നഗ്‌നതാപ്രദർശനമെന്ന കടുത്ത മാനസികരോഗം

74

Lis Lona 

നഗ്നമേനിയിലെ ചിത്രം വരയൊക്കെ അടിപൊളിയാണ് വിദേശികളൊക്കെ ചെയ്യുന്നതല്ലേ എന്താ കുഴപ്പം? ജനിച്ചപ്പോൾ മുതൽ കുഞ്ഞു കണ്ട അമ്മിഞ്ഞ തന്നെ അല്ലേ ഇപ്പോഴും കാണുന്നത്..അമ്മയുടെ അമ്മിഞ്ഞ മകൻ കണ്ടാലൊരു ലൈംഗികതയുമില്ല..

എന്റെ അഭിപ്രായത്തിൽ ആ ട്രൗസർ കൂടി ഒഴിവാക്കി കൊടുക്കണമായിരുന്നു അതും ലൈംഗികാവയവമെന്ന കാറ്റഗറിയിൽ പെടുന്നതല്ലേ മാത്രമല്ല ജനിച്ച വഴി മക്കൾ കൂടി അറിഞ്ഞു വളരട്ടെ..അപ്പോഴല്ലേ വിചാരിച്ച ആശയത്തിന് പൂർണതയുള്ളൂ. അനുകൂലിക്കുന്നത് കൊള്ളാം ഇതെല്ലാം അനുകരിച്ച് പ്രാവർത്തികമാക്കി അവരുടെ കൂടെ നിൽക്കാൻ ആരൊക്കെയുണ്ട്.ഫേസ്‌ബുക്കിലെ പോസ്റ്റിലും വാക്കിലും മാത്രമല്ലാതെ നിങ്ങളിലെത്ര പേര് ജീവിതത്തിലും ഈ പുരോഗമന നഗ്നതാപ്രദർശനമെന്ന മഹത്തായ ആശയം സ്വന്തം വീട്ടിലും കൊടുത്ത് ഫേസ്‌ബുക്കിൽ കൊടുത്ത “സപ്പോട്ടക്ക് ” പിന്തുണ നൽകുമെന്ന് പറയണം.

•നാളെ നിങ്ങളുടെ മകൻ ചിത്രം വരയ്ക്കാൻ ക്യാൻവാസിനായി നിങ്ങളുടെ ശരീരം ചോദിക്കുമ്പോൾ പിറന്നപടി കിടന്നു കൊടുക്കുമോ ?
•വേറൊരാൾക്ക് മുൻപിൽ മകനെയോ മകളെയോ ക്യാൻവാസ് ആയി കിടക്കാൻ അനുവദിക്കുമോ?

•സ്ത്രീയുടെ ശരീരം മാത്രമല്ല പുരുഷന്റെ ശരീരവും ഈ അറിവിൽ പ്രധാനമാണെന്നിരിക്കെ ലൈംഗിക വിദ്യാഭ്യാസം നല്കാൻ മകൾക്ക് മുൻപിൽ അച്ഛനോട് കിടന്നുകൊടുക്കണമെന്നു പറയാൻ നിങ്ങളിൽ എത്ര പേര് തയ്യാറാകും?
•അച്ഛനും അമ്മയും ശാരീരിക ബന്ധത്തിലേർപ്പെടുമ്പോൾ ഉണ്ടാകുന്ന ചെറിയ ശബ്ദം പോലും ചെവിയോർത്ത് ശ്രദ്ധിക്കുന്ന കുഞ്ഞുമക്കളെ മാറ്റികിടത്താതെ ലൈംഗിക അറിവ് പകരാൻ നിങ്ങളിൽ എത്ര പേര് അവരെ കൂടെ കിടത്തും??
•കുഞ്ഞുങ്ങളെ മുലയൂട്ടുന്നതുകൊണ്ട് ഞാൻ വീട്ടിൽ മേൽവസ്ത്രം ധരിക്കാറില്ലെന്ന് പറയുന്നവർ മറ്റുള്ളവർ വീട്ടിലെത്തുമ്പോൾ അങ്ങനെ തന്നെ ആണോ പുറത്തേക്ക് ചെല്ലാറുള്ളത്.

•നാളെ കൂടെപഠിക്കുന്നവരോടോ ടീച്ചറോടോ അല്ലെങ്കിൽ ഏതെങ്കിലുമൊരു അന്യസ്ത്രീയോടോ എന്റമ്മ ഇതൊക്കെ എനിക്ക് കാണിച്ചുതരുന്നതാണെന്നും ലൈംഗികത തലപോകുന്ന വിഷയമല്ലെന്നും ആർക്ക് മുൻപിലും എങ്ങനെ വേണമെങ്കിലും എപ്പോൾ വേണമെങ്കിലും നിൽക്കാമെന്നും ചെറുപ്രായത്തിൽ ധൈര്യസമേതം പറയാൻ മകനെ പ്രാപ്തനാക്കുന്ന ഗവേഷണത്തിൽ നിങ്ങൾ ആരൊക്കെ ആത്മാർഥമായി പങ്കെടുക്കും?
ഏറ്റവും പ്രധാനമായി..

“• സാമൂഹികഅവബോധത്തിനായി ഈ ആശയത്തിലൂടെ ഒരു വീഡിയോ പിടിച്ച് എത്രപേർ മറ്റുള്ളവർക്ക് കണ്ടുപഠിക്കാനായി സോഷ്യൽമീഡിയയിൽ പോസ്റ്റും? ”
ഇത്തരത്തിൽ വളർന്നുവരുന്ന മക്കൾക്ക് കിട്ടുന്ന അറിവ് ശരിയായ ദിശയിൽ തന്നെയാണ് എത്തിയതെന്നും
നിങ്ങളുടെ ഭർത്താവോ അച്ഛനോ മകനോ അന്യസ്ത്രീകളെ ബഹുമാനിക്കുന്നത് അവരുടെ അമ്മമാരുടെ നഗ്നശരീരം കണ്ടുവളർന്നിട്ടാണോ എന്ന് കൂടി ആലോചിക്കണം..
അർദ്ധനഗ്നശരീരത്തിൽ ചിത്രം വരക്കാൻ മകനെ പഠിപ്പിക്കുന്ന ഒരമ്മക്കെതിരെ മാത്രമല്ല ഷർട്ടിടാത്ത അച്ഛന്മാർക്ക് എതിരെയും കേസ് കൊടുക്കണമെന്ന് കമെന്റുകൾ കണ്ടു.. മാറ് മറക്കാൻ സമരം നടത്തിയത് സ്ത്രീകൾക്ക് വേണ്ടി ആയിരുന്നില്ലേ അന്നെന്ത്‌ കൊണ്ട് പുരുഷന്മാരും മറയ്ക്കണമെന്ന് ആരും നിർബന്ധം പിടിച്ചില്ല.

അമ്മയിലെ മുല തന്നെയാണ് ഭാര്യയ്‌ക്കും മകൾക്കും പെങ്ങൾക്കും ഉള്ളത് എന്ന് കരുതി മുലയൂട്ടുന്ന ഒരു അമ്മയെ നോക്കി പെങ്ങളോടും മകളോടും ഇനിമുതൽ മേൽവസ്ത്രം ഇട്ടില്ലെങ്കിലും കുഴപ്പമില്ലെന്ന് ആരും പറയാറില്ല കാരണം മുലയെന്നത് സാധാരണ അവയവമല്ലെന്നും വ്യക്തിയും സാഹചര്യവും മാറിവരുമ്പോൾ ലൈംഗികതയിൽ അതിന് പങ്കുണ്ടെന്നും എല്ലാവർക്കും അറിയാം..
ഇന്നലെകളിൽ പീരിയഡ്‌സും പാഡുമൊക്കെ അശ്ലീലവും അറപ്പുമൊക്കെ ആയിരുന്നു ഇന്നത് ഒരുപാട് ആൺമക്കൾ എന്താണെന്ന് അറിഞ്ഞുവളരുന്നത് ചോര കിനിയുന്ന നാപ്കിനും അത് വരുന്നവഴിയും മക്കൾക്ക് മുൻപിൽ അമ്മമാർ പ്രദർശിപ്പിച്ചല്ല..അതുപോലെ ഈ അറിവ് പകരാനും എത്രയോ വഴികളുണ്ട്

അമ്മയുടെ മുല കണ്ടതുകൊണ്ട് മകന് ഒന്നും തോന്നില്ല അതിന് തെളിവുകളായി തളർന്നുവീണുപോയ അമ്മയെ ശുശ്രുഷിക്കുന്ന ആൺമക്കളെ ഞാൻ കണ്ടിട്ടുണ്ട് ആ കണ്ണുകളിൽ നഗ്നതയോടുള്ള ആർത്തി ഞാൻ കണ്ടിട്ടില്ല..
പക്ഷേ ഇത് സോഷ്യൽ മീഡിയ വഴി പബ്ലിഷ് ചെയ്ത് ആശയം പടർത്താൻ ശ്രമിച്ചവർക്ക് നഗ്‌നതാപ്രദർശനമെന്ന കടുത്ത മാനസികരോഗമുണ്ടെന്നാണ് എനിക്ക് തോന്നിയത്..
വഴിവക്കിൽ നിന്ന് തുണി പൊക്കികാണിക്കുന്നവരുടെ മനോഭാവം പോലെ ആരെങ്കിലുമൊക്കെ കണ്ടാൽ കിട്ടുന്ന ഒരു മനസുഖം.. കൂടെ പണവും.
പറയാനുള്ള കാരണം യൂട്യൂബിൽ പുള്ളിക്കാരിയുടെ വീഡിയോയിൽ ടോപ്‌ലെസ് കാഴ്ച സ്ഥിരം സംഭവം ആണ് ഇറക്കംകുറഞ്ഞ വസ്ത്രം , നഗ്നത ഇതൊക്കെ സ്ഥിരം കാഴ്ചക്കാർക്ക് അനുഭൂതിയുണ്ടാക്കി അവിടെയുണ്ട്.

വീഡിയോ എടുക്കുന്നവൻ ശ്രദ്ധിക്കുന്നതും മുൻഗണന നൽകുന്നതും അവരുടെ ചാളകറി വെക്കുന്നതിലല്ല നഗ്‌നശരീരത്തിൽ ആണ് ..അതിൽ തന്നെ വ്യക്തമാണ് കാണാൻ വരുന്നതിൽ ഭൂരിഭാഗവും അവരുടെ ശരീരം കാണാൻ വരുന്നവരാണെന്ന ബോധ്യം വീഡിയോഗ്രാഫർക്കും അവർക്കും ഉണ്ടെന്ന് അതിനെ വ്യൂസും പൈസയുമാക്കി മാറ്റാൻ അവർ തീരുമാനിക്കുകയും ചെയ്തു.
രാത്രി ഉറങ്ങും മുൻപ് വീഡിയോ രഹസ്യമായി കാണുന്ന സദാചാരക്കാരും അമ്മയുടെ മുല കണ്ടാൽ മകന് എന്ത് തോന്നാൻ എന്ന് അനുകൂലിക്കുന്നവരും വീഡിയോ മുഴുവൻ കണ്ട് വൈറൽ ആക്കി.
നാളെ മക്കൾക്ക് മുൻപിൽ ശാരീരിക ബന്ധത്തിലേർപ്പെടുമ്പോഴുള്ള വീഡിയോ അവർ മറ്റുള്ളവർക്ക് വിജ്ഞാനപ്രദമായി പോസ്റ്റിയാലും നമ്മൾ വൈറൽ ആക്കും ..ആക്കണം.കാരണം നമ്മുടെ മക്കൾക്ക് കിട്ടുന്ന അറിവിനേക്കാളും അവരുടെ കഞ്ഞികുടി പ്രശ്നമാണ്.
കുഞ്ഞിനെ വച്ചുള്ള ചൂണ്ടയിൽ എല്ലാവരും പോയി അന്തസ്സായി കൊത്തി അതിൽ കൂടുതൽ പ്രത്യേകതയൊന്നും ഈ പുരോഗമനവാദത്തിന് ഇല്ലെന്നാണ് എനിക്ക് തോന്നിയത്.
നാളെ ഇതിന്റെ പേരിൽ എന്നും നിന്റെ വീട്ടിൽ ഇതൊക്കെത്തന്നെ അല്ലേയെന്ന് ആ കുഞ്ഞ് അപമാനിക്കപ്പെടില്ലയെന്നും വേറൊരു ദിശയിലേക്ക് ആ മകന്റെ ചിന്താഗതികൾ മാറില്ലയെന്നും പ്രതീക്ഷിക്കാം അല്ലേ

പതിനെട്ട് വയസ്സെന്ന പ്രായപരിധി വെറുതെയല്ലെന്നും അതുകഴിഞ്ഞുള്ള പ്രായത്തിലേ സമ്മതമെന്ന വാക്കിന് പോലും പ്രസക്തിയുള്ളൂവെന്നും വാളയാർ കേസിലെ ഉഭയകക്ഷിസമ്മതപ്രകാരമെന്ന എഫ് ഐ ആറിനെ ശക്തമായി ചോദ്യം ചെയ്തവർ ഈ കുഞ്ഞിന്റെ പ്രായം കാണാത്തതുകൊണ്ടാണോ മറന്നിട്ടോ ആകുമല്ലേ അനുകൂല പോസ്റ്റ് ഇട്ടത് ..
പത്തിരുപത് പട്ടാളക്കാർ മരിച്ചുവീണപ്പോൾ ഇത്രെയും കോളിളക്കം ഫേസ്‌ബുക്കിൽ ഉണ്ടായില്ലായിരുന്നു.
പക്ഷേ മുഖ്യമന്ത്രിയുടെ മകളുടെ രണ്ടാം വിവാഹമെന്ന സ്വകാര്യത എല്ലാവരും ആഘോഷിച്ചു…
വയനാട്ടിൽ ഒരു പയ്യനെ കടുവ കടിച്ചുകൊന്ന് ശരീരത്തിന്റെ ബാക്കി മീൻ മുള്ള് പോലെ ഇട്ടിട്ട് പോയപ്പോഴും ആരും അറിഞ്ഞില്ല..
പകരം ആന മരിച്ചത് ലോകം മുഴുവൻ അറിഞ്ഞിരുന്നു..

അതുപോലൊന്ന് മാത്രമാണ് സോഷ്യൽ മീഡിയയിയിൽ ഇന്നലെമുതലുള്ള ട്രെൻഡ് ചിത്രംവര..
പെൺമക്കൾ ആയിട്ട് പോലും കുഞ്ഞുങ്ങൾ ഇത്തിരി മുതിർന്നപ്പോൾ ഉടുപ്പ് മാറാൻ പോലും മറവ് തേടി പോകുന്ന അത്രയൊന്നും പുരോഗമനമെത്താത്ത കുലസ്ത്രീ അമ്മമാരിൽ പെട്ട ഒരമ്മയാണ് പോസ്റ്റിട്ടതിന് ക്ഷമിക്കണം.
ലിസ് ലോന✍️

Advertisements