യങ്ങൾ കൊണ്ട് അവർ തർക്കിക്കുമ്പോൾ ഇതൊക്കെ സ്ത്രീകൾക്ക് മാത്രമേ ബാധകമായിട്ടുള്ളൂ എന്ന പഴയ നൂറ്റാണ്ടിന്റെ പ്രാകൃതബോധങ്ങൾ കളസസ്യങ്ങളെ പോലെ നമുക്ക് ചുറ്റും അജയ്യമായി തന്നെ വളർന്നുനിൽക്കുകയാണ് എന്ന് മനസിലാക്കാം. കന്യകാത്വം, ചാരിത്ര്യം, വേശ്യാവൃത്തി ഇവയ്ക്കൊന്നും പുല്ലിംഗമില്ലാത്ത ഒരു നാടാണ് നമ്മുടേതെന്നു ചിന്തിക്കുമ്പോൾ അതിന്റെ ഭീകരത മനസിലാക്കാൻ സാധിക്കും.

ഛായാമുഖി ബൂലോകം ടീവി ഒടിടി പ്ലാറ്റ്‌ഫോമിൽ കാണാം

ഇവിടെ പുരുഷന്മാർ മാത്രമാണോ വില്ലന്മാർ ? അല്ല . അവന്റെ എല്ലാ കല്പനകളെയും സങ്കുചിതബോധങ്ങളെയും അരിയിട്ടുവഴിക്കുന്നത് സ്ത്രീകൾ കൂടി തന്നെയാണ്. ഒരർത്ഥത്തിൽ ഇത്തരം സ്ത്രീകൾ തന്നെയാണ് വനിതകളുടെ മുന്നേറ്റങ്ങളിൽ ഏറ്റവും തടസം സൃഷ്ട്ടിക്കുന്ന പുരുഷന്റെ ചട്ടുകങ്ങൾ. കഴിഞ്ഞ വർഷങ്ങളിൽ സമൂഹത്തെ ഇളക്കി മറിച്ച ചില പ്രശ്നങ്ങളിൽ പോലും നമ്മളത് കണ്ടതാണ്. ഛായാമുഖി പറയുന്നത് എന്താണ് ?  എന്താണ് ഈ ഛായാമുഖി ?

അതൊരു കണ്ണാടിയാണ്. വനവാസക്കാലത്തു ഹിഡുംബി ഭീമന് നൽകിയ കണ്ണാടി. ആ കണ്ണാടിയിൽ മുഖം നോക്കിയാൽ നമ്മുടെ മുഖമല്ല, നാം ഏറ്റവുമധികം സ്നേഹിക്കുന്ന ആളിന്റെ പ്രതിബിംബമാണ് അതിൽ തെളിയുക. ഭീമൻ ആ കണ്ണാടിയിൽ നോക്കുമ്പോൾ തന്റെ മുഖമാകും തെളിയുക എന്ന് കരുതി ഹിഡുംബി ആ കണ്ണാടി ഭീമന് നൽകുന്നു , എന്നാൽ ഭീമൻ അതിൽ നോക്കുമ്പോൾ തെളിയുന്നത് ദ്രൗപതിയുടെ പ്രതിബിംബമായിരുന്നു. പ്രണയനൈരാശ്യത്തോടെ അലർച്ചയോടെ കാട്ടിലേക്ക് പോയിമറഞ്ഞ ഹിഡുംബി നമ്മുടെ മനസുകളിൽ കോറിയിട്ടത് നൊമ്പരം തന്നെയാണ്.

കഥയവിടെ നിൽക്കട്ടെ… ഇവിടെ ഒരുവൾ തന്റെ ഉള്ളിൽ തന്നെ വഹിക്കുന്നൊരു കണ്ണാടിയാണ് ഛായാമുഖി .മേല്പറഞ്ഞതുപോലുള്ള യാഥാസ്ഥിതികതകളും പാട്രിയാർക്കിയും തെളിയുന്ന ആ ദർപ്പണത്തിൽ നോക്കി അവൾ തന്നോട് തന്നെ തർക്കിക്കുകയാണ്. പുരുഷമേധാവിത്വവും മതകല്പനകളും സമൂഹവും കുടുംബവും ചുറ്റിനും അക്ഷൗണിപ്പട നയിക്കുമ്പോൾ ഓരോ പെണ്ണും തോൽക്കുന്നത് അവയോട് യുദ്ധം ചെയ്തിട്ടല്ല. മറിച്ചു തന്റെ ഉള്ളിൽ തന്നെ തനിക്കെതിരെയും പുരോഗമനത്തിനെതിരെയും പോരാടാനുള്ള ബോധങ്ങൾ നൂറ്റാണ്ടുകളുടെ ജനിതകബോധം വഴി പകർന്നുകിട്ടിയിട്ടുണ്ട് . ഗോത്രകാലജീവിതത്തിൽ , സ്ത്രീയുടെ ഏതോ ദശാസന്ധി കാലങ്ങളിൽ …തുടങ്ങിവച്ച ജനിതകബോധം. അത് തലമുറകളിലൂടെ അവൾ അവളെ തന്നെ അടിച്ചമർത്തുന്ന പ്രേരകശക്തിയായി തുടർന്നുകൊണ്ടേയിരിക്കുന്നു.

പെണ്ണായാൽ ഇങ്ങനെയാകണം എന്ന് സ്വയം പറഞ്ഞു പഠിച്ച, സ്വയം സ്ഥാപിച്ച , വീട്ടിലെ ഇളമുറക്കാരികളെ അടിച്ചമർത്തുന്ന സ്ത്രീബോധങ്ങൾ തന്നെയാണ് സ്ത്രീയുടെ ഏറ്റവുംവലിയ ശത്രു. ആ ശത്രു ഒരു പുരുഷരൂപമണിഞ്ഞു കൊണ്ടുതന്നെ അവളുടെ ഛായാമുഖിയിൽ അവളോട് വാദിച്ചു ജയിക്കാൻ ശ്രമിക്കുകയാണ്. ആ കണ്ണാടി പൊട്ടിച്ചുകളയാതെ നൂറ്റാണ്ടുകളുടെ യാഥാസ്ഥിതിക പ്രതിബിംബങ്ങൾ തകരുകയില്ല എന്ന് അവൾക്കറിയാം. ആ പ്രതിബിംബങ്ങൾ ഒന്നോ പത്തോ അല്ല.. നൂറും ആയിരവും അല്ല.. പതിനായിരങ്ങൾ തന്നെയുണ്ട്. നമ്മുടെ ചുറ്റിനും കാണുന്ന സ്ത്രീകൾ എല്ലാം അതിലെ പ്രതിബിംബങ്ങളാണ്. രാത്രി എട്ടുമണിക്ക് ശേഷം റോഡിൽ ഇറങ്ങാൻ ഒരുവളുടെ ഉള്ളിൽ ഭയം നാമ്പിടുമ്പോൾ അവളും യാഥാസ്ഥിതിക ദർപ്പണത്തിലെ പ്രതിബിംബമാകുന്നു. ആ കണ്ണാടി ഉടച്ചുകളഞ്ഞേ മതിയാകൂ. താൻ ഏറ്റവും സ്നേഹിക്കുന്ന തന്നെ വീണ്ടെടുത്തു കാലത്തിന്റെ കണ്ണാടിയിൽ സ്ഥാപിക്കേണ്ടതുണ്ട് ഓരോ പെണ്ണിനും.

നിങ്ങൾ തര്ക്കിച്ചുകൊണ്ടേയിരിക്കുക, സംവാദങ്ങൾ കൊഴുക്കട്ടെ . നിങ്ങളുടെ ‘കുറവുകളെ’ചൂണ്ടി തർക്കിക്കുന്ന മനുഷ്യപോത്തുകളുടെ വരിയുടയ്ക്കുക . നിങ്ങളുടെ അശ്വമേധങ്ങളിൽ സ്വാതന്ത്ര്യബോധത്തിന്റെ ഫെമിനിസത്തിന്റെ ചിന്താധാരകളുടെ കുതിരക്കുളമ്പടികൾ മുഴങ്ങട്ടെ… രാജ്യങ്ങളെയും ഭൂഖണ്ഡങ്ങളെയും തന്നെ അധിനിവേശിച്ചു മതബോധങ്ങളുടെ യാഥാസ്ഥിതിക ഗോപുരങ്ങളെ നിലംപരിശാക്കി … സംവാദങ്ങൾ, പോരാട്ടങ്ങൾ തുടരട്ടെ….

സുഷോബ് കെവി ബൂലോകം ടീവിയോട് സംസാരിക്കുന്നു

“ഞാൻ ‘പാതി’ക്കു ശേഷം ഏറ്റവുമൊടുവിൽ ആയി ചെയ്തത് ചെയ്തതാണ് ഛായാമുഖി എന്ന ഷോർട്ട് ഫിലിം. ഇതിൽ കൊണ്ടുവന്ന ഐഡിയ ശരിക്കും രണ്ടാമത് ചിന്തിച്ചതായിരുന്നു . ആദ്യം കൊണ്ടുവന്നത് രണ്ടു കഥാപാത്രങ്ങളുടെ മൈൻഡിൽ നിന്നുള്ള ആ ഒരു ആശയം അതായിരുന്നു എന്റെ മനസ്സിൽ ആദ്യം വന്നത്. അതിലേക്കു അതൊരു ആശയത്തെ ഉൾക്കൊള്ളിക്കും എന്നായിരുന്നു പ്രധാനമായും ചിന്തിച്ചത്. അങ്ങനെയാണ് പാട്രിയാർക്കി വിരുദ്ധമായ ആശയത്തെ അതിലേക്കു കൊണ്ടുവന്നത്.”

SUSHOB KV

“നമ്മൾ എത്രയൊക്കെ സമത്വം വേണമെന്ന് സ്ത്രീകൾ തന്നെ പറയുന്നുണ്ടെങ്കിലും പുരുഷനും സ്ത്രീയും ഒന്നാണ് എന്നൊക്കെ പറയുന്നുണ്ടെങ്കിലും അവരുടെ മൈൻഡിൽ തന്നെ മറ്റൊരു ഭാഗത്തു പുരുഷനാണ് തങ്ങളേക്കാൾ വലുതെന്നു തോന്നൽ ഉള്ള സ്ത്രീകൾ വളരെയധികമുണ്ട്. ഇതൊന്നും എല്ലാ സ്ത്രീകളുടെയും കാര്യമല്ല. ഒരു കാരക്റ്ററിന്റെ കാര്യം മാത്രമാണ്. ഞാൻ സംസാരിക്കുന്നത് എന്റെ കാര്യം മാത്രമാണ് എന്ന് അതിലെ കഥാപാത്രം തന്നെ പറയുന്നുണ്ട്.”

“നമ്മൾ എന്തിനെയൊക്കെ റെപ്രെസന്റ് ചെയ്യാൻ ശ്രമിച്ചാലും നമ്മൾ ഒരു പോയിന്റിൽ എത്തുമ്പോൾ നമുക്കുവേണ്ടിമാത്രമേ വാദിക്കാൻ സാധിക്കുകയുള്ളൂ. അത് ഏതൊരു ആശയധാര ആയിരുന്നാലും അങ്ങനെ തന്നെ. പൊതുവായ വാദങ്ങൾക്കൊക്കെ ഒരു പരിധിയുണ്ട്. എല്ലായിടത്തേയ്ക്കും നമുക്ക് കടന്നുകയറാൻ പറ്റില്ല. ഞാൻ സംസാരിക്കുന്നതു എനിക്കുവേണ്ടിയാണ് എന്ന് ഇതിലെ കഥാപാത്രം പറയുന്നതുപോലെ എല്ലാരും ചിന്തിച്ചാൽ മതിയല്ലോ.”

“ഇതിലെ പ്രധാനകഥാപാത്രത്തെ അവതരിപ്പിച്ച രേഷ്മ എന്റെ സുഹൃത്തിന്റെ അനിയത്തിയാണ്. അവൾ ഡ്രാമയും സ്കിറ്റും ഒക്കെ ചെയ്‌തു എക്സ്പീരിയൻസ് ഉള്ള ആളാണ്. അവളുടെ അഭിനയം കണ്ടു ഇഷ്ടം തോന്നിയിട്ടാണ് ഇതിലേക്ക് വിളിച്ചത്. പിന്നെ എന്റെയൊരു കുഞ്ഞു ഷോർട്ട് ഫിലിമിൽ രേഷ്മ അഭിനയിച്ചിരുന്നു. രേഷ്മ ഒരു ഫുട്ബാൾ പ്ലെയർ ആണ്. എന്റെ കഥാപാത്രമാകാൻ യോജിച്ചവൾ എന്ന് തോന്നിയിട്ട് കൂടിയാണ് ഛായാമുഖിയിൽ അഭിനയിപ്പിച്ചത്. പിന്നെ നീരജ് രാമകൃഷ്ണ എന്റെ പരിചയത്തിലെ ഒരു ചേട്ടൻ ആണ്. അഭിനയത്തോട് ഭയങ്കര പാഷൻ ഉള്ള വ്യക്തിയാണ്.”

അഭിമുഖത്തിന്റെ ശബ്‌ദരേഖ

“ഇതിന്റെ സ്ക്രിപ്റ്റ് എഴുതി ഫ്രണ്ട്സിനെയൊക്കെ കാണിച്ചപ്പോൾ ഇതിൽ നാടകീയത അനുഭവപ്പെടുമോ എന്ന് സംശയം വന്നിരുന്നു. എന്നാൽ അങ്ങനെ ആയാലും പ്രശ്നമില്ല എന്നുതോന്നി. കാരണം ..ഇത് രണ്ടുപേരുടെ ഉള്ളിൽ നടക്കുന്ന കാര്യമാണ്. അതുകൊണ്ടുതന്നെയാണ് അല്പം നാടകീയത വന്നാലും കുഴപ്പമില്ലെന്ന് കരുതി ആ ഡയലോഗുകൾ അവിടെ വരുന്നത്. രണ്ടുപേർ സ്വാഭാവികമായി സംസാരിക്കുമ്പോൾ അങ്ങനെയൊന്നും പറയാറില്ലല്ലോ.”

ഛായാമുഖി ബൂലോകം ടീവി ഒടിടി പ്ലാറ്റ്‌ഫോമിൽ കാണാം

⁣

CHAAYAAMUKHI

Malayalam Psychological Thriller Shortfilm
Written and Directed by SUSHOB KV

⁣Written&Direction:SUSHOB KV
Produced by : FAISAL PK MADIKAI
DOP: SANU PINNACLE
EDITING: ALWIN
BGM ANAND SEKHAR
STUDIO &VFX : AKV MEDIA PILIKODE
SOUND DESIGN : SHOBHITH MADIKAI
ASSISTANT DIRECTOR: UNNI BGM
SUBTITLES: ARUN CHAND & NANDANA

CAST:
RESHMA
NEERAJ RAMAKRISHNA

ഛായാമുഖി ബൂലോകം ടീവി ഒടിടി പ്ലാറ്റ്‌ഫോമിൽ കാണാം > CLICK > CHAAYAAMUKHI

 2,328 total views,  3 views today