സിൽക്ക് സ്മിത എന്തുകൊണ്ട് ആത്മഹത്യചെയ്തു ?

1979ൽ മലയാളിയായ ആന്റണി ഈസ്റ്റ്മാൻ സംവിധാനം ചെയ്ത “ഇണയെത്തേടി”യിലൂടെ ആണ് തന്റെ പത്തൊൻപതാം വയസ്സിൽ വിജയലക്ഷ്മി സിനിമയിലെത്തുന്നത് . പുതിയ ചിത്രത്തിനു നായികയെത്തേടി കോടമ്പാക്കത്തെത്തിയ ആന്റണി ഈസ്റ്റ്മാന് യാദൃശ്ചികമായി കണ്ട കറുത്ത് മെലിഞ്ഞ വിജയലക്ഷ്മിയുടെ ചിത്രങ്ങൾ ആദ്യം ഇഷ്ടമായില്ലെങ്കിലും പിന്നീട് അവരുടെ കണ്ണൂകളിൽ കണ്ട തീക്ഷ്ണമായ ആകർഷണവും വശ്യമായ ചിരിയുമൊക്കെ തന്റെ നായികയായി തീരുമാനിക്കാൻ കാരണമാവുകയായിരുന്നു. വിജയലക്ഷ്മിയെന്ന പേരു മാറ്റി സിനിമക്ക് വേണ്ടി സ്മിത എന്ന പേരു കൊടുത്തതും ആന്റണിയാണ്. ഇണയേത്തേടിയുടെ ഷൂട്ടിംഗ് നടക്കുമ്പോൾത്തന്നെ സ്മിതയേത്തേടി വിനുചക്രവർത്തിയുടെ ‘വണ്ടിചക്രമെന്ന’ ചിത്രവുമെത്തി. നാടോടികളുടെ കഥ പറഞ്ഞ ആ ചിത്രത്തിൽ പിൽക്കാലത്ത് സൂപ്പർസ്റ്റാറായ നടൻ സൂര്യയുടെ അച്ഛൻ ശിവകുമാറായിരുന്നു നായകൻ. ‘വണ്ടിച്ചക്ര’ത്തിലെ ‘വാ മച്ചാ വാ വണ്ണാറപ്പേട്ടേ” എന്ന ഗാനരംഗം സ്മിതയെ വളരെ ശ്രദ്ധേയയാക്കി. വണ്ടിചക്രം സൂപ്പർഹിറ്റായതോടെ അതിലെ കഥാപാത്രത്തിന്റെ പേരായ സിൽക്ക് എന്ന പേര് സ്മിത കൂടെക്കൂട്ടി “സിൽക്ക് സ്മിത” എന്ന് തുടർന്ന് അറിയപ്പെടാനും ഇത് കാരണമായി.

വണ്ടിച്ചക്രത്തിന്റെ വിജയത്തേത്തുടർന്ന് അടുത്ത മൂന്ന് വർഷങ്ങളിൽ ഇരുന്നൂറോളം ചിത്രങ്ങളിൽ സ്മിത വേഷമിട്ടു. ദക്ഷിണേന്ത്യൻ സിനിമയുടെ ആദ്യത്തെ ഗ്ലാമർ ഗേൾ എന്ന് അറിയപ്പെട്ട സ്മിതയുടെ നൃത്ത രംഗങ്ങൾക്ക് സൂപ്പർസിനിമാനടിമാരേക്കാൾ കൂടുതൽ പ്രതിഫലം ലഭ്യമായിരുന്നു. നൃത്തം പ്രൊഫഷണലായി അഭ്യസിച്ചിരുന്നില്ലെങ്കിലും ഗ്ലാമർ രംഗങ്ങളിലെ സിൽക്കിന്റെ ഡാൻസുകളും സാന്നിധ്യവും സിനിമകളുടെ വിജയങ്ങൾക്ക് അഭിവാജ്യഘടകങ്ങളായി മാറി. ‘സിൽക്ക് സിൽക്ക് സിൽക്ക്’ എന്ന് സ്മിത മൂന്ന് റോളുകളിൽ അഭിനയിച്ച സിനിമയും രംഗത്തെത്തി.

സീത കോകചിലുക, യമകിന്‍കരുഡ, സകല കലാവല്ലഭന്‍, പട്ടണത്തുരാജാക്കള്‍, തീര്‍പ്പ് , തനിക്കാട്ട് രാജ, ശിവന്നകണ്‍കള്‍, പായുംപുലി, തുടിക്കും കരങ്ങള്‍, സദ്മ, തായ് വീട്, പ്രതിജ്ഞ, ജീത്ഹമാരി, ജാനിദോസ്ത്, സില്‍ക് സില്‍ക് സില്‍ക് , മിസ് പമീല, അഥര്‍വ്വം, വിജയ്പഥ്, സ്ഫടികം, ഇങ്ങനെ തമിഴ്, മലയാളം, തെലുങ്ക്, കന്നഡ, ഹിന്ദി ഭാഷകളിലായി പതിനേഴ് വർഷം വർഷം കൊണ്ട് അഞ്ഞൂറിലേറെ ചിത്രങ്ങളിൽ സ്മിത പല രൂപങ്ങളിലും ഭാവങ്ങളിലും വേഷമിട്ടു. ശിവാജി ഗണേശൻ, കമലഹാസൻ, രജനീകാന്ത് , ചിരഞ്ജീവി തുടങ്ങിയ മുൻനിരനായകന്മാരുടെ സിനിമകൾ പോലും സിൽക്കിന്റെ ഡേറ്റുകൾക്കൊപ്പിച്ച് ചിത്രീകരണം മാറ്റാൻ കാരണമായി. ഒടുവിൽ കോടമ്പാക്കത്തിന്റെ കറുത്ത ചരിത്രം സ്മിതയേയും ആക്രമിക്കാനെത്തി. പുതിയ ഗ്ലാമർ നർത്തകിമാരുടെ വരവ് സ്മിതയേ സിനിമാ നിർമ്മാണത്തിലേക്ക് കൂടി തിരിക്കുവാൻ കാരണക്കാരിയാക്കി. എന്നാൽ ആദ്യം നിർമ്മിച്ച രണ്ട് ചിത്രങ്ങളും വൻപരാജയങ്ങളായി മാറി. മൂന്നാമത്തെ സിനിമയിൽ രക്ഷപെടുമെന്ന് കരുതി 2 കോടിയോളം രൂപ കടത്തിലായെങ്കിലും മൂന്നാം സിനിമ പൂർത്തിയാക്കാൻ കഴിഞ്ഞിരുന്നില്ല.

സിൽക്കിൻറെ സുഹൃത് വലയം വളരെ ചെറുതായിരുന്നു. പൊതുവെ അന്തർമുഖിയായ അവർ അധികമാരോടും സംസാരിക്കുകയോ ഇടപഴകുകയോ ചെയ്യാറില്ലായിരുന്നു. അതുകൊണ്ട് തന്നെ അധികമാരെയും പെട്ടന്ന് സ്നേഹിക്കാനോ വിശ്വസിക്കാമോ അവർക്ക് കഴിയുമായിരുന്നില്ല. നേരെ വാ നേരെ പോ എന്ന നയം കാരണം എന്തും മുഖത്തടിച്ചത് പോലെ ആരോടും എവിടെവെച്ചു വേണമെങ്കിലും പറയുന്ന സ്വഭാവം പലരെയും അവരിൽ നിന്നകറ്റി. ഷൂട്ടിങ്ങ് സ്ഥലത്ത് കൃത്യസമയത്ത് എത്തുകയും ചുമതലാ ബോധത്തോട് കൂടി എല്ലാവരോടും സഹകരിക്കുകയും ചെയ്തിരുന്ന അവർ തീവ്രമായ ഉത്കർഷയുള്ള ഒരു സ്ത്രീ ആയിരുന്നു. പ്രാഥമിക വിദ്യാഭ്യാസം മാത്രം ലഭിച്ച അവർ നന്നായി ഇംഗ്ലീഷ് സംസാരിക്കുമായിരുന്നു. സുഹൃത്തുക്കൾക്കിടയിൽ നൈർമല്യവും സ്നേഹവും ഉള്ള ഒരു വ്യക്തി എന്ന ലേബൽ ഉണ്ടായിരുന്നു. ചെറുപ്പം മുതൽ സ്വന്തമായി മെയ്ക്ക് അപ്പ് ചെയ്യാൻ അറിയാമായിരുന്ന അവരുടെ പ്രത്യേകത സ്വർണ്ണ നിറമുള്ള ശരീരപ്രകൃതിയും മാദകത്വം തുളുമ്പുന്ന അംഗലാവണ്യവും മാൻപേട കണ്ണുകളുമായിരുന്നു.

‘സബാഷ്’ എന്ന ചിത്രമാണ് സ്മിതയുടേതായി അവസാനമായി റിലീസായത്. ബോക്സോഫീസിൽ കാര്യമായ ചലനങ്ങളൊന്നും അതിന് സൃഷ്ടിക്കാനായില്ല. അവസനമായി വന്ന ഓഫറുകളിലെ മിക്ക സിനിമകൾക്കും ഇതേ അവസ്ഥയായിരുന്നു. ഒരു യുവസംവിധായകൻ സ്മിതയേ വിവാഹം കഴിക്കാമെന്ന് വാക്കുപറഞ്ഞ് വഞ്ചിക്കുകയായിരുന്നു എന്ന് വാർത്തകളുണ്ട്. നെടുനാൾ കാത്തു സൂക്ഷിച്ച ഈ പ്രണയത്തിന്റെ തകർച്ചയും സ്മിതയേ നിരാശയുടെ പടുകുഴിയിലേക്കെത്തിച്ചു. വീണ്ടും തന്റെ ആദ്യകാല ജീവിതത്തിലേക്കും പട്ടിണിയിലേക്കും ചെന്നെത്തുമോ എന്ന് സ്മിത ഭയന്നു. കടുത്ത മാനസിക സമ്മർദ്ദത്തിനടിമയായ സ്മിത മദ്യപാനത്തിന്റെ പിടിയിലേക്ക് പതിയെ വഴുതി വീണു. 1996 സെപ്റ്റംബർ 23ന് തന്റെ 35ആം വയസ്സിൽ ചെന്നെയിൽ സാലിഗ്രാമിലുള്ള തന്റെ ഫ്ലാറ്റിൽ സീലിംഗ് ഫാനിൽ സാരിക്കുരുക്കിട്ട് അവർ ആത്മഹത്യ ചെയ്തു.

സിൽക്കിന്റെ ജീവിതത്തെ അവലംബിച്ച് വിദ്യാ ബാലനെ നായികയാക്കി ഡേർട്ടിപിക്ചർ എന്ന ചിത്രം മിലൻ ലുത്രിയ സംവിധാനം ചെയ്ത് 2011ൽ പുറത്തിറങ്ങിയിരുന്നു. ഈ ബോളിവുഡ് ചിത്രത്തിൽ സ്മിതയായി തിളങ്ങിയ വിദ്യയ്ക്ക് മികച്ച നടിക്കുള്ള ദേശീയ പുരസ്ക്കാരവും ലഭിച്ചു. മലയാളത്തിൽ അനിൽ സംവിധാനം ചെയ്ത ക്ലൈമാക്സും സ്മിതയുടെ ജീവിതം പശ്ചാത്തലമാക്കിയ സിനിമയാണ്.വിജയലക്ഷ്മി എന്ന സില്‍ക്ക് സ്മിതയുടെ ചെറുപ്പകാലം മുതലുള്ള സംഭവങ്ങളായിരിക്കും വെബ് സീരീസ് ഉൾക്കൊള്ളിക്കുക. പാ രഞ്ജിത്തിന്റെ കാമറയിൽ സ്മിതയുടെ ജീവിതത്തിന്റെ ഇതുവരെ കാണാത്ത ഏടുകളിലൂടെയാവും വെബ് സീരീസ് സഞ്ചരിക്കുകയെന്നാണ് ലഭ്യമാകുന്ന വിവരം.