ലൂസിഫറിലെ ആ സംഭാഷണവും ‘കള ‘ സിനിമയും തമ്മിലുള്ള ബന്ധം

0
245

Rithin Chilambuttusseril

“കർഷകൻ അല്ലേ madam, കളപറിക്കാൻ ഇറങ്ങിയതാണ് .”

ലൂസിഫർ ലെ ഈ സംഭാഷണവും ‘കള ‘ സിനിമയും തമ്മിലുള്ള ബന്ധം എന്താണെന്നല്ലേ. ബന്ധമുണ്ട്. ഒരു പക്ഷേ ‘വിപരീത ബന്ധം ‘.അതൊരു പക്ഷേ കൃഷിക്കാരന്റെയും വന വിഭവങ്ങൾ ആശ്രയിച്ചു ജീവിക്കുന്നവരുടെയും ദൃഷ്ടിയിൽ ഉള്ള വ്യത്യാസം മാത്രമാണ്!

പ്രകൃതിക്കു കള / വിള എന്നൊന്നില്ല. കർഷകനായ മനുഷ്യൻ തന്റെ ആവശ്യത്തിനായി തിരഞ്ഞെടുത്തു manipulate (Domesticate ) ചെയ്ത സസ്യ/ജന്തു വർഗ്ഗങ്ങൾ വിളകളായി. മറ്റുള്ളവ കളകളും. അങ്ങനെ Domesticate ചെയ്ത സസ്യ /ജന്തു ഇനങ്ങളുമായി അവൻ പുതിയ ഇടങ്ങളിൽ തേടി വന്നു. അവയെ വിളകൾക്ക് യോജിച്ച നിലയിൽ Manipulate ചെയ്തു. അനാദി കാലത്തോളം നില നിന്ന കരിങ്കാടുകൾ വെട്ടി വെളുപ്പിച്ചു. കുന്നുകൾ നിരപ്പാക്കി. ഉഴുതു മറിച്ചു. കായലുകൾ വരമ്പ് കെട്ടി തിരിച്ചു. വെള്ളം തേവി. പാടങ്ങളായി…
അവൻ സിന്ധു നദീതടത്തിനു ചുറ്റുമുള്ള കാട്ടിൽ ചുറ്റിത്തിരിഞ്ഞ കോഴികളെ പാട്ടിലാക്കി. നാട്ടു കോഴികളാക്കി. അവർ തെക്കോട്ടു കുടിയേറി വന്നു. എങ്കിലും ഈ നാടിന്റെ കാട്ടു കോഴിക്കൊപ്പം നാട്ടുകോഴിയും ഒരേ പൊന്തക്കാട് ചികയുന്നു.

May be an image of 5 people, beard and textഅവൻ പശ്ചിമേഷ്യ – ഏഷ്യമൈനറിലെ കാട്ടിൽ നിന്നു കാട്ടാടുകളെ domesticate ചെയ്തു. ആ ആടിനെ കൊണ്ടു നമ്മുടെ നാട്ടിൽ വളർത്തി.നമ്മുടെ നാട്ടിൽ(കാടുകളിൽ ) സ്വാഭാവികമായി ആടുകളില്ല.ആനമുടിയുടെ കുത്തനെ ഉള്ള ചെരിവിൽ ജീവിക്കുന്ന വരയാടുകൾ (വരൈ – മല) അല്ലാതെ. എങ്കിലും നാട്ടാടുകൾ ഈ മണ്ണിൽ സ്വഭാവികമായി മുളച്ചു പൊന്തിയ കുറുന്തോട്ടിയും തഴുതാമയും പ്ലാവിലയും കടിക്കുന്നു.

ഉത്തര ധ്രുവത്തോടടുത്ത് സൈബീറിയയിൽ അവൻ തന്റെ പരിസരത്തു ജീവിച്ചിരുന്ന കാട്ടുനായ്ക്കളെ ഇണങ്ങി നായ്ക്കളാക്കി. അവയുടെ ആദ്യരൂപം ഈ നാട്ടിൽ വന്നു. നാടൻ നായ്ക്കളായി. ലോകത്തിന്റെ പലയിടങ്ങളിലെ കാലാവസ്ഥക്ക് അനുരൂപമായി പല ബ്രീഡുകൾ ഉണ്ടായി. അവയും ഈ നാട്ടിൽ വന്നു. അവയും ഒരേ പ്രദേശം പങ്കു വയ്ക്കുന്നു.

ഞാൻ ചുറ്റും നോക്കുമ്പോൾ വീടിനു ചുറ്റുമുള്ള റബ്ബർ കാടുകളുടെ സ്ഥാനത്തു വന്മരങ്ങളിൽ പടർന്നു നിൽക്കുന്ന കുരുമുളകു കാടുകളെ കാണുന്നു. ഒന്നുകൂടി സൂക്ഷിച്ചു നോക്കിയപ്പോൾ നൂറ്റാണ്ടുകൾക്ക് മുൻപ് ഇടതൂർന്നു നിൽക്കുന്ന ചോലകൾ നിറഞ്ഞ നിത്യ ഹരിത വനങ്ങളെയും. പക്ഷേ ആ കാടിന്റെ ശേഷിപ്പുകളായി കാട്ടാഞ്ഞിലിയും പേഴും വട്ടയും ഒക്കെ നിൽക്കുന്നു. കൂടെ, റബ്ബറും…

ഉലകം മുഴുവൻ മഞ്ഞു മൂടിയ ഹിമയുഗത്തിന്റെ ഒരു ചെറിയ ഇടവേളയിൽ ആണ് നാം. 12000 വർഷമേ ആയിട്ടുള്ളു നാം അലച്ചിൽ നിർത്തി കൃഷി തുടങ്ങിയിട്ട്. അപ്പോൾ മുതലാണ് കളകളും വിളകളും ഉണ്ടായത്. മേൽജാതിയും കീഴ്ജാതിയും ഉണ്ടായത്. മതങ്ങൾ ഉണ്ടായത്.

എല്ലാം കുറച്ച് കാലം…ഈ ഇടവേള കഴിഞ്ഞു ഹിമയുഗം തിരിച്ചു വരുന്നത് വരെ. കടലുകൾ മഞ്ഞു കട്ടകളായും, മഴക്കാടുകൾ വരണ്ട പുൽപ്പരപ്പുകളായും, പുഴകൾ മലമുകളിൽ മഞ്ഞു കൂനകളായി കൂടുന്ന കാലം വരെയ്ക്കും. എല്ലാം…..കുറച്ച് കാലം…

“കാനക്കോഴി കതിർ കൊത്ത
മനയ്‌ക്കോഴി തിനയ്ക്കവര
വരൈ മന്തി കഴി മൂഴ്ക
കഴി നാറൈ വരൈ ഇരുപ്പത്.”

കാട്ടു കോഴി (പാടത്തെ) കതിര് കൊത്തുന്നു. വീട്ടിലെ കോഴി (മലമുകളിലെ ) തിന കവരുന്നു. മലയിലെ കുരങ്ങൻ തീര ദേശത്തെ ഉപ്പളക്കുഴിയിൽ കുളിക്കുന്നു. ആ കുഴിയിലെ ഞാറ കൊക്ക് മലയിൽ ഇരിക്കുന്നു.
(പൊരുനർ ആറ്റുപ്പട : സംഘകാല കൃതി )