പ്രേമമുറിവ് (സോണി ഡിത്തിന്റെ കവിത) Sony Dith

പ്രേമത്തെക്കുറിച്ചാണ് നാം നിരന്തരം
ഓര്‍ത്തുകൊണ്ടിരിക്കുന്നത്
പ്രാണനെക്കുറിച്ച് എന്നപോലെ നാം അതില്‍
ആകുലരാകുന്നു .
അതോ ,
വിഷാദവും ആഹ്ലാദവും തരുന്ന ഒരു
ഇരട്ടപ്പാനപ്പാത്രം !

ഉള്ളിലിരുന്നൊരു തേങ്കുരുവി മൂളുമ്പോള്‍
അതിന്‍റെ വസന്തം പൂക്കളില്‍ തേന്‍ പകരും
ഉള്ളിലിരുന്നൊരു ചെങ്കനല്‍ എരിയുമ്പോള്‍
അതിന്‍റെ കാടുകള്‍ കറുത്ത് പോകുന്നു .

പ്രണയത്തിലായിരിക്കുന്നവരുടെ
മനസ്സുകളില്‍
ഒരേയൊരു ഋതുവിന്‍റെ പ്രതിഷ്ഠ
ഒരേയൊരു ഘടികാരം !

ചുംബനങ്ങളുടെ ദ്വീപിലേയ്ക്കാണ്
ഓരോ രാത്രികളും അതിന്‍റെ
പ്രണയം ഒളിച്ചു കടത്തുന്നത്
പകല്‍ അതിന്‍റെ ഒച്ചകളുടെ മറുകുകള്‍
തൊട്ടുനോക്കി അവര്‍ പരസ്പരം
നാണിക്കുന്നു ,
വിരഹദൂരങ്ങളിലും
അതിന്‍റെ ഓര്‍മ്മകള്‍ കൊണ്ട്
ചിറക് മിനുക്കുന്നു .

കാട്ടരുവികളില്‍
മീനുകള്‍ തുടിക്കുന്ന പോലെ
പ്രണയത്തിലെ തിമിര്‍പ്പുകള്‍ .
സൂര്യനെ വിഴുങ്ങുന്ന
കടലെത്തും വരെ അതിനെയവര്‍
അനുഗമിക്കുന്നു .

ചുറ്റും
പ്രണയം മാത്രം നിറയുമ്പോള്‍
മഴയ്ക്കോ വേനലിനോ അവര്‍
പ്രണയത്തിന്‍റെ മാത്രം
പേരിട്ടു വിളിക്കുന്നു ,
പ്രളയമോ പൊള്ളലോ
അതിനു മീതെയെത്തുമ്പോള്‍
എതിര്‍ ദിശകളില്‍ പരക്കം പായുന്നു .

പ്രണയകാലം
കണ്ണ്ചിമ്മിത്തുറക്കുമ്പോള്‍
ഒരു വാല്‍നക്ഷത്രം കുറുകെപ്പോകുന്നു ,
അവരുടെ പ്രണയത്തില്‍ നിന്നടര്‍ന്ന
വെളിച്ചത്തിന്‍റെ
ഇരുണ്ട മുറിവുമായ്‌ അതവരെ
കടന്നുപോകുകയും ചെയ്യുന്നു .
പുതുക്കുവാന്‍ ഒരു ഉടമ്പടി തേടി
ജീവിതം അതിന്‍റെ ഓരോ
പ്രണയത്തെയും കൊണ്ട്
പിന്നെയും
പലായനം തുടരുന്നു

Advertisements
ഇന്ത്യയിലെ ആദ്യത്തെ സിറ്റിസൺ ജേർണലിസം പോർട്ടൽ. ഇവിടെ പ്രസിദ്ധീകരിക്കപ്പെടുന്ന ലേഖനങ്ങളും കമന്റുകളും ബൂലോകത്തിന്റെ അഭിപ്രായങ്ങളല്ല.അവയുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.