ലോകത്താകമാനം സാമ്പത്തിക വളർച്ചയെ സൂചിപ്പിക്കുന്ന അസാധാരണമായ സാമ്പത്തിക സൂചകങ്ങൾ (Economic Indicator ) ഏതെല്ലാം?⭐

അറിവ് തേടുന്ന പാവം പ്രവാസി

???? ലോകത്താകമാനം സാമ്പത്തിക വളർച്ചയെ സൂചിപ്പിക്കുന്ന അല്ലെങ്കിൽ സാമ്പത്തിക വളർച്ച കുറയുന്നു എന്ന് കാണിക്കുന്നതിന് അസാധാരണമായ സാമ്പത്തിക സൂചകങ്ങൾ ഉപയോഗിക്കപ്പെടുന്നുണ്ട്.നമ്മൾ ഒരിക്കലും ചിന്തിക്കുക പോലും ചെയ്യാത്ത സൂചകങ്ങളാണ് വിപണിയുടെ വളർച്ചയെയും തളർച്ചയെയും കണ്ടെത്താൻ ഉപയോഗിക്കുന്നത്.അത്തരത്തിൽ ഉള്ളതിൽ ഏതാനും ചിലത് താഴെ

⚡ പുരുഷൻമാരുടെ അടിവസ്ത്ര ഉപഭോഗരീതി : അമേരിക്കയിലെ മുൻ ഫെഡറൽ റിസർവ്വ് മേധാവി ഗ്രീൻസ്പാൻ ആണ് അടിവസ്ത്രവും സാമ്പത്തിക വളർച്ചയെയും സംബന്ധിക്കുന്ന സിദ്ധാന്തത്തിന് പിറകിൽ. അദ്ദേഹം പറയുന്നത് പുരുഷൻമാരുടെ അടിവസ്ത്രമാണ് ഏറ്റവും സ്വകാര്യമായത്. അതുകൊണ്ട് തന്നെ സാമ്പത്തിക ഞെരുക്കത്തിൽ ഉള്ള ഒരു വ്യക്തി പഴയത് മാറ്റി പുതിയതൊന്ന് വാങ്ങില്ല. ഇതിനാൽ തന്നെ പുരുഷൻമാരുടെ അടിവസ്ത്ര വിൽപ്പന കുറയുന്നത് സാമ്പത്തിക മാന്ദ്യത്തിന്റെ വലിയൊരു സൂചനയാണെന്നാണ്.

പുരുഷന്മാരുടെ അടിവസ്ത്ര സൂചിക ഗ്രീൻസ്പാന്റെ സിദ്ധാന്തത്തെ പിന്തുണയ്ക്കുന്നുണ്ട്. ഉദാഹരണത്തിന് 2007 മുതൽ 2009 വരെ അമേരിക്കയിൽ ഉണ്ടായ ഏറ്റവും വലിയ സാമ്പത്തിക മാന്ദ്യകാലത്ത് പുരുഷന്മാരുടെ അടിവസ്ത്രങ്ങളുടെ വിൽപ്പന ഗണ്യമായി കുറഞ്ഞിരുന്നു. 2010ഓടെ വിപണി കരകയറിയപ്പോൾ വിൽപ്പനയും വർധിച്ചുവെന്നാണ് റിപ്പോർട്ടുകൾ പറയുന്നത്.

⚡അംബരചുംബികളായ കെട്ടിടങ്ങൾ: ബാർക്ളേയ്സ് ക്യാപിറ്റലിലെ മുൻ ഡയറക്ടറും , മുൻ റിയൽ എസ്റ്റേറ്റ് അനലിസ്റ്റുമായ ആൻഡ്രൂ ലോറൻസാണ് 1999 ൽ ഇത്തരമൊരു സാമ്പത്തിക സൂചിക അവതരിപ്പിച്ചത്. അദ്ദേഹത്തിന്റെ സിദ്ധാന്തമനുസരിച്ച് വളരെ ഉയരമുള്ള കെട്ടിടങ്ങളുടെ എണ്ണത്തിലുള്ള വർധന രാജ്യം സാമ്പത്തികത്തകർച്ചയിലേക്ക് നീങ്ങുന്നതിന്റെ സൂചനയാണെന്നാണ്. ലോകത്തിലെ ഏറ്റവും ഉയരം കൂടിയ കെട്ടിടമെന്ന ഖ്യാതിയോടെ ഏതെങ്കിലും കെട്ടിടം പൂർത്തിയാകുമ്പോൾ തൊട്ടു പിന്നാലെ സാമ്പത്തിക മാന്ദ്യമോ , സാമ്പത്തിക പ്രതിസന്ധിയോ ആസന്നമാണെന്നാണ് അദ്ദേഹം തന്റെ സിദ്ധാന്തത്തിൽ സമർത്ഥിക്കുന്നത്. 1800-കളുടെ അവസാനത്തിൽ ഇത്തരത്തിലുള്ള സൂചികകൾ എടുത്തിട്ടുണ്ടെന്നും അതിലും പിന്നിലേക്ക് പോയാലും സാമ്പത്തിക പ്രതിസന്ധിയും ലോകത്തിലെ ഏറ്റവും ഉയരം കൂടിയ കെട്ടിടത്തിന്റെ പൂർത്തീകരണവും തമ്മിൽ പരസ്പരബന്ധമുണ്ടെന്ന് കണ്ടെത്താൻ കഴിഞ്ഞിട്ടുണ്ടെന്ന് അദ്ദേഹം പറയുന്നു.

1930 ൽ എംപയർ സ്റ്റേറ്റ് ബിൽഡിങ് പണി പൂർത്തിയായത് അമേരിക്കയിൽ മഹാമാന്ദ്യ കാലത്താണ്. അതുപോലെ തന്നെ സിയേഴ്സ് ടവറും (ഇപ്പോൾ വില്ലീസ് ടവർ) വേൾഡ് ട്രേഡ് സെന്ററിന്റെ ഇരട്ട ഗോപുരങ്ങളും 1970 കളുടെ തുടക്കത്തിൽ തുറന്നുകൊടുക്കുമ്പോൾ അമേരിക്ക മാന്ദ്യത്തിന്റെ പിടിയിലായി കഴിഞ്ഞിരുന്നു. 2009 ഒക്ടോബറിൽ നിർമ്മാണ കമ്പനിയായ എമാർ ദുബായിലെ ബുർജ് ഖലീഫയുടെ പുറംഭാഗം പൂർത്തിയാക്കിയതിന് (എക്സിറ്റീരിയർ) പിന്നാലെ രണ്ട് മാസത്തിന് ശേഷം ദുബായ് ഗവൺമെന്റ് ഏതാണ്ട് കടക്കെണിയിൽ അകപ്പെട്ടിരുന്നു.

⚡ലിപ്സ്റ്റിക് വിപണി:

2001 സെപ്തംബർ 11-ന് ശേഷമുള്ള സാമ്പത്തിക മാന്ദ്യത്തിന്റെ സമയത്ത് അമേരിക്കയിലെ മൾട്ടി നാഷണൽ കോസ്മെറ്റിക് കമ്പനിയായ എസ്റ്റീ ലോഡറിന്റെ ചെയർമാൻ ആയ ലിയോനാർഡ് ലോഡറാണ് ലിപ്സ്റ്റിക് ഇൻഡെക്സ് ആദ്യമായി അവതരിപ്പിച്ചത്. സൗന്ദര്യ വസ്തുക്കളുടെ വാങ്ങൽ സമ്പദ് വ്യവസ്ഥയുമായി ബന്ധപ്പെട്ടിരിക്കുന്നു എന്നാണ് അദ്ദേഹം അഭിപ്രായപ്പെട്ടത്. കാരണം സാമ്പത്തിക മാന്ദ്യത്തിന്റെ സമയത്ത് സ്ത്രീകൾ ചെലവേറിയ സൗന്ദര്യ വർധക ഉല്പന്നങ്ങൾ വാങ്ങുന്നതിന് പകരം ലിപ്സ്റ്റിക് പോലുള്ള ചെറിയ ചെറിയ സാധനങ്ങൾ വാങ്ങുന്നു എന്നാണ് അദ്ദേഹം നിരീക്ഷിച്ചത്. 2001 ലെ മാന്ദ്യ സമയത്ത് ലിപ്സ്റ്റിക് വിൽപ്പന 11 ശതമാനം വർധിച്ചതായും അദ്ദേഹം ചൂട്ടിക്കാട്ടി.

എന്നാൽ ഈ സിദ്ധാന്തം എപ്പോഴും നിലനിൽക്കില്ലെന്ന് വാദിക്കുന്നവരുമുണ്ട്. സാമ്പത്തിക പ്രതിസന്ധിയുടെ സമയത്ത് ലിപ്സ്റ്റിക്ക് വിൽപ്പന വർദ്ധിക്കുന്നതുപോലെ സാമ്പത്തിക വളർച്ചയുടെ കാലത്തും ലിപ്സ്റ്റിക് വിൽപ്പനയിൽ വളര്‍ച്ചയുണ്ടാകാമെന്ന് മാർക്കറ്റ് റിസർച്ച് ഗ്രൂപ്പായ ക്ലൈൻ ആൻഡ് കമ്പനി പറയുന്നു.എന്തുകൊണ്ടാണ് വിൽപ്പന വർധിക്കുന്നതെന്ന് ഇക്കാരണത്താൽത്തന്നെ തിരിച്ചറിയാൻ കഴിഞ്ഞെന്നുവരില്ല.

അതേസമയം 2020-ൽ കോവിഡ് കാലത്ത് ആളുകൾ മാസ്കുകൾ ധരിച്ച് വീട്ടിലിരുന്ന് ജോലി ചെയ്തിരുന്നതിനാൽ ലിപ്സ്റ്റിക് സൂചികയ്ക്ക് പകരം ഒരു ചർമ്മ സംരക്ഷണ ഇനം വന്നതായി എസ്റ്റി ലോഡറിന്റെ സിഇഒ ഫാബ്രിസിയോ ഫ്രെഡ പറഞ്ഞു. ലിപ്സ്റ്റിക് ഇൻഡക്സിന് പകരം മോയ്സ്ചറൈസിംഗ് ഇൻഡക്‌സ് വന്നു. ഇത്തരത്തിൽ ഉൽപ്പന്നങ്ങൾ മാറാമെങ്കിലും സൂചികയുടെ ആശയം എപ്പോഴും ഉണ്ടെന്നാണ് ഫ്രെഡ വ്യക്തമാക്കുന്നത്.

⚡ഫസ്റ്റ് ഡേറ്റ് ഇൻഡക്സ്:
കൈയ്യിൽ പണമില്ലാതെയിരിക്കുകയും ഒറ്റപ്പെട്ടുപോകുകയും ചെയ്യുമ്പോൾ മനുഷ്യർ എന്താകും ചെയ്യുക. ഡേറ്റിങ് ആപ്പുകളിൽ സജീവമാകുമെന്നാണ് ഈ രംഗത്തെ കണക്കുകൾ നിരത്തി വിദഗദ്ധർ പറയുന്നത്. സമ്പദ്‌വ്യവസ്ഥയിലെ മാന്ദ്യത്തെ തുടർന്ന് വിഷാദത്തെ മറികടക്കാൻ ബന്ധങ്ങളിൽ ഏർപ്പെടാൻ ശ്രമിക്കുന്ന ആളുകളുടെ എണ്ണത്തിൽ വർധനയുണ്ടാകുന്നുണ്ടെന്നാണ് ഈ രംഗത്തെ പഠനങ്ങളും പറയുന്നത്.
മാന്ദ്യകാലത്ത് ഓൺലൈൻ ഡേറ്റിങ് ആപ്പുകളിലെ ട്രാഫിക്കിൽ കാര്യമായ വർധനയുണ്ടാകുന്നുണ്ടെന്നാണ് പറയുന്നത്. 2008 സാമ്പത്തിക മാന്ദ്യകാലത്ത് ഓൺലൈൻ ഡേറ്റിംഗ് സേവനമായ മാച്ച് ഡോട്ട് കോമിന്റെ ട്രാഫിക്കിൽ വൻ കുതിച്ചുചാട്ടം ഉണ്ടായാതായാണ് റിപ്പോർട്ടുകൾ. 2009-ൽ ഏഴ് വർഷത്തിനിടയിലെ ഏറ്റവും ശക്തമായ നാലാം പാദ വരുമാനമാണ് കമ്പനി നേടിയത്. 2020ൽ കൊവിഡ് രൂക്ഷമായപ്പോൾ, 2020 മാർച്ചിനും 2021 മാർച്ചിനുമിടയിൽ മാച്ചിന്റെ ഓഹരി വില 141ശതമാനമാണ് ഉയർന്നത്. തൊഴിലില്ലാത്ത യുവതീ യുവാക്കൾക്ക് ഇത്തരം സൈറ്റുകളിൽ സ്വൈപ്പ് ചെയ്യാൻ ധാരാളം സമയം ഉണ്ടെന്നതാണ് ഒരു പ്രധാന കാരണം.

⚡ജാപ്പാൻ സ്ത്രീകളുടെ ഷോർട്ട് ഹെയർ കട്ട്:
സമ്പദ്‌വ്യവസ്ഥ നല്ല രീതിയിൽ ആയിരിക്കുമ്പോൾ സ്ത്രീകൾ അവരുടെ സൗന്ദര്യ സംരക്ഷണത്തിനായി ധാരാളം പണം ചെലവഴിക്കാൻ സാധ്യതയുണ്ടെന്നാണ് പൊതുവെ ഉള്ള വിലയിരുത്തൽ. അതുതന്നെയാണ് ജപ്പാനിലെ സ്ത്രീകളുടെ ഷോർട്ട് ഹെയർ സ്റ്റൈലുമായി ബന്ധപ്പെട്ടിരിക്കുന്ന സിദ്ധാന്തവും. അതായത് സമ്പദ്‌വ്യവസ്ഥയിൽ മാന്ദ്യം ഉണ്ടാകുമ്പോൾ സ്ത്രീകൾ മുടി ചെറുതാക്കാൻ സാധ്യതയുണ്ടെന്നാണ്. കാരണം ചെറിയ നീളത്തിലുള്ള മുടി പരിപാലിക്കാൻ അധികം ചെലവ് വരില്ല എന്നുള്ളത് തന്നെയാണ്. ജപ്പാന്റെ സമ്പദ്‌വ്യവസ്ഥ നല്ല നിലയിലായിരിക്കുമ്പോൾ സ്ത്രീകൾ മുടി നീട്ടി വളർത്തുന്നതായും മാന്ദ്യം ഉണ്ടാകുമ്പോൾ മുടി ചെറുതാക്കുന്നത് പതിവാണെന്നും ജാപ്പനീസ് കോസ്‌മെറ്റിക്‌സ് കമ്പനിയായ കാവോ കോർപ്പറേഷൻ നടത്തിയ സർവേ റിപ്പോർട്ട് ചെയ്തിരുന്നു.
90 കളുടെ ആരംഭത്തിൽ അതായത് ജപ്പാനിൽ സാമ്പത്തിക മാന്ദ്യം പിടികൂടുന്നതിന് തൊട്ടു മുമ്പു വരെ ജപ്പാനിലെ 20-കളിൽ ഉള്ള അറുപത് ശതമാനം പെൺകുട്ടികളും മുടി നീട്ടിവളർത്തിയിരുന്നുവെന്നാണ് ഈ സർവ്വേ പറയുന്നത്. സാമ്പത്തിക മാന്ദ്യത്തോടെ ഷോർട്ട് ഹെയർ ജപ്പാനിലെ സ്റ്റൈലായി മാറി. എന്നാൽ 2002 മുതൽ സമ്പദ്‌വ്യവസ്ഥ വികസിക്കാൻ തുടങ്ങിയതോടെ നീണ്ട മുടിക്ക് വീണ്ടും ജനപ്രീതി ലഭിച്ചുവെന്നും സർവ്വേ ചൂട്ടിക്കാട്ടുന്നു.

⚡ഗാർബേജ് ഇൻഡക്സ് :
വളരെ ലളിതമായി പറഞ്ഞാൽ ആളുകൾക്ക് കൂടുതൽ പണമുള്ളപ്പോൾ കൂടുതൽ വാങ്ങിക്കൂട്ടുകയും ബാക്കി വരുന്നവ ഉപേക്ഷിക്കുകയും ചെയ്യും. യുഎസ് സാമ്പത്തിക വളർച്ചയെക്കുറിച്ച് പഠിക്കുമ്പോൾ ഈ സൂചകത്തിന് 82% കൃത്യതയുണ്ടെന്നാണ് സാമ്പത്തിക വിദഗ്ധർ അഭിപ്രായപ്പെടുന്നത്. ഒരു രാജ്യത്തിന്റെ സമ്പദ്‌വ്യവസ്ഥയെക്കുറിച്ച് ധാരാളം കാര്യങ്ങൾ വെളിപ്പെടുത്താൻ കഴിയുമെന്നാണ് സാമ്പത്തിക വിദഗ്ധൻ മൈക്കൽ മക്‌ഡൊണാഫ് സൃഷ്ടിച്ച യുഎസ് ഗാർബേജ് ഇൻഡിക്കേറ്റർ പറയുന്നു.
അമേരിക്കയെ സംബന്ധിച്ച് അവിടുത്തെ ഗാർബേജിലെ അവശിഷ്ടങ്ങളുടെ അളവിനെ അവിടുത്തെ ജിഡിപിയുമായി താരതമ്യപ്പെടുത്തിയാണ് സാമ്പത്തിക മാന്ദ്യത്തെ അളക്കുന്നത്. സമ്പദ്‌വ്യവസ്ഥ ചുരുങ്ങുകയാണെങ്കിൽ, മാലിന്യ ഉൽപ്പാദനം കുറയുന്നതിലേക്ക് നയിക്കും, അതേസമയം കുതിച്ചുയരുന്ന സമ്പദ്‌വ്യവസ്ഥ മാലിന്യ ഉൽപാദനം വർദ്ധിപ്പിക്കുന്നതിന് കാരണമാകും. ഇന്ത്യയെ പോലൊരു വികസ്വര രാജ്യത്ത് പക്ഷേ ഈ രീതി പിന്തുടരുന്നത് അപ്രായോഗികമായിരിക്കും.

⚡ആർ- വേർഡ് ഇൻഡക്സ് (R- word) :
ദി ഇക്കണോമിസ്റ്റ് സൃഷ്ടിച്ച ഒരു അനൗപചാരിക സൂചികയാണിത്. “മാന്ദ്യം” (recession) എന്ന വാക്ക് വാർത്തകളിൽ എത്ര തവണ പ്രത്യക്ഷപ്പെടുന്നു എന്നതിന്റെ കണക്ക് വെച്ചാണ് ഈ ഇൻഡക്സ് പ്രവർത്തിക്കുന്നത്. സാമ്പത്തിക മാന്ദ്യത്തിന്റെ സമയത്ത് “R ൽ ആരംഭിക്കുന്ന പദത്തിന്റെ” ഉപയോഗത്തിൽ കുതിച്ചുചാട്ടമുണ്ടെന്നാണ് സൂചിക തെളിയിക്കുന്നത്. അതായത് ഇത് “മാന്ദ്യം” എന്ന വാക്ക് അടങ്ങിയ ലേഖനങ്ങളുടെ എണ്ണം ട്രാക്ക് ചെയ്യുന്നു. 1990, 2001, 2007 വർഷങ്ങളിൽ യുഎസ് മാന്ദ്യത്തിന്റെ തുടക്കത്തിൽ ഈ സൂചിക വച്ചുള്ള പ്രവചനം വിജയകരമായി തെളിയിച്ചിട്ടുണ്ട്.

⚡ഹെംലൈൻ സൂചിക(hemline) :
1920-കളിൽ സാമ്പത്തിക വിദഗ്ധനായ ജോർജ്ജ് ടെയ്‌ലർ കണ്ടെത്തിയതാണ് ഹെംലൈൻ സൂചിക. സ്ത്രീകളുടെ ഫാഷൻ സാമ്പത്തിക ഭദ്രതയെ എങ്ങനെ അടയാളപ്പെടുത്തുന്നു എന്നതാണ് ഈ സൂചിക പറയുന്നത്. സ്ത്രീകളുടെ പാവാടകളുടെ നീളം കൂടുകയോ , കുറയുകയോ ചെയ്യുന്നത് സാമ്പത്തിക രംഗത്തെ മാറ്റത്തെ സൂചിപ്പിക്കുന്നു. നല്ല സാമ്പത്തിക സമയങ്ങളിൽ പാവാടയുടെ നീളം കുറയുകയും മോശം സമയങ്ങളിൽ നീളം കൂടുകയും ചെയ്യും എന്നതാണ് ഈ സിദ്ധാന്തം മുന്നോട്ടു വയ്ക്കുന്നത്.
അതായത് നല്ല സാമ്പത്തിക സമയങ്ങളിൽ സ്ത്രീകൾ തങ്ങളുടെ വിലകൂടിയ സിൽക്ക് സ്റ്റോക്കിംഗുകൾ കാണിക്കാൻ നീളം കുറഞ്ഞ പാവാടയാണ് ധരിച്ചിരുന്നത്, എന്നാൽ മാന്ദ്യകാലത്ത് നഗ്നമായ കാലുകൾ മറയ്ക്കാൻ നീളമുള്ള ഹെംലൈനുകളാണ് കൂടുതൽ ഉപയോഗിച്ചിരുന്നതെന്ന് ജോർജ്ജ് ടെയ്‌ലർ തന്റെ സിദ്ധാന്തത്തിൽ എടുത്തു പറയുന്നുണ്ട്. ഈ സിദ്ധാന്തത്തെ പിന്തുണയ്ക്കുന്നതിനായി 2008-ലെ സാമ്പത്തിക പ്രതിസന്ധിക്ക് ശേഷം പ്രചാരത്തിലിരുന്ന നീളമുള്ള വസ്ത്രങ്ങളുടെ ഉദാഹരണം സാമ്പത്തിക വിദഗ്ധർ മുന്നോട്ട് വയ്ക്കുന്നുണ്ട്.

Leave a Reply
You May Also Like

കുതിര മനുഷ്യരുമായി ഇങ്ങാറുണ്ട്, എന്നാൽ ഇതിനോട് സാമ്യം തോന്നുന്ന സീബ്രയെ നമുക്കു ഇണക്കുവാൻ സാധിക്കില്ല

Baijuraj Sasthralokam കുതിര മനുഷ്യരുമായി ഇങ്ങാറുണ്ട്. കഴുതയും ഇണങ്ങും. എന്നാൽ ഇവയോട് വളരെ സാമ്യം തോന്നുന്ന…

വിലാസിനിയുടെ വിശേഷങ്ങൾ

ഇന്ത്യ, ശ്രീലങ്ക, തായ്ലൻഡ്, മ്യാൻമർ തുടങ്ങി തെക്കുകിഴക്കൻ ഏഷ്യയിലെ പല പ്രദേശങ്ങളിലും കാണപ്പെടുന്ന വളരെ ഭംഗിയുള്ള ഒരു ചിത്രശലഭമാണ് കോമൺ ഈസബെൽ

എന്താണ് ബോസ്റ്റൺ ടീ പാർട്ടി ?

മസ്സാചുസെറ്റ്സ് പ്രവിശ്യയിലെ ബോസ്റ്റൺ തുറമുഖത്ത് അമേരിക്കൻ കോളനിക്കാർ ബ്രിട്ടീഷ് സർക്കാരിന്റെ നികുതിനയത്തിനെതിരെ 1773 ഡിസംബർ 16 ന് നടത്തിയ പ്രതിഷേധനടപടിയാണ് ബോസ്റ്റൺ ചായവിരുന്ന് (ബോസ്റ്റൺ ടീ പാർട്ടി)

‘ഞാൻ വോട്ടുചെയ്യുന്നില്ല’: ബൂത്തിനുള്ളിലും വോട്ടർക്ക് തീരുമാനിക്കാം

നോട്ടയോടും താത്പര്യമില്ലെങ്കിൽ വോട്ടിങ് യന്ത്രത്തിനടുത്തുനിൽക്കുന്ന അവസാന നിമിഷം വോട്ടർക്ക് തീരുമാനിക്കാം -ഞാൻ വോട്ടുചെയ്യുന്നില്ല