അങ്ങനെ, ജൂതന്മാരെയും അവരെ കല്യാണം കഴിച്ചവരെയും ജനം തന്നെ അടിച്ചു കൊന്നു തുടങ്ങി

145

ജിമ്മി മാത്യു

രണ്ടു മീറ്റിങ്ങുകൾ :

നമുക്ക് ഒരു പ്രശ്നമുണ്ട് . പൊതുവേ കാര്യങ്ങൾ അമിത ലളിതവൽക്കരിച്ചു കളയും . കുറ്റം പറഞ്ഞിട്ട് കാര്യമില്ല . ഈ സങ്കീർണ ഭീകര കുണാണ്ടറിഫൈഡ് ബ്രഹ്മാണ്ഡത്തിന്റെ അന്തവും കുന്തവും ഒരു എത്തും പിടിയും ഉണ്ടാക്കണ്ടേ .അതിൽ ഒന്നാണ് ഹിറ്റ്ലർ വെറും ഒരു ക്രൂരനും പ്രാന്തനും ആയിരുന്നു എന്നതും , അയാൾ കാരണം മാത്രമാണ് അതി ഭയാനകമായ രണ്ടാം ലോകമഹായുദ്ധം ഉണ്ടായതെന്നും , അറുപതു ലക്ഷം യഹൂദർ കൂട്ടക്കൊല ചെയ്യപ്പെട്ടതെന്നും .തെറ്റാണ് അത് .

ഹിറ്റ്ലർ അതീവ ബുദ്ധിമാനായ ഒരു ഭരണാധികാരി ആയിരുന്നു . ആത്മാഭിമാനിയായ ജർമ്മൻ ആയിരുന്നു .തികഞ്ഞ രാജ്യസ്നേഹി ആയിരുന്നു . സ്വ ജനത്തിനു വേണ്ടി സ്വന്തം ജീവൻ ത്യജിക്കാൻ മാത്രം കൂർ ഉള്ളവൻ ആയിരുന്നു . ഒന്നാം ലോക മഹായുദ്ധത്തിൽ തോറ്റമ്പിയ ജർമ്മൻ ജനത പ്രതിസന്ധിയിൽ ആയിരുന്നു. അവർ ഹിറ്റ്ലറെ ആരാധിച്ചു ; സ്നേഹിച്ചു . നാസി ഐഡിയോളജി ആയിരുന്നു ആ സ്നേഹം ജനിപ്പിച്ച ‘ശാസ്ത്രം’ .

എന്താണ് നാസി ഐഡിയോളജി ? – ജർമ്മൻ ജനത ആണ് അടിപൊളി – ലോകം ഭരിക്കേണ്ട ജനത ആണ് നാം – ഉള്ളിൽ ഉള്ള ജൂതന്മാർ ശത്രുക്കൾ ആണ് – ഉള്ളിൽ ഉള്ള ശത്രുക്കളെ അമർത്തി , പുറമെ ഉള്ള ശത്രുക്കളെ അമർച്ച ചെയ്ത് , മഹത്തായ ജർമ്മൻ രാജ്യം – ഓസ്ട്രിയ ഹാങ്കറി , സ്വിസർലാൻഡ് , ഫ്രാൻസ് , പോളണ്ട്, റഷ്യ ഒക്കെ ഉൾപ്പെടുന്ന വലിയ ഒരെണ്ണം – ഉണ്ടാക്കണം .സൊ സിംപിൾ . ഇത്രേ ഉള്ളു . അതിനിടെ , സംശുദ്ധമായ ജർമ്മൻ ചോരയെ , അവരെ പോലെ തന്നെ ഇരിക്കുന്ന , ചിരിക്കുന്ന , വെളുമ്പൻമാർ തന്നെ ആയ ജൂത രക്ത കലർപ്പിൽ നിന്ന് എങ്ങനെ രക്ഷിക്കാം ?

ആദ്യ മീറ്റിങ് – ബെർലിൻ, ജൂൺ 1934 .

1934 ൽ , ജർമ്മൻ ജനതയുടെ ആഗ്രഹം അനുസരിച്ച് അധികാരത്തിൽ കയറിയ നാസി പാർട്ടി നേതാക്കൾ , ആദ്യമായി ചർച്ചക്കെടുത്ത വിഷയങ്ങളിൽ ഒന്നായിരുന്നു അത് . ആ മീറ്റിങ് ബെർലിനിൽ ആണ് നടന്നത് . ആ മീറ്റിങ്ങിന്റെ എല്ലാം സ്‌റ്റെനോഗ്രാഫർ എഴുതിയത് നമുക്ക് ലഭ്യമാണ് .

നീതി ന്യായ വകുപ്പ് മന്ത്രി ആയ ഫ്രാൻസ് ഗർട്ണർ ആണ് അധ്യക്ഷം വഹിച്ചത് . ആര്യൻ രക്തത്തിന്റെ വിശുദ്ധി ഊന്നി പറഞ്ഞു കൊണ്ടാണ് മീറ്റിംഗ് ആരംഭിച്ചത് . മറ്റുള്ള ജാതിക്കാരെ , ജൂതരെ ഉൾപ്പെടെ , “അണ്ടെർമേൻഷ്’ – ‘താഴ്ന്ന മനുഷ്യർ ‘ – എന്നാണ് വിവക്ഷിച്ചത് . ഹെൻറിക്ക് ക്രെയ്‌ഗ്ർ എന്ന ഒരു നിയമ വിദഗ്ധൻ , അമേരിക്കയിലെ കറുത്ത വർഗക്കാരെ അകറ്റി നിർത്തുന്ന വഴികൾ ഒക്കെ അമേരിക്കയിലും , പിന്നെ സൗത്ത് ആഫ്രിക്കയിലും ഒക്കെ പോയി പഠിച്ചിട്ടാണ് മീറ്റിങ്ങിനു വന്നിട്ടുള്ളത് .
‘പഠിച്ചിട്ട് നിയമം ഉണ്ടാക്കണ്ടേ സുഹൃത്തേ ?’ – അല്ല പിന്നെ .ഹെർബർട്ട് കിയർ എന്നൊരാളും അമേരിക്കയിൽ പോയി കറുത്ത വർഗക്കാർക്കെതിരെ ഉള്ള നിയമങ്ങൾ പഠിച്ചതാണ് ! അതായത് , നമ്മൾ മനസിലാക്കേണ്ടത് , ചുമ്മാ ഒരോളത്തിനോ പ്രാന്തിനോ കേറി തോന്നുന്നതെല്ലാം ചെയ്തതല്ല നാസികൾ . വർഷങ്ങൾ നീണ്ട പ്ലാനിങ്ങിനും പഠനത്തിനും ശേഷമാണു !

1934 ജൂണിൽ നടന്ന ആ മീറ്റിംഗിന് രണ്ട്‌ അജണ്ട ആണ് ഉണ്ടായിരുന്നത് :

1 . ജെര്മനിയിലുള്ള പല തരം മനുഷ്യരെ ചോരയുടെ ‘ശുദ്ധത ‘ അനുസരിച്ച് തരം തിരിക്കുക .
2 . ശുദ്ധ ജര്മന്കാരും ജൂതരും തമ്മിലുള്ള വിവാഹങ്ങൾ നിരോധിക്കുക .
റോളണ്ട് ഫ്രേയ്‌സറിന്റെ നേതൃത്വത്തിൽ ചിലർ , ആ മീറ്റിങ്ങിൽ , അങ്ങനെ ഉള്ള വിവാഹത്തിൽ ഏർപ്പെടുന്നവരെ കർശനമായി ശിക്ഷിക്കണം എന്ന് തന്നെ വാദിച്ചു . അച്ചിം ഗെർക്കേ എന്നൊരു ചുള്ളൻ പറഞ്ഞു :
“പതിനാറിൽ ഒന്ന് എന്ന കണക്കിൽ ജൂത രക്തം ഉള്ളവരെ ജൂതർ ആയി കണക്കാക്കണം ! രക്ത ശുദ്ധി എന്നാ ചുമ്മാവാ ? ബെർതെ തമാശ കളിച്ചു നടന്നാണോ ജർമ്മൻ മഹാ രാജ്യം കെട്ടിപ്പടുക്കാൻ പോണത് ?”
നാസികളുടെ ആദ്യകാല മീറ്റിങ്ങുകളിൽ ഒന്നായിരുന്നു അത് .

പിന്നെ അടിപൊളി സംഭവങ്ങൾ ആയിരുന്നു . ജൂതന്മാരെയും അവരെ കല്യാണം കഴിച്ചവരെയും ഒക്കെ ജനം തന്നെ അടിച്ചു കൊന്നു തുടങ്ങി . ടീച്ചർമാരും ഡോക്ടർമാരും കച്ചവടക്കാരുമായ ജൂതന്മാരെ എല്ലാ ജോലികളിലും നിന്ന് വിലക്കി . അവർ പലരും പട്ടിണി കിടന്നു മരിച്ചു . ചിലർ വഴി അരുകിൽ തെണ്ടി . അച്ഛനും അമ്മയും ഇല്ലാതായ കുട്ടികൾ വിശപ്പ് കൊണ്ട് കരഞ്ഞു . ഒരു കഷ്ണം ബ്രെഡിന് വേണ്ടി തെരുവുകളിൽ കൈ നീട്ടി .ഒരു കഷ്ണം ബ്രെഡ് പോലും ആരും കൊടുത്തില്ല .
“ഛായ് – നശിച്ച വര്ഗങ്ങള് !!”
മാത്രല്ല . സഹായിച്ചാ ചിലപ്പോ രഹസ്യപൊലീസ് പിടിക്കും . ഗസ്റ്റപ്പോ !
എന്തുട്ട് മയിലപ്പൊ !!!

അടുത്ത മീറ്റിങ് – ബെർലിനിലെ വാൻസീ എന്ന സ്ഥലത്ത് – 1942
——-

യുദ്ധം കൊടുമ്പിരിക്കൊണ്ടിരിക്കുന്നു . രാജ്യത്തെ ജൂതന്മാരെ ഒക്കെ എന്ത് ചെയ്യണം ? പലരും ജയിലിൽ ആണ് . പുറത്തുള്ളവർ അപകടം അല്ലെ ? പിടിച്ചടക്കുന്ന ആസ്ട്രിയയിലും , പോളണ്ടിലും ഒക്കെ ജൂതന്മാർ ഉണ്ട് . ഇവരെ ഒക്കെ എന്ത് ചെയ്യണം ? ലക്ഷക്കണക്കിന് ഉണ്ട് . പത്തു ലക്ഷം ? ഇരുപത് ലക്ഷം ? ഒരു കോടി ? അറിയില്ല . കുറെ ഉണ്ട്. നാശങ്ങൾ !! ഇതാണ് നാസി അധികാരികളെ കുഴക്കിയത് .
ഇതുങ്ങളെ എല്ലാം എന്ത് ചെയ്യും ? പോംവഴി ? എന്ത് ? വാട്ട് ഈസ് ദി സൊല്യൂഷൻ ?
ഈ മീറ്റിങ്ങിന്റെ അധിപൻ ആയിരുന്നു – റൈൻഹാർഡ്‌ ട്രിസ്റ്റാൻ യൂജിൻ ഹെഡറിക്ക് . എസ് എസ് എന്നറിയപ്പെട്ട ജർമ്മൻ ആഭ്യന്തര സുരക്ഷാ സേനയുടെ തലവൻ . അയ്യാളുടെ നേതൃത്വത്തിൽ ഉണ്ടായി . എന്തുട്ട് ?

പോംവഴി . എല്ലാം ഇപ്പൊ ശരിയാക്കിത്തരാം . സിമ്പിളല്ലേ . സൊല്യൂഷൻ . ദി ഫൈനൽ സൊല്യൂഷൻ . എൻഡ്‌ലോസാങ് ദേർ ജൂഡൻഫ്രാങ് .
“ജൂദ ചോദ്യത്തിന് ഒരുത്തരം ” അത്രേ ഉള്ളു .വളരെ ലളിതം ആണ് സംഭവം .യൂറോപ്പിൽ ഉള്ള ജൂതന്മാരെ ഒക്കെ കൊണ്ടുവന്നു കോണ്സെന്ട്രേഷൻ ക്യാംപുകളിൽ കൊണ്ട് വരിക . അവിടെ വച്ച് ഒക്കേത്തിനെയും ….ഒക്കേത്തിനെയും ..?ഒക്കേത്തിനെയും ….?ചെർതായി അങ്ങ് കൊല്ലുക . ദാറ്റ് ഈസ് ഓൾ. ദാസ് ഈസ്റ്റ് അല്ലെസ് . അപ്പൊ പറഞ്ഞ പോലെ . ഇവർ പ്രാന്തന്മാരോ ജന്മനാ ക്രൂരന്മാരോ ഒന്നും അല്ല കേട്ടോ . ഭാര്യമാരെയും , ഭർത്താക്കന്മാരേയും , കാമുകന്മാരേയും കാമുകിമാരെയും സഹോദരരേയും സുഹൃത്തുക്കളെയും ജീവന് തുല്യം സ്നേഹിച്ചു . മക്കളെ പൊന്നു പോലെ നോക്കി . ജീവൻ രാജ്യത്തിന് വേണ്ടി ത്യജിച്ചു .അകെ കുഴപ്പം പറ്റിയത് , ഇച്ചിരി രാജ്യസ്നേഹം .ഇച്ചിരി സ്വജാതി കൂറ് .സ്വല്പം പ്രത്യയ ശാസ്ത്ര അന്ധത .ദാറ്റ് ഈസ് ആൾ . ദാസ് ഈസ്റ്റ് അല്ലെസ് .