ജയറാമിൻ്റെ “സ്നേഹസമ്മാനം”
Gopala Krishnan
ഏഷ്യാനെറ്റിലെ “ഗീതാഗോവിന്ദം” എന്ന മെഗാസീരിയലിൽ ആസിഫലി അതിഥി വേഷത്തിൽ ഒരു എപിസോഡിൽ വന്നത് വാർത്തയായല്ലോ. ഇതുപോലെ മുമ്പ് ജയറാം ഒരു സീരിയലിൽ അഭിനയിച്ച് മിനിസ്ക്രീൻ പ്രേക്ഷകരെ ആകർഷിച്ചിട്ടുണ്ട്. 2001 വിഷു ദിനത്തിൽ സൂര്യ ടിവിയിൽ സംപ്രേഷണം ആരംഭിച്ച “സ്നേഹസമ്മാനം” എന്ന 13 എപ്പിസോഡ് സീരിയലിൻ്റെ ക്ലൈമാക്സിലാണ് ജയറാമിൻ്റെ എൻട്രി . രാജസേനൻ സംവിധാന മേൽനോട്ടവും തുളസീദാസ് സംവിധാനവും നിർവഹിച്ച ഈ പരമ്പരയിലെ നായികയായ അഞ്ജിതയുടെ കാമുകനായിട്ടാണ് ജയറാം വേഷമിട്ടത്.. മരണകിടക്കയിൽ അമ്മയ്ക്ക് നൽകിയ വാക്ക് പാലിച്ച് അവിവാഹിതരായി ജീവിക്കുന്ന തൻ്റെ അമ്മായിമാരുടെ വിവാഹം നടത്താൻ ശ്രമിക്കുന്ന കഥാപാത്രമാണ് അഞ്ജിതയുടേത്.. മൂന്നു സഹോദരിമാരും ചേർന്നെടുത്ത പ്രതിജ്ഞയ്ക്ക് വിരുദ്ധമായി ഒരു വിവാഹം ചെയ്ത ഏക സഹോദരനെ ഇക്കാരണത്താൽ തന്നെ ആ സഹോദരിമാർ വെറുക്കുന്നു. ഈ പിണക്കം തീർക്കാനുള്ള ബാധ്യതയും അഞ്ജിത ഏറ്റെടുക്കുന്നുണ്ട്..
ഒരു പ്രാവശ്യം മാത്രമേ “സ്നേഹസമ്മാനം” സൂര്യയിൽ സംപ്രേഷണം ചെയ്തിട്ടുള്ളൂ.. (എൻ്റെ ഓർമ്മയിൽ) ഇടയ്ക്ക് അഞ്ജിതയ്ക്ക് കത്തുകൾ അയയ്ക്കുന്ന അജ്ഞാതനായ ഒരാളിനെ കുറിച്ച് പരാമർശമുണ്ട്. അദ്ദേഹം കഥാവസാനം, അമ്മായിമാരുടെ വിവാഹ മണ്ഡപത്തിൽ തിരക്കിട്ട് ഓടിനടന്നിരുന്ന അഞ്ജിതയുടെ മുന്നിലെത്തുകയാണ്.. തൻ്റെ പ്രണയം അവളുമായി പങ്കുവയ്ക്കാൻ..! അതോടൊപ്പം കുടുംബത്തിലെ പ്രശ്നങ്ങൾ തീർക്കാൻ അഞ്ജിത ചെയ്ത ത്യാഗങ്ങളെ കുറിച്ച് മറ്റുള്ളവർക്ക് ബോധ്യപ്പെടുത്തുന്ന കടമയും ജയറാം നിർവഹിച്ചു. കനകലത, ബിന്ദു പണിക്കർ, കലാമണ്ഡലം കേശവൻ എന്നിവർ സീരിയലിലെ പ്രധാന വേഷങ്ങളെ അവതരിപ്പിച്ചു.. “സ്നേഹസമ്മാനം” അന്ന് സൂര്യ ടിവിയിൽ കണ്ടിട്ടുള്ളവർ ഓർമ്മകൾ പങ്കുവയ്ക്കുമല്ലോ.
