Bineesh K Achuthan
26 വർഷം മുമ്പ് ഇന്നേ ദിവസം (ഡിസംബർ19/20) നടന്ന ഒരു ക്ലാഷ് റിലീസ്.
1. കമൽ – ശത്രുഘ്നൻ ടീമിന്റെ ദിലീപ് – മഞ്ജു വാര്യർ ചിത്രം ഈ പുഴയും കടന്ന്
2. ഹരികുമാർ – ലോഹിതദാസ് ടീമിന്റെ മമ്മൂട്ടി – കാവേരി ചിത്രം ഉദ്യാനപാലകൻ
3. സിബി മലയിൽ – ശശിധരൻ ആറാട്ടുവഴി ടീമിന്റെ ജയറാം – മഞ്ജു വാര്യർ ചിത്രം കളിവീട്.
ഹിറ്റായ ഒരു ജോടിയെ ആവർത്തിച്ച് വീണ്ടും ഹിറ്റടിക്കുന്ന കമലിന്റെ 90 – കളിലെ മാജിക് ആവർത്തിച്ച ചിത്രമായിരുന്നു ഈ പുഴയും കടന്ന്. അതേ വർഷം സമ്മർ സീസണിൽ റിലീസ് ചെയ്തു സൂപ്പർ ഹിറ്റായി മാറിയ, ദിലീപ് – മഞ്ജു വാര്യർ ജോടിയുടെ സല്ലാപത്തേക്കാൾ വലിയ വിജയമായിരുന്നു ഈ പുഴയും കടന്ന് നേടിയത്. ശത്രുഘ്നന്റെ പ്രഥമ തിരക്കഥ ഇതാണെന്ന് തോന്നുന്നു. സല്ലാപത്തിലെ താരനിര ഏകദേശം ഈ ചിത്രത്തിലും ആവർത്തിച്ചിരുന്നു. ഗിരീഷ് പുത്തഞ്ചേരിയുടെ വരികൾക്ക് ജോൺസൺ ഈണം നൽകിയ ഗാനങ്ങൾ എല്ലാം ഹിറ്റായിരുന്നു. 90 – കളുടെ രണ്ടാം പകുതിയിൽ മഞ്ജു വാര്യരും ഭാരതപ്പുഴയും വള്ളുവനാടും ഒരു തരംഗമാകാൻ സല്ലാപമെന്ന പോലെ ഈ പുഴയും കടന്നും ഒരു പങ്ക് വഹിച്ചിട്ടുണ്ട്.
കൗമാരക്കാരിക്ക് മധ്യവയസ്ക്കനോട് തോന്നുന്ന പ്രണയത്തെ അധികരിച്ചു രചിച്ച പത്മരാജന്റെ ഐ.വി.ശശി ചിത്രമായ കാണാമറയത്തിൽ നിന്നും വിഭിന്നമായ പശ്ചാത്തലത്തിലാണ് ലോഹിതദാസ് ഉദ്യാനപാലകന്റെ രചന നിർവഹിച്ചിട്ടുള്ളത്. മമ്മൂട്ടിക്കൊപ്പം മത്സരിച്ചുള്ള പ്രകടനമായിരുന്നു കാവേരിയും കാഴ്ച്ച വച്ചത്. എന്നാൽ ഏതാനും സീനുകളിലെ ഗംഭീര പ്രകടനം കൊണ്ട് കലാഭവൻ മണി ഷോ സ്റ്റീലറായി.
ഒരു കൊമേഡിയൻ എന്നതിലുപരി ഒരു അഭിനേതാവ് എന്ന നിലയിൽ മണിയെ നിരൂപകരും പ്രേക്ഷകരും ഒരു പോലെ പ്രശംസിച്ച പ്രകടനമായിരുന്നു ഉദ്യാന പാലകനിലെ ലൈൻമാൻ ജോസിന്റെ വേഷത്തിൽ കലാഭവൻ മണി കാഴ്ച്ച വച്ചത്. പിൽക്കാലത്ത് കൾട്ടായി മാറിയ കണ്ടു കൊണ്ടേൻ കണ്ടു കൊണ്ടേൻ എന്ന രാജീവ് മേനോന്റെ തമിഴ് ചിത്രത്തിലെ മമ്മൂട്ടിയുടെ മേജർ ബാല എന്ന വേഷം ഉദ്യാനപാലകനിലെ സുധാകരൻ നായരുടെ എക്സ്റ്റൻഷനാണെന്ന് തോന്നിയിട്ടുണ്ട്.
ആ വർഷം ജയറാമിന്റെ നായികയായി മഞ്ജു വാര്യർ അഭിനയിച്ച രണ്ട് ഓണ ചിത്രങ്ങളും സർപ്രൈസ് ഹിറ്റുകളായിരുന്നു. ജയറാമാണെങ്കിൽ സകല സൂപ്പർ താര ചിത്രങ്ങളെയും മലർത്തിയടിച്ച് ഓണത്താരമായി വിലസുന്ന സമയവും. സ്വാഭാവികമായും ഈ ജോടി ക്രിസ്മസ് സീസണിൽ ഒരുമിക്കുമ്പോൾ പ്രതീക്ഷകൾ ഉയരുക സ്വാഭാവികം. എന്നാൽ പ്രതീക്ഷകൾക്കനുസരിച്ചുയരാൻ കളിവീടിന് കഴിഞ്ഞില്ല.
