ಜನುಮದ ಜೋಡಿ

Sanjeev S Menon

ഒരു ഗാനരംഗം ചിത്രീകരിക്കാൻ 9 ദിവസമെടുത്തു. അല്പനേരം മാത്രം കിട്ടുന്ന സൂര്യാസ്തമയം ചിത്രീകരിക്കാൻ നാഗാഭരണ അത്രയും സമയം ചിലവാക്കിയതിൽ തെറ്റുപറയാനാവില്ല. ആ ഗാനവും ഗാന രംഗങ്ങളും മനോഹരമായിരുന്നു. ഹിറ്റ് ചാർട്ടിൽ മുൻപന്തിയിലുണ്ടായിരുന്നു മണി മണിയെന്ന ഗാനം .ഗ്രാമീണതയുടെ വശ്യസൗന്ദര്യം ആവാഹിച്ചെടുത്തിട്ടുണ്ട് ഈ ഗാനരംഗത്തിൽ.ഈയൊരു പാട്ടിലൊതുങ്ങില്ല ‘ജനുമദജോഡി’യിലെ ഹിറ്റുകൾ.വി.മനോഹർ സംഗീതം പകർന്ന ഭൂരിഭാഗം ഗാനങ്ങളും പുതുമയുള്ളതും ഗ്രാമീണത തുളുമ്പുന്നതുമായിരുന്നു.

വയലൻസും ഐറ്റം ഡാൻസും പതിവായിരുന്ന കാലത്ത് പക്കാ ഫാമിലി എന്റർടെയ്നറായി വന്ന ഈ ചിത്രം വൻ വിജയമായി.മലയാള സിനിമയുടെ സംഭാവനയായ ചിപ്പി ശില്പയെന്ന നാമം സ്വീകരിച്ച് തനി കന്നഡത്തി കനകയായി വെള്ളിത്തിരയിലെത്തിയപ്പോൾ കന്നഡ ജനത ഇരുകൈകളും നീട്ടി സ്വീകരിച്ചു. ആദ്യ ചിത്രത്തിനു തന്നെ മികച്ച നടിക്കുള്ള കർണ്ണാടക സംസ്ഥാന അവാർഡും കരസ്ഥമാക്കി.പ്രഥമ ചിത്രത്തിൽ നായകനായി ശിവണ്ണയെ കിട്ടിയതും ചിപ്പിയുടെ ഭാഗ്യമാകാം. പിന്നീടങ്ങോട്ട് ചിപ്പിയെന്ന ശില്പയുടെ സമയമായിരുന്നു. അനവധി ഹിറ്റുകൾ പിറന്നു.

1996 നവമ്പറിൽ റിലീസായ ചിത്രമാണ് ജനുമദജോഡി. അവസാന രംഗത്തിൽ ഗ്രാമത്തിലെസ്വാമിജി പറയുന്നുണ്ട്, കൃഷ്ണയും കനകയും ഒന്നിച്ചു ജീവിക്കാനായി ജനിച്ചവരാണ് അതായത് ജനുമദജോഡിയാണ്‌, അവരെ വേർപെടുത്താൻ ശ്രമിക്കേണ്ട എന്ന് .തുടക്കം മുതൽ തന്നെ സാധാരണ കന്നഡ സിനിമകൾ കാണുന്നവർക്ക് വ്യത്യാസം മനസിലായിത്തുടങ്ങും. തനി ഗ്രാമീണ ശൈലിയിലെ സംഭാഷണങ്ങളും അമ്പലത്തിലെ രഥോത്സവവും ആകസ്മികമായി കണ്ണുകൾ തമ്മിലുടക്കുന്ന നായകനും നായികയും. ഗ്രാമങ്ങളിൽ നിലനില്ക്കുന്ന ജാതീയമായ വേർതിരിവുകളും നാട്ടുക്കൂട്ടത്തിന്റെ പ്രസക്തിയും എല്ലാം നന്നായി അവതരിപ്പിച്ചിട്ടുണ്ട്.കൃഷ്ണയും കനകയും ഒരുമിക്കും എന്നു തോന്നുന്നയിടത്തു നിന്ന് കഥ മറ്റൊരു തലത്തിലേക്കു പോകുന്നു.

തന്റെ ഗ്രാമത്തേയും അവിടുത്തെ ജനങ്ങളേയും നെഞ്ചിലേറ്റി നടക്കുന്ന കൃഷ്ണക്ക് കനകയെ സ്വന്തമാക്കാനുള്ള പ്രയാണത്തിൽ പ്രതിസന്ധികളുടെ ഘോഷയാത്രകളെയാണ് നേരിടേണ്ടി വരുന്നത്. കനക താഴ്ന്ന ജാതിയിലുള്ള പെൺകുട്ടിയായതിനാൽ ചില സന്ദർഭങ്ങളിൽ അവഹേളനം സഹിക്കേണ്ടി വരുന്നു. കൃഷ്ണക്ക് എല്ലാ പിൻതുണയുമായി കൂട്ടുകാരും കനകക്ക് താങ്ങായി ആത്മസഖി മണിയുമുണ്ട്. പക്ഷെ അവർക്ക് നിയന്ത്രിക്കാവുന്നതിലപ്പുറമായിരുന്നു പ്രതിബന്ധങ്ങൾ. പ്രതിസന്ധികളിൽ കൃഷ്ണ അഭയം തേടുന്നത് സ്വാമിജിയുടെ മുന്നിലാണ്. സ്വാമിജിയുടെ ഉപദേശങ്ങൾ കൃഷ്ണ മുഖവിലക്കെടുക്കുന്നുമുണ്ട്. കാളവണ്ടിയോടിക്കുന്നതിലും കുട്ട വഞ്ചി തുഴയുന്നതിലുമൊക്കെ പ്രഗദ്ഭനായ കൃഷ്ണ താൻ വിശ്വസിക്കുന്ന ധർമ്മങ്ങളിൽ നിന്ന് അണുവിട ചലിക്കുന്നില്ല, തന്റെ പ്രണയിനിക്കുവേണ്ടി പോലും. അന്യപുരുഷൻ ബലമായി താലികെട്ടിയ കനക അരിവാൾ ചൂണ്ടിക്കൊണ്ട് ,തന്റെ ശരീരത്തിൽ തൊട്ടാൽ ആ നിമിഷം കഴുത്തു മുറിക്കുമെന്ന് ഭർത്താവിനോടു പറയുമ്പോൾത്തന്നെ അവൾ കൃഷ്ണയെ മനസാ വരിച്ചവളാണെന്ന് ഭർത്താവിന് മനസിലാക്കിക്കൊടുക്കുന്നു.

shilpa - chippi
shilpa – chippi

സിങ്കാരി ഗൗഡ എന്ന ഗ്രാമത്തിലെ അല്പം റൗഡിസം കൈമുതലായുള്ള ഒരു മുഖ്യന്റെ വാക്കും കേട്ട് ബലമായി താലികെട്ടിയവൻ പിന്നീട് അതിന്റെ ഫലം അനുഭവിക്കുന്നുമുണ്ട്. അപമാനവും സങ്കടവും സഹിക്കാനാവാതെ വിഷം ചേർത്ത് റൊട്ടിയുണ്ടാക്കി കഴിച്ച് ആത്മഹത്യ ചെയ്യാൻ തുടങ്ങുന്ന കനക, സ്വാമിജിയോട് കൃഷ്ണ എവിടെയുണ്ടെന്ന് ഒരു വാക്ക് ചോദിക്കാമെന്നു കരുതുന്നത്, കൃഷ്ണ എവിടെ പോയാലും സ്വാമിജിയോടു പറയാതെ പോകില്ല എന്ന വിശ്വാസത്തിലാണ്. പക്ഷെ ആ പോക്കുവരവിനുള്ളിൽ വിശന്നുവലഞ്ഞു വന്ന ഭർത്താവ് റൊട്ടിയെടുത്ത് കഴിക്കുന്നു, പിടഞ്ഞു വീണ് മരിക്കുന്നു. അതോടെ അമ്മായിയമ്മയും നാട്ടുകാരും കനകയെ കൊലപാതകിയായി മുദ്രകുത്തി നാട്ടുകൂട്ടത്തിലെത്തിക്കുന്നു. അവിടെ അന്യായമായ ചോദ്യം ചെയ്യലിൽ നിയന്ത്രണം വിട്ട് കനക പ്രതികരിക്കുന്നതോടൊപ്പം അവളുടെ മാനസിക നിലയും തെറ്റുന്നു. ഈയൊരു അവസരത്തിൽ വീണ്ടും അതേ ക്ഷേത്രത്തിലെ ഉത്സവത്തിരക്കിൽ എത്തിപ്പെടുന്ന കനകയും കൃഷ്ണയും അവിചാരിതമായി വീണ്ടും കണ്ടുമുട്ടുന്നതോടെ തിരശ്ശീല വീഴുകയാണ്.

ഒരു കന്നഡ ചിത്രമാണ് കാണുന്നതെന്ന തോന്നലോടെ കണ്ടാൽ ഇഷ്ടപ്പെടുന്ന ചിത്രം.ഹാസ്യത്തിനും ഗൗരവത്തിനുമൊക്കെ അല്പം അതിഭാവുകത്വം ഇല്ലെങ്കിൽ അവിടുത്തെ പ്രേക്ഷകർക്ക് ഒരു ‘ഗും’ കിട്ടില്ല. അതൊക്കെ കണ്ടില്ലെന്നു നടിക്കാം. മാനസികനില തെറ്റുന്ന കനകയുടെ പാട്ടും ഒഴിവാക്കിയാൽ എനിക്ക് ചിത്രം ഇഷ്ടമായി.ഗാനരംഗങ്ങളൊക്കെ മനോഹരമായി ചിത്രീകരിച്ചിട്ടുണ്ട്.ശിവരാജ് കുമാറിന്റെ “കോലുമണ്ടെ ജംഗമദേവരു” എന്ന ഗാനരംഗത്തിലെ സ്റ്റെപ്പുകൾ നന്നായിരുന്നു. മൊത്തത്തിൽ എനർജി ലെവൽ നന്നായിട്ടുണ്ട്.പന്നാലാൽ പട്ടേലിന്റെ ഗുജറാത്തിനോവലായ ‘മലേല ജീവ്’ എന്ന നോവലിന്റെ ചലച്ചിത്രാവിഷ്കാരമാണ് ‘ജനുമദജോഡി’.ചിപ്പിയും കൂട്ടുകാരി മണിയായി വേഷമിട്ട പവിത്ര ലോകേഷും സുന്ദരികളായിട്ടുണ്ട്.സ്വാമി ജിയായി ഏനാഗി ബാലപ്പ നല്ല പ്രകടനം നടത്തി.പാർവതമ്മ രാജ് കുമാർ നിർമ്മിച്ച ഈ ചിത്രം മികച്ച നടിയുടേതടക്കം ആറ് സംസ്ഥാന അവാർഡുകൾ നേടി.ബറഗൂരു രാമചന്ദ്രപ്പയുടേതാണ് സംഭാഷണം.

Leave a Reply
You May Also Like

സുരേഷ് ഗോപി,സൂരജ് വെഞ്ഞാറമൂട്, ഗൗതം വാസുദേവ് ​​മേനോൻ എന്നിവരെ പ്രധാന കഥാപാത്രങ്ങളാക്കി സനൽ വി ദേവൻ സംവിധാനം ചെയ്യുന്ന “വരാഹം”

നവ്യ നായർ, പ്രാഞ്ചി ടെഹ് ലാൻ, ശ്രീജിത്ത് രവി, സന്തോഷ് കീഴാറ്റൂർ,സാദ്ദിഖ്,സരയു തുടങ്ങിയവരാണ് മറ്റു പ്രമുഖ താരങ്ങൾ.

അവയവ മാഫിയ ആണത്രേ തമിഴ്‌നാട്ടിൽ ആക്സിഡന്റ് ഉണ്ടാക്കി മലയാളികളെ കൊല്ലുന്നത്, എന്തൊക്കെയാണ് നാം പ്രചരിപ്പിച്ചു വിടുന്നത് ?

Dileesh Ek പളനി തീർഥാടകരായ മലയാളികൾ സഞ്ചരിച്ച കാർ ദൗർഭാഗ്യവശാൽ ഡിണ്ടിഗലിൽ ആക്സിഡന്റ് ആയി 2…

ഗൗതം വാസുദേവ് മേനോൻ്റെ പോസ്റ്ററുമായി ബസൂക്ക, “തങ്കമണി ” വീഡിയോ ഗാനം (ഇന്നത്തെ ഏറ്റവും പുതിയ സിനിമാ അപ്ഡേറ്റ്സ് )

ഡയൽ 100 .മാർച്ച് 8 ന് തീയേറ്ററിൽ. ഗംഭീര പോലീസ് ഇൻവെസ്റ്റിഗേഷൻ ചിത്രമായ ഡയൽ 100…

ടൊവിനോയും ദുൽഖറും കയറിപോകുമ്പോൾ നിവിൻ കയറിയതിനേക്കാൾ വേഗത്തിൽ ഇറങ്ങുകയാണോ ? കുറിപ്പ്

Jeevan Roy മലർവാടി ആർട്സ് ക്ലബ് എന്ന മലയാളചലച്ചിത്രത്തിൽ പ്രധാനകഥാപാത്രത്തെ അവതരിപ്പിച്ചുകൊണ്ട് നിവിൻ പോളി സിനിമാരംഗത്തേക്ക്…