ഇന്ത്യക്കാരെപ്പോലെയല്ല സായിപ്പന്മാർ, ശാരീരികമായ പണികളൊന്നും ചെയ്യാൻ മടിയില്ല

    0
    207

    Sajeev Ala

    ‘ ഇംഗ്ലീഷുകാരുടെ ഏറ്റവും വലിയ ഗുണം ഒരാളും ഒരു മിനിറ്റും വെറുതെയിരിക്കില്ല എന്നതാണ്. ഓഫീസിൽ നിന്ന് മടങ്ങി വീട്ടിലെത്തിയാൽ പൂന്തോട്ടത്തിൽ പണിക്കിറങ്ങും അല്ലെങ്കിൽ ചുമരിന് ചായമിടും അതുമല്ലെങ്കിൽ പൈപ്പ് നന്നാക്കും ഒന്നുമില്ലെങ്കിൽ ലൈറ്റിന്റെ അറ്റക്കുറ്റപ്പണി തീർക്കും. വൃത്തി അവരുടെ പ്രധാന മൂല്യമാണ്.വൃത്തിയുള്ള ജീവിതം എന്നതാണ് അവരിൽ നിന്ന് പഠിച്ച പ്രധാനപ്പെട്ട പാഠം. അതു സാധ്യമാകണമെങ്കിൽ എപ്പോഴും എവിടെയും മടികൂടാതെ എന്തും ചെയ്യാൻ സന്നദ്ധരാകണം. ഇത്തരം പാഠങ്ങളൊക്കെ ഗാന്ധിജിക്കും കിട്ടിയത് ഇംഗ്ലീഷുകാരിൽ നിന്നാകണം. അദ്ദേഹം പഠിച്ചത് ലണ്ടനിലാണല്ലോ.’പറയുന്നത് ബ്രിട്ടീഷ് സാമ്രാജ്യത്വത്തെ ഇന്ത്യയിൽ നിന്ന് കെട്ടുകെട്ടിച്ച മഹാത്മജിയുടെ പ്രൈവറ്റ് സെക്രട്ടറിയായിരുന്ന ശ്രീ. കല്യാണം. (കാരശ്ശേരി മാഷ് നടത്തിയ അഭിമുഖം ഈ ലക്കം ഭാഷാപോഷിണിയിൽ)

    ശ്രീ. കല്യാണം തുടരുന്നു ..ഇംഗ്ലീഷുകാരുടെ ചിട്ടയും അധ്വാനവും കണ്ടുപഠിക്കണം. തിങ്കളാഴ്ച രാവിലെ മുതൽ വെള്ളിയാഴ്ച വൈകുന്നേരം വരെ കഠിനമായി ജോലി ചെയ്യും. ശനി ഞായർ ദിവസങ്ങളിൽ വിശ്രമവും വിനോദവുമാണ്. അന്നു ജോലിയൊന്നും ചെയ്യില്ല. നമ്മൾ ഇന്ത്യക്കാരെപ്പോലെയല്ല സായ്പന്മാർ. ശാരീരികമായ പണികളൊന്നും ചെയ്യാൻ മടിയില്ല. അവർക്ക് യാതൊരു മാനക്കേടും തോന്നില്ല. എതിർപക്ഷത്തിൻറെ നല്ല ഗുണങ്ങളെ ആദരിക്കാനുള്ള ഈ വിശാലതയും മാന്യതയും കല്യാണത്തിന് ഗാന്ധിജിയിൽ നിന്ന് കിട്ടിയതാവണം.സായിപ്പ് ലോകം കീഴടക്കിയതിൻറെ ഇരുനൂറ് വർഷം ഭാരതം അടക്കിഭരിച്ചതിൻറെ കാരണവും ഇതൊക്കെ തന്നെയാണ്.
    മേലനങ്ങി പണി ചെയ്യുന്ന എല്ലാവരേയും നികൃഷ്ടജാതിയാക്കിയ ഒരു സംസ്ക്കാരത്തെ കാൽച്ചുവട്ടിലാക്കാൻ ഇംഗ്ലീഷുകാരന് അധികം ബുദ്ധിയും തന്ത്രവും ഒന്നും പ്രയോഗിക്കേണ്ടിയും വന്നില്ല.

    ശാരീരിക അധ്വാനത്തെ അവമതിച്ചു എന്നതാണ് ആർഷഭാരതസംസ്ക്കാരം തലമുറകളോട് ചെയ്ത ഏറ്റവും വലിയ ക്രൂരകൃത്യം. അതിവിദഗ്ദ്ധമായകൈവിരുതൂം കലാവിരുതും സമ്മേളിപ്പിച്ച് സുന്ദരമായ മൺകുടങ്ങളും കലങ്ങളും നിർമ്മിച്ചവൻ വെറും കൊശവൻ.മഹാക്ഷേത്രങ്ങളും കൊട്ടാരങ്ങളും തീർത്ത് അതിശയിപ്പിച്ച തച്ചൻ ജാതിയിൽ നീചൻ. വെട്ടിത്തിളങ്ങുന്ന സ്വർണ്ണാഭരണങ്ങൾ മെനഞ്ഞ തട്ടാൻ പിന്നോക്കം ഇരുമ്പുപണിക്കാരൻ ജാതിയിൽ വെറും തുരുമ്പ്.കോടിയ ചളുങ്ങിയ നമ്മുടെ മുഖങ്ങളെ മിനുക്കി പഞ്ചാരകുട്ടപ്പന്മാരാക്കുന്ന ബാർബർ മ്ളേച്ഛൻ മലയാളസിനിമയിലെ സ്ഥിരം പരിഹാസപാത്രം. മണ്ണിൽ പണിയെടുത്ത് നൂറുമേനി കാർഷികവിപ്ളവം നടത്തിയ പുലയൻ ദൃഷ്ടിയിൽ പെട്ടാൽ ദോഷമുള്ളവൻ.

    ഒന്നാന്തരം വട്ടിയും കുട്ടയും നെയ്ത് നാട്ടുകാരുടെ ജീവിതം സൂഖപ്രദമാക്കിയ പറയൻ അധ:കൃതരിൽ അധ:കൃതൻ. അധ്വാനിച്ച എല്ലാ മനുഷ്യരേയും ഹീനജാതിയാക്കി മാറ്റിയ ഭാരതീയസംസ്ക്കാരത്തെ എന്തുജോലിയും ചെയ്യാൻ മടിയില്ലാത്ത സായിപ്പ് വലിയ ബുദ്ധിമുട്ടൊന്നുമില്ലാതെ കോളനിയാക്കി.
    ഇന്ത്യ ഇന്നും പിന്നോക്കാവസ്ഥയിൽ തുടരാനുള്ള ഒരു കാരണം വിയർപ്പൊഴുക്കി ജോലി ചെയ്യുന്നവരോടുള്ള പരിഹാസവും പൂച്ഛവും വെറുപ്പുമാണ്. കല്പണിക്കാരനും കവിക്കും ഒരേ പരിഗണന കിട്ടാത്ത ഒരു സംസ്ക്കാരത്തേയും ശ്രേഷ്ഠമെന്ന് വിളിക്കാനാവില്ലെന്ന് ബുക്കർ ടി വാഷിംഗ്ടൺ പറഞ്ഞത് ഒരു പക്ഷെ ഇന്ത്യയെ നിരീക്ഷിച്ചിട്ടായിരിക്കണം.