കഴിവും സൗന്ദര്യവും ഉണ്ടായിട്ടും സിനിമയിൽ മുൻനിര നായികയാകാൻ കഴിയാതെപോയ നടി

റീന

70 – കളിലും 80 – കളുടെ തുടക്കത്തിലും സജീവമായിരുന്ന അഭിനേത്രി. ഷീല, ജയഭാരതി, ലക്ഷ്മി, ശ്രീവിദ്യ, ശാരദ, സീമ, വിധുബാല, ഉണ്ണിമേരി തുടങ്ങിയ നടികൾ മുൻനിരയിൽ നിറഞ്ഞാടിയ കാലഘട്ടത്തിൽ അവരുടെ പിന്നിൽ കൂടുതൽ ചിത്രങ്ങളിൽ ഉപനായികയായും, വളരെക്കുറച്ച് ചിത്രങ്ങളിൽ നായികയായും അഭിനയിച്ചിരുന്ന കുറെ നടികളുണ്ട്.ശുഭ, പ്രമീള, രാജകോകില, ശോഭന (ചെമ്പരത്തി), പ്രിയ, ഭവാനി, സുമിത്ര തുടങ്ങിയവരുടെ കൂട്ടത്തിൽ പ്രധാനപ്പെട്ട ഒരു താരമായിരുന്നു റീന.

1958 മാർച്ച് 14നു പീറ്റർ റസ്ക്യൂനയുടെയും ജെസിയുടെയും മകളായി മാഗാളുരിൽ ജനിച്ചു. വിദ്യാഭ്യാസം മദ്രാസിലെ സെന്റ് ജോസഫ് പ്രസന്റേഷൻ കേളേജ് പെരുമ്പൂരിലായിരുന്നു . ഐവൻ ഏക സഹോദരനാണ്. ഭർത്താവ് ഐസക്. അലൻ, എബിൻ എന്നീ രണ്ട് മക്കൾ ഉണ്ട്. മഞ്ജിലാസിന്റെ ഉടമ എം ഒ ജോസഫിന്റെ കുടുംബവുമായുള്ള സൗഹൃദമാണു് നീനയെ സിനിമയിലെത്തിച്ചതു്. ഏകദേശം 90ലധികം ചിത്രങ്ങളിൽ അഭിനയിച്ചിട്ടുണ്ട്.  1973 – ൽ  14 വയസ്സുള്ളപ്പോൾ ചുക്ക് എന്ന ചിത്രത്തിൽ ഷീലയുടെ മകളായി അഭിനയിച്ചുകൊണ്ട് അഭിനയ രംഗത്തെത്തിയ റീന തുടർന്ന് ചട്ടക്കാരിയിൽ തുടങ്ങി തമിഴിലും മലയാളത്തിലുമായി അനവധി ചിത്രങ്ങളിൽ അഭിനയിച്ചു. കെ ബാലചന്ദറിന്റെ ചിത്രത്തിലൂടെയാണു് തമിഴിൽ എത്തി.തുടർന്നു് ഐ സി കമ്പൈൻസ് എന്ന ബാനറിൽ ഒരു നിർമ്മാണക്കമ്പനി തുടങ്ങി. ശശികുമാർ സംവിധാനം ചെയ്ത ധ്രുവസംഗമമായിരുന്നു ആദ്യത്തെ ചിത്രം. തുടർന്നു പി കെ ജോസഫ് സംവിധാനം ചെയ്ത എന്റെ കഥ നിർമ്മിച്ചു. രണ്ടും ഭേദപ്പെട്ട വിജയമായിരുന്നു. അതോടെ നിർമ്മാണവും അഭിനയവും നിർത്തി. പിന്നെ 1994ൽ പ്രിയദർശന്റെ സിനിമയിൽ (മിന്നാരം) തിരിച്ചെത്തി. ഇപ്പോൾ എല്ലാവർഷവും ഒന്നോരണ്ടോ സിനിമയിൽ അഭിനയിക്കുമെങ്കിലും അധികവും ടി.വി പരമ്പരകളിൽ ശ്രദ്ധിക്കുന്നു.

B&W കാലഘട്ടത്തിലെ മുൻനിര നായകനായിരുന്ന സുധീറിന്റെ ജോഡിയായി കൂടുതൽ ശ്രദ്ധേയയായി. A.R.റഹ്മാൻ ചിട്ടപ്പെടുത്തിയ ആദ്യ ഗാനം എന്നു വിശേഷിപ്പിക്കപ്പെടാവുന്ന

വെള്ളിത്തേൻ കിണ്ണംപോൽ …
എന്ന ഗാനരംഗത്ത് അഭിനയിച്ചത്
സുധീർ – റീന ജോഡി ആയിരുന്നു.
(ഈ ഗാനം അടങ്ങിയ പെൺപട എന്ന ചിത്രത്തിന്റെ സംഗീത സംവിധായകൻ R.K.ശേഖർ ആയിരുന്നു. അദ്ദേഹം പാട്ടുകൾ ചിട്ടപ്പെടുത്തുന്നതിനിടെ ഈയൊരു ഗാനം, മകൻ ദിലീപ് വെറുതെയൊന്ന് ട്യൂൺ ചെയ്ത് നോക്കിയത് സംവിധായകൻ ക്രോസ്ബെൽറ്റ് മണിക്ക് ഇഷ്ടപ്പെട്ടപ്പോൾ ആ ട്യൂൺ അതേപടി ഉപയോഗിക്കുകയായിരുന്നു. അന്നത്തെ ദിലീപ് പില്ക്കാലത്ത് A.R.റഹ്മാൻ എന്ന പേരിൽ അറിയപ്പെട്ടു എന്നത് പ്രത്യേകിച്ച് പരാമർശിക്കേണ്ടതില്ലല്ലോ)

മലയാളത്തിനു പുറമേ തമിഴ്, തെലുങ്കു, കന്നട, ഹിന്ദി ചിത്രങ്ങളിലും അഭിനയിച്ചിട്ടുള്ള റീന ശിവാജി ഗണേശന്റെ ജോഡിയായി അഭിനയിച്ച തൃശൂലം ഏറെ ശ്രദ്ധിക്കപ്പെട്ടിരുന്നു. 80 – കളുടെ തുടക്കത്തിൽ പൂർണ്ണിമ, സുമലത, സ്വപ്ന, മാധവി, അംബിക തുടങ്ങിയ നടികളുടെ മുന്നേറ്റത്തോടെ പ്രഭ മങ്ങിയ റീന ക്രമേണ അഭിനയരംഗം വിടുകയായിരുന്നു. ഒരു ദശകക്കാലം ചലച്ചിത്ര രംഗത്തു നിന്നും വിട്ടു നിന്നതിനു ശേഷം 90 – കളുടെ മധ്യത്തോടെ തിരിച്ചെത്തി ക്യാരക്ടർ റോളുകളിൽ സജീവമായി. നിരവധി ടെലിവിഷൻ സീരിയലുകളിലും വേഷമിട്ട റീന ഇപ്പോഴും അഭിനയരംഗത്ത് തുടരുന്നു. . പേയിംഗ് ഗസ്റ്റാണു് ആദ്യത്തെ ടെലിവിഷൻ പരമ്പര.