വന്ദനത്തിലെ ഗാഥയെ മലയാളികൾ ഒരിക്കലും മറക്കില്ല. ഹൃദയത്തെ അത്രത്തോളം തുളയ്ക്കുന്ന ഒരു പശ്ചാത്തല സംഗീതത്തിന്റെ അകമ്പടിയിൽ ഗാഥ തന്നെ സ്നേഹിക്കുന്നവനിൽ നിന്നും വഴിപിരിഞ്ഞു പോയെങ്കിലും മലയാളികളുടെ മനസ്സിൽ എന്നുമുണ്ടായിരുന്നു. വന്ദനവും തെലുങ്കിൽ നാഗാർജ്ജുന നായകനായ ഗീതാഞ്ജലിയുമാണ് ഗിരിജയ്ക്ക് ഏറെ ജനപ്രീതി നേടിക്കൊടുത്ത ചിത്രങ്ങൾ. 
മലയാളം, ഹിന്ദി, തെലുങ്ക് ഉൾപ്പെടെ ആറ് ചിത്രങ്ങളിൽ താരം അഭിനയിച്ചു. ഇംഗ്ലണ്ടിലാണ് ഗിരിജ ഷെട്ടാർ ജനിച്ചത്. പിതാവ് കർണ്ണാടകത്തിൽ നിന്നും ഇംഗ്ലണ്ടിലേക്ക് എത്തിയ ഡോക്ടറാണ്. അമ്മ ബ്രിട്ടീഷ് വശജയും. മണിരത്‌നത്തിൻറെ ഗീതാഞ്ജലിയിൽ അഭിനയിച്ചാണ് താരം സിനിമ യിലെത്തുന്നത്.
നീണ്ട ഇടവേളക്ക് ശേഷം ഗിരിജ ഷെട്ടാർ സ്‌ക്രീനിലേക്ക് തിരിച്ചെത്തുകയാണ്. രക്ഷിത് ഷെട്ടിയുടെ പരംവാ സ്റ്റുഡിയോസ് നിർമിക്കുന്ന ‘ഇബ്ബനി തബ്ബിട എന്ന ചിത്രത്തിലൂടെയായിരിക്കും ഗിരിജ തിരിച്ചെത്തുന്നത്. അഭിനേതാവും ഗായികയുമായ അങ്കിത അമരുമാണ് ചിത്രത്തിലെ പ്രധാന കഥാപാത്രമായി എത്തുന്നത്. 
ചന്ദ്രജിത്ത് ബെളിയപ്പയാണ് സംവിധായകൻ. രക്ഷിത് ഷെട്ടിയുടെ റൈറ്റിങ് ടീമിന്റെ അസോസിയേറ്റായി ചന്ദ്രജിത് പ്രവർത്തിച്ചിട്ടുണ്ട്. വാലന്റൈൻസ് ഡേയോടനുബന്ധിച്ച് കഴിഞ്ഞ ദിവസം ചിത്രത്തിന്റെ ലൊക്കേഷൻ ദൃശ്യങ്ങൾ അണിയറപ്രവർത്തകർ പുറത്തുവിട്ടിരുന്നു.
