എന്തുകൊണ്ട് ആറാട്ട് ഇത്രമേൽ വിമർശിക്കപ്പെടുന്നു ?

ബൂലോകം
ബൂലോകം
Facebook
Twitter
WhatsApp
Telegram
15 SHARES
178 VIEWS
മോഹൻലാൽ നായകനായി ബി ഉണ്ണികൃഷ്ണൻ സംവിധാനം ചെയ്ത ആറാട്ടിനു തിയേറ്ററിൽ നല്ല വരവേല്പാണ് ലഭിച്ചത് എങ്കിൽ പോലും സിനിമയെ കുറിച്ച് ട്രോളുകളുടെ പെരുമഴ ആയിരുന്നു. എന്താകും ഈ സിനിമയെ ഇത്രമേൽ വിമർശിക്കാൻ കാരണം ? സനൂജ് സുശീലന്റെ പോസ്റ്റ് വായിക്കാം.
Sanuj Suseelan
ആറാട്ട് കണ്ടു. കളർഫുള്ളായ ആദ്യപകുതി നല്ല രസകരമായിരുന്നു. പഴയ ഹിറ്റ് സിനിമകളിലെ പല ഭാഗങ്ങളുമെടുത്ത് സ്പൂഫ് ചെയ്തിരിക്കുന്നതും കൊള്ളാം. ഇടവേള വരെ ഒരുവിധം നന്നായി പൊയ്ക്കൊണ്ടിരുന്ന പടം പക്ഷെ രണ്ടാം പകുതിയിലെത്തുമ്പോൾ കയ്യിൽനിന്നു പോയി. ആറാം തമ്പുരാന് നരസിംഹത്തിൽ ഉണ്ടായ മകനാണ് ഒടിയൻ എന്ന് ശ്രീകുമാർ മേനോൻ പണ്ട് തള്ളിയതാണ് ഈ സിനിമയുടെ സെക്കന്റ് ഹാഫ് കണ്ടപ്പോ ഓർമ്മ വന്നത്. കാവിലെ മുടങ്ങിക്കിടന്ന ഉത്സവം നടത്തിക്കുന്നത് പോലെ റഹ്മാനെ കൊണ്ട് വന്ന് ഗാനമേള, ഗാനമേള നടക്കുമ്പോൾ ബാക്കിൽ അടിയോടടി, അതും പോരാഞ്ഞിട്ട് കേണൽ സൂര്യചന്ദ്ര ലാലേട്ടന്റെ പ്രതികാരം തുടങ്ങി ട്വിസ്റ്റോടു ട്വിസ്റ്റ്. ഇതൊന്നും പോരാഞ്ഞിട്ട് ഒടുവിൽ ഹൈദരാബാദിൽ ഏജന്റ് എക്സ് നടത്തുന്ന ചറപറാ വെടിവയ്പ്പും പൊരിഞ്ഞ തെലുങ്ക് ഡയലോഗുകളും . പടം കാണുന്നതിനിടയ്ക്ക് ഉറങ്ങിപ്പോയ ആരെങ്കിലും ക്ലൈമാക്സിലാണ് ഉറക്കമെണീക്കുന്നതെങ്കിൽ ഈ തെലുങ്ക് മുഴുവൻ കേട്ട് അവർക്ക് ഫ്ലാറ്റ് മാറിപ്പോയി എന്ന് തോന്നാനും ചാൻസുണ്ട്. നല്ലതുപോലെ പണിതെടുത്ത ആദ്യ പകുതിയുടെ മുഴുവൻ ഗുമ്മും അപ്പാടെ നശിപ്പിച്ച ഈ ട്വിസ്റ്റുകളാണ് സിനിമയ്ക്ക് വിനയായത്. എന്തായാലും അത് നല്ലതുപോലെ നിരാശപ്പെടുത്തി. സിനിമയെപ്പറ്റി കൂടുതൽ പറയാനില്ലെങ്കിലും വേറെ ചില കാര്യങ്ങൾ പറയാനുണ്ട്.
ഈ സിനിമക്കെതിരെ ഉണ്ടായതു പോലുള്ള പ്രചാരണം അടുത്തിടെയൊന്നും മറ്റൊരു സിനിമയ്ക്കും ഉണ്ടായിട്ടില്ല. ഉണ്ടായിട്ടുണ്ടെങ്കിൽ അതും ലാലിന്റെ തന്നെ ഒടിയനും മരയ്ക്കാറിനും നേരെയായിരുന്നു. ഈ മൂന്നു സിനിമയ്ക്കും ഒരു പാളിച്ചകളും ഇല്ലായിരുന്നുവെന്നോ അവ ഒരു വിമർശനവും അർഹിക്കുന്നില്ലെന്നതോ എന്നല്ല അവകാശപ്പെടുന്നത്.
പക്ഷേ ഈ വിമർശനപ്പെരുമഴ നിഷ്കളങ്കമായി, ഓർഗാനിക് ആയി സംഭവിച്ചതാണെന്നു വിശ്വസിക്കുന്നില്ല. ഈയടുത്ത കാലത്ത് ഇതുപോലെ സൈബർ ലിഞ്ചിങിന് വിധേയനായ മറ്റൊരു നടൻ മലയാളത്തിലില്ല. നടിയെ ആക്രമിച്ച കേസിൽ ജയിലിൽ കിടന്ന മാന്യദേഹത്തിനുള്ളതിനേക്കാൾ ഹേറ്റേഴ്‌സ് മോഹൻലാലിനുണ്ട്. രാഷ്ട്രീയം, മതം, ജാതി എന്നീ വിഷയങ്ങളുടെ പേരിൽ ലാലിനെതിരെ ആസൂത്രിതമായ ആക്രമണം നടക്കുന്നുവെന്നത് പരസ്യമായ രഹസ്യമാണ്. ലാൽ സിനിമകൾക്ക് നേരെയുള്ള ഇത്തരം ഹേറ്റ് കാമ്പയിനുകൾ തുടങ്ങിയത് ഒടിയൻ എന്ന സിനിമയിലൂടെയാണ് എന്നാണ് തോന്നുന്നത്. ലാലിന്റെ ഏതു സിനിമ റിലീസായാലും ആദ്യ ദിവസം ആദ്യ ഷോയുടെ അരമണിക്കൂർ കഴിയുന്നതിനു മുമ്പേ തന്നെ ഇത്തരം പോസ്റ്റുകൾ വെള്ളപ്പൊക്കം പോലെ ഒഴുകി വരുന്നത് ഞാൻ നേരിട്ട് കണ്ടിട്ടുള്ളതാണ്. മിക്കതും ഒരേ വാചകങ്ങൾ അങ്ങോട്ടും ഇങ്ങോട്ടും മറിച്ചിട്ട് ഇടയ്ക്ക് കുറെ സ്മൈലികളും തിരുകി ഉണ്ടാക്കുന്ന സാധനങ്ങൾ. ഫേക്ക് ഐ ഡികളിൽ നിന്നാണ് മിക്കതും പോസ്റ്റ് ചെയ്യുന്നതും. വളരെ സ്പഷ്ടമായ സാമ്യതകളുള്ള അതൊക്കെ സിനിമയോട് സ്നേഹമുള്ള പാവങ്ങൾ മോഹൻലാലിനെ നന്നാക്കാൻ വേണ്ടി ഉറക്കമൊഴിഞ്ഞിരുന്നു ചെയ്യുന്നതാണെന്ന് അരിയാഹാരം കഴിക്കുന്ന ആരും വിശ്വസിക്കില്ല. അതിനു പുറകിൽ ആരാണെന്നും ജനത്തിനറിയാം. പുരാണ കഥാപാത്രത്തിന്റെ പേരിൽ ഇറങ്ങിയ മറ്റൊരു സൂപ്പർ താര സിനിമയെക്കുറിച്ചുള്ള കുറിപ്പുകളിൽ അദ്ദേഹം “ആറാടുകയാണ്” എന്നുള്ള വാചകമൊക്കെ എങ്ങനെ വന്നതാണെന്ന് ആലോചിച്ചു നോക്കിയാൽ പിടികിട്ടും. സിനിമ കണ്ടതിനു ശേഷം വസ്തുനിഷ്ഠമായും നിശിതമായും അദ്ദേഹത്തെ വിമർശിക്കുന്നവരെയല്ല ഞാൻ ഉദ്ദേശിച്ചത്. മറിച്ച് സിനിമ കാണാതെ കുറ്റം പറയുന്നവരെയും മറ്റുള്ളവർ പറയുന്നത് കേട്ടിട്ട് സ്വയം സിനിമ കണ്ടെഴുതുന്നത് പോലെ ഓരോന്ന് പ്രചരിപ്പിക്കുന്നവരെയുമാണ് മുകളിൽ സൂചിപ്പിച്ചത്.
ഇനിയൊരു കൂട്ടരുണ്ട്. അദ്ദേഹത്തെ ഉപദേശിച്ചു കൊല്ലുന്നവർ. ഇത്തരം കച്ചറ കച്ചവട സിനിമകളിൽ അഭിനയിക്കാതെ “നല്ല” സിനിമകളിൽ അഭിനയിക്കണം, ഇങ്ങനെയൊന്നുമായാൽ ശരിയാവില്ല എന്ന് തുടങ്ങി ഉപദേശത്തോട് ഉപദേശമാണ്. അവരോട് പറയാനുള്ളത് ഇതാണ്. അഭിനയത്തിൽ നാൽപതു വർഷത്തോളം എക്സ്പീരിയൻസുള്ള ഒരാളാണ് മോഹൻലാൽ. ഇരുപതു മുതൽ നാൽപതു വരെയുള്ള പ്രായത്തിനുള്ളിൽ മലയാളത്തിലെ ഏറ്റവും മികച്ച കഥാകൃത്തുക്കളുടെയും തിരക്കഥാകൃത്തുക്കളുടെയും സംവിധായകരുടെയും സിനിമകളിൽ മലയാളം കണ്ട ഏറ്റവും മികച്ച അഭിനേതാക്കളിൽ മിക്കവരുമൊത്ത് സിനിമകൾ ചെയ്തിട്ടുളളയാളാണ് മോഹൻലാൽ. അതും മലയാള സിനിമാ ചരിത്രത്തിൽ ഇടം പിടിച്ച മനോഹരമായ സിനിമകൾ. അങ്ങോർക്ക് സ്വന്തം കഴിവ് തെളിയിക്കാൻ വേണ്ടി ഇനിയും ഒരു അമ്പതു സിനിമ കൂടി ചെയ്യേണ്ട കാര്യമില്ല. ചെയ്താൽ നല്ലത്. പക്ഷെ ചെയ്യണ്ട എന്ന് തീരുമാനിക്കാനുള്ള സ്വാതന്ത്ര്യം അദ്ദേഹത്തിന് മാത്രമാണ്. വ്യക്തി സ്വാതന്ത്ര്യത്തെക്കുറിച്ച് എപ്പോളും വാചാലനാവുന്ന ഇവരൊക്കെ അതുംകൂടി ഓർക്കണം. ഇപ്പോൾ ലാൽ അഭിനയിച്ചുകൊണ്ടിരിക്കുന്ന ടൈപ്പ് സിനിമകൾ പുള്ളിയുടെ ചോയ്സാണ്. വലിയ താര പദവി നൽകുന്ന ഓളവും ധാരാളം പണവും ആരാധകരും ഒക്കെയായിരിക്കും ഒരുപക്ഷെ അഭിനയ ജീവിതത്തിന്റെ ഈ ഘട്ടത്തിൽ അദ്ദേഹം ഏറ്റവും കൂടുതൽ ആസ്വദിക്കുന്നത്. അതൊരു തെറ്റല്ല. ഒരാളുടെ വ്യക്തിപരമായ തെരഞ്ഞെടുപ്പാണ്. നിങ്ങൾക്കിഷ്ടമല്ലെങ്കിൽ അത്തരം സിനിമകൾ പൂർണമായി ഒഴിവാക്കുക. അങ്ങോർ ആരെയും വീട്ടിൽ വന്ന് ഉന്തിയും തള്ളിയും പടങ്ങൾ കാണാൻ നിർബന്ധിക്കുന്നൊന്നുമില്ല. പുള്ളിയുടെ ഏതു പുതിയ പടം ഇറങ്ങുമ്പോളും പോയി കാണുകയും “ഇത് കഴിഞ്ഞ പടം പോലെ തന്നെ തല്ലിപ്പൊളിയാണെന്നു എനിക്ക് പണ്ടേ അറിയാമായിരുന്നു” എന്ന ഭാവത്തിൽ വിമർശിക്കുന്നവർ പിന്നെന്തിനാണ് അത് കാണാൻ മിനക്കെടുന്നത് ? ട്രെയ്‌ലർ കണ്ട് ഇത്രയും മനസ്സിലാക്കാൻ കഴിവുള്ള നിങ്ങൾക്ക് ആ സിനിമ കാണുന്നത് ഒഴിവാക്കിയാൽ സമയവും പണവും ഊർജവും ഒക്കെ ലാഭിക്കാമല്ലോ.
ഇത്രയും വായിച്ചപ്പോൾ നിങ്ങൾക്ക് തോന്നും മോഹൻലാലിനെ ഇത്രയും കഷ്ടപ്പെട്ട് ന്യായീകരിക്കുന്നത് എന്തിനാണെന്ന്. കാരണമുണ്ട്. ലാൽ ചിത്രങ്ങൾ മാത്രം ഇത്രയും ഓഡിറ്റ് ചെയ്യപ്പെടുമ്പോൾ മറ്റുള്ള മഹാന്മാരും എന്ത് ചെയ്യുകയാണ് എന്ന് നോക്കേണ്ടി വരും. എങ്കിൽ മാത്രമേ മോഹൻലാൽ എന്ന ക്രൂരൻ മലയാള സിനിമയോട് ചെയ്യുന്ന ദ്രോഹത്തെ നമുക്ക് വിമർശിക്കാൻ അവകാശമുള്ളൂ. സിനിമയിൽ നിന്നുണ്ടാക്കിയ പണം ഭൂരിഭാഗവും അതിൽ തന്നെ മുടക്കുകയും നഷ്ടപ്പെടുകയും ചെയ്ത മറ്റു സൂപ്പർ താരങ്ങൾ മോഹൻലാലിനെപ്പോലെ മലയാളത്തിൽ വേറെയില്ല. നല്ല ചിത്രങ്ങളുടെ ഭാഗമാക്കണമെന്ന ആഗ്രഹം കൊണ്ടുമാത്രം അദ്ദേഹം നിർമിച്ച പല ചിത്രങ്ങളും ബോക്സ് ഓഫിസിൽ തകർന്ന ചരിത്രമേയുള്ളൂ. ഇപ്പോളത്തെപ്പോലെ സമ്പന്നനാവുന്നതിനു മുമ്പ് തൊണ്ണൂറുകളിൽ നാലു കോടിയോളം മുടക്കി വാനപ്രസ്ഥം പോലെ ഒരു സിനിമ നിർമ്മിച്ചയാളാണ് അദ്ദേഹം. രണ്ടു കോടി മുടക്കി കാലാപാനി നിർമ്മിച്ചയാളാണ് ലാൽ. വാനപ്രസ്ഥമൊന്നും ഒരിക്കലും മുടക്കുമുതൽ തിരിച്ചു പിടിക്കില്ല എന്നറിയാമായിരുന്നിട്ടും ലോകപ്രശസ്ത കലാകാരന്മാരെ അണിനിരത്തി അത്തരമൊരു സിനിമ നിർമിക്കാൻ നല്ല ധൈര്യം കൂടി വേണം. ആ സിനിമ ഉണ്ടാക്കിയ സാമ്പത്തികമായ ബാദ്ധ്യത ലാലിനെ എത്രത്തോളം മോശമായി ബാധിച്ചിരുന്നു എന്ന് ശ്രീനിവാസൻ പണ്ട് കൈരളിയിൽ ചെറിയ ശ്രീനിയും വലിയ ലോകവും എന്ന പരിപാടിയുടെ ഒരു എപ്പിസോഡിൽ സരസമായി വിവരിച്ചിരുന്നു. രാഷ്ട്രീയം, ജാതി , മതം തുടങ്ങിയ കാരണങ്ങളാൽ ലാലിനെ വളഞ്ഞിട്ടാക്രമിക്കുന്നതിന് മുമ്പ് ഇതൊന്നുമില്ലെന്നു ഭാവിക്കുന്ന മറ്റു താരങ്ങളുടെ “അഭിനയം” കൂടി അവർ കണക്കിലെടുക്കണം എന്നാണ് എന്റെ അഭിപ്രായം.
മലയാളത്തിൽ ഏറ്റവും കൂടുതൽ പ്രേക്ഷകരെ ആദ്യ ദിവസം തന്നെ തീയേറ്ററിലേക്ക് ആകർഷിക്കാൻ കഴിവുള്ള രണ്ടു താരങ്ങൾ മാത്രമേ ഇപ്പോളുള്ളൂ. മമ്മൂട്ടിയും മോഹൻലാലും. ഒരേ വിഷയത്തിൽ മലയാളികൾ രണ്ടുപേരോടും എങ്ങനെയാണു പെരുമാറുന്നതെന്ന് നിഷ്പക്ഷമായി നിരീക്ഷിച്ചാൽ കൗതുകകരമായ പല സംഗതികളും കാണാം. ഈ സിനിമ തന്നെ നോക്കുക. സിനിമാ നിർമാതാക്കൾക്ക് മാത്രം പണം കൊടുക്കുന്നു എന്ന ന്യായീകരണത്തിന്റെ ജാമ്യത്തിൽ സിനിമാ ഡയലോഗുകൾ തലങ്ങും വിലങ്ങും വീശി മാസ്സ് ഉണ്ടാക്കുന്ന കഥാപാത്രമാണ് ഷൈലോക്ക്. എന്നാൽ സ്വന്തം സിനിമകളെ തന്നെ ട്രോൾ ചെയ്യുന്ന ഗോപന് കിട്ടിയ വിമർശനം ഷൈലോക്കിനു കിട്ടിയിട്ടില്ല. മധുരരാജാ , പോക്കിരി രാജ, രാജാധി രാജാ തുടങ്ങിയ രാജാപ്പാർട്ട് സിനിമകളിലൊന്നും മമ്മൂട്ടിക്ക് ലാലിന് കിട്ടിയ പോലുള്ള വിമർശനം നേരിടേണ്ടി വന്നിട്ടില്ല. സ്ത്രീകളോടുള്ള ലാൽ കഥാപാത്രങ്ങളുടെ പെരുമാറ്റമാണ് വേറൊരു വിഷയം. ആറാട്ടിലെ നെയ്യാറ്റിൻകര ഗോപന്റെ പൊളിറ്റിക്കൽ കറക്ട്നെസ്സ് ഒക്കെ കണ്ടു കുരുപൊട്ടിയവർ കസബ എന്ന ചിത്രത്തിലെ വിവാദത്തിനു ശേഷമിറങ്ങിയ മാസ്റ്റർപീസ് എന്ന സിനിമയിൽ നായകൻ ഇടയ്ക്കും മുറയ്ക്കും സ്ത്രീ കഥാപാത്രങ്ങളോട് I respect woman എന്നാവർത്തിച്ചത് കണ്ടിട്ടേയില്ല. കസബായുടെ പേരിൽ തന്നെ വിമർശിച്ചവർ പുച്ഛത്തോടെ കളിയാക്കുന്നതിനാണ് ആ ഡയലോഗ് അദ്ദേഹം ആവർത്തിച്ച് പറയുന്നത് എന്നുള്ള വിമർശനം മമ്മൂട്ടിക്ക് നേരിടേണ്ടി വന്നിട്ടില്ല. ഇരയോടൊപ്പം നിൽക്കും, വേട്ടക്കാരന് വേണ്ടി പ്രാർത്ഥിക്കും എന്ന ഡയലോഗുണ്ടാക്കി ലാലിനെ വിമർശിച്ചവർ ഈയടുത്ത കാലത്തു പോലും ഒരു ചടങ്ങിൽ പ്രസ്തുത നടനോട് ചിരിച്ചു സന്തോഷത്തോടെ സംസാരിക്കുന്ന മമ്മൂട്ടിയെ കണ്ടില്ല. എന്തിനധികം പോണം. ദൃശ്യം, ലൂസിഫർ തുടങ്ങിയ ചിത്രങ്ങളുടെ കോടികളുടെ ബോക്സ് ഓഫീസ് കളക്ഷൻ വാർത്തകൾക്കു ശേഷമിറങ്ങിയ ഒരു സിനിമയുടെ പ്രൊമോഷൻ പരിപാടികൾക്കിടയിൽ “ഇത്തരം തള്ളുകൾക്ക് നമ്മളില്ലേ” എന്ന് സാക്ഷാൽ മമ്മൂട്ടി തന്നെ പറയുകയുണ്ടായി. തീർച്ചയായും ആ കളക്ഷൻ റെക്കോർഡുകൾ അദ്ദേഹത്തെ അസ്വസ്ഥമാക്കിയിട്ടുണ്ട്. മത്സരബുദ്ധിയോടെ ഇപ്പോളും സിനിമയിലുള്ള, സിനിമയ്ക്ക് വേണ്ടി മാത്രം ജീവിക്കുന്ന അദ്ദേഹത്തിന് അങ്ങനെ തോന്നിയതിൽ തെറ്റ് പറയാനുമാവില്ല. രാഷ്ട്രീയം നോക്കൂ. ഹിന്ദുത്വ പാർട്ടികളോടുള്ള അനുഭവമാണ് ലാലിനെ എതിർക്കാൻ ഇവർ കാരണമാക്കുന്നതെങ്കിൽ കമ്യൂണിസ്റ്റ് പാർട്ടിക്കാരനായ മ്മൂട്ടിയെ ആ പാർട്ടി കാണിക്കുന്ന മോശം കാര്യങ്ങളുടെ പേരിൽ ആരെങ്കിലും വിമർശിക്കുന്നുണ്ടോ ? അതും പോട്ടെ, പാർട്ടിയുടെ പേരിൽ കൈരളി ചെയർമാനായി വർഷങ്ങളോളമിരുന്ന അദ്ദേഹം ഈ രാഷ്ട്രീയ ബന്ധങ്ങൾ ഉപയോഗിച്ച് മലയാള സിനിമയ്ക്ക് എന്ത് സഹായങ്ങളാണ് ചെയ്തു തന്നിട്ടുള്ളത് ? ഒരു കൗതുകം കൊണ്ട് ചോദിച്ചു പോകുന്നതാണ്. എല്ലാവർക്കും അവരവരുടേതായ വ്യക്തി താല്പര്യങ്ങളുണ്ട്. തീർച്ചയായും അത് തന്നെയാണ് മീതെ നിൽക്കുന്നത്. ലാലായാലും മമ്മുക്കയായാലും.
മമ്മൂട്ടിയെയും മോഹൻലാലിനെയും പോലുള്ള രണ്ട് അഭിനേതാക്കൾ മലയാള സിനിമയുടെ അഭിമാനമാണ്. മേൽപ്പറഞ്ഞ തെറ്റുകുറ്റങ്ങൾ അവർക്കു രണ്ടുപേർക്കുമുണ്ടെങ്കിലും വളരെ നീണ്ടൊരു കാലം ഇന്ത്യൻ സിനിമയിൽ മലയാള സിനിമയ്ക്ക് തലയുയർത്തി നില്ക്കാൻ കരുത്തുണ്ടാക്കിയ രണ്ട് മഹാമേരുക്കളാണ് അവർ രണ്ടും. അഭിനനയജീവിതത്തിന്റെ അവസാന ഇന്നിംഗ്സ് കളിച്ചുകൊണ്ടിരുന്ന അവർ ആരോഗ്യത്തോടെയിരിക്കണം, കൂടുതൽ സിനിമകൾ അഭിനയിക്കണം എന്നതാണ് രണ്ടുപേരുടെയും ആരാധകനായ എന്നെപ്പോലുള്ള ലക്ഷക്കണക്കിന് സിനിമാസ്വാദകരുടെ ആഗ്രഹം. അതുകൊണ്ട് അവരെ വിട്ടേക്ക് . അവർക്കിഷ്ടമുള്ള സിനിമകൾ അവർ ചെയ്തോട്ടെ.

Leave a Reply

Your email address will not be published. Required fields are marked *

LATEST

സ്ത്രീയുടെ രതിമൂര്‍ച്ഛ – ധാരണകളും ശരികളും, സ്ത്രീയ്ക്ക് രതിമൂര്‍ച്ഛ അനുഭവപ്പെടുന്നു എന്ന് പുരുഷന്മാര്‍ മനസിലാക്കിയതു തന്നെ വളരെ വൈകിയാണ്

സ്ത്രീയ്ക്ക് ലൈംഗിക ബന്ധത്തിനൊടുവില്‍ രതിമൂര്‍ച്ഛ അനുഭവപ്പെടുന്നു എന്ന് പുരുഷന്മാര്‍ മനസിലാക്കിയതു തന്നെ വളരെ