ഈ മനുഷ്യൻ ക്യാമറയ്ക്കു പിന്നിലിരുന്ന് തീർത്ത വിസ്മയങ്ങൾ എത്രയെന്നറിയുമോ ? വായിച്ചുനോക്കൂ

Sanalkumar Padmanabhan

കുട്ടികളെ സ്നേഹിച്ച കുട്ടിചാത്തന്റെയും ,ചാത്തനെ പിന്തുടർന്ന ദുര്മന്ത്രവാദിയുടെയും കഥ പറഞ്ഞ മൈ ഡിയർ കുട്ടിച്ചാത്തൻ .
അലീനയെന്ന വിധവയുടെയും അവരുടെ നാല് വയസുള്ള മകളുടെയും ജീവിതത്തിലേക്ക് ടെലിഫോണിലൂടെ ശബ്ദം കൊണ്ട് കടന്നു വന്ന “ടെലിഫോൺ അങ്കിളിന്റെയും ” കഥ പറഞ്ഞ ഒന്ന് മുതൽ പൂജ്യം വരെ ..

ഭാസ്കര തട്ടാന്റെയും സ്നേഹലതയുടെയും പിന്നെ പത്തു പവന്റെ നെക്‌ലേസിന്റെയും ” ചതിയുടെയും ” കഥ പറഞ്ഞ പൊന്മുട്ടയിടുന്ന താറാവ് !
അമ്മിണികുട്ടിയെ കെട്ടാനായി സുഹൃത്ത് കുഞ്ഞിക്കാദര് ജോലി ചെയ്യുന്ന പഴനിയിലെ ലെതർ ഫാക്ടറിയിൽ പോയി ബാർബർ ആയി മാറേണ്ടി വന്ന വേലായുധൻകുട്ടിയുടെ കഥ പറഞ്ഞ മഴവിൽ കാവടി…
അമ്മയില്ലാത്ത കുഞ്ഞിനേയും കൊണ്ട് ഒറ്റക്കുള്ള ഡോക്ടർ അനിരുദ്ധന്റെ ജീവിതവും , അയാളുടെ ജീവിതത്തിലേക്ക് കടന്നു വന്ന രാധ ദേവിയുടെയും ശിവന്റെയും കഥ പറഞ്ഞ എന്നും നന്മകൾ !
ഒരു ടൂറിസ്റ്റ് ബസ് മാനേജർ സുധാകരന്റെ ജീവിതത്തിലേക്ക് ഭാര്യയായി , ഒരു പെട്ടി നിറയെ കുട്ടികളുടെ മനസുമായി കടന്നു വന്ന ഹൃദയകുമാരിയുടെ കഥ പറഞ്ഞ കടിഞ്ഞൂൽ കല്യാണം !
മേലേപ്പറമ്പിലെ ആൺവീടിലേക്കു , പൊള്ളാച്ചി കൗണ്ടറുടെ മകളെ വിവാഹം കഴിച്ചു, അവളെ വേലക്കാരിയായി വേഷം കെട്ടിച്ചു കൊണ്ട് വന്നു , വന്ന ഹരികൃഷ്ണന്റെയും ഭാര്യ പവിഴത്തിന്റെയും ,ചേട്ടന്മാരുടെയും കഥ പറഞ്ഞ മേലേപ്പറമ്പിൽ ആൺവീട് !
അച്ഛന്റെ ജീവനേക്കാൾ വിലയുണ്ട് അച്ഛന്റെ പേരിലെ ഇൻഷുറൻസ് തുകക്ക് എന്ന കഥ പറഞ്ഞ സന്താനഗോപാലം !
അപരിചിതൻ ആയ വഴിപോക്കൻ കുമാരേട്ടന്റെ ഒരു കത്തിന്റെ പിറകെ , അയാളുടെ ശത്രുക്കളെ തേടി പോയ ക്യാപ്റ്റൻ വിജയ് മേനോന്റെയും പൂച്ചക്കണ്ണൻ വില്ലന്റെയും കഥ പറഞ്ഞ പിൻഗാമി !
ഒരു ഡോക്റ്ററെ ഭാര്യയാക്കാൻ ആഗ്രഹിച്ച സിദ്ധാർത്ഥന്റെയും , അയാളുടെ ഭാര്യ ആയ മൃഗ ഡോക്ടർ അമ്മുക്കുട്ടിയുടെയും കഥ പറഞ്ഞ വധു ഡോക്ടറാണ് !
നാട്ടുമ്പുറത്തുകാരി മായാ സുരേന്ദ്രൻ ,ബോംബെ കാരി മനസേശ്വരീ ഗുപ്ത ആയ കഥ പറഞ്ഞ മംഗലം വീട്ടിൽ മാനസേശ്വരീ ഗുപ്ത !
നാരായണൻ മാസ്റ്ററുടെയും മകൻ ദിനകന്റെയും ജീവിതവും , കുറുപ്പന്മാരുമായുള്ള പ്രശ്നനങ്ങളുടെയും കഥ പറഞ്ഞ വിസ്മയം !
“സെവൻ ബെല്സ്” എന്ന സംഗീത ഉപകരണം വായിച്ചു എന്ന, ചെയ്യാത്ത തെറ്റിന് ശിക്ഷ അനുഭവിച്ച വിശാൽ കൃഷ്ണമൂർത്തിയുടെയും , ആൻജെലിന ഇഗ്നേഷ്യസിന്റെയും അന്ധഗായകന്റെയും കഥ പറഞ്ഞ ദൈവദൂതൻ !
ദേശീയ അവാർഡുകളുടെ നേരെ പേര് രേഖപ്പെടുത്തിയ മൂന്നു ചിത്രങ്ങളുടെ ( പിറവി , സ്വം , വാനപ്രസ്ഥം ) തിരക്കഥാരചനയിൽ പങ്കാളി!
തുടങ്ങി വെള്ളിത്തിരയിൽ , അതി പ്രശസ്തമായ കഥകളും, പ്രശസ്തർ ആയ കഥാപാത്രങ്ങളെയും സൃഷ്‌ടിച്ച രഘുനാഥ് പാലേരി എന്ന ഒരു “അപ്രശസ്തൻ ” ആയ ഒരാളുണ്ട് വർഷങ്ങൾ ആയി മഷി നിറച്ച പേനയും , വാക്കുകൾ നിറച്ച വെള്ള പേപ്പറും പിടിച്ചു ക്യാമറക്കു പിന്നിൽ !

പ്രശസ്തിയുടെ ലൈം ലൈറ്റിനടിയിൽ നില്ക്കാൻ അധികം ഇഷ്ടപെടാത്ത മനുഷ്യൻ ആയതു കൊണ്ടാകാം ക്യാമറക്കണ്ണുകൾ ഫോക്കസ് ചെയ്യുന്ന നക്ഷ്ത്രക്കൂട്ടങ്ങൾക്കിടയിൽ തിരഞ്ഞാൽ അയാളെ കണ്ടെത്താൻ ആകാത്തത് !
പ്രിയ രഘുനാഥ് സാർ ഇനിയും ഒരായിരം കഥകളുടെ ഉറവ ആ ഹൃദയത്തിൽ ഉണ്ടെന്നറിയാം .. അവയെ അക്ഷരങ്ങളായി വെള്ളപേപ്പറിലേക്കു അരുവിയെന്ന പോൽ ഒഴുക്കി വിടു……ആ കൈകളിൽ നിന്നും ഒഴുകി വരുന്ന വാക്കുകളുടെ അരുവിയെ പ്രതീക്ഷയോടെ കാത്തിരിക്കുന്ന എത്രയോ പേര് ഇന്നും ഉണ്ടെന്നോ !

 123 total views,  1 views today