കേരളാ പൊലീസിനെ സ്വകാര്യ ആവശ്യങ്ങൾക്ക് വാടകയ്ക്ക് ലഭിക്കുമോ ?
പണമടച്ചാല്‍ സ്വകാര്യ ആവശ്യങ്ങള്‍ക്ക് പോലീസ് സേവനങ്ങളെ വിട്ടു കൊടുക്കാമെന്നാണ് നിയമം . പക്ഷേ ഈ നിയമത്തിന് എതിരെ പൊലീസിനുള്ളിൽ തന്നെ പ്രതിഷേധം ഉണ്ട്. ഈ വിഷയത്തിൽ കേരള പോലീസ് അസോസിയേഷന്‍ സമൂഹ മാധ്യമങ്ങളിലൂടെ പരസ്യമായി തങ്ങളുടെ എതിര്‍പ്പ് പ്രകടിപ്പിച്ചിട്ടുണ്ട്. സ്വകാര്യ ആവശ്യങ്ങള്‍ക്ക് സേവനം നൽകാൻ നിയമങ്ങൾ ഉണ്ടെങ്കിലും കല്യാണത്തിനും മറ്റും വീട്ടുകാർക്ക് ഷോ കാണിക്കാനുള്ളതല്ല കേരളാ പൊലീസ് എന്നാണ് പ്രധാന വിമർശനം . പുതുക്കിയ നിരക്കനുസരിച്ച്‌ സ്വകാര്യാവശ്യത്തിനും , സിനിമാ ഷൂട്ടിങ്ങിനും , പല ആഘോഷങ്ങൾക്കും പൊലീസിനെ വിട്ടുകൊടുക്കുമ്പോൾ റാങ്കനുസരിച്ചാണ് നിരക്ക് ഈടാക്കുക.
⚡ സി.ഐ. റാങ്കിലുള്ള ഉദ്യോഗസ്ഥന് പകൽ 3795 രൂപയും, രാത്രി 4750 രൂപയുമാണ് നിരക്ക്.
⚡എസ്ഐമാര്‍ക്ക് 2560, 4360 എന്നിങ്ങനെയാണ് പകലും രാത്രിയിലുമുള്ള നിരക്ക് .
⚡എ.എസ്.ഐ.യ്ക്ക് 1870, രാത്രി 2210
⚡സിവിൽ പോലീസ് ഓഫീസർ-പകൽ 700, രാത്രി 1040
⚡പോലീസ് നായയെ ആവശ്യമുണ്ടെങ്കിൽ 6950 രൂപ നൽകണം .
⚡പോലീസുകാര്‍ക്ക് ആവശ്യമെങ്കില്‍ വയർലസ് സെറ്റും കൊടുക്കും. ചാർജ് 2315 രൂപ.
⚡ഷൂട്ടിങ്ങിനോ മറ്റോ പോലീസ് സ്റ്റേഷൻ തന്നെ വേണമെങ്കിൽ ദിവസം 33,100 രൂപ വാടക കൊടുത്താല്‍ മതി
⚡വിരലടയാളവിദഗ്ധരുടെ സേവനം സ്വകാര്യ ആവശ്യത്തിന് വേണ്ടിവന്നാൽ നിശ്ചിത സമയത്തേക്ക് 6070 രൂപ ഈടാക്കാം.
⚡ഫൊറൻസിക് ലബോറട്ടറി സേവനമാണെമെങ്കിൽ ഓരോ കേസിലും 12,130രൂപ നല്‍കണം.
കല്യാണവീട്ടിലെ ഡ്യൂട്ടിക്കെതിരേ പോലീസ് സംഘടനകൾ രംഗത്തെത്തിയ പശ്ചാത്തലത്തിൽ സ്വകാര്യ ആവശ്യങ്ങള്‍ക്ക് പോലീസ് സേവനം ലഭ്യമാക്കാമെന്ന ഉത്തരവും വിവാദമായി.
നിയമപരമല്ലാത്ത ഒരു കാര്യത്തിനും പോലീസിനെ നിയോഗിക്കാൻ പാടില്ലെന്ന നിലപാടിലാണ് പോലീസുകാരുടെ സംഘടനകൾ. സ്വകാര്യ വ്യക്തിക്ക് സൗജന്യമായോ, പണം നൽകിക്കൊണ്ടോ പോലീസിനെ ഉപയോഗിക്കാൻ അവകാശമില്ലെന്ന് കേരള പോലീസ് ആക്ട് സെക്‌ഷൻ 62(2)ൽ വ്യക്തമാക്കിയിട്ടുണ്ട്. സ്വകാര്യ വ്യക്തികൾക്കോ, സ്ഥാപനങ്ങൾക്കോ സുരക്ഷ ആവശ്യമാണെങ്കിൽ സ്റ്റേറ്റ് ഇൻഡസ്ട്രിയൽ സെക്യൂരിറ്റി ഫോഴ്‌സിനെ നിയോഗിക്കാം.
