റഫേൽ വിമാനത്തിൻറെ ടയറിനടിയിൽ നാരങ്ങാ വെച്ചതിന്റെ ശാസ്ത്രീയമായ വശങ്ങൾ അറിയാതെ വിമർശിക്കരുത്

5415

എഴുതുന്നത് : Jinesh PS

റഫേൽ വിമാനത്തിൻറെ ടയറിനടിയിൽ നാരങ്ങാ വെച്ചതിനെ പലരം ട്രോളുന്നത് എന്തിനാണെന്ന് മനസ്സിലാവുന്നില്ല.

ശാസ്ത്രീയമായ വശങ്ങൾ അറിയാതെ പലരും വിമർശിക്കുകയാണ്.

നാരങ്ങയിൽ സിട്രിക്ക് ആസിഡ് ഉണ്ട് എന്ന് അറിയില്ലേ ? ഈ സിട്രിക് ആസിഡ് ബാഷ്പത്തിൻറെ സാന്നിധ്യത്തിൽ ടയറിലെ കാർബണുമായി പ്രവർത്തിക്കുന്നു. ആഡിഡിൻറെ സാന്നിധ്യത്തിൽ ടയറിന്റെ പുറകിലത്തെ പാളി മാത്രം ചെറുതായി കരിയുന്നു. സിട്രിക് ആസിഡ് താരതമ്യേന ശക്തി കുറഞ്ഞ ആസിഡ് ആണെന്ന് അറിയാമല്ലോ. അതുകൊണ്ട് ടയർ പൂർണമായി കത്തി പോവില്ല. ചെറുതായി കരിയുമ്പോൾ ടയറിന്റെ പുറംഭാഗം കുറച്ചുകൂടി പരുപരുത്തത് ആവും എന്ന് അറിയാമല്ലോ. പരുപരുത്ത ടയർ കൂടുതൽ ഗ്രിപ്പ് നൽകും. ഇത് അപകടങ്ങൾ കുറയ്ക്കാൻ സഹായിക്കും.

ആകാശത്തിൽ കൂടി വിമാനം പറക്കുമ്പോൾ കാർ മേഘത്തിൽ നിന്നും ബാഷ്പം ലഭിക്കും. അങ്ങനെ ടയറിൽ പറ്റിപ്പിടിച്ചിരിക്കുന്ന സിട്രിക് ആസിഡും ബാഷ്പവും ചേർന്ന് മുകളിൽ പറഞ്ഞ പ്രവർത്തനം നടത്തുകയും ആകാശത്ത് പറക്കുമ്പോൾ വിമാനത്തിൻറെ ഗ്രിപ്പ് കൂടുകയും ചെയ്യുന്നു.

ഇത്ര ശാസ്ത്രീയമായ കാര്യങ്ങളെ ട്രോളുന്നത് കഷ്ടമാണ്. താളിയോല ഗ്രന്ഥങ്ങളിൽ രേഖപ്പെടുത്തിയത് അറിയാത്തവരാണ് ഇതൊക്കെ ട്രോളുന്നത്. നാസ പോലും ഈ ശാസ്ത്ര സത്യത്തെ അംഗീകരിക്കുന്നില്ലേ ? ബ്രിട്ടീഷ് ഭരണകാലത്ത് നമ്മുടെ നാട്ടിൽ നിന്നും കടത്തിയ താളിയോല ഗ്രന്ഥങ്ങളിൽ നിന്നാണ് അവർക്ക് ഈ വിവരം കിട്ടിയിരിക്കുന്നത് എന്നത് പരസ്യമായ രഹസ്യമാണല്ലോ !

ഇനി വിമാനത്തിൻറെ പുറത്ത് ഓം എന്ന് എഴുതിയതിനെ ട്രോളുന്നവരോട്,

വളരെ വേഗതയിൽ പറക്കുമ്പോൾ എന്ത് ശബ്ദം ആണ് നമ്മൾ കേൾക്കുന്നത് ?

“ശൂ…” എന്ന ശബ്ദം. മലയാളത്തിലെ ശൂ ഏക ശാസ്ത്രീയ ഭാഷയായ സംസ്കൃതത്തിൽ എത്തുമ്പോൾ ഓം എന്നാകും എന്ന രഹസ്യവും ആർക്കും അറിയില്ല. അതായത് ഓം എന്നെഴുതുമ്പോൾ വേഗത കൂടും എന്ന് ചുരുക്കം. ഈ ഓം ഇലക്ട്രിക്കൽ റെസിസ്റ്റൻസിന്റെ ചിഹ്നമായി ഉപയോഗിക്കുന്നതും മറ്റൊന്നും കൊണ്ടല്ല എന്ന് വളരെ വൈകാതെ പുറത്തറിയും. ഇന്ന് ട്രോളുന്നവർ അന്ന് എന്തു പറയുമെന്ന് അറിയണമല്ലോ !!!

ഇനി മഞ്ഞപ്പൂവ് വച്ചതിനെ കുറിച്ച്,

ഒരു മുറിവുണ്ടായാൽ കാപ്പിപ്പൊടിയോ മഞ്ഞൾപൊടിയോ ഇടുന്നത് കണ്ടിട്ടില്ലേ ? അതിനു വേണ്ടി തന്നെയാണ് ഇത്. മേഘങ്ങൾക്കിടയിൽ ഇടിമിന്നൽ മൂലം പരിക്കു പറ്റിയാൽ പുറത്തിറങ്ങി ഇതൊന്നും ചെയ്യാൻ സാധിക്കണം എന്ന് നിർബന്ധമില്ല.

ഇത്രയും ശാസ്ത്രീയമായി ജി ചെയ്ത കാര്യങ്ങളെ വച്ചുകൊണ്ട് മിത്രങ്ങളെ ട്രോളണോ ???

Advertisements