‘പുള്ള’ എന്ന കഥാപാത്രം പത്മരാജൻ്റെ മികച്ചൊരു സൃഷ്ടി

Sebastian Xavier

ചെല്ലപ്പനാശാരിയുടെ കൂടെത്തന്നെ കാണും സദാസമയവും ഈ പയ്യൻസ്.. ആശാരി പണിയുന്നിടത്ത് ചെന്നിരുന്ന് പുള്ളിയുടെ ഗിർവാണവും പുളുവടിയും കഥകളുമൊക്കെ കേട്ട് രസംപിടിച്ചിരിക്കാനാണ് ‘പുള്ള’യ്ക്കിഷ്ടം..ഇച്ചിരി ലോലഹൃദയനായ പുള്ളയെ വായ്ത്താളമടി കൊണ്ട് പാട്ടിലാക്കി തൻ്റെയൊരു കയ്യാളാക്കി നിർത്തിയിരിക്കുകയാണ് ആശാരി..

പെണ്ണുങ്ങളോടൊക്കെ ഒരൽപം കൂടുതൽ അടുപ്പം കാണിക്കുന്ന ആശാരിയിൽ നിന്ന് തനിക്ക് ഏറെ പഠിക്കാനുണ്ടെന്ന് പുള്ളയും കരുതുന്നു.. ഭരതൻ പത്മരാജൻ കൂട്ടുകെട്ടിൽ 1979 ൽ റിലീസായ തകര എന്ന ചിത്രത്തിലെ പ്രധാന കഥാപാത്രങ്ങളിലൊന്നായിരുന്നു ‘പുള്ള’ എന്ന് വിളിപ്പേരുള്ള ഈ കൗമാരക്കാരൻ..
ലേശം ബുദ്ധിക്കുറവുള്ള തകരയെ ഒരോന്ന് പറഞ്ഞ് ഇളക്കിവിടുന്ന ചെല്ലപ്പനാശാരിയുടെ കുസൃതിത്തരങ്ങൾക്കൊക്കെ പുള്ളയും സാക്ഷിയാണെങ്കിലും വരുംവരായ്കളെക്കുറിച്ച് ചെറിയൊരു ആശങ്കയും ഇല്ലാതില്ല.. കാര്യങ്ങൾ കൈവിട്ടുപോവുന്ന നിലയിലെത്തുമ്പോ, ഇതിനൊക്കെ വഴിമരുന്നിട്ട ആശാരിയെ വിമർശിക്കാനുള്ള ആർജ്ജവമൊക്കെ ചെക്കൻ കാണിക്കുന്നുമുണ്ട്.. ചെല്ലപ്പനാശാരിയുടെ തമാശകൾക്കൊക്കെ കൂടെ നിൽക്കുമെങ്കിലും തകരയോട് ഇഷ്ടവും കരുതലുമൊക്കെയുള്ള, ‘പുള്ള’ എന്ന ഈ കഥാപാത്രം പത്മരാജൻ്റെ മികച്ചൊരു സൃഷ്ടി തന്നെയാണ്.

പ്രമുഖ നാടകനടനായ വൈക്കം സുകുമാരൻ നായരുടെ മകനായ അനിരുദ്ധനാണ് ഈ കഥാപാത്രത്തെ അവതരിപ്പിച്ചത്.. പ്രശസ്ത സിനിമാതാരം ജനാർദ്ദനൻ ഇദ്ദേഹത്തിൻ്റെ പിതൃസഹോദരനാണ്..
അഭിനയത്തോട് ഭ്രമമുണ്ടായിരുന്ന അനിരുദ്ധനെന്ന പതിനഞ്ചുകാരൻ തകര എന്ന സിനിമയിലേക്ക് എത്തപ്പെട്ടതും ഇളയച്ഛൻ ജനാർദ്ദനൻ വഴി തന്നെ.. ആദ്യ ചിത്രത്തിലെ കഥാപാത്രത്തിന് സ്വന്തം ശബ്ദത്തിൽത്തന്നെ ഡബ്ബ് ചെയ്യാനും കഴിഞ്ഞു.. തകരയിൽ മറ്റൊരു പ്രധാന കഥാപാത്രമായ മാതുമൂപ്പനെ അവതരിപ്പിച്ചത് അനിരുദ്ധൻ്റെ പിതൃസഹോദരീ ഭർത്താവും ആകാശവാണിയിലെ ആർട്ടിസ്റ്റുമായ കെ.ജി.മേനോനായിരുന്നു..

സിനിമാഭിനയത്തിനു ശേഷം പിന്നിട് പത്തൊൻപതാം വയസ്സിലാണ് അനിരുദ്ധൻ നാടകരംഗത്തേക്കെത്തുന്നത്.. പശസ്ത നാടക നടനും സംവിധായകനുമായ ടി.കെ.ജോണിൻ്റെ ശിക്ഷണത്തിൽ വൈക്കം മാളവികയിൽ അരങ്ങേറ്റം.. പിൽക്കാലത്ത് മലയാളത്തിലെ പ്രമുഖ തിരക്കഥാകൃത്തായി മാറിയ ലോഹിതദാസാണ് അന്ന് മാളവികയുടെ നാടകങ്ങൾ എഴുതിയിരുന്നത്..

തുടർന്ന് നിരവധി നാടകസമിതികൾ.. തോപ്പിൽ ഭാസിയുടെ ക്ഷണം സ്വീകരിച്ച് കെ.പി.എ.സി.യുടെ പാഞ്ചാലി എന്ന നാടകത്തിൽ അഭിനയിച്ചു.. തുടർന്നും കെ.പി.എ.സിയുടെ പല ഹിറ്റ് നാടകങ്ങളുടെയും ഭാഗമായി.. കായംകുളം സംസ്കാര, കൊല്ലം തൂലിക, തൃശൂർ യമുന എൻറർടൈനേഴ്സ് തുടങ്ങി നിരവധി സമിതികൾ..

തകഴിയുടെ കഥാപാത്രങ്ങളായ ചെമ്മീനിലെ പരീക്കുട്ടിയും, അനുഭവങ്ങൾ പാളിച്ചകളിലെ ചെല്ലപ്പനുമടക്കം അനവധി വേഷങ്ങൾ..നാടക അഭിനേത്രി കൂടിയായ വത്സലയെയാണ് അനിരുദ്ധൻ ജിവിത സഖിയാക്കിയത്.. വൈക്കം ഉല്ലലയിലാണ് താമസം..ഒരു വടക്കൻ വീരഗാഥയിൽ സഞ്ജയ് മിത്ര ചെയ്ത ആരോമലുണ്ണിയുടെ വേഷം അഭിനയിക്കാൻ അനിരുദ്ധന് ക്ഷണം ലഭിച്ചിരുന്നെങ്കിലും അത് സ്വീകരിക്കാൻ കഴിഞ്ഞില്ല..തകര എന്ന ഒരേയൊരു സിനിമയിൽ മാത്രമാണ് ഇദ്ദേഹം അഭിനയിച്ചത്..നാടകത്തിൽ നിന്ന് സിനിമയിലേക്കെത്തിയ ഒട്ടേറെ അഭിനേതാക്കളുണ്ട്.. പക്ഷേ നാടകരംഗത്ത് സ്വന്തംവ്യക്തിമുദ്ര പതിപ്പിച്ച അനിരുദ്ധൻ എന്ന നടൻ്റെ അഭിനയത്തിലെ തുടക്കം ഒരു ക്ലാസ്സിക് സിനിമയിലെ ശ്രദ്ധേയ വേഷത്തിലായിരുന്നു എന്നത് വ്യത്യസ്തവും കൗതുകകരവുമായ ഒരു വസ്തുത തന്നെ..

അനിരുദ്ധൻ്റെ m3db പ്രൊഫൈൽ:

https://m3db.com/anirudhan