അറിവ് തേടുന്ന പാവം പ്രവാസി
സിനിമയിലെ ചുംബന രംഗങ്ങളും , കിടപ്പറ രംഗങ്ങളുമൊക്കെ ചിത്രീകരിക്കുന്നത് എങ്ങനെ ? ശരിക്കും നടീ നടന്മാര്‍ നഗ്നരായി തന്നെയാണോ അഭിനയിക്കുന്നത് ? ഇതൊക്കെ സംവിധായകന്‍ പറഞ്ഞുകൊടുക്കുന്നതാണോ? ഇൻ്റിമേറ്റ് ഡയറക്ടറുടെ ജോലി എന്താണ്?
👉തിരക്കഥ മുതല്‍ ഒരു സിനിമ പ്രേക്ഷകര്‍ക്ക് മുന്നിലേക്ക് എത്തുന്നത് വരെ സിനിമയുണ്ടാകുന്ന വഴികള്‍ ഇപ്പോള്‍ ഒരുവിധം എല്ലാവര്‍ക്കും പരിചിതമായ കാര്യമാണ്. സിനിമ അതുകൊണ്ടൊക്കെ തന്നെയാണ് ജനകീയ കല ആകുന്നതും. സംവിധായകന്‍, ക്യാമറാമാന്‍, എഡിറ്റര്‍, മ്യൂസിക് ഡയറക്ടര്‍ തുടങ്ങി കാസ്റ്റിംഗ് ഡയറക്ടര്‍, വിഎഫ്എക്‌സ് ആര്‍ടിസ്റ്റ്, ഫോക്കസ് പുള്ളര്‍ വരെയുള്ള പേരുകളും അവര്‍ ചെയ്യുന്ന ജോലികളും പലര്‍ക്കും പരിചിതമാണ്. സോഷ്യല്‍ മീഡിയ തന്നെയാകാം ഒരു പക്ഷെ ഇത്തരം കാര്യങ്ങള്‍ ഇപ്പോള്‍ കൂടുതലായി എല്ലാവരിലേക്കും എത്തിക്കുന്നത്. ഒരു സിനിമ ഇറങ്ങി കഴിഞ്ഞാല്‍ അതിലെ മുക്കും ,മൂലയും വരെ പലരും പരിശോധനകള്‍ക്ക് വിധേയമാക്കാറുണ്ട്.
പലപ്പോഴും പാട്ടുകളും , സംഘടനരംഗങ്ങളുമൊക്കെ സംവിധാനം ചെയ്യുന്നത് സിനിമയുടെ സംവിധായകന്‍ തന്നെ ആകണമെന്നില്ല. നൃത്തരംഗം ഇപ്പോള്‍ പൂര്‍ണ്ണമായും സംവിധാനം ചെയ്യുന്ന കോറിയോഗ്രാഫേഴ്‌സ് ഉണ്ട്. ക്യാമറ ആംഗിള്‍ മുതല്‍ എഡിറ്റിംഗ് പോയിന്റുകള്‍ വരെ അവരാണ് തീരുമാനിക്കുന്നത്. സംഘട്ടന രംഗങ്ങള്‍ സംവിധാനം ചെയ്യാന്‍ സ്റ്റണ്ട് മാസ്‌റ്റേഴ്‌സും ഉണ്ട്. സംഘട്ടന രംഗത്ത് എന്തൊക്കെ വേണം ? എവിടെയൊക്ക ക്യാമറ വെക്കണം ? എങ്ങനെ എഡിറ്റ് ചെയ്യണം ?എന്നൊക്ക തീരുമാനം ഇപ്പോള്‍ അവര്‍ എടുക്കുന്നു. അതുപോലെ തന്നെ ഇന്ത്യന്‍ സിനിമയില്‍ പുതിയതായി വന്നിരിക്കുന്ന ഒരു മേഖലയാണ് ഇന്റിമസി കോഓര്‍ഡിനേറ്റര്‍. ദീപിക പദുകോൺ നായികയായെത്തുന്ന ഏറ്റവും പുതിയ ചിത്രമായ ഗേഹരിയാനിലെ ടൈറ്റിൽ ക്രെഡിറ്റ് ഭാഗത്ത് ഇൻ്റിമേറ്റ് ഡയറക്ടർ എന്ന ഈ പുതിയ തസ്തിക കൂടി ചേർത്തിട്ടുണ്ട്. ഇതുവരെ ഇന്ത്യൻ സിനിമ മേഖല കണ്ടിട്ടില്ലാത്ത തസ്തിക.
ഒറ്റിറ്റി പ്ലാറ്റ്‌ഫോമുകള്‍ ജനകീയമായതോടെ ലോകത്ത് എവിടെ നിന്നും ഇറങ്ങുന്ന സിനിമകള്‍ പ്രേക്ഷകര്‍ക്ക് മുന്നിലേക്ക് എത്തുകയാണ്. ഒറ്റിറ്റി കണ്ടന്റുകളുടെ വലിയൊരു സവിശേഷത സെന്‍സറിങ്ങ് ആവശ്യമില്ല എന്നത് തന്നെയാണ്. അതുകൊണ്ട് തന്നെ നഗ്നരംഗങ്ങളും , വയലന്‍സുമൊക്കെ ധാരാളം കാണാം. സിനിമയില്‍ ഇങ്ങനെയുള്ള അടുത്തിടപഴകേണ്ടി വരുന്ന രംഗങ്ങള്‍ സംവിധാനം ചെയ്യുക എന്നതാണ് ഇന്റിമസി കോഓര്‍ഡിനേറ്ററുടെ അല്ലെങ്കിൽ ഇൻ്റിമേറ്റ് ഡയറക്ടറുടെ ജോലി.
സംഘട്ടനം സംവിധാനം ചെയ്യുന്നവരെ പോലെ നായികയും ,നായകനും ചേർന്നഭിനയിക്കേണ്ട ചൂടൻ രംഗങ്ങൾക്കായി ഉള്ള ഡയറക്ടറാണ് ഇൻ്റിമേറ്റ് ഡയറക്ടർ .സിനിമ ചിത്രീകരണ വേളയില്‍ വളരെ ആഴത്തിലുള്ള പ്രണയ രംഗങ്ങളും, കിടപ്പറ രംഗങ്ങളുമൊക്കെ അഭിനയിക്കുമ്പോള്‍ നടീ നടന്‍മാര്‍ക്ക് ഒരു തരത്തിലുള്ള പ്രശ്നങ്ങളും ഉണ്ടാകാതെ നോക്കുക എന്നതാണ് ഇന്റിമേറ്റ് ഡയറക്ടേഴ്സിന്റെ പ്രധാന ചുമതല.ചെറിയ ചുംബനരംഗങ്ങള്‍ മുതല്‍ അതിതീവ്രമായ കിടപ്പറ രംഗങ്ങള്‍ വരെ കോറിയോഗ്രാഫ് ചെയ്യുന്നത് ഇവരായിരിക്കും. ആ രംഗങ്ങളില്‍ ഉപയോഗിക്കേണ്ടുന്ന വസ്ത്രങ്ങള്‍ , ക്യാമറ പൊസിഷന്‍സ് ഒക്കെ അവരാകും തീരുമാനിക്കുക. ബോഡി കളറിന് സാമ്യതയുള്ള വസ്ത്രങ്ങളാണ് പലപ്പോഴും ഇങ്ങനെയുള്ള നഗ്നത കാണുന്ന രംഗങ്ങളില്‍ അഭിനേതാക്കള്‍ ധരിക്കുന്നത്.
സിനിമ ചിത്രീകരണം എന്ന പേരിൽ പലപ്പോഴും നടിമാർ കടുത്ത ലൈംഗിക അതിക്രമത്തിന് വിധേയരാകാറുണ്ട്. ഇത് ഇവരിൽ ഉണ്ടാക്കുന്ന മാനസിക പ്രശ്നങ്ങൾ ചെറുതായി കാണുവാൻ പറ്റില്ല.സ്ത്രീകളെ എന്നപോലെ പുരുഷന്മാരെയും ബാധിക്കുന്ന ഒന്നാണ് ഇത്. പല പുരുഷന്മാരും ഇങ്ങനെയുള്ള രംഗങ്ങളിൽ അഭിനയിക്കാൻ മടികാണിക്കാറുണ്ട്. വളരെ മനോഹരവും , വിശ്വസനീയമായ വിധം പ്രണയ രംഗങ്ങളും , കിടപ്പറരംഗങ്ങളും, മറ്റെന്തെങ്കിലും സമാനമായ രംഗങ്ങളും കൊറിയോഗ്രാഫ് ചെയ്യാൻ ഇൻറിമേറ്റ് ഡയറക്ടറെ ആശ്രയിക്കുന്നവരുടെ എണ്ണം കൂടി കൊണ്ടിരിക്കുകയാണ് .
അഭിനയിക്കും മുൻപു നടീനടന്മാരെ ഇത്തരം രംഗങ്ങൾക്ക് വേണ്ടി മാനസികവും , ശാരീരികവുമായി തയ്യാറാക്കേണ്ട ചുമതല അത്ര എളുപ്പമല്ല പണിയല്ല.ചിത്രീകരണത്തിന് മുൻപ് അഭിനേതാക്കളെ പരിശീലനക്കളരിയിൽ എത്തിക്കണം. ഇവിടെ വച്ച് സീനിനെക്കുറിച്ച് വളരെ വ്യക്തമായി തുറന്ന് സംസാരിക്കും. ഇരുവ‍ർക്കുമിടയിലെ പരസ്പര ധാരണ മെച്ചപ്പെടുത്താനുള്ള സന്ദർഭങ്ങളും മറ്റും ഏർപ്പെടാക്കും. കൺസെന്‍റ് അഥവാ സമ്മതം ഉറപ്പാക്കും. ചിത്രീകരണത്തിനിടെ ഒരുതരത്തിലുമുള്ള അതിക്രമവും അഭിനേതാക്കൾ നേരിടുന്നില്ല എന്ന് ഇവർ ഉറപ്പുവരുത്തണം. ഇതിന് നിയമ പരിജ്ഞാനവും ആവശ്യമായി വന്നേക്കാം. മാറുന്ന ലോകത്ത് പ്രണയത്തെക്കുറിച്ചും , സെക്സിനെക്കുറിച്ചുമുള്ള പ്രേക്ഷകരുടെ ചിന്താഗതി കുറച്ച് കൂടി വിശാലമാവുകയാണ്.
പ്രതീകാത്മക രംഗങ്ങളോടു വിട പറഞ്ഞ് സിനിമയിൽ ലൈംഗികത നേരിട്ടു ചിത്രീകരിക്കാൻ തുടങ്ങിയതോടെ സിനിമയിൽ സെക്സ് സീനുകൾക്കും പ്രാധാന്യം വർധിച്ചു. അനുരാഗബദ്ധരായ കമിതാക്കളിൽനിന്ന് ഇരുട്ടിലേക്കും , കറങ്ങുന്ന ഫാനിലേക്കും , കുതിച്ചു പായുന്ന കുതിരയിലേക്കുമെല്ലാം തെന്നിമാറിയിരുന്ന ക്യാമറ ഇന്ന് കിടപ്പറ രംഗങ്ങളിലേക്കു നേരേ കയറിച്ചെല്ലുന്നു.കിടപ്പറ രംഗങ്ങൾക്കായി അക്വേറിയത്തിലെ മീനുകളെയോ , തിരമാലകളെയോ പ്രതീകങ്ങളായി സ്വീകരിക്കുന്നത് പലപ്പോഴും ഫലിതമായി മാറാറുണ്ട്. സെൻസർഷിപ്പ് കുറഞ്ഞ ഒടിടി പ്ലാറ്റ്ഫോമുകളുടെ വരവും ഇതിന് കാരണമാണ്.
വിദേശ സിനിമകളിൽ കണ്ടിരുന്ന തരം ഇന്റിമേറ്റ് രംഗങ്ങൾ ഇന്ത്യൻ സീരീസുകളിലും ഇപ്പോൾ ധാരാളം കാണാം. ഹോളിവുഡിൽ സെക്സ് സീനുകൾക്കായാണ് ഇന്റമസി ഡയറക്ടർ എന്ന തസ്തിക ആദ്യം സൃഷ്ടിക്കപ്പെട്ടത്. ഇന്റിമസി ഡയറക്ടർ എന്നാണ് ഇന്ത്യയിൽ അറിയപ്പെടുന്നതെങ്കിലും രാജ്യാന്തര തലത്തിൽ ഇന്റിമസി കോ ഓർഡിനേറ്റർ എന്നാണ് പറയുന്നത്. ഇന്റിമസി ഡയറക്ടർ ആണെങ്കിലും ഇന്റിമസി കോ ഓർഡിനേറ്റർ ആയാലും ഇന്റിമസി കോച്ചായാലും ,ഇന്റിമസി പ്രഫഷനൽസ് എല്ലാം ഒരേ കുടക്കീഴിലാണ് പ്രവർത്തിക്കുന്നത്. സിനിമയുടെ സ്വഭാവം അനുസരിച്ച് ജോലിയിൽ ചെറിയ ചില മാറ്റങ്ങൾ വരുമെന്നുമാത്രം. ഇന്റിമസി ഡയറക്ടർ ഇന്റിമസി സീനുകൾ ഡയറക്ട് ചെയ്യും. ഇന്റിമസി കോഓർഡിനേറ്റർ ആകുമ്പോൾ അത്തരം രംഗങ്ങളിലെ കോസ്റ്റ്യൂം, പ്രൊഡക്‌ഷൻ എന്നിവ മാനേജ് ചെയ്യണം.
പരസ്പരം അടുപ്പമില്ലാത്തവർക്ക് ഇടപഴകി അഭിനയിക്കേണ്ടി വരുമ്പോൾ മാനസിക സംഘർഷമുണ്ടാകാം. ഇത് ലഘൂകരിച്ച് സീനുകൾ മനോഹരമാക്കുകയാണ് പ്രധാന ലക്ഷ്യം.റൊമാൻസ് മാത്രമല്ല മാതൃസ്നേഹം, സഹോദര സ്നേഹം, സൗഹൃദം എന്നിവയെല്ലാം ഇന്റിമസി സീനുകളാണ്. അവ തന്മയത്വത്തോടെ അഭിനയിക്കണമെങ്കിൽ അഭിനേതാക്കൾ തമ്മിലുള്ള അടുപ്പം വർധിപ്പിക്കണം. അവരുടെ മുഖഭാവങ്ങൾ, പോസിറ്റീവ്സ് ആൻഡ് നെഗറ്റീവ്സ് എല്ലാം മനസ്സിലാക്കി ആവശ്യമായ നിർദേശങ്ങൾ നൽകുന്നു.
സിനിമയിൽ സെക്സ് സീനുകൾക്കായി ചില മുന്നൊരുക്കങ്ങൾ നടത്തും.ആദ്യം സീൻ എന്താണെന്ന് നടീനടൻമാരോടു പറയും. എല്ലാം തുറന്നു പറയാനാണ് ശ്രമിക്കുന്നത്. പരമാവധി ആളുകളെ കുറച്ചാണ് ഷൂട്ടിങ്. നടീനടൻമാർക്ക് ബുദ്ധിമുട്ട് ഉണ്ടാക്കാതെ ഷൂട്ട് ചെയ്യാനുള്ള സാഹചര്യം ഒരുക്കും. ഒപ്പം ഒരുതരത്തിലുള്ള ലൈംഗിക ചൂഷണവും നടക്കാതിരിക്കാനും ശ്രദ്ധിക്കണം. സീനുകളുടെ ഒഴുക്ക് നഷ്ടപ്പെടാതെയാണ് ഇവ ചിത്രീകരിക്കേണ്ടത്. ഇന്റിമസി കിറ്റുകൾ ഇതിനായി ഉപയോഗിക്കാറുണ്ട്.
ബോഡി ടേപ്പുകൾ ഉപയോഗിച്ചാണ് ഇത്തരം സീനുകൾ എടുക്കുന്നത്. ഓരോരുത്തരുടെയും സ്കിനിന്റെ നിറത്തിനനുസരിച്ച് ബോഡി ടേപ്പുകൾ ഉപയോഗിക്കും.ലൈംഗിക ബന്ധത്തിൽ ഏർപ്പെടുന്ന സീനുകൾ ചിത്രീകരിക്കുമ്പോൾ നടീനടൻമാർക്കിടയിൽ പലാറ്റെ ബോൾ ഉപയോഗിക്കും. അഭിനേതാക്കൾക്ക് ഒരു തരത്തിലും ബുദ്ധിമുട്ട് ഉണ്ടാക്കാതെ ഇത്തരം രംഗങ്ങൾ ചിത്രീകരിക്കാനായിരിക്കും ശ്രമം.
2018 മുതൽ ലണ്ടനിൽ ചിത്രീകരണത്തിന് ഇന്റിമസി ഡയറക്ടർമാർ എത്തിത്തുടങ്ങിയിരുന്നു. 2019ൽ നെറ്റ്ഫ്ലിക്സ് ‘സെക്സ് എജ്യൂക്കേഷൻ’ പുറത്തിറക്കിയത് ഇന്റിമസി ഡയറക്ടറെ ഉപയോഗിച്ചാണ്. നിലവിൽ ഇന്റിമസി ഡയറക്ടർക്ക് വലിയ സാധ്യതയാണുള്ളത്. പരസ്യം, ഒടിടി, സിനിമ ഇവിടങ്ങളിലെല്ലാം ജോലി സാധ്യതയുണ്ട്. ഇന്റിമസി ഡയറക്ടേഴ്സിന് എല്ലാ വിഷയങ്ങളിലും ധാരണ ഉണ്ടായിരിക്കണം. മനഃശാസ്ത്രം, ചലച്ചിത്ര നിർമാണം, സെൻസർഷിപ്പ് ,നിയമങ്ങൾ ഇതിലെല്ലാം അവർക്ക് അറിവുണ്ടായിരിക്കും. സിനിമ എന്ന മാധ്യമം കാലത്തിനനുസരിച്ച് മാറുകയാണ്.
ചിത്രീകരണത്തിനിടെ ഒരു തരത്തിലുമുള്ള അതിക്രമം അഭിനേതാക്കൾ നേരിടുന്നില്ലെന്ന് ഉറപ്പാക്കേണ്ടതും ഇന്റിമേറ്റ് ഡയറക്ടറാണ്. നിയമ പരിജ്ഞാനവും ആവശ്യമാണ്. സെറ്റും , നിറങ്ങളുമടക്കം സീനുമായി ബന്ധപ്പെട്ട മറ്റ് ചേരുവകളും തീരുമാനിക്കണം.ഗെഹരിയാൻ എന്ന സിനിമയുടെ പോസ്റ്ററിൽ ഇന്റിമേറ്റ് ഡയറക്ടറുടെ പേര് വന്നതും ഈ ദിശാമാറ്റത്തെ സൂചിപ്പിക്കുന്നു. ഇന്റിമസി പ്രഫഷനൽസ് അസോസിയേഷന്‍റെ (IPA) കീഴിൽ സർട്ടിഫിക്കറ്റ് കോഴ്സ് പൂർത്തിയാക്കിയാണ് പലരും പുതിയതായി ഈ രംഗത്തേക്കിറങ്ങുന്നത്.
💢 വാൽ കഷ്ണം💢
ഒരു കഥാപാത്രത്തിന്റ ഷോട്ട് എടുക്കുന്ന സമയത്തുള്ള ക്യാമറ ലെൻസ്‌ ഫോക്കസ്,റീഫോക്കസ് എന്നിവ ചെയ്യുന്നത് ഫസ്റ്റ് അസിസ്റ്റന്റ് ക്യാമറാമാൻ (1AC ) ആണ്. ക്യാമറയിലൂടെ നോക്കാതെ സബ്ജക്ടും , ക്യാമറയും തമ്മിലുള്ള ദൂരം നോക്കിയാണ് ഇത് നിർവഹിക്കുന്നത്. ഇത്തരത്തിൽ ഫോക്കസ് കൈകാര്യം ചെയ്യുന്നതിനാൽ 1AC യെ ഫോക്കസ് പുള്ളർ എന്നു വിളിക്കുന്നു.
