ചിട്ടപ്പെടുത്തിയത്: അറിവ് തേടുന്ന പാവം പ്രവാസി
ലോക സുന്ദരി പട്ടവും (Miss World ) ,വിശ്വ സുന്ദരി പട്ടവും (Miss Universe ) തമ്മിൽ എന്താണ് വ്യത്യാസം ? എന്താണു മിസ് യൂണിവേഴ്സ് ആയാലുള്ള ഗുണം ? എത്രയാണു മൽസരത്തിന്റെ സമ്മാനത്തുക ? വിശ്വസുന്ദരിക്ക് എന്തൊക്കെ കിട്ടും?⭐
👉ലോകമെമ്പാടും ഗണ്യമായ അളവിലുള്ള സൗന്ദര്യമത്സരങ്ങൾ വർഷം തോറും നടത്തപ്പെടുന്നു, എന്നിരുന്നാലും, ഇതിൽ ഏറ്റവും വലിയതും പ്രശസ്തവുമായത് നാലെണ്ണം മാത്രമാണ് .
⚡1.ലോക സുന്ദരി പട്ടം (Miss World) : ഒറ്റ വാക്കിൽ പറഞ്ഞാൽ അന്താരാഷ്ട്ര സൗന്ദര്യമത്സരമാണിത്. 1951 ജൂലൈ 29-ന് ബ്രിട്ടനിൽ എറിക് മോർലി എന്നയാളാണ് ഇതിന് തുടക്കം കുറിച്ചത്. ആദ്യകാലത്ത് ബിക്കിനി മത്സരം എന്ന പേരിൽ അറിയപ്പെട്ടത് പിന്നീട് ലോക സുന്ദരി മത്സരം എന്നായി മാറി.
2000 ൽ അദ്ദേഹത്തിന്റെ മരണശേഷം, ഭാര്യ ജൂലിയയാണ് മത്സരം നടത്തിയത്. സൗന്ദര്യം , മാത്രമല്ല അറിവും , ബുദ്ധിയുമെല്ലാം മിസ്സ് വേൾട്ട് പട്ടം നേടാൻ വേണം. അവയെല്ലാം പരിശോധിച്ചാണ് പുരസ്കാരം ലഭിക്കുക. ഫെസ്റ്റിവൽ ഓഫ് ബ്രിട്ടന്റെ ഒരു മത്സരമായിട്ടാണ് ഈ മത്സരം ആദ്യം ആസൂത്രണം ചെയ്തിരുന്നതെങ്കിലും എറിക് മോർലി മിസ്സ് വേൾഡ് മത്സരത്തെ ഒരു വാർഷിക പരിപാടിയാക്കാൻ തീരുമാനിച്ചു. മോർലി “മിസ്സ് വേൾഡ്” നാമം ഒരു വ്യാപാരമുദ്രയായി രജിസ്റ്റർ ചെയ്തു .
ഭാവിയിലെ എല്ലാ മത്സരങ്ങളും ആ പേരിൽ നടന്നു.
ഇന്ത്യയിൽ നിന്നും 1994-ൽ ഐശ്വര്യ റായി ,2000-ൽ പ്രിയങ്കാ ചോപ്ര, 2017-ൽ മാനുഷി ചില്ലാർ എന്നിവർ ലോക സുന്ദരി പട്ടം അണിഞ്ഞു.മലയാളിയായ പാർവതി ഓമനക്കുട്ടൻ 2008-ൽ മിസ് വേൾഡ് റണ്ണർ അപ്പായിരുന്നു. ലോകസുന്ദരിപ്പട്ടം നേടുന്ന ആദ്യ ജേതാവ് സ്വീഡനിലെ കികി ഹകാൻസൺ ആണ്.ബിക്കിനിയിൽ കിരീടമണിഞ്ഞ ഏക മിസ്സ് വേൾഡ് ഹൊകാൻസണാണ്.നമ്പർ 3, നമ്പർ 2, നമ്പർ 1 എന്നീ ക്രമങ്ങളിലാണ് പിരിമുറുക്കം നിലനിർത്തി മിസ്സ് വേൾഡ് വിജയികളെ പ്രഖ്യാപിക്കുന്നത്.
മിസ്സ് വേൾഡ് ഓർഗനൈസേഷൻ 250 ദശലക്ഷം ഡോളറിലധികം കുട്ടികളുടെ ചാരിറ്റികൾക്കായി സ്വരൂപിക്കുന്നു.നൂറിലധികം രാജ്യങ്ങളിൽ മിസ് വേൾഡ് ഫ്രാഞ്ചൈസിയുണ്ട്.ഇൻഡ്യയിൽ ഫെമിന ആണ് ഇത് സംഘടിപ്പിക്കുന്നത് .മിസ്സ് വേൾഡ്, ലിമിറ്റഡ് ഒരു സ്വകാര്യ ഉടമസ്ഥതയിലുള്ള സ്ഥാപനമായതിനാൽ അതിന്റെ വരുമാനം, ചെലവുകൾ, ജീവകാരുണ്യ പ്രവർത്തനങ്ങൾ എന്നിവയുടെ കണക്കുകൾ പൊതുവായി ലഭ്യമല്ല.
⚡2.മിസ്സ് യൂണിവേഴ്സ്(Miss Universe):
കാലിഫോർണിയ വസ്ത്ര കമ്പനിയായ കാറ്റലീന പസഫിക് മിൽസ് എന്ന സ്വിം സ്യൂട്ട് കമ്പനി 1952-ൽ സൃഷ്ടിച്ച ഒരു വാർഷിക അന്താരാഷ്ട്ര സൗന്ദര്യ പരിപാടിയാണിത്. മിസ് യൂണിവേഴ്സ് ഓർഗനൈസേഷനാണ് വിശ്വ സുന്ദരി പട്ടം (Miss Universe) മത്സരം സംഘടിപ്പിക്കുന്നത്. ഇതിൽ സൗന്ദര്യത്തേക്കാൾ പ്രധാനം മത്സരാർഥിയുടെ കഴിവ് തന്നെ. ഇന്ത്യയിൽ നിന്നും 2000-ൽ ലാറ ദത്തയും, 1994-സുസ്മിതാ ന്നും നേരത്തെ വിശ്വസുന്ദരി പട്ടം നേടിയിട്ടുണ്ട്. 21 വർഷത്തിനു ശേഷമാണ് മിസ് യൂണിവേഴ്സ് കിരീടം ഇന്ത്യയിലേക്ക് ഹർനാസ് സന്ധു എത്തിച്ചത്.
ലോക സുന്ദരി-വിശ്വ സുന്ദരി പട്ടങ്ങൾ രണ്ട് വ്യത്യസ്ത ലോക സംഘടനകൾ നടത്തുന്നുവെങ്കിലും ചില ചെറിയ കാര്യങ്ങളിലെ വ്യത്യാസങ്ങൾ ഒഴിച്ച് വലിയ മാറ്റങ്ങൾ ഇല്ല. മിസ്സ് വേൾഡിൽ പങ്കെടുക്കുന്നവർ 172 സെന്റീമീറ്ററിനേക്കാൾ ഉയരമുള്ളവരായിരിക്കണം . മിസ്സ് യൂണിവേഴ്സിൽ ഉയരത്തിന് അത്തരം കർശന നിയന്ത്രണങ്ങളൊന്നുമില്ല. മാത്രമല്ല, മിസ്സ് വേൾഡ് മത്സരത്തിൽ പങ്കെടുക്കുന്നവർക്ക് കുറഞ്ഞത് ഒരു വിദേശ ഭാഷയെങ്കിലും അറിയുകയും അത് നിലനിർത്താൻ കഴിയുകയും വേണം.
പൊതുവേ, പങ്കെടുക്കുന്നവരുടെ ബാഹ്യ ഡാറ്റയേക്കാൾ അവരുടെ കഴിവുകൾ തിരിച്ചറിയുന്നതിനാണ് ഈ മത്സരം കൂടുതൽ ലക്ഷ്യമിടുന്നത് .ഫിൻലൻഡിന്റെ അർമി കുസേലയാണ് ആദ്യത്തെ മിസ് യൂണിവേഴ്സ്. രണ്ടരലക്ഷം യുഎസ് ഡോളറാണു മിസ് യൂണിവേഴ്സിന്റെ സമ്മാനത്തുക. ഇന്ത്യൻ രൂപയിൽ കണക്കാക്കിയാൽ ഏകദേശം 1.8 കോടി രൂപ വരുമിത്. ഇതുകൂടാതെ ഒരു വലിയ പ്രതിമാസ തുക ഒരു വർഷത്തേക്കു കിട്ടുമെന്നും അഭ്യൂഹമുണ്ട്. ഇത് സ്ഥിരീകരിക്കപ്പെട്ടിട്ടില്ല. മിസ് യൂണിവേഴ്സ് പട്ടം ലഭിക്കുന്നവർക്ക് കിട്ടുന്ന ഏറ്റവും വലിയ ഭാഗ്യം ലോകത്തെ തന്നെ ഏറ്റവും വില കൂടിയ കിരീടങ്ങളിലൊന്ന് തലയിൽ വയ്ക്കാനുള്ള അവസരമാണ്. 1770 വജ്രങ്ങൾ പതിച്ച ഈ കിരീടത്തിനു കോടികൾ വിലമതിക്കും. ഇതു തന്നുവിടുകയൊന്നുമില്ല. എന്നാൽ മിസ് യൂണിവേഴ്സ് സംഘടന അംഗീകരിച്ചിട്ടുള്ള ഒരുപിടി ചടങ്ങുകളിൽ ഈ കിരീടം വച്ചുകൊണ്ടു വിശ്വസുന്ദരിക്കു പോകാം.
ന്യൂയോർക്ക് നഗരത്തിൽ മിസ് യൂണിവേഴ്സ് അപ്പാ‍ർട്മെന്റിൽ ഒരു വർഷം സൗജന്യമായി വസിക്കാനും വിശ്വസുന്ദരിക്ക് അവസരം ലഭിക്കും. ഒട്ടേറെ സൗകര്യങ്ങുള്ള ആഢംബര വീടാണിത്. കൂടാതെ അസിസ്റ്റന്റുമാരും , മേക്കപ്പ്മാൻമാരുമുൾപ്പെടെ പ്രഫഷനലുകളുടെ ഒരു ടീമിനെയും വിശ്വസുന്ദരിക്ക് ലഭിക്കും. മുന്തിയ നിലവാരത്തിലുള്ള മേക്കപ്പ്, കേശസംരക്ഷണ ഉത്പന്നങ്ങൾ, പാദരക്ഷകൾ, ആഭരണങ്ങൾ തുടങ്ങിയവയൊക്കെയും ഒരുവർഷത്തേക്ക് ഇവർക്ക് ലഭിക്കും. കൂടാതെ വൻകിട ചടങ്ങുകൾ, സിനിമകളുടെയും , മറ്റും സ്ക്രീനിങ് ചടങ്ങുകൾ എന്നിവയിലൊക്കെ പങ്കെടുക്കാനുള്ള ക്ഷണവും വിശ്വസുന്ദരിയെ തേടി വരും. ലോകമെമ്പാടും സൗജന്യമായി യാത്ര,സൗജന്യ താമസ–ഭക്ഷണ ഫീസുകൾ തുടങ്ങിയവയും കിട്ടും.
ഇതിനെല്ലാമപ്പുറം, മോഡലിങ്, സിനിമ, കല തുടങ്ങിയ മേഖലകളിൽ താൽപര്യമുള്ളവർക്ക് വലിയ അവസരങ്ങൾ മിസ് യൂണിവേഴ്സ് പട്ടം സമ്മാനിക്കുന്നുണ്ട്. നമ്മുടെ രാജ്യത്ത് ഇതിനു മുൻപ് മിസ് യൂണിവേഴ്സായ സുസ്മിത സെന്‍, ലാറാ ദത്ത തുടങ്ങിയവർക്ക് ബോളിവുഡിൽ നിന്നൊക്കെ മികച്ച അവസരങ്ങൾ ലഭിച്ചിരുന്നു. സൗന്ദര്യമത്സരങ്ങളുടെ സാധ്യമായ അവാർഡുകളിൽ സേവിംഗ്സ് ബോണ്ടുകൾ, സ്കോളർഷിപ്പുകൾ, സമ്മാന തുക എന്നിവ ഉൾപ്പെടുന്നു. തത്സമയ ടിവി കവറേജിന്റെ കാര്യത്തിൽ ലോകത്തിലെ ഏറ്റവും വലിയ മത്സരമാണ് മിസ്സ് യൂണിവേഴ്സ് . ലോകമെമ്പാടുമുള്ള 190 ലധികം രാജ്യങ്ങളിൽ പ്രതിവർഷം 500 ദശലക്ഷത്തിലധികം പ്രേക്ഷകർക്കായി ഇത് സംപ്രേഷണം ചെയ്യുന്നു.
മിസ് യൂണിവേഴ്സിൽ പങ്കെടുക്കാൻ ഏറ്റവും കുറഞ്ഞ പ്രായം 18 ആണ്.2012 മുതൽ ട്രാൻസ്‌ജെൻഡർസും പങ്കെടുക്കാൻ തുടങ്ങി.വിജയികൾക്ക് മിസ് യൂണിവേഴ്സ് ഓർഗനൈസേഷനുമായി ഒരു വർഷത്തെ കരാർ നൽകിയിട്ടുണ്ട്, പല രാജ്യങ്ങളിലും പോയി മാരകരോഗങ്ങളുടെ നിയന്ത്രണം, സമാധാനം, എയ്ഡ്സിനെക്കുറിച്ചുള്ള പൊതു അവബോധം എന്നിവയെക്കുറിച്ച് സന്ദേശങ്ങൾ പ്രചരിപ്പിക്കണം.വിജയിക്ക് ഒരു കാരണവശാലും, മിസ് യൂണിവേഴ്സ് എന്ന നിലയിൽ തന്റെ ചുമതലകൾ നിറവേറ്റാൻ കഴിയുന്നില്ലെങ്കിൽ ആ സ്ഥാനം ഒന്നാം റണ്ണർഅപ്പ് ഏറ്റെടുക്കുന്നു. ഈ പ്രോട്ടോക്കോൾ സംഭവിച്ചത് 2020 ൽ ഒരു തവണ മാത്രമാണ് .
1994-ൽ സുസ്മിത സെന്നും , ഐശ്വര്യ റായിയും യഥാക്രമം മിസ് യൂണിവേഴ്സ്, മിസ്സ് വേൾഡ് കിരീടങ്ങള്‍ നേടുന്നതിന് മുന്‍പ് ഇന്ത്യയുടെ അഭിമാനമായ സുന്ദരിയാണ് റീത്ത ഫാരിയ (Reita Faria). ഇന്ത്യയിൽ നിന്നുമാത്രമല്ല, ഏഷ്യയിൽ നിന്നുപോലും ഈ കിരീടം നേടുന്ന ആദ്യ വനിതയാണ് റീത്ത ഫാരിയ. Best in Swimsuit, Best in Eveningwear എന്നിവ വിജയിച്ചതിന് ശേഷമാണ് 1966-ൽ റീത്ത മിസ് വേള്‍ഡ് (Miss World) കിരീടം സ്വന്തമാക്കിയത്.
2000-ൽ മിസ് യൂണിവേഴ്സ് മത്സരത്തിൽ വിജയിക്കുന്ന രണ്ടാമത്തെ ഇന്ത്യൻ വനിതയായിരുന്ന ലാറ ദത്ത നേടിയ വിജയം ഐതിഹാസികമാണ്. മത്സരത്തിന്‍റെ ചരിത്രത്തിലെ ഏറ്റവും ഉയർന്ന സ്കോറുകൾ നേടിയാണ് ചരിത്രം സൃഷ്ടിച്ചത്.
⚡3- മിസ് ഇന്റർനാഷണൽ:1960-ൽ തുടങ്ങിയ ടോക്കിയോ ആസ്ഥാനമായുള്ള ഇന്റർനാഷണൽ കൾച്ചർ അസോസിയേഷൻ സംഘടിപ്പിക്കുന്ന അന്താരാഷ്ട്ര സൗന്ദര്യ മത്സരമാണിത്. മിസ് ഇന്റർനാഷണൽ ബ്യൂട്ടി എന്നും ഇത് അറിയപ്പെടുന്നു. കൊളംബിയയുടെ സ്റ്റെല്ല മാർക്വേസ് ആദ്യ മിസ് ഇന്റർനാഷണൽ ആയി കിരീടമണിഞ്ഞു.
⚡4- മിസ്സ് എർത്ത്: ഇത് 2001-ൽ ആദ്യമായി നടത്തിയ ഒരു അന്താരാഷ്ട്ര പരിസ്ഥിതി പ്രമേയത്തിലുള്ള സൗന്ദര്യമത്സരമാണ്. ഫിലിപ്പൈൻ ആസ്ഥാനമായുള്ള കറൗസൽ പ്രൊഡക്ഷൻസ് മിസ് എർത്ത് ഫൗണ്ടേഷനാണ് പരിസ്ഥിതി അവബോധം പ്രോത്സാഹിപ്പിക്കുന്നതിനായി ഇത് സംഘടിപ്പിക്കുന്നത്. ബ്യൂട്ടി ഇവന്റ് ഗ്രീൻപീസ്, വേൾഡ് വൈൽഡ് ലൈഫ് ഫൗണ്ടേഷൻ, യുണൈറ്റഡ് നേഷൻസ് എൻവയോൺമെന്റ് പ്രോഗ്രാം എന്നിവയുൾപ്പെടെയുള്ള മറ്റ് സ്ഥാപനങ്ങളുമായി അഫിലിയേറ്റ് ചെയ്യുകയും പ്രവർത്തിക്കുകയും ചെയ്യുന്നു. ഡെന്മാർക്കിന്റെ കാതറീന സ്വെൻസണാണ് ആദ്യ മിസ് എർത്ത്.
💢 വാൽ കഷ്ണം💢
സൗന്ദര്യമത്സരം എന്നത് മത്സരാർത്ഥികളുടെ ശാരീരിക സവിശേഷതകളെ വിഭജിക്കുന്നതിലും , റാങ്കുചെയ്യുന്നതിലും പരമ്പരാഗതമായി ശ്രദ്ധ കേന്ദ്രീകരിച്ച ഒരു മത്സരമാണ് . എന്നിരുന്നാലും മിക്ക മത്സരങ്ങളും വ്യക്തിത്വ സവിശേഷതകൾ, ബുദ്ധി, കഴിവ്, വിവിധ വിഷയങ്ങളിൽ ജഡ്ജിമാരുടെ ചോദ്യങ്ങൾക്ക് ഉത്തരം നൽകാനുള്ള കഴിവ് എന്നിവയാണ് പരിഗണിക്കുന്നത്. “സൗന്ദര്യമത്സരം” എന്ന പദം പ്രധാനമായും സ്ത്രീകൾക്കുള്ള മത്സരങ്ങളെയാണ് സൂചിപ്പിക്കുന്നത്.
അന്താരാഷ്ട്ര സൗന്ദര്യമത്സരങ്ങൾക്ക് പുറമെ, ലോകമെമ്പാടുമുള്ള നിരവധി ചെറിയ മത്സരങ്ങൾ സൗന്ദര്യത്തിന്റെ വ്യത്യസ്ത ധാരണകൾ പ്രദർശിപ്പിക്കുന്നു. ഓരോ മത്സരത്തിന്റെയും സംഘാടകർക്ക് മത്സരാർത്ഥികളുടെ പ്രായപരിധി ഉൾപ്പെടെയുള്ള മത്സര നിയമങ്ങൾ നിർണ്ണയിക്കാം. മത്സരാർത്ഥികൾ അവിവാഹിതരായിരിക്കണം.
സൗന്ദര്യമത്സരങ്ങൾ പൊതുവെ മൾട്ടി-ടയർ ആണ് . ഉദാഹരണത്തിന്, അന്താരാഷ്ട്ര മത്സരങ്ങൾക്ക് നൂറുകണക്കിന് അല്ലെങ്കിൽ ആയിരക്കണക്കിന് പ്രാദേശിക മത്സരങ്ങളുണ്ട്. സൗന്ദര്യമത്സരത്തിലെ വിജയിയെ പലപ്പോഴും സൗന്ദര്യ രാജ്ഞി എന്ന് വിളിക്കുന്നു. മത്സരാർത്ഥികളുടെ റാങ്കിംഗിനെ പ്ലെയ്‌സ്‌മെന്റുകൾ എന്ന് വിളിക്കുന്നു.
മത്സരാർത്ഥികൾ സ്വിം‌സ്യൂട്ട് ധരിക്കേണ്ടതിന്റെ ആവശ്യകത വിവിധ മത്സരങ്ങളുടെ വിവാദപരമായ ഒരു വശമായിരുന്നു. 1946-ൽ ബിക്കിനി അവതരിപ്പിച്ചതിനുശേഷം ജനപ്രീതി വർദ്ധിച്ചതോടെ വിവാദം രൂക്ഷമായി. റോമൻ കത്തോലിക്കാ പ്രക്ഷോഭകർ കാരണം 1947-ൽ മിസ്സ് അമേരിക്ക മത്സരത്തിൽ ബിക്കിനി നിരോധിക്കപ്പെട്ടു. 1951-ൽ മിസ്സ് വേൾഡ് മത്സരം തുടങ്ങിയപ്പോൾ, വിജയിയെ ബിക്കിനിയിൽ കിരീടധാരണം ചെയ്തപ്പോൾ പ്രതിഷേധം ഉയർന്നു.
മതപാരമ്പര്യമുള്ള രാജ്യങ്ങൾ പ്രതിനിധികളെ പിൻവലിക്കുമെന്ന് ഭീഷണിപ്പെടുത്തി. ബിക്കിനികൾ (അല്ലെങ്കിൽ പൊതുവെ നീന്തൽക്കുപ്പായങ്ങൾ) സാമൂഹികമായി അംഗീകരിക്കപ്പെടാത്ത രാജ്യങ്ങളിൽ ഫൈനലുകൾ നടന്നപ്പോൾ വിവാദമുണ്ടാക്കി. ഉദാഹരണത്തിന്, 2003-ൽ അഫ്ഗാനിസ്ഥാനിൽ നിന്നുള്ള വിഡാ സമദ്‌സായി ചുവന്ന ബിക്കിനിയിൽ 2003 മത്സരത്തിൽ പങ്കെടുത്തപ്പോൾ ജന്മനാട്ടിൽ കോളിളക്കമുണ്ടാക്കി. അഫ്ഗാൻ സുപ്രീംകോടതി അവളെ അപലപിച്ചു .
