കഴിഞ്ഞ ആറുമാസം എഴുപത് മലയാളചിത്രങ്ങൾ, തിയേറ്ററുകളിൽ ആളുകയറിയത് ഏഴു ചിത്രങ്ങൾക്ക് , പ്രതിസന്ധി രൂക്ഷം

കോവിഡിന് ശേഷമുള്ള മലയാള സിനിമയുടെ അവസ്ഥ വളരെ പരിതാപകരമാണ്. തിയേറ്ററിൽ ആള് കയറുന്നില്ല എന്നതാണ് ഏറ്റവും വലിയ ദുരവസ്ഥ. ലോക് ഡൌൺ കാലത്ത് ഒടിടിയുടെ ആനുകൂല്യം മുതലെടുത്തു കുറഞ്ഞ ചിലവിൽ കുടുംബസമേതം ചിത്രങ്ങൾ ആസ്വദിച്ച മലയാളിക്ക് തിയേറ്ററിലെ ഭാരിച്ച ചിലവുകൾ ഓർത്ത് തിയേറ്ററിൽ പോകാൻ ഭയവും മടിയുമാണ്. എത്രവലിയ തിയേറ്റർ അനുഭവം നൽകുന്ന സിനിമയാണ് എങ്കിലും ഒടിടിയിൽ വരുമ്പോൾ കണ്ടോളാം എന്ന നിലപാടാണ് ഇപ്പോൾ ഭൂരിപക്ഷം മലയാളികൾക്കും. തിയേറ്ററുകൾ ഈടാക്കുന്ന അമിത നിരക്ക് തന്നെയാണ് പ്രധാനവില്ലൻ. കുടുംബസമേതം സിനിമയ്ക്കു പോകാൻ ശരാശരി മലയാളിക്ക് ഇപ്പോൾ ഭയമാണ്.

കഴിഞ്ഞ ആറുമാസം റിലീസ് ചെയ്ത എഴുപതോളം ചിത്രങ്ങളിൽ ലാഭം നേടിയത് വെറും ഏഴു ചിത്രങ്ങൾ മാത്രം. പ്രതിസന്ധിയുടെ രൂക്ഷത ഇതിലൂടെ തന്നെ മനസിലായല്ലോ. ‘‘വെറും പ്രതിസന്ധിയെന്നു പറഞ്ഞാൽ പോരാ. തിയറ്ററുകളിൽ ആളു വരാത്ത സ്ഥിതിയാണ്. പല തിയറ്ററുകളിലും ഷോ നടത്താൻ പറ്റുന്നില്ല’’ – ഇതൊരു പ്രമുഖ നിർമ്മാതാവിന്റെ വാക്കുകൾ ആണ്.

അമൽ നീരദ് മമ്മൂട്ടി കൂട്ടുകെട്ടിൽ പിറന്ന ഭീഷ്മപർവ്വം, വിനീത് ശ്രീനിവാസൻ സംവിധാനം ചെയ്തു പ്രണവ് മോഹൻലാൽ കല്യാണി പ്രിയദർശൻ, ദർശന രാജേന്ദ്രൻ എന്നിവർ അഭിനയിച്ച ഹൃദയം, എ.ഡി.ഗിരീഷ് സംവിധാനം ചെയ്തു അനശ്വര രാജൻ , മമത ബൈജു, അർജുൻ അശോകൻ, നസ്ലിൻ എന്നിവർ അഭിനയിച്ച സൂപ്പർ ശരണ്യ, ബിബിൻ കൃഷ്ണ തിരകകഥയും സംവിധാനവും നിർവഹിച്ചു അനൂപ്മേനോൻ പ്രധാന വേഷത്തിൽ എത്തിയ ’21 ഗ്രാംസ്’ എന്ന ക്രൈം ത്രില്ലർ, ഡിജോ ജോസ് ആന്റണി സംവിധാനം ചെയ്തു പൃഥ്വിരാജ് , സുരാജ് വെഞ്ഞാറമ്മൂട്, മമ്ത മോഹൻദാസ് എന്നിവർ അഭിനയിച്ച ജനഗണമന , ജനപ്രീതി നേടിയില്ലെങ്കിലും മമ്മൂട്ടി, എസ്എൻ സ്വാമി , കെ മധു കൂട്ടുകെട്ടിൽ ഇറങ്ങിയ സിബിഐ 5 ദി ബ്രയ്ൻ , അർജുൻ ഡി.ജോസ് സംവിധാനം ചെയ്ത് മാത്യുസ്, നിഖില വിമൽ, നസ്ലിൻ എന്നിവർ പ്രധാന വേഷത്തിൽ എത്തിയ ജോ ആൻഡ് ജോ ഇവയൊക്കെ തിയേറ്ററുകളിൽ ഇളക്കം സൃഷ്ടിച്ചു കാശുവാരിയ ചിത്രങ്ങളാണ്. ഇന്ദ്രൻസ്, ദുർഗകൃഷ്ണ, ധ്യാൻ ശ്രീനിവാസൻ എന്നിവർ അഭിനയിച്ച ഉടൽ, ശക്തമായ തിരിച്ചുവരവ് നടത്തിയ നവ്യാനായരെ കേന്ദ്രകഥാപാത്രമാക്കി വികെ പ്രകാശ് സംവിധാനം ചെയ്ത ഒരുത്തി ഇവയൊക്കെ ലാഭം നേടിയ ചിത്രങ്ങളാണ്. ആർആർആർ, കെജിഎഫ് 2, വിക്രം തുടങ്ങിയ ബഹുഭാഷാ ചിത്രങ്ങൾ കേരളത്തിൽ നിന്നു മാത്രം വാരിയത് എത്രയോ കോടികൾ ആണ്.

 1,598 total views,  4 views today