എഴുതിയത്  : Rafeeque Mohamed

കഴിഞ്ഞ ദിവസം ചൈനീസ് പ്രസിഡന്റ് ഷീ ജിന്‍പിങുമായി അനൗപചാരിക കൂടിക്കാഴ്ചയ്ക്ക് തമിഴ്‌നാട്ടിലെ മഹാബലിപുരത്തെത്തിയ ഭാരതത്തിന്റെ വീരപുത്രൻ നരേന്ദ്ര മോദിജിയുടെ ചരിത്ര പ്രസിദ്ധമായ കടപ്പുറം യാത്രയും സ്വച്ഛഭാരത് പ്രവര്‍ത്തനങ്ങളുമെല്ലാം താങ്കൾ അറിഞ്ഞിരിക്കുമല്ലോ. രാജ്യദ്രോഹികളായ ചില മലയാളികൾ മാത്രം മഹാത്മാ ഗാന്ധിയുടെ ദണ്ഡി യാത്രക്ക് ശേഷം ഭാരതം കണ്ട ആ ചരിത്ര മുഹൂർത്തത്തെ വെറും കുപ്പി പാട്ട പെറുക്കുന്ന ആളായി അവഹേളിച്ചു സമയം കൊല്ലുന്നു.

കടപ്പുറത്തെ സന്നദ്ധ സേവനത്തിനു ശേഷം മനസ്സ് ഘനീഭവിച്ച മോദിജി അൽപ്പനേരം തൊട്ടടുത്ത കടൽ ഭിത്തിയിൽ പോയിരുന്നു. മഹാസാഗരത്തിന്റെ ഗഗന നീലിമയുടെ മഹാമേരുക്കളിലേക്ക് മിഴികളോടിച്ച മോദിജിയുടെ വേദനിക്കുന്ന മനസ്സിന്റെ അന്തരാളങ്ങളിലേക്ക് നീലകണ്ഠന്റെ നീല വർണ്ണമോർത്തപ്പോഴുള്ള തപ്ത നിശ്വാസങ്ങളുടെ അനർഗ്ഗള നിർഗ്ഗള സപര്യകൾ അദ്ദേഹത്തിന്റെ മനസ്സിൽ പണ്ടെങ്ങോ അന്തർലീനമായി കിടന്നിരുന്ന കവി മനസ്സിനെ തൊട്ടുണർത്തി. അദ്ദേഹത്തിന്റെ കവിഹൃദയം സത്വരം വിജ്രംഭിതമായി. ലോകപ്രശസ്തമായ ശിശിര മാസങ്ങളിലെ ഹിമവൽസാനുക്കളിലെ കൊടും തപസ്സനുഷ്ഠിക്കുമ്പോഴത്തെ നിർമമമായ കാവ്യചിന്തകൾ അദ്ദേഹത്തിന്റെ ഹൃദയന്തരാളങ്ങളെ മഥിച്ചു. മറ്റാരും കൂട്ടിനില്ലാതെ കടപ്പുറത്തു ഏകനായി പ്രഭാത സവാരിക്കിറങ്ങിയ അദ്ദേഹം അതി വിദൂരത്ത് നിന്നിരുന്ന മറ്റൊരു ശുചീകരണ തൊഴിലാളിയായ പാണ്ടി ദുരൈയെ മാടി വിളിച്ചു ഒരു കെട്ടു കടലാസും ഒരു നീല വർണ്ണത്തിലുള്ള പേനയും കൊണ്ട് വരാൻ ആവശ്യപ്പെട്ടു. പാണ്ടി ദുരൈ തൽക്ഷണം മോദിജിയുടെ എളിയ ആവശ്യം നിവർത്തിച്ചു കൊടുത്തു.

പേനയും കടലാസും കയ്യിൽ കിട്ടിയ മോദിജി കടലിനു നേരെ തിരിഞ്ഞു സാഷ്ടാംഗം വന്ദിച്ചു ആ മഹത്കാവ്യം ചമച്ചു. ടാഗോർ ജിയേയും വള്ളത്തോളിനെയും പോലെ ഭാവിയിൽ ലോക ക്ലാസ്സിക്കുകളുടെ കൂട്ടത്തിൽ ഇടം പിടിക്കാൻ പോകുന്ന ഹിന്ദി ഭാഷയിലുള്ള ആ മഹാകാവ്യം മിത്രങ്ങൾക്ക് വേണ്ടി ഇവിടെ മലയാളത്തിൽ പരിഭാഷ പെടുത്തുന്നു. ആസ്വദിച്ചാലും!!

“നിത്യമിക്കാണുന്ന കാറും കോളും
വേലിയേറ്റവുമിറക്കവും ഗർജ്ജിക്കും
തിരമാലകൾ തൻ പ്രതാപം,
നിൻ വേദനയോ ആക്രോശമോ
അതോ ദീന വിലാപമോ?

ചഞ്ചലമല്ല നിന്നുടെ മാനസം.
ആശങ്കയില്ല, ഭയം ലേശമില്ല.
നിന്നോളമാഴമിവിടെ മറ്റാർക്ക്?
പ്രിയ സാഗരമേ, നിനക്കെന്റെ സ്നേഹ വന്ദനം!

ശക്തി തൻ അപാര ഭണ്ടാരമുള്ളിൽ പേറി
അപാരമാം ഊർജ്ജത്തെയുമുള്ളിലൊതുക്കി,
സംയമനമൊന്നുമേ ശീലമതാക്കി,
സീമകൾക്കുള്ളിൽ സ്വയമൊതുക്കി
പ്രൗഢ ഗാംഭീര്യത്തെ എന്നുമോർപ്പിച്ചു
പ്രിയ സാഗരമേ, നിനക്കെന്റെ സ്നേഹവന്ദനം!

നീയെൻ പ്രിയ അധ്യാപകൻ,
എന്നുമെൻ പ്രിയ അധ്യാപകൻ നീ,
നിന്റെയലകളിൽ ജീവസന്ദേശം.
അഭിനന്ദേച്ചയില്ല, നിനക്കില്ലാ
അഭയാന്വേഷണവും.
നിശ്ചിതയെന്നുമീ നിത്യ പ്രവാസം.
പ്രിയ സാഗരമേ, നിനക്കെന്റെ സ്നേഹവന്ദനം!

നിത്യ നിർജ്ജരീ,
നിന്റെയീ ജീവ പ്രവാഹിനീ,
നിൽക്കാതെ നിലക്കാതെ ചരൈവതി,
ചരൈവതിയെന്ന് നിൻ മൂല മന്ത്രജപം.
നിരന്തരം സർവ്വത്രം.
ഈ യാത്ര അനവരം,
ഇതിൻ സന്ദേശവും അനവരതം.
പ്രിയ സാഗരമേ, നിനക്കെന്റെ
സ്നേഹവന്ദനം!

ഒരു തിര മരിക്കുമ്പോൾ മറുതിര ജനിക്കുന്നു.
വിലയത്തിലും നവ ജീവോദയം തന്നെ,
ജനന മരണത്തിന്റെ അനുപമ ക്രമം പോലെ.
നിന്നിലടങ്ങി നിന്നിലൊടുങ്ങി
പുനർ ജന്മത്തിൻ
നിത്യ പ്രതീതിയുണർത്തി
പ്രിയ സാഗരമേ,
നിനക്കെന്റെ സ്നേഹവന്ദനം!

സൂര്യനോടല്ലയോ നിൻ പുരാതന
ബന്ധു തപ്തമാം നിന്റെയീ ജീവജലം
നീരാവിയായി ചെന്ന് മാനം തൊടുന്നു,
സൂര്യനെ ചുംബിക്കുന്നു. മേഘമായ്
വീണ്ടും പൊഴിയുന്നു.
മധുമയമായ്‌ വീണ്ടും പെയ്തിറങ്ങുന്നു.
സുജലമായ് സുഫലമായ് പ്രകൃതിയെ
വീണ്ടുമൊരുക്കുന്നു.പ്രിയ സാഗരമേ,
നിനക്കെന്റെ സ്നേഹവന്ദനം!

ജീവിത സൗന്ദര്യം നീലകണ്ഠന്റെ
ജീവിതമാദർശമെന്നപോൽ ഭൂമി തൻ
കാളകൂടം സ്വന്തം ഉടലിൽ പടർത്തി നീ.
അമ്ല ലവണത്തെ നെഞ്ചേറ്റി നീ
പുതുജീവനീ ലോകത്തിനേകി
ജീവിത മർമ്മ പാഠം പകർന്നു നൽകുന്നു
നീ.പ്രിയ സാഗരമേ,
നിനക്കെന്റെ സ്നേഹവന്ദനം”!

ഈ മഹാകാവ്യം ഇതിനകം അന്താരാഷ്ട്ര മാധ്യമങ്ങളിൽ വൈറൽ ആയിരിക്കുകയാണ്. ഇതിനകം തന്നെ ലോകത്തെ മുന്നൂറ്റി എൺപത് രാഷ്ട്രങ്ങളിൽ പത്താം ക്‌ളാസ്സിലെ പാഠപുസ്തകങ്ങളിൽ ഇടം പിടിച്ചു കഴിഞ്ഞു. എന്നിട്ടും കേരളത്തിലെ മാമാ മാധ്യമങ്ങൾ ഈ കലാ സൃഷ്ടിക്കെതിരെ മുഖം തിരിച്ചു നിൽക്കുകയാണ്. ഭാരതം ഓരോ ദിവസവും മോദിജിയുടെ ബലിഷ്ഠമായ കരങ്ങളാൽ വികസനത്തിന്റെ ആഴക്കടലിലേക്ക് മുങ്ങാം കുഴിയിടുമ്പോൾ കേരളത്തിൽ മാത്രം കുറച്ചു വേട്ടപ്പട്ടികൾ ഓരിയിടുകയാണ്. അതിനൊന്നും ചെവി കൊടുക്കാതെ പൂജ്യനീയ മോദിജി അദ്ദേഹത്തിന്റെ പടയോട്ടം തുടരുക തന്നെ ചെയ്യും. ആർക്കും ആ യാഗാശ്വത്തെ തടയാനാവില്ല.

അഭിനയിക്കും, നാസിക് ഡോൾ കൊട്ടും, പുല്ലാങ്കുഴലൂതും, കവിതയുമെഴുതും. ഇതുപോലെ സകലകാല വല്ലഭനായ മോദിജിയെ തന്നെ പ്രധാന മന്ത്രിയായി കിട്ടിയത് ഭാരതീയരുടെ പുണ്യമാണ്.മാമാ മാധ്യമങ്ങൾ പൂഴ്ത്തി വെച്ചത് കൊണ്ട് മാത്രം മലയാളികൾ മോദിജിയുടെ ഈ മഹാകാവ്യത്തെ കുറിച്ച് അറിയാതെ പോകരുത്.

No photo description available.

(ഹിന്ദിയിലുള്ള ഈ ക്‌ളാസ്സിക് മൂലകൃതി മലയാളത്തിലേക്ക് പരിഭാഷപ്പെടുത്തിയപ്പോൾ മൗലിക കൃതിയുടെ അന്തസാര ശൂന്യതയോട് പൂർണ്ണമായും നീതി പുലർത്താനായിട്ടുണ്ടാവില്ല എന്ന് ഖേദ പ്രകടനം കൂടി ഈ അവസരത്തിൽ അറിയിക്കട്ടെ. ഇതുപോലെ മോദിജിയുടെ പുണ്യകർമ്മങ്ങൾ മുഴുവൻ ഭാരതീയരിലേക്കും ത്വരിതഗമനമായി എത്തിക്കുവാൻ വേണ്ടിയാണ് ദേശീയ ഭാഷയായ ഹിന്ദി ഭാരതത്തിൽ നിർബന്ധ ഭാഷയാക്കണമെന്ന് അമിട് ജി ആവശ്യപ്പെട്ടത്. മോഡിജിയെ മലയാളികളിൽ നിന്ന് അകറ്റി നിർത്താൻ നിർബന്ധ ബുദ്ധിയുള്ള അന്തംകമ്മികൾ ആ സദുദ്ദേശം നിറഞ്ഞ നിർദേശത്തെയും കണ്ണടച്ച് എതിർത്തു)

Advertisements
ഇന്ത്യയിലെ ആദ്യത്തെ സിറ്റിസൺ ജേർണലിസം പോർട്ടൽ. ഇവിടെ പ്രസിദ്ധീകരിക്കപ്പെടുന്ന ലേഖനങ്ങളും കമന്റുകളും ബൂലോകത്തിന്റെ അഭിപ്രായങ്ങളല്ല.അവയുടെ പൂർണ ഉത്തരവാദിത്തം രചയിതാവിനായിരിക്കും. കേന്ദ്ര സർക്കാരിന്റെ ഐടി നയപ്രകാരം വ്യക്തി, സമുദായം, മതം, രാജ്യം എന്നിവയ്ക്കെതിരായി അധിക്ഷേപങ്ങളും അശ്ലീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.