മാതാപിതാക്കൾക്ക് വെല്ലുവിളിയാകുന്ന ഔട്ട്ലെറ്റ് ചലഞ്ച് എന്താണ് ?
അറിവ് തേടുന്ന പാവം പ്രവാസി
സോഷ്യൽ മീഡിയയിൽ ആഴ്ചകൾ തോറും പുതിയ പുതിയ ചാലഞ്ചുകൾ വന്ന് കൊണ്ടിരിക്കുകയാണ്. അപകടം നിറഞ്ഞ ചാലഞ്ചുകളാണ് ഇതിൽ പലതും. അത്തരത്തിൽ ടിക്ടോകിലുള്ള പുതിയ ചാലഞ്ച് മാതാപിതാക്കൾക്ക് വെല്ലുവിളിയാകുകയാണ്:ഔട്ട്ലെറ്റ് ചാലഞ്ച്.ചാലഞ്ച് എന്ന് പറയുമ്പോൾ കുറച്ചൊക്കെ അഡ്വഞ്ചറൊക്കെ വേണ്ടെ, അതൊക്കെ കൊണ്ട് തന്നെ ആയിരിക്കണം അടുത്ത കാലത്തായി സമൂഹ മാധ്യമങ്ങളിൽ പ്രചരിച്ച എല്ലാ ചാലഞ്ചുകളും അപകടം നിറഞ്ഞതായത്. എന്നാൽ ഇത് ഏറ്റെടുത്ത് ചെയ്യാനും ആളുകൾ ഉണ്ട് എന്നതാണ് വാസ്തവം. അത്തരത്തിലുള്ള ഒരു ചാലഞ്ചാണ് സമൂഹ മാധ്യമങ്ങളിൽ ചർച്ചയായത്.
എന്താണ് ചാലഞ്ച് എന്ന് പറയാം. മൊബൈൽ ചാർജ്ജർ പകുതിയായി പ്ലഗ്ഗിൽ കുത്തിയിടുക. പ്ലഗ്ഗിന്റെയും, ചാർജ്ജറിന്റെയും ഇടയിൽ ഒരു കോയിനും വെക്കുക. ഇങ്ങനെ ചെയ്ത് ചെറിയ തരത്തിൽ സ്പാർക്ക് ഉണ്ടാക്കുക എന്നതാണ് ചാലഞ്ച്. എന്നാൽ ഇത്തരത്തിൽ ചെയ്യുമ്പോൾ പ്ലഗ്ഗ് പൊട്ടിത്തെറിക്കാനുള്ള സാധ്യത കൂടുതലാണ്. പലരും ഇത്തരത്തിലുള്ള ചാലഞ്ച് ഏറ്റെടുത്ത് ചെയ്ത് ഒടുവിൽ നിരവധി നഷ്ടങ്ങൾ വരുത്തി വെച്ചിട്ടുണ്ട്.അപകടകരമായ ഈ ചാലഞ്ചിനെതിരെ മുന്നറിയിപ്പുമായി പലരും രംഗത്തെത്തിയിട്ടുണ്ടെങ്കിലും പലരും ഇപ്പോഴും ഈ ചാലഞ്ച് ഏറ്റെടുത്ത് കൊണ്ടിരിക്കുകയാണ്.
