നിർമ്മാതാവായ ജോളി ജോസഫ് എഴുതിയത്
നന്മയുള്ളവൻ മധു വാര്യർ !
പല പരിപാടികളുമായി ദുബായിലുണ്ടായിരുന്ന ഞാൻ കഴിഞ്ഞ വെള്ളിയാഴ്ച്ച ഉച്ചകഴിഞ്ഞു പന്ത്രണ്ടേമുക്കാലിന് പുറപ്പെടേണ്ടിയിരുന്ന എയർ ഇന്ത്യ വണ്ടി മക്തും എയർപോർട്ടിൽ ( DWC ) നിന്ന് കൊച്ചിയിലേക്ക് പുറപ്പെടാൻ വൈകുമെന്നറിയിച്ചപ്പോൾ കൂട്ടുകാരെ കാണാൻ പോയി സമയമറിയാതെ സംസാരിച്ചിരുന്നു …പിന്നെ ചാടിയോടി ആലപ്പാഞ്ഞു ടെൻഷനടിച്ച് വിമാനത്താവളത്തിൽ എത്തുമ്പോഴേക്കും അവർ കടയടക്കാൻ തുടങ്ങിയിരുന്നു ….!
അതിനിടയിൽ മധു എന്നെ ഫോണിൽ വിളിച്ചിട്ട് പറഞ്ഞു ” എന്റെ പടത്തിലെ സുധീഷേട്ടനെ മേക്കപ്പ് ചെയ്യുകയും തലമുടി കെട്ടിവെക്കുകയും ചെയ്ത സീൻ ഓർമ്മയുണ്ടോ ….. ? എയർപോർട്ടിൽ വൈകി എത്തിയതിനാൽ ഒരല്പം മാനസിക പിരിമുറുക്കത്തോടെ നിന്നിരുന്ന ഞാൻ മറുപടി പറഞ്ഞു …. ” ഉവ്വടാ, ഞാൻ വണ്ടിയിൽ കയറാനുള്ള തത്രപ്പാടിലാണ് ..എന്നാലും എന്താ കാര്യം …? ” ഉടനെ വന്നു ഉത്തരം . ‘’ ഞാൻ പറഞ്ഞിട്ടുണ്ടോന്ന് അറിയില്ല , ആ സീൻ ഞാൻ ജോളിച്ചേട്ടന്റെ വീട്ടിലെ പഴയ ഓർമ്മയിൽ നിന്നും എടുത്തതാണ് …. ഞാൻ നിങ്ങളുടെ വീട്ടിൽ വരുമ്പോഴൊക്കെ രേഖയും രേഷ്മയും എന്നെ അങ്ങിയൊക്കെ ചെയ്യുമായിരുന്നു …. ” ഒരു നിമിഷം ഞാൻ ആലോചിച്ചുപോയീ … പണ്ട് മധുവും ജിഷ്ണുവും നിഷാന്തും പ്രശാന്തും പോലുള്ള ആത്മാർത്ഥ സുഹൃത്തുക്കൾ വീട്ടിൽ വന്നിരുന്ന പഴയ കാലഘട്ടത്തിലേക്ക് …. അതെ , അവൻ പറഞ്ഞത് ശെരിയാണ് ..ആറേഴു വയസ്സ് പ്രായമുണ്ടായിരുന്ന എന്റെ ഇരട്ട പെണ്മക്കളായ രേഖയും രേഷ്മയും ഇവനെ അണിയിച്ചൊരുക്കുന്നത് പലപ്പോഴും ഞാനും കണ്ടിട്ടുണ്ട് … പക്ഷെ പണ്ടത്തെ കാര്യങ്ങൾ പലതും ഞാൻ മറന്നു പോയിരുന്നു …!
നൊസ്റ്റു അടിച്ച് യാതൊരു ടെൻഷനുമില്ലാതെ എന്ത് പറയണമെന്നറിയാതെ വെറുതെ ഹാളിലെ മേൽ ഭാഗത്തേക്ക് നോക്കിയപ്പോൾ കത്തിനിന്ന ബൾബുകളെല്ലാം നക്ഷത്രങ്ങളായി തോന്നി. യാതൊരു വ്യസനവുമില്ലാതെ പുഞ്ചിരിച്ചു നിന്ന എന്നെ ചെക്ക് ഇൻ കൗണ്ടറിലെ ചേച്ചി വണ്ടറടിച്ചു വിളിച്ചു ബോർഡിങ് പാസ് തന്നു …അതിനിടയിൽ ഞാനവനോട് പറഞ്ഞു ” സന്തോഷം , ഇങ്ങിനെയൊക്കെ കേൾക്കുമ്പോ എനിക്ക് നിന്നോട് സ്നേഹം കൂടുന്നു കുട്ടാ …നീ ഇതൊക്കെ ഇപ്പോഴും ഓർക്കുന്നുണ്ടോ ? ” സംവിധായകൻ കൂളായി മറുപടി പറഞ്ഞു ” ചില കാര്യങ്ങൾ നമ്മുടെ മനസിനെ സ്പർശിക്കും , അത് സ്വന്തം സൃഷ്ടിയിയിലും സ്വാധീനിക്കും … ”
അത്രയൊന്നും നന്മയില്ലാത്ത നമ്മുടെ സിനിമ ഇൻഡസ്ട്രിയിൽ സ്മരണയുള്ള നന്മയുള്ള നന്ദിയുള്ള നവാഗത സംവിധായകനായ എന്റെ മധുവിന്റെ മനസ്സുണ്ടല്ലോ …അതാണ് അവന്റെ ക്വാളിറ്റി , അന്നും ഇന്നും ! ഒരുപക്ഷെ മലയാള സിനിമക്ക് അന്യം നിന്നുപോയ ഗുണമേന്മ . കഴിഞ്ഞ വെള്ളിയാഴ്ച്ച മാധവേട്ടന്റെ ( മധുവിന്റെ / മഞ്ജുവിന്റെ അച്ഛൻ ) ശ്രാദ്ധദിനമായിരുന്നു, അതിനിടയിലാണ് ഇക്കാര്യം ഓർമ വന്നപ്പോൾ അവനെന്നെ വിളിച്ചത് .. ഞാനിക്കാര്യം എന്റെ കുടുംബത്തിൽ അവതരിപ്പിച്ചപ്പോൾ അവർക്കും അത്ഭുതം, പെരുത്ത് സന്തോഷം ..! ഒരൊറ്റ ഫോൺകാളിൽ സത്യസന്ധവും ലളിതവും സുന്ദരവുമായി പറഞ്ഞ വിഷയം പലർക്കും നൽകിയ സന്തോഷം വിലമതിക്കാനാവാത്തതാണ് …!
കട്ടികൂടിയ കാര്മേഘങ്ങൾക്കിടയിലൂടെ ഊളിയിട്ട് പറന്നിറങ്ങിയ എയർ ഇന്ത്യക്ക് അനക്കമോ കുലുക്കമോ ഉണ്ടായിരുന്നില്ല , അതോ ഞാൻ അറിയാതെ പോയതോ …? പ്രേക്ഷകരിൽ സന്തോഷം നിറക്കുന്ന , നല്ല കഥപറച്ചിലിന്റെ ദൃശ്യഭംഗിയുള്ള ഗംഭീര സിനിമകൾ ഉണ്ടാക്കാൻ ഉടയ തമ്പുരാൻ നിന്നെ സമൃദ്ധമായി അനുഗ്രഹിക്കട്ടെ ..! നീയെന്റെ കുഞ്ഞനുജനും ചെങ്ങായിയും ആണെന്നതിൽ എന്നും അഭിമാനം .!🥰
