പ്രകൃതി ദുരന്തങ്ങൾ നേരിടാൻ നിസാർ

21

പ്രകൃതി ദുരന്തങ്ങൾ നേരിടാൻ നിസാർ

ലോകത്തിലെ ആദ്യ റഡാർ ഇമേജിംഗ് സാറ്റലൈറ്റ് വിക്ഷേപണത്തിനൊരുങ്ങുകയാണ് ഐഎസ്ആർഒ യും നാസയും. 2022 സെപ്തംബറിൽ ഇന്ത്യൻ റോക്കറ്റിൽ (GSLV Mk II) വിക്ഷേപിക്കുന്ന ഈ കൃത്രിമ ഉപഗ്രഹത്തിന് നൽകിയിരിക്കുന്ന പേര് നിസാർ (Nasa‐Isro Synthetic Aperture Radar ‐NISAR) എന്നാണ്. ഇരട്ട ഫ്രീക്വൻസ്വിയിൽ, ഏറ്റവും നവീനമായ റഡാർ സാങ്കേതികവിദ്യയിലാണ് നിസാർ പ്രവർത്തിക്കുന്നത്.

Missions | NASA-ISRO Synthetic Aperture Radar2016 സെപ്തംബർ 30 ന് ടൊറന്റോയിൽ ഒപ്പുവച്ച കരാർ പ്രകാരമാണ് നിസാറിന്റെ നിർമാണ, നിയന്ത്രണ പ്രവർത്തനങ്ങൾക്കു ഔദ്യോഗിക അംഗീകാരമായത്. ഇതു പ്രകാരം സ്പേസ് ക്രാഫ്റ്റിന്റെ നിർമാണം, വിക്ഷേപണ വാഹനം, ഒരു എസ്‐ബാൻഡ് സിന്തറ്റിക് അപെർചർ റഡാർ എന്നിവയുടെ നിർമാണ ചുമതല ഐ എസ് ആർ ഒ ക്കാണ്. സ്പേസ് ക്രാഫ്റ്റിൽ ഉപയോഗിക്കുന്ന കമ്യൂണിക്കേഷൻ സബ്സിസ്റ്റം, ജിപിഎസ് റിസീവറുകൾ, റെക്കോർഡർ, ഡാറ്റാ സബ്സിസ്റ്റം പെലോഡ്, എൽ‐ബാൻഡ് സിന്തറ്റിക് അപെർചർ റഡാർ എന്നിവ നാസ നിർമിച്ചു നൽകും. ഇന്ത്യയിൽ നിന്നായിരിക്കും പേടകം വിക്ഷേപിക്കുക. പേടകത്തിന്റെ നിയന്ത്രണം ഐ എസ്ആർഒ യും നാസയും സംയുക്തമായി നിർവഹിക്കും.

ഭൂവൽക്കം (crust) പരിണമിച്ചുണ്ടായതിനെക്കുറിച്ചുള്ള ഏറ്റവും വ്യക്തമായ വിവരങ്ങൾ നിസാർ ശേഖരിക്കും. ഭൗമാന്തർഭാഗത്ത് നടക്കുന്ന സംവഹന പ്രവർത്തനങ്ങളെ കുറിച്ചും കാലാവസ്ഥ വ്യതിയാനത്തെ കുറിച്ചും കൂടുതൽ വിശ്വസനീയമായ വിവരങ്ങൾ നൽകാൻ നിസാറിന് കഴിയും. പന്ത്രണ്ട് മീറ്റർ വ്യാസമുള്ള വൃത്താകൃതിയിലുള്ള വലിയ മെഷ് ആന്റിനയാണ് സ്പേസ് ക്രാഫ്റ്റിന്റെ പ്രധാന സവിശേഷത. എൽ‐ബാൻഡിലും എസ്‐ബാൻഡിലും പ്രവർത്തനക്ഷമമാണിത്.

സൂര്യ കേന്ദ്രീകൃത ഭ്രമണ പഥത്തിലാണ് (sun synchronous orbit) പേടകത്തെ നിലനിർത്തുന്നത്. മൂന്ന് വർഷമാണ് ദൗത്യകാലാവധി. സ്പേസ് ക്രാഫ്റ്റിന്റെ ഡിസൈനിങ് ഐ എസ് ആർ ഒ യിലെ ശാസ്ത്രജ്ഞർ നേരത്തെ തന്നെ നിർവഹിച്ചിരുന്നു. നാസ ഈ ഡിസൈൻ അംഗീകരിച്ചിട്ടുണ്ട്. രണ്ട് വ്യത്യസ്ത റഡാർ ഉപയോഗിച്ച് ഭൂമുഖത്തെ ഓരോ സെന്റീമീറ്ററും സ്കാൻ ചെയ്യാൻ കഴിയുന്ന നിസാറിന് അവിടെയുണ്ടാകുന്ന ചെറിയ മാറ്റം പോലും കൃത്യമായി കണ്ടെത്താൻ കഴിയും. വിക്ഷേപിച്ചു കഴിയുമ്പോൾ ഇത്തരത്തിലുള്ള ലോകത്തിലെ ആദ്യത്തെ കൃത്രിമ ഉപഗ്രഹമായിരിക്കും നിസാർ. നാസയുടെ മേധാവിയായ ചാൾസ് ബോൾഡൻ 2014 ജൂൺ 25 ന് ഐഎസ്ആർഒ യുടെ അഹമ്മദാബാദിലുള്ള സ്പേസ് ആപ്ലിക്കേഷൻ സെന്ററിൽ (SAC) സന്ദർശനം നടത്തിയപ്പോഴാണ് ഇത്തരമൊരു സംയുക്ത സംരംഭമെന്ന ആശയം മുന്നോട്ടുവെക്കുന്നത്.

എൽ‐ബാൻഡ് (L‐Band)

വിദ്യുത് കാന്തിക വർണരാജിയിലെ നാല് വ്യത്യസ്ത വേവ് ബാൻഡുകളെയാണ് എൽ‐ബാൻഡ് എന്നതുകൊണ്ട് വ്യക്തമാക്കുന്നത്. 40 മുതൽ 60 ജിഗാ ഹെർട്സ് വരെ (NATO), 1 മുതൽ 2 ജിഗാ ഹെർട്സ് വരെ (IEEE), 1565 മുതൽ 1625 നാനോമീറ്റർവരെ (Optical), 3.5 മൈക്രോമീറ്റർ (Microwave) എന്നിവയാണവ.

എസ്‐ബാൻഡ് (S‐Band)

വിദ്യുത്കാന്തിക സ്പെക്ട്രത്തിൽ മൈക്രോവേവ് ബാൻഡിന്റെ ഒരു ഭാഗമാണ് എസ്‐ബാൻഡ്. 2 മുതൽ 4 ജിഗാഹെർട്സ് വരെ ആവൃത്തിയുള്ള റേഡിയോ തരംഗങ്ങളാണ് ഇതിൽ ഉൾക്കൊണ്ടിരിക്കുന്നത്. കാലാവസ്ഥ പ്രവചനം, ജലഗതാഗതം എന്നിവയ്ക്കുപയോഗിക്കുന്ന റഡാർ ഫ്രീക്വൻസിക്ക് തുല്യമാണിത്. ഇത് കൂടാതെ വാർത്താവിനിമയ ഉപഗ്രഹങ്ങൾ, സ്പേസ് ഷട്ടിലുകൾ, ഇന്റർനാഷണൽ സ്പേസ് സ്റ്റേഷൻ എന്നിവയിലും ഇതേ ആവൃത്തിയുള്ള റേഡിയോ തരംഗങ്ങളാണ് ഉപയോഗിക്കുന്നത്.

സിന്തറ്റിക് അപെർചർ റഡാർ (SAR)

ഒരു ഭൂപ്രദേശത്തിന്റെ ചിത്രമെടുക്കാൻ ഉപയോഗിക്കുന്ന റഡാർ വകഭേദമാണ് സിന്തറ്റിക് അപെർചർ റഡാർ. വലിയൊരു ആന്റിനയുടെ സഹായത്തോടെയാണ് ഇത് സാധ്യമാകുന്നത്. പരമ്പരാഗത ബീം‐സ്കാനിങ് റഡാർ സംവിധാനത്തിൽനിന്നും വ്യത്യസ്തമായി ഒരു വസ്തുവിന്റെയോ ഭൂപ്രദേശത്തിന്റേയോ വളരെ വ്യക്തമായ ചിത്രങ്ങൾ നിർമിക്കാൻ ഈ സങ്കേതമുപയോഗിച്ച് സാധിക്കും. ചലിച്ചുകൊണ്ടിരിക്കുന്ന ഒരു പ്രതലത്തിലാണ് സാധാരണയായി ഇത്തരം റഡാറുകൾ സ്ഥാപിക്കുന്നത്. വിമാനമോ കൃത്രിമ ഉപഗ്രഹമോ ആണ് ഇതിനായി ഉപയോഗിക്കുന്നത്. ഇപ്പോൾ പ്രവർത്തിച്ചുകൊണ്ടിരിക്കുന്ന പാർശ്വ വീക്ഷണ റഡാറിന്റെ (Side Looking Airborne Radar‐SLAR) നവീന രൂപമാണ് സിന്തറ്റിക് അപെർചർ റഡാർ.

ലക്ഷ്യ സ്ഥാനത്തേക്ക് റേഡിയോ സിഗ്നലുകൾ അയക്കുകയും പ്രതിഫലിച്ചു വരുന്ന തരംഗങ്ങളിലുണ്ടാകുന്ന ആന്ദോളനങ്ങൾ കൃത്യമായി കണക്കുകൂട്ടിയുമാണ് ഭൂപ്രദേശത്തിന്റെ സമഗ്രമായ ചിത്രം നിർമിക്കുന്നത്. ഇങ്ങനെ പ്രതിഫലിച്ചു വരുന്ന അനുപ്രസ്ഥ തരംഗങ്ങൾക്കുണ്ടാകുന്ന അപശ്രുതി അളക്കുന്നതുവഴി ഭൂകമ്പം, സുനാമി, അഗ്നിപർവത സ്ഫോടനം തുടങ്ങിയ പ്രതിഭാസങ്ങൾ മുൻകൂട്ടി കണ്ടെത്താൻ കഴിയും. മുൻകരുതലുകളെടുക്കാൻ അത് സഹായകരമാവും.