ന്യൂക്ലിയര്‍ പ്രൊപൽഷൻ യാഥാര്‍ഥ്യമാകുമോ ?

Sabu Jose

ഭാവിയിലെ ചൊവ്വാ, ചാന്ദ്ര യാത്രകള്‍ക്കും അതിനുമപ്പുറത്തേയ്ക്കുള്ള ബഹിരാകാശ പര്യവേഷണങ്ങള്‍ക്ക് ഇനി ന്യൂക്ലിയര്‍ എഞ്ചിന്‍ ഘടിപ്പിച്ചിട്ടുള്ള ബഹിരാകാശ പേടകങ്ങളായിരിക്കാം ഉപയോഗിക്കുന്നത്. നിലവിലുള്ള സാങ്കേതികവിദ്യ (Chemical propulsion) നേരിടുന്ന നീണ്ട കാലദൈര്‍ഘ്യം ഒഴിവാക്കാനാകുമെന്നു മാത്രമല്ല, ന്യൂക്ലിയര്‍ എഞ്ചിനുകള്‍ കുറേക്കൂടി സുരക്ഷിതവും വിശ്വസനീയവും ഭാരക്കുറവുള്ളതുമാണ്. നിലവിലുള്ള ക്രയോജനിക് എഞ്ചിനുകളുടെ ഭാരക്കൂടുതലും ദ്രാവക ഇന്ധന ടാങ്കുകളുടെ വലിപ്പവും ദീര്‍ഘദൂര ബഹിരാകാശ യാത്രകള്‍ക്ക് അനുയോജ്യമല്ല. ഇനി സോളാര്‍ പാനലുകള്‍ ഉപയോഗിക്കാമെന്നുവച്ചാലോ? സൂര്യനില്‍നിന്ന് അകലുന്തോറും പ്രകാശ തീവ്രതയിലുണ്ടാകുന്ന കുറവുകാരണം സ്‌പേസ് ക്രാഫ്റ്റുകളില്‍ ഒരു ഫുട്‌ബോള്‍ കോര്‍ട്ടിന്റെയെങ്കിലും വലിപ്പമുള്ള പാനലുകള്‍ ഘടിപ്പിച്ചിരിക്കണം. ഇത്രയും വലിയ സോളാര്‍ പാനലുകളും വഹിച്ചുകൊണ്ടുള്ള യാത്ര അപകടകരമാണ്. മാത്രമല്ല അതൊട്ടും പ്രായോഗികവുമല്ല.ഇതിനെല്ലാമുള്ള മറുപടിയാണ് പുതിയ ന്യൂക്ലിയര്‍ എഞ്ചിനുകള്‍.

നാസയുടെയും ലോസ് അലാമോസ് നാഷണല്‍ ലാബറട്ടറിയുടെയും ഗവേഷകര്‍ ചേര്‍ന്നു രൂപകല്‍പ്പന നിര്‍വഹിച്ച ഏറ്റവും നവീനമായ ന്യൂക്ലിയന്‍ എഞ്ചിന്റെ പരീക്ഷണം പൂര്‍ണവിജയമായി. 19ാം നൂറ്റാണ്ടില്‍ നിര്‍മ്മിക്കപ്പെട്ട പഴയ സ്റ്റെര്‍ലിംഗ് ഗ്യാസ് എഞ്ചിനില്‍ ചില അഴിച്ചുപണികള്‍ നടത്തിയാണ് ഈ പുതിയ ന്യൂക്ലിയര്‍ എഞ്ചിന്‍ വികസിപ്പിച്ചെടുത്തിരിക്കുന്നത്. ഭാരക്കുറവുള്ളതും അനായാസം പ്രവര്‍ത്തിപ്പിക്കാന്‍ കഴിയുന്നതുമായ ന്യൂക്ലിയര്‍ എഞ്ചിനില്‍ സങ്കീര്‍ണമായ നിയന്ത്രണ സംവിധാനങ്ങള്‍ ഒന്നുംതന്നെ ഇല്ലെന്നുപറയാം. അതുകൂടാതെ സാധാരണയായി സ്‌പേസ് റോവറുകളില്‍ ഉപയോഗിക്കുന്ന ദുര്‍ലഭമായ പ്ലൂട്ടോണിയം (Pu-238) റേഡിയോ ഐസോടോപ്പിനു പകരം യുറാനിയം ഉപയോഗിക്കാന്‍ കഴിയുമെന്നതും ഈ യന്ത്രസംവിധാനത്തിന്റെ പ്രത്യേകതയാണ്. സൗരയൂഥത്തിന്റെ അതിരുകളും കടന്നു സഞ്ചരിച്ചുകൊണ്ടിരിക്കുന്ന വോയേജര്‍ ദൗത്യങ്ങളിലും, ശനി പര്യവേഷണവാഹനമായ കസീനിയിലുമാണ് ഇതിനുമുന്‍പ് പ്ലൂട്ടോണിയം റേഡിയോ ഐസോടോപ്പ് ഉപയോഗിച്ചിട്ടുള്ളത്. അതുകൂടാതെ ചൊവ്വയില്‍ പര്യവേഷണം നടത്തിക്കൊണ്ടിരിക്കുന്ന മാര്‍സ്‌റോവര്‍, ക്യൂരിയോസിറ്റിയിലും നേരിയ അളവില്‍ പ്ലൂട്ടോണിയം ഉപയോഗിക്കുന്നുണ്ട്.

ആറു ഭാഗങ്ങളാണ് ഗവേഷകര്‍ വികസിപ്പിച്ചെടുത്ത പുതിയ ന്യൂക്ലിയര്‍ എഞ്ചിനുള്ളത്. സമ്പുഷ്ട യുറാനിയം നിറച്ചിട്ടുള്ള കോര്‍, ഒരു കോര്‍ പ്രതിഫലകം, ഒരു നിയന്ത്രണദണ്ഡ് (എഞ്ചിന്‍ പ്രവര്‍ത്തിപ്പിക്കുന്നതിനും പ്രവര്‍ത്തനം നിര്‍ത്തുന്നതിനും വേണ്ടിയാണിത്), ഒരു റേഡിയേഷന്‍ ഷീല്‍ഡ്, ഹീറ്റ് പൈപ്പുകള്‍ ഘടിപ്പിച്ചിട്ടുള്ള എട്ട് സ്റ്റെര്‍ലിംഗ് എഞ്ചിനുകള്‍ ഇവയെല്ലാം ക്രമീകരിച്ചിട്ടുള്ള എഞ്ചിന്‍ യൂണിറ്റ് എന്നിവയാണവ. വളരെ കുറഞ്ഞ തോതില്‍ മുതല്‍ ന്യൂക്ലിയര്‍ പവര്‍‌സ്റ്റേഷനുകളിലേതുപോലെ ഉയര്‍ന്ന അളവില്‍ വരെ വൈദ്യുതി ഉല്‍പ്പാദിപ്പിക്കാന്‍ ഈ യന്ത്രസംവിധാനത്തിനു കഴിയും. പ്രവര്‍ത്തനമികവും കൈകാര്യം ചെയ്യാന്‍ എളുപ്പമുള്ള ഈ ന്യൂക്ലിയര്‍ എഞ്ചിന് പ്രത്യേക സുരക്ഷാ ക്രമീകരണങ്ങളോ, ശീതീകാരികളോ, ഘനജലമോ ഒന്നും ആവശ്യമില്ല.

ബഹിരാകാശ പേടകങ്ങള്‍ക്ക് 600 മുതല്‍ 700 വരെ വാട്ട് വൈദ്യുതിയാണ് ആവശ്യമുള്ളത്. പുതിയ ന്യൂക്ലിയര്‍ എഞ്ചിന്റെ പ്രോട്ടോടൈപ്പ് ഉപയോഗിച്ചു നടത്തിയ ‘ഡഫ്’ (Demonstration Using Flattop Fission- DUFF) പരീക്ഷണത്തില്‍ 24 വാട്ട് വൈദ്യുതിയാണ് ഉല്‍പ്പാദിപ്പിച്ചത്. പ്രോട്ടോടൈപ്പിന്റെ പരീക്ഷണ വിജയം ഈ പുതിയ സാങ്കേതികവിദ്യയുടെ (Kilowatt Reactor Using Stirling Technology- KRUSTY) വിജയമായാണ് ശാസ്ത്രജ്ഞര്‍ വിലയിരുത്തുന്നത്.1816ല്‍ റോബര്‍ട്ട് സ്‌റ്റെര്‍ലിംഗ് എന്ന സ്‌കോട്ടിഷ് എഞ്ചിനീയറാണ് സ്‌റ്റെര്‍ലിംഗ് എഞ്ചിന്‍ കണ്ടുപിടിച്ചത്. ഇതിന്റെ രൂപകല്‍പ്പനയിലുള്ള പ്രത്യേകതയാണ് ന്യൂക്ലിയര്‍ എഞ്ചിനുവേണ്ടി ഈ മാതൃക സ്വീകരിക്കാന്‍ കാരണമായത്. സാധാരണ ആന്തര ദഹനയന്ത്രങ്ങളെ അപേക്ഷിച്ച് ആണവ ഇന്ധനമുള്‍പ്പെടെ ഏതു തരത്തിലുള്ള ഇന്ധനവും ഉപയോഗിക്കാന്‍ കഴിയുമെന്നതാണ് സ്‌റ്റെര്‍ലിംഗ് എഞ്ചിന്റെ സവിശേഷത. ലളിതമായ യന്ത്രസംവിധാനങ്ങളാണ് ഇതിലുള്ളത്. എഞ്ചിന്റെ പ്രവര്‍ത്തനത്തിന് വായുപ്രവാഹം ആവശ്യമില്ലാത്തതുകൊണ്ട് മുങ്ങിക്കപ്പലുകളിലും സ്റ്റെര്‍ലിംഗ് സാങ്കേതിക വിദ്യ (air- independent propulsion) ഉപയോഗിക്കാറുണ്ട്. കാലാവസ്ഥയിലുള്ള മാറ്റങ്ങള്‍ എഞ്ചിന്‍ പ്രവര്‍ത്തനത്തെ ബാധിക്കില്ല.

Leave a Reply
You May Also Like

പക്ഷികളുടെ മരണം നമ്മളറിയാതെ പോകുന്നു, ശരിക്കും പക്ഷികൾ മരിക്കുന്നത് എങ്ങനെയാണ് ?

പക്ഷികൾ മരിക്കുന്നത് എങ്ങനെ ? അറിവ് തേടുന്ന പാവം പ്രവാസി ജീവനുള്ളതെല്ലാം ഒരിക്കല്‍ ചാവും. മറ്റു…

ഒരു വിമാനത്തിലെ ടോയ്ലറ്റില്‍ കയറി ഫ്ലഷ് ചെയ്‌താല്‍ എന്ത് സംഭവിക്കും ?

ഒരു വിമാനത്തിലെ ടോയ്ലറ്റില്‍ കയറി ഫ്ലഷ് ചെയ്‌താല്‍ എന്ത് സംഭവിക്കും ? എന്തുകൊണ്ടാണ് ഫ്ലഷ് ചെയ്യുന്ന…

എന്താണ് ഉഷ്ണതരംഗം ?

ഇതൊരു തീവ്രമായ കാലാവസ്ഥയാണ്.ചൂടും സൂര്യപ്രകാശവും കൂടി മനുഷ്യശരീരത്തെ കൂടുതലായി ചൂടാക്കും. ഭാവിയെ നോക്കുമ്പോൾ കേരളത്തിന് പേടിക്കാൻ ഉഷ്ണതരംഗം (ഹീറ്റ് വേവ്) എന്ന ഒരു പ്രകൃതി പ്രതിഭാസം കൂടി എന്ന് ആലങ്കാരികമായി പറയാം.

ഒരു വിസയും ഗ്രീൻ കാർഡും തമ്മിലുള്ള വ്യത്യാസം എന്താണ് ? അമേരിക്കയിൽ പോകാൻ ആഗ്രഹിക്കുന്ന നിങ്ങൾ തീർച്ചയായും വായിച്ചിരിക്കണം

ഡിപ്പാർട്ട്‌മെൻ്റ് ഓഫ് ഹോംലാൻഡ് സെക്യൂരിറ്റിയുടെ കണക്കനുസരിച്ച്, 2018-ൽ മാത്രം 666,582 പേർ യുഎസിൽ വിസ കാലാവധി…