തെങ്ങോല മേഞ്ഞ വീടുകൾ ധാരാളം ഉണ്ടായിരുന്ന കാലത്ത് ഇങ്ങിനേയും ഒരു കല്ല്യാണമുണ്ടായിരുന്നു

0
365

Sabu Manjaly Jacob

പുരകെട്ടു കല്ല്യാണം

പണ്ട് പണ്ട് നാട്ടിൽ തെങ്ങോല മേഞ്ഞ വീടുകൾ ധാരാളം ഉണ്ടായിരുന്ന കാലത്ത് ഇങ്ങിനേയും ഒരു കല്ല്യാണമുണ്ടായിരുന്നു . അന്നൊക്കെ സദ്യയുള്ള ഏതു ചടങ്ങും കല്ല്യാണം എന്ന പേരിലാണ് അറിയപ്പെട്ടിരുന്നത് . വർഷത്തിലൊരിക്കൽ പുര കെട്ടി മേയുന്ന ദിവസമാണ് പുരകെട്ട് കല്ല്യാണം . മെയ് മാസം പകുതി ആയിട്ടും കെട്ടിമേയാൻ കഴിയാത്ത വീട്ടുകാരുടെ മനസ്സിൽ തീയാളി തുടങ്ങും .മഴയെങ്ങാനും പെയ്താൽ കാറ്റെങ്ങാനും വീശിയാൽ കരിഞ്ഞുണങ്ങിയ ഓലയിളുമ്പിലൂടെ വെള്ളം അകത്തേക്കിറങ്ങുന്നത് സ്വപ്നം കണ്ട്‌ അവർ ഞെട്ടിയുണരും . വലിയ മുന്നൊരുക്കങ്ങൾ വേണം പുരകെട്ടുകല്ല്യാണത്തിന് . മേച്ചിലിന് ആവശ്യമായ പച്ചോല സംഭരിച്ച് മെടഞ്ഞ് കെട്ടുകളായി അട്ടി വച്ചിട്ടുണ്ടായിരിക്കണം. ചെറിയ പറമ്പുകൾ ഉള്ളവർക്ക് ഇത് ഒരു വർഷം നീളുന്ന പ്രക്രിയ ആണ് .

May be an image of one or more people, people standing, outdoors and palm treesപുരകെട്ട്കല്ല്യാണദിവസം വീട്ടുകാരെല്ലാം അതിരാവിലെ എഴുന്നേൽക്കും . സ്ത്രീകൾ ചെറിയൊരു സദ്യ ഒരുക്കുവാനുള്ള ചിട്ടവട്ടങ്ങൾ ആരംഭിക്കും . പുര കെട്ടുകാർ എത്തും മുൻപേ പാചകക്രിയകൾ ചെയ്ത് അടുക്കള ഒഴിച്ചു കൊടുക്കണം . അരിവെയ്പ്പും പപ്പടം കാച്ചലും അന്ന് മാത്രം മുറ്റത്ത് കല്ല് വച്ചുണ്ടാക്കിയ താത്കാലിക അടുപ്പിലായിരിക്കും . ആണുങ്ങൾക്കും അന്ന് പിടിപ്പത് പണിയാണ് . വീട്ടിലെ സാധന സാമഗ്രികളൊക്കെ പെട്ടന്ന് മൂടി വക്കണം . മെടഞ്ഞ ഓല കഴുക്കോലിൽ കെട്ടുവാനുള്ള കൊതുമ്പു ഞാരുകൾ തയ്യാറാക്കുവാനായി വെള്ളത്തിൽ കുതിർത്ത കൊതുമ്പുകൾ പുരകെട്ടുകാർക്കു എടുത്ത് കൊടുക്കണം . ദ്രവിച്ച കഴുക്കോലുകൾ മാറ്റുവാനുള്ളവ തയ്യാറാക്കി വക്കണം . സഹായികളുടെ കുറവുണ്ടെങ്കിൽ സഹായികളാകണം .

No photo description available.പുരകെട്ടുകാർ എത്തിയാൽ ഉടനെ ഒരു ഗ്ലാസ്സ് കട്ടൻചായ . അതും കുടിച്ച് അവർ പുരപ്പുറത്തു കയറും . രണ്ട്‌ അടരുകളായി കഴുക്കോലിൽ കെട്ടി വച്ചിരിക്കുന്ന മെടഞ്ഞ ഓല വെട്ടി താഴേക്കിടലാണ് ആദ്യ പണി . വീടുകൾ അപ്പോൾ തലപ്പാവില്ലാതെ അസ്ഥികൂടങ്ങളായി തെളിഞ്ഞുവരും .താഴേക്ക് വീഴുന്ന ഓലകൾ രണ്ടായി തരം തിരിച്ചു വക്കണം .കരിയോലയും വരട്ടോലയും .അതിൽ വരട്ടോല വീണ്ടും ഉപയോഗിക്കാനുള്ളതാണ് . ഓലയിറക്കി കഴിഞ്ഞാൽ കഴുക്കോലുകൾ പൊടി തട്ടി ആവശ്യമുള്ളിടത്തു പുതിയവ കെട്ടി പണിക്കാർ താഴേക്കിറങ്ങും .സമയം അപ്പോൾ ഏകദേശം ഉച്ച ആയി കാണും .പരിസരത്തെല്ലാം പപ്പടം കാച്ചിയ മണമായിരിക്കും . അടുത്തത് സദ്യയാണ്‌ . പുരകെട്ട് കല്ല്യാണസദ്യ . വെറും നിലത്തോ ഉമ്മറത്തോ വാഴയില വിരിച്ചാണ് സദ്യവട്ടങ്ങൾ വിളമ്പുക . സദ്യ കഴിഞ്ഞാൽ ഒരൽപം വിശ്രമം .

പിന്നെ പുരമേയൽ തുടങ്ങുകയായി. പുരകെട്ടുകാർ അരയിൽ കൊതുമ്പു നാരുകൾ (വഴുക) കെട്ടിവച്ച് പുരപ്പുറത്തു കയറും . അടി ഭാഗത്തു നിന്നും മേൽഭാഗത്തേക്കാണ് മേഞ്ഞു തുടങ്ങുക .അപ്രകാരം നാല് വശത്തു നിന്നും മേഞ്ഞു കയറും .നെറുകയിൽ ഓല ഒരു പ്രത്യേക രീതിയിൽ മടക്കി കെട്ടി വെക്കും .ചരിവുകളിൽ മെടയാത്ത മുഴുവൻ തെങ്ങോലകൾ പതിപ്പിച്ചു വച്ച് കെട്ടിവെക്കും . പുരമേയൽ പൂർത്തിയായാൽ താഴെയിറങ്ങി അരിക് അരിഞ്ഞു ചന്തമാക്കലാണ് അവസാന പണി .വീട്ടുകാർ അപ്പോഴേക്കും പരിസരം വൃത്തിയാക്കി ചായയും പലഹാരവും ഒരുക്കി വച്ചിട്ടുണ്ടാകും . ചായകുടിച്ച് കൂലിയും വേടിച്ചു ഒരു വർഷം കഴിഞ്ഞ് വീണ്ടും കാണണം എന്നോർമിപ്പിച്ച് പുരകെട്ടുകാർ യാത്രപറഞ്ഞിറങ്ങുകയായി . ഒന്ന് നെടുവീർപ്പിട്ടുകൊണ്ട് വീട്ടുകാർ അപ്പോൾ വീടിനകത്തേക്ക് കയറും . പുല്ല് മേഞ്ഞതും വൈക്കോൽ മേഞ്ഞതും പനയോല മേഞ്ഞതുമായ വീടുകളും കേരളത്തിൽ പലയിടത്തും ഇപ്പോഴും കാണാം .