മലയാളി അവഗണിച്ചെങ്കിലും ഹിറ്റുകളുടെ പരമ്പര തന്നെ ജാസി കന്നഡത്തിൽ സൃഷ്ടിക്കുകയുണ്ടായി

30

Nikhil Venugopal

ജാസ്സി ഗിഫ്റ്റ്..

മലയാളത്തിനൊരു ദുശ്ശീലമുണ്ട്.ദുശ്ശീലം എന്നല്ല, മലയാളം അങ്ങിനെയാണ്‌..എന്തെന്നാൽ,വളരെ യാഥാസ്ഥിതികമായ ഒരു ചട്ടക്കൂടിനകത്താണ്‌ മലയാള സിനിമാസംഗീതം ഏറെക്കാലവും കറങ്ങിക്കൊണ്ടിരുന്നത്. അതായത് മലയാളത്തിൽ എന്തെങ്കിലുമൊക്കെ ചെയ്ത് അംഗീകരിക്കപ്പെടണമെങ്കിൽ ഈ ചട്ടക്കൂടിനകത്ത് കൃത്യമായി ഒതുങ്ങി നിൽക്കണം. അല്ലാത്തതെന്തും അംഗീകരിക്കാൻ നമുക്ക് ഇത്തിരി വൈമനസ്യം ഉണ്ട്.ഈ ചട്ടക്കൂട് യേശുദാസ്-ദേവരാജൻ-ദക്ഷിണാമൂർത്തി-ബാബുരാജ് കാലഘട്ടത്തിൽ തനിയെ ഉരുത്തിരിഞ്ഞു വന്ന ഒന്നാണ്‌. ഇവർക്കു ശേഷം പലരും വന്നു പോയെങ്കിലും പല പരീക്ഷണങ്ങളും നടന്നെങ്കിലും ഈയ്യടുത്ത കാലം വരെ (കുറുച്ചു കൂടെ സ്പഷ്ടമായി പറഞ്ഞാൽ യേശുദാസ് സജീവമല്ലാതാവുന്നതു വരെ) ഈ ചട്ടക്കൂടിന്‌ കാര്യമായ ഇളക്കമൊന്നും സംഭവിച്ചിട്ടില്ല. അതായത് ദേവരാജൻ ചെയ്തിരുന്ന പാട്ടുകളിൽ നിന്നും ശ്യാം, ജോൺസൺ, രവീന്ദ്രൻ, ഒക്കെ കഴിഞ്ഞ് എം.ജയചന്ദ്രൻ വരെയുള്ള സംഗീതസംവിധായകരും ഈ ചട്ടക്കൂടിനകത്ത് ഒതുങ്ങി നിന്നു, വ്യത്യസ്തമായ ശൈലികൾ നില നിർത്തിക്കൊണ്ടു തന്നെ.
ഇതിൽ നിന്നും വ്യത്യസ്തമായി എന്തെങ്കിലും ചെയ്താൽ മലയാളത്തിൽ അംഗീകരിക്കപ്പെടാൻ ബുദ്ധിമുട്ടാണ്‌. ഡിസ്കോ കാലഘട്ടം മലയാളത്തിലേക്ക് കൊണ്ടു വന്ന ശ്യാം പോലും പിടിച്ചു നിന്നത് മെലഡിയുടെയും റീ-റിക്കാർഡിംഗിന്റേയുമൊക്കെ ബലത്തിലാണെന്ന് ഓർക്കുക.

Jassie Gift Biography, Age, Height, Weight, Family, Caste, Wiki & Moreമലയാളസിനിമാസംഗീതത്തെ അല്പം വ്യത്യസ്തമായ വഴികളിലൂടെ നടത്താൻ ശ്രമിച്ച ശരതിന്‌ അവസരങ്ങൾ കാത്ത് പിന്നമ്പുറങ്ങളിൽ നിൽക്കേണ്ടി വന്നതും കുറച്ചൊക്കെ ഈ കാരണങ്ങൾ കൊണ്ടാണ്‌.തമിഴിലേക്കൊന്നു നോക്കൂ, എം.എസ്.വി യുടെ കർണ്ണാടക സംഗീത സ്വാധീനത്തെ മറികടക്കാൻ ഫോക്കും പാശ്ചാത്യസംഗീതവുമായി ഒരു ഇളയരാജ വന്നു.. പിന്നെ ഇളയരാജയെ മറികടന്ന് പുതിയ ശബ്ദവിപ്ളവവുമായി ഒരു ഏ ആർ റഹ്മാൻ വന്നു, റഹ്മാനോളം വന്നില്ലെങ്കിലും പുതിയ ചില രീതികളുമായി ഹാരിസ്സ് ജയരാജ് ചില മാറ്റങ്ങൾ സൃഷ്ടിച്ചു..മലയാളത്തിൽ അങ്ങിനെ ഒന്ന് ഉണ്ടായിട്ടുണ്ടോ?മലയാള സിനിമാ സംഗീതത്തിൽ ഹിറ്റായ ഗാനങ്ങളുമായി, വ്യത്യസ്തതകളുമായി പലരും അരങ്ങേറിയിട്ടുണ്ടെങ്കിലും ഒരു പാത് ബ്രേകിംഗ് എന്ന നിലയിൽ മലയാളത്തിൽ ഒരാളെ കണ്ടു കിട്ടാൻ ബുദ്ധിമുട്ടാണ്‌.അങ്ങിനെ ഒരാളെ ഉണ്ടായിട്ടുള്ളൂ..ജാസ്സി ഗിഫ്റ്റ്. മലയാള ഗാനമെന്നാൽ ഇങ്ങനെയൊക്കെ ആയിരിക്കണം എന്ന ധാരണകളെ മുച്ചൂടും പൊളിച്ചെഴുതുകയായിരുന്നു ലജ്ജാവതിയിലൂടെ ജാസ്സി ഗിഫ്റ്റ് ചെയ്തത്.

‘ലജ്ജാവതി’ ഇറങ്ങുന്നതു വരെ ഒരു തമിഴനോടോ തെലുങ്കനോടോ മലയാളഗാനങ്ങളെക്കുറിച്ച് ചോദിച്ചു നോക്കിയിട്ടുണ്ടോ? ഏറിപ്പോയാൽ കഷ്ടപ്പെട്ട് പറഞ്ഞൊപ്പിക്കുന്ന ഒരു “കടലിനക്കരെ പോണോരെ” എന്നു കേൾക്കാമായിരുന്നു. മലയാളത്തിലെ ഒരു പാട്ട്, തെന്നിന്ത്യ മുഴുവനായും ഏറ്റെടുക്കുന്നത്, എന്തിന്‌ ഹിന്ദിക്കാർ പോലും മൂളി നടന്നത് “ലജ്ജാവതി” ആണ്‌ എന്ന കാര്യത്തിൽ ഒരു സംശയവുമില്ല.
പക്ഷെ ഈ അംഗീകാരങ്ങൾക്കും പ്രശസ്തിക്കുമൊപ്പം തന്നെ അതിനിശിതമായ വിമർശനങ്ങളും ജാസി ഗിഫ്റ്റ് ഏറ്റു വാങ്ങി, പ്രത്യേകിച്ച് മലയാളത്തിൽ നിന്നും. ഒരു ഗാനം “അടിപൊളി” എന്നു ബ്രാൻഡ് ചെയ്യപ്പെട്ടാൽ പിന്നെ അതിനെ വിമർശിക്കാനും ഇകഴ്താനും പ്രത്യേകിച്ച് ബുദ്ധിമുട്ടില്ല മലയാളത്തിൽ.

എന്നാൽ ആ പാട്ടിൽ മെലഡിയുടെ മനോഹരമായ ഒരു അടിയൊഴുക്കുണ്ടായിരുന്നെന്നും, പണി അറിയാവുന്ന, പ്രതീക്ഷ വയ്ക്കാവുന്ന ഒരു കമ്പോസറുടെ സർഗ്ഗാത്മകത ഉണ്ടായിരുന്നെന്നും അധികം ചർച്ച ചെയ്യപ്പെടാതെ പോയി. “തൂവെള്ള തൂവൊന്നുഷസ്സിൽ” എന്ന അതീവഹൃദ്യമായ മെലഡിയിലൂടെയാണ്‌ ജാസി ഗിഫ്റ്റ് അരങ്ങേറ്റം കുറിച്ചത് എന്ന കാര്യം സകര്യപൂർവ്വം വിസ്മരിക്കപ്പെട്ടു. “ലജ്ജാവതി” ബ്രാൻഡിംഗിൽ അദ്ദേഹം ഒതുങ്ങിപ്പോയി. പിന്നാലെ വന്ന “ഒരു നൂറാശകൾ”, “സ്നേഹത്തുമ്പീ ഞാനില്ലേ കൂടെ” എന്നീ ലക്ഷണമൊത്ത ഗാനങ്ങൾക്കൊന്നും പിന്നീട് ആ ബ്രാൻഡിംഗ് മാറ്റിയെടുക്കാൻ സാധിച്ചില്ല. “റെയിൻ റെയിൻ ഗോ എവെ” യും “ശംഭു” വും ഒക്കെ അതിനൊരു കാരണമായിട്ടുണ്ട് എന്നതും വിസ്മരിക്കുന്നില്ല.

“അഴകാലില മഞ്ഞച്ചരടില്‌ പൂത്താലി” (അശ്വാരൂഢൻ), “മണിക്കിനാവിൻ കൊതുമ്പു വള്ളം” (പോക്കിരിരാജ), “അരികിൽ നിന്നാലും അറിയുവാൻ”(ചൈന ടൌൺ)… കൊള്ളാവുന്ന കുറേ ഗാനങ്ങളുണ്ട് ജാസി ഗിഫ്റ്റിന്റെ ക്രെഡിറ്റിൽ. മലയാളം പുറം തിരിഞ്ഞു നിന്നപ്പോൾ കന്നഡമാണ്‌ ജാസി ഗിഫ്റ്റിനെ ഇരു കൈയ്യും നീട്ടി സ്വീകരിച്ചത്. ഹിറ്റുകളുടെ ഒരു പരമ്പര തന്നെ ജാസി ഗിഫ്റ്റ് കന്നഡത്തിൽ സൃഷ്ടിക്കുകയുണ്ടായി.

കന്നഡത്തിലെ തെരെഞ്ഞെടുത്ത ചില ഗാനങ്ങൾ…






ജാസി ഗിഫ്റ്റിന്റെ മെലഡികൾക്ക് മലയാളത്തിൽ ഇനിയും സാധ്യതകളുണ്ട്.പുതിയ പടങ്ങളും പാട്ടുകളും മലയാളത്തിൽ അദ്ദേഹം ചെയ്യട്ടെ എന്ന് അതിയായി ആഗ്രഹിക്കുന്നു!! അഭിപ്രായങ്ങളും നിരിക്ഷണങ്ങളും തികച്ചും വ്യക്തിപരം.