നേരം വെളുക്കുമ്പോള്‍ പൂവൻ കോഴി കൂവുന്നത് എന്തുകൊണ്ട് ?
ചിട്ടപ്പെടുത്തിയത്: അറിവ് തേടുന്ന പാവം പ്രവാസി
കോഴിയുടെ കൂവൽ കേട്ട് എണീറ്റിട്ടുണ്ടെങ്കിലും അതെന്തു കൊണ്ടാണെന്ന് ചിന്തച്ചിട്ടുള്ളവരും, അന്വേഷിച്ചിട്ടുള്ളവരും, ഉത്തരം കണ്ടെത്തിയിട്ടുള്ളവരും എണ്ണത്തിൽ വളരെ കുറവായിരിക്കും.പുലരിയില്‍ പൂവന്‍ കോഴി മാത്രമല്ല കൂവുന്നത്. മറ്റ് വിവിധ തരം പക്ഷികളും അതിരാവിലെ അവരുടേതായ ശബ്ദങ്ങള്‍ പുറപ്പെടുവിക്കാറുണ്ട്‌. കോഴി വളര്‍ത്തു പക്ഷി ആയതുമൂലം നാം അതു കൂടുതല്‍ ശ്രദ്ധിക്കുന്നു എന്ന് മാത്രം.
മൂന്നുകാരണങ്ങളാണ് ഈ കോഴിയുടെ കൂവലിനു പിന്നിലുള്ളത്.
ഒന്ന് കോഴിയുടെ ജൈവ ഘടികാരം:
അതായത് എല്ലാ ജീവികളും വിധേയമാകുന്നതും 24 മണിക്കൂർ ഇടവിട്ട് മാറിക്കൊണ്ടിരിക്കുന്നതുമായ
വിവിധയിനം താളങ്ങളുടെ സ്ഥായിയായ പുനരാവർത്തനം. എല്ലാ തരം ജീവികളിലും അവയുടെ പ്രവര്‍ത്തനങ്ങളെ നിയന്ത്രിക്കാന്‍ വേണ്ടിയുള്ള ഒരു ആന്തര സംവിധാനമാണിത്‌. ദിവസ ദൈര്‍ഘ്യമായ ഇരുപത്തിനാലു മണിക്കൂറും ഇതു സദാ പ്രവര്‍ത്തിച്ചു കൊണ്ടിരിക്കുന്നു. മനുഷ്യനും ഇതില്‍ നിന്നു വിഭിന്നമല്ല. വിശ്രമശേഷം ഉണര്‍ന്ന്‌ പ്രവര്‍ത്തിക്കാനും, പ്രവര്‍ത്തനശേഷം വിശ്രമിക്കാനുമൊക്കെ നിര്‍ദ്ദ്ദേശങ്ങള്‍ നല്‍കുക ഈ ഘടികാരമത്രേ. ജീവജാലങ്ങളുടെ തലച്ചോറിനോടനുബന്ധിച്ചാണ്‌ ഈ ഘടികാര പ്രവര്‍ത്തനങ്ങളും നടക്കുക. കീ കൊടുക്കലോ, ബാറ്ററിയോ, ക്വാര്‍ട്സ്‌ ക്രിസ്റ്റലുകളോ വേണ്ടെന്ന്‌ മാത്രം.
രണ്ട്- ആഹാരം തേടാനുള്ള തയ്യാറെടുപ്പ്:
പൂവന്‍ കോഴി ഒരു സംഘത്തിന്റെ നേതാവാണ്‌. മറ്റ് പ്രജകളെ ഉണര്‍ത്തേണ്ടതും, കര്‍മ്മോന്‍മുഖരാക്കേണ്ടതും നേതാവിന്റെ കര്‍ത്തവ്യമാണ്‌. ആ കര്‍ത്തവ്യ ബോധമുള്ളതിനാല്‍ അത് ആദ്യം തന്നെ ഉണരുകയും ഉച്ചത്തില്‍ കൂവി മറ്റുള്ളവരെ ഉണര്‍ത്തുകയും ചെയ്യുന്നു. മറ്റ് പക്ഷികളെ പോലെ ഇര തേടാനുള്ള പ്രവര്‍ത്തിയുടെ ആദ്യ ഘട്ടമാണ്‌ ഈ ശബ്ദ ഘോഷവും. അതിരാവിലെയുള്ള ഭക്ഷണം തേടലിന്റെ ഒരു തയ്യാറെടുപ്പു കൂടിയാണ്‌ ഈ കൂവലും ,കലപില ശബ്ദങ്ങളും.അതിരാവിലെ ശ്രദ്ധിച്ചാല്‍ മറ്റ് നിരവധി തരം പക്ഷികളും ഈ സ്വഭാവം കാട്ടുന്നതായി കാണാം.
മൂന്ന്- തന്റെ അധികാരപരിധി മറ്റുള്ളവരെ അറിയിക്കൽ:
സംഘത്തിലെ നേതാവായ പൂവൻകോഴിയാണല്ലോ കൂവുന്നത്. നേതാവിന്റെ ധര്‍മ്മമാണ്‌ പ്രജകളൂടെ സംരക്ഷണം . തന്റെ അധീനതയില്‍ പെട്ട സ്ഥലത്ത്‌ മറ്റുള്ളവര്‍ കടന്നു കയറുന്നത്‌ അവര്‍ക്ക്‌ രസിക്കില്ല. തന്റെ അധികാര പരിധി മറ്റുള്ളവര്‍ക്ക്‌ മുന്നറിയിപ്പ്‌ നല്‍കാന്‍ കൂടിയാണ്‌ അവ കൂവുന്നത്. ഇത്തരം അറിയിപ്പുകള്‍ മറ്റ് സമയങ്ങളിലും കേള്‍ക്കാനാവും. കുയിലിന്റെ പാട്ടും ഇതിന്റെ മറ്റൊരു ഉദാഹരണമാണ്‌. ഉദ്ദിഷ്ടത , ജാഗ്രത എന്നീ അറിയിപ്പുകള്‍ കൂടാതെ കര്‍മ്മോത്സുകതക്കുള്ള ആഹ്വാനം കൂടിയാണ്‌ കൂവല്‍. ചുരുക്കത്തില്‍ കൂവുക പൂവന്റെ പൊതുസ്വഭാവമാണ്‌.
