മെജോയ്ക്ക് ജനിച്ച മണ്ണിൽ അന്തിയുറങ്ങാൻ അവസരമൊരുക്കിയ സുരേഷ് ഗോപിക്കു നന്ദി

Parvathy Sumesh

ഓസ്ട്രേലിയയിൽ ഒറ്റപ്പെട്ടുകിടന്ന കുറച്ചു ഇന്ത്യക്കാരെ മെയ്‌ 25 നു എയർ ഇന്ത്യാ ഫ്ലൈറ്റിൽ കൊച്ചിൻ എയർപോർട്ടിൽ എത്തിക്കുമ്പോൾ അതിൽ അകാലത്തിൽ പൊലിഞ്ഞുപോയ മെജോ വർഗീസ് എന്ന മുപ്പത്തിയേഴുകാരന്റെ ഭൗതികശരീരവും ഉണ്ടായിരുന്നു.

ഓസ്ട്രേലിയയിലെ മിഡ്‌നോർത്‌ കോസ്റ്റ് റീജിയണിലെ Port Macquarie എന്ന സ്ഥലത്തു ആറു വർഷത്തോളം ജീവിച്ച മെജോ മലയാളി കമ്മ്യൂണിറ്റിയിലെ ഏറ്റവും പ്രിയപ്പെട്ട അംഗം ആയിരുന്നു. ഓസ്ട്രേലിയയിലേക്കു വരുന്നതിനു മുൻപ് മെജോയും കുടുംബവും അയർലണ്ടിൽ ആയിരുന്നു.സ്പോർട്സിൽ അതീവതൽപ്പരനായിരുന്ന മെജോ, ഐറിഷ് നാഷണൽ ബാഡ്മിന്റൺ ചാമ്പ്യൻഷിപ്‌ വിജയിയായിരുന്നു. അതുപോലെ അയർലണ്ടിൽ ആയിരുന്ന കാലത്തു യൂറോപ്യൻ ചാമ്പ്യൻഷിപ്പിൽ റണ്ണർ അപ്പുമായിരുന്നു. ബാഡ്‌മിന്റനു പുറമെ ക്രിക്കറ്റിലും, ഫുട്ബോളിലും തന്റെ പ്രതിഭ തെളിയിച്ച മെജോ ഒരു നല്ല പാട്ടുകാരനും, ഡാൻസറും ഒക്കെ ആയിരുന്നു.ഒരു സകലകലാവല്ലഭനായിരുന്ന മെജോ Port Macquarie, Kempsey എന്നീ ടൗണുകൾ ഉൾപ്പെട്ട ഹേസ്റ്റിംഗ്‌സ് മക്‌ലേ മലയാളി അസോസിയേഷന്റെ ജീവനും താളവും ആയിരുന്നു.

ഏപ്രിൽ ഇരുപത്തിഅഞ്ചാം തീയതി സൈക്കിൾ സവാരിക്കിടെ കാർഡിയാക് അറസ്റ്റ് വന്നു മെജോ അപ്രതീക്ഷിതമായി ഈ ലോകത്തോട് വിട പറയുമ്പോൾ അദ്ദേഹം ബാക്കിയാക്കി പോയത് നാലു വയസ്സുമാത്രം പ്രായമുള്ള മകനെയും, എട്ടു മാസം ഗർഭിണിയായ ഭാര്യയെയും, ഒരുപാട് സ്വപ്നങ്ങളുമാണ്. മെജോയുടെ അകാലവിയോഗത്തെ ഇപ്പോഴും ഉൾക്കൊള്ളാൻ കഴിയാത്ത അവസ്ഥയിൽ ആണ് ഇവിടുത്തെ മലയാളി കമ്മ്യൂണിറ്റിയും, അദ്ദേഹത്തിന്റെ സുഹൃത്തുക്കളും സഹപ്രവർത്തകരും എല്ലാം.

താൻ മരിക്കുമ്പോൾ നാട്ടിൽ അടക്കം ചെയ്യണം എന്നായിരുന്നു മെജോ എപ്പോഴും ആഗ്രഹിച്ചിരുന്നത്‌.മാത്രമല്ല മെജോയുടെ മാതാപിതാക്കൾക്ക് അവനെ അവസാനമായി ഒരു നോക്ക് കാണാനുള്ള ഒരേയൊരു അവസരം കൂടിയായതിനാൽ എങ്ങനെയെങ്കിലും മെജോയെ നാട്ടിൽ എത്തിക്കണം എന്ന ആഗ്രഹം അദ്ദേഹത്തിന്റെ ഭാര്യ പ്രകടപ്പിക്കുമ്പോൾ ഈയൊരു സാഹചര്യത്തിൽ അതൊരു വലിയ ചോദ്യചിഹ്നം ആയിരുന്നു. കൊറോണവ്യാപനം മൂലം ഫ്ലൈറ്റുകൾ ഇല്ലാതെ യാത്ര ചെയ്യാൻ കഴിയാത്ത അവസ്ഥ. എന്തിനും ഏതിനും തടസ്സങ്ങൾ മാത്രം നേരിടുന്ന പ്രതികൂല സാഹചര്യം. കേരളത്തിലേക്ക് പോകാൻ ഫ്ലൈറ്റുകൾ ഒന്നും ഇല്ലാത്ത ഒരു അവസ്ഥയിൽ എങ്ങനെ മെജോയെ അങ്കമാലിയിൽ എത്തിക്കും എന്നത്‌ തന്നെയായിരുന്നു നിസ്സംശയമായും ഏറ്റവും വലിയ വെല്ലുവിളി.

ബോംബെയിലേക്ക് ഒരു ഫ്ലൈറ്റ് ഉണ്ടായിരുന്നു, എന്നാൽ മരിച്ചയാളെ ബോംബെയിൽ നിന്ന് അങ്കമാലിയിലേക്ക് 3-4 സംസ്ഥാന അതിർത്തികൾ കടന്നു എങ്ങനെ എത്തിക്കുമെന്ന് എന്നതിനെപ്പറ്റി ആർക്കും അറിവില്ലായിരുന്നു. മരണമടഞ്ഞവരെ ഇന്ത്യയിലേക്ക് കൊണ്ടുപോകുന്നതിൽ ഗണ്യമായ പരിചയമുള്ള ഒരു ഫ്യൂണറൽ ഹോമിനെ കാര്യങ്ങൾ ചുമതലപ്പെടുത്തി. റീപാട്രിയേഷന് ആവശ്യമായ രേഖകൾ സിഡ്നിയിലെ ഇന്ത്യൻ കോൺസുലേറ്റിൽ സമർപ്പിച്ചു. യു‌എഇയിലേക്കും ബോംബെയിലേക്കും ചരക്ക് സർവീസുകളല്ലാതെ ഇന്ത്യയിലേക്ക് നിലവിൽ വിമാനങ്ങളൊന്നുമില്ലെന്ന് കാർഗോ സർവീസ് അറിയിച്ചു. തങ്ങളുടെ പ്രിയപ്പെട്ട സുഹൃത്ത് ബോംബെ വിമാനത്താവളത്തിലെ ചില സംഭരണ ​​കേന്ദ്രത്തിൽ എല്ലാവരിൽ നിന്നും തനിച്ചായി ആരോരുമില്ലാതെ കിടക്കുന്നത്‌ ചിന്തിക്കാവുന്ന ഒന്നായിരുന്നില്ല.

ഓസ്‌ട്രേലിയയിൽ കുടുങ്ങിക്കിടക്കുന്ന ഇന്ത്യക്കാരെ തിരിച്ചുകൊണ്ടുവരാൻ എയർ ഇന്ത്യ സിഡ്‌നിയിൽ നിന്നും മെൽബണിൽ നിന്നും വിമാനങ്ങൾ ആസൂത്രണം ചെയ്യുന്നതിനെക്കുറിച്ചു മെയ് 12 നു വിവരം ലഭിച്ചു. ആ വിമാനങ്ങളിലൊന്ന്, മെൽബണിൽ നിന്ന് കൊച്ചിയിലേക്ക് ദില്ലി വഴിയായിരുന്നു. ഇതറിഞ്ഞപ്പോൾ മലയാളി കമ്മ്യൂണിറ്റിയുടെ മുന്നിൽ രണ്ട് പ്രധാന ചോദ്യങ്ങൾ ആയിരുന്നു ഉണ്ടായിരുന്നത്‌: ഒന്ന്:- മെജോയ്ക്ക് പോകാനുള്ള കാര്യങ്ങൾ കൈകാര്യം ചെയ്യുന്ന സിഡ്നി കാർഗോ സർവീസിന് മെൽബണിൽ ഒരു ബ്രാഞ്ച് ഉണ്ടാകുമോ? രണ്ട്:- മൃതദേഹം റെസ്ക്യൂ ഫ്ലൈറ്റിൽ കയറ്റാൻ എയർ ഇന്ത്യ സമ്മതിക്കുമോ?

ഫ്യൂണറൽ ഹോമുമായും, കോൺസുലേറ്റുമായും ബന്ധപ്പെട്ടു അന്വേഷണങ്ങൾ നടത്തിയപ്പോൾ , കാർഗോ സർവീസിന് മെൽബണിൽ ഒരു ശാഖയുണ്ടെന്നും വിമാനക്കമ്പനി അനുവദിച്ചാൽ മെജോയെ വിമാനത്തിൽ കയറ്റാമെന്നും അടുത്ത ദിവസം തന്നെ കണ്ടെത്തി. മൃതദേഹം വന്ദേ ഭാരത് മിഷന്റെ വിമാനത്തിൽ കയറ്റാൻ എയർ ഇന്ത്യ അനുവദിക്കുമോ എന്ന കാര്യത്തിൽ കോൺസുലേറ്റിന് ഉറപ്പില്ലായിരുന്നു.അവർ ഈക്കാര്യം എയർ ഇന്ത്യയോട് അഭ്യർത്ഥിച്ചു.ഫ്യൂണറൽ ഹോമിനെകൊണ്ടു ഇതേ ആവശ്യം അഭ്യർത്ഥിച്ചുകൊണ്ടു എയർ ഇന്ത്യക്ക് ഒരു ഇമെയിൽ അയപ്പിക്കാനും ഈ കാര്യങ്ങളുമായി ബന്ധപ്പെട്ടിരുന്ന ഷിജോയെ കോൺസുലേറ്റ് ഉപദേശിച്ചു.

ഈ കാര്യങ്ങൾ എല്ലാം ഏകോപിപ്പിച്ചുകൊണ്ടിരുന്ന ഷിജോയും, വിശാന്തും ഇന്ത്യയിൽ അറിയുന്ന എല്ലാ രാഷ്ട്രീയക്കാരുമായും ബന്ധപ്പെട്ടു. അവരും ദുരന്തനിവാരണ സമിതിയിലെ ജോസഫ് സാറും തങ്ങളാൽ കഴിയാവുന്ന വിധത്തിലുള്ള എല്ലാ കാര്യങ്ങളും ചെയ്തു. അയർലണ്ടിൽ കുടുങ്ങിക്കിടന്ന ക്യാൻസർ രോഗിയെ ഇന്ത്യയിലേക്ക് കൊണ്ടുവരാൻ സുരേഷ് ഗോപി സഹായിച്ചതിനെക്കുറിച്ചുള്ള ഒരു ലേഖനം വായിച്ച വിശാന്ത്, സുരേഷ് ഗോപിയെ അറിയാവുന്ന തന്റെ സുഹൃത്ത്‌ രാജേഷ് നായരുമായി ബന്ധപ്പെട്ടു. കാര്യങ്ങളുടെ സ്ഥിതി പരിശോധിക്കാൻ സുരേഷ് ഗോപി ഉടൻ കോൺസുലേറ്റുമായി ബന്ധപ്പെടുകയും തുടർന്ന് ഇൻഫ്ലൈറ്റ് സർവീസസ് എയർ ഇന്ത്യയുടെ സീനിയർ എക്സിക്യൂട്ടിവ് ആയ മധു സി. മാത്തനുമായി ബന്ധപ്പെടുകയും ചെയ്തു. മധു സി മാത്തൻ, മെൽബൺ വിമാനത്താവളത്തിലെ എയർ ഇന്ത്യ മാനേജരുമായി ഉടനെ ബന്ധപ്പെട്ടു. കാര്യങ്ങൾ വളരെപെട്ടെന്ന് തന്നെ മുമ്പത്തേതിനേക്കാൾ വേഗത്തിൽ നീങ്ങിത്തുടങ്ങി. യാത്രക്ക് ആവശ്യമായ എല്ലാ പേപ്പർ വർക്കുകളും കോൺസുലേറ്റ് പൂർത്തിയാക്കി. സിഡ്‌നി അംബാസിഡർ നന്ദകുമാറും, സ്റ്റാഫ് അംഗം അഫിലാജും ഇക്കാര്യത്തിൽ വിലമതിക്കാനാവാത്ത പിന്തുണ നൽകി.

ബുക്കിംഗ് ചെയ്യുന്നതിനായി അവരുടെ സിസ്റ്റത്തിൽ ഫ്ലൈറ്റ് നമ്പർ അപ്പോഴും തുറന്നിട്ടില്ലാത്തതിനാൽ എയർ ഇന്ത്യ പകരം ഒരു എയർവേ ബിൽ നമ്പർ നൽകി. കൊച്ചി വിമാനത്താവളത്തിലെ എയർ ഇന്ത്യ ഓഫീസുമായി ബന്ധപ്പെട്ടപ്പോൾ, വന്ദെ ഭാരത് മിഷന്റെ വിമാനങ്ങളിൽ മൃതദേഹം അനുവദനീയമാണോ എന്നതിനെപ്പറ്റി അവർക്കു ഉറപ്പില്ലാത്തതിനാൽ വീണ്ടും ഒരു തടസ്സം കൂടി നേരിട്ടു.. എന്നാൽ മധു മാത്തൻ കൊച്ചി ഓഫീസിലേക്ക് വിളിച്ച് സംശയനിവാരണം ചെയ്തു. കിടങ്ങൂരിലെ മെജോയുടെ കുടുംബത്തെ ബന്ധപ്പെട്ടു മൃതദേഹം സ്വീകരിക്കുന്നതിനുള്ള നടപടിക്രമങ്ങൾ കൊച്ചി ഓഫീസ് അറിയിച്ചു.

മെജോയുടെ ശവസംസ്ക്കാരചടങ്ങുകൾ കിടങ്ങൂരിലെ സെയിന്റ് സെബാസ്റ്റ്യൻ പള്ളിയിൽ ഇന്ന് രാവിലെ പതിനൊന്നു മണിക്ക് കുടുംബാംഗങ്ങളുടെ സാന്നിധ്യത്തിൽ നടന്നു. മെജോയുടെ ആഗ്രഹം പോലെ തന്നെ ജനിച്ച മണ്ണിൽ അന്തിയുറങ്ങാൻ ഇത്രയും പ്രതികൂലസാഹചര്യങ്ങൾ മറികടന്നു അവസരമൊരുക്കിയ പ്രിയതാരം സുരേഷ് ഗോപിക്കും, അതിനുവേണ്ട എല്ലാ നടപടിക്രമങ്ങളും പൂർത്തിയാക്കാൻ കൂടെ നടന്ന ഇന്ത്യൻ വിദേശകാര്യവകുപ്പിലെ അധികാരികൾക്കും, മറ്റു എല്ലാ ഉദ്യോഗസ്ഥർക്കും Hastings Macleay Malayali association ന്റെ എല്ലാ നന്ദിയും അറിയിക്കുന്നു. മെജോയുടെ ഭാര്യക്കും, മകനും താങ്ങും തണലുമായി, അവരെ ചേർത്തുപിടിച്ചു കൊണ്ടു പോർട്ട്‌ മാക്ക്വാറിയിലെ മലയാളികൾ കൂടെ തന്നെയുണ്ട്. മെജോ നിങ്ങൾ എങ്ങും പോയിട്ടില്ല, എല്ലാവരുടെയും ഹൃദയങ്ങളിലൂടെ നിങ്ങൾ ഇനിയും ജീവിക്കും.

 57 total views,  1 views today