കേരളത്തെ ഇകഴ്ത്തി മുതലാളിത്ത രാജ്യങ്ങളെ പുകഴ്ത്തിയിരുന്നവർ വായിച്ചിരിക്കാൻ

0
105

Shabu Thachat

ഇവിടുത്തെ പൊതുവിദ്യാലയത്തിൽ പഠിച്ചു ഒരു വിസയും തരപ്പെടുത്തി വിദേശത്തു പോയി വന്ന ശേഷം ചിലർ പറയുന്നതു കേട്ടിട്ടുണ്ട്: “ആശുപത്രിയോ? ഇവിടെന്താശുപത്രി. റോഡോ? ഇവിടെന്ത് റോഡ്. സർക്കാരോ? ഇവിടെന്ത് സർക്കാർ .വിദ്യാലയമോ? വിദ്യാഭ്യാസമോ? ഇവിടെന്ത്. അതൊക്കെ അമേരിക്കയിൽ. ആസ്ട്രേലിയയിൽ!! ദുബായിൽ, ജർമനിയിൽ, ഇറ്റലിയിൽ , കാനഡയിൽ ,അതാണ് കണ്ടു പഠിക്കണ്ടത്! ” അതിനെല്ലാം മറുപടിയായി ഈ കോവിഡ്- 19 കാലം:മുതലാളിത്ത ലോകം അമ്പരന്നു വിറച്ചു നിൽക്കുകയാണ്. അമേരിക്കൻ സ്വപ്ന ലോകം. വൈറോളജി ലാബുകൾ ആവശ്യത്തിനില്ല. പൗരൻ്റെ ആരോഗ്യത്തിൽ സർക്കാരിനു വേവലാതിയില്ല. ഒരു സേവനവും സൗജന്യമല്ല. കോവിഡ് ഉണ്ടോ എന്നറിയാൻ പരിശോധനയ്ക്കു ഇന്ത്യൻ രൂപ 87,000.
ഐസൊലേഷൻ വാർഡിനു ഏകദേശം 2 ലക്ഷം രൂപ. ചികിത്സ കൊടുക്കുന്നില്ല. കോവിഡ് ചികിത്സ തേടി ഒരു അമേരിക്കക്കാരി 13 മണിക്കൂർ പറന്നു ചൈനയിലേക്കു പോയത് ഇന്നത്തെ വാർത്ത. ആസ്‌ത്രേലിയയിലെ മെൽബണിൽ നിന്നു മലയാളിയുടെ വീഡിയോ:’രണ്ടു വൈറോളജി ലാബാണുള്ളത്. അഞ്ഞൂറു പേർ ക്യൂവിൽ. ധാരാളം പണം വേണം. സർക്കാരിനു ഒരു ശ്രദ്ധയും ഇടപെടലും ഇല്ല’.ഇറ്റലി വൃത്തിയുടെ കാര്യത്തിൽ ലോകോത്തരം.കോവിഡിൽ മുങ്ങി മരിക്കാൻ പോവുന്നു.. സർക്കാർ പകച്ചു നിൽക്കുന്നു.ഓരോന്നും എണ്ണി പറഞ്ഞാൽ മധ്യവർഗ മലയാളികളുടെ സ്വപ്ന ഭൂമികളൊക്കെ പരാജയം.പണമാണ് എല്ലാം എന്നു കരുതുന്നവർക്കു മരണം ഫലം.അതിനിടയിലും കൊവിഡിനു മരുന്നു കണ്ടുപിടിച്ചെന്നറിഞ്ഞപ്പോൾ അതു സ്വന്തമാക്കാൻ ആർത്തി പിടിച്ചു ചാടി വീഴുന്ന മുതലാളിത്തം.ട്രംപ് എന്ന ലോക ഭരണാധികാരി. ലോകത്തെ മനുഷ്യ ജീവന് പുല്ലുവില കൽപിച്ചു മരുന്നിന്റെ പേറ്റന്റ് സ്വന്തമാക്കാൻ വില പേശുന്നു.”ആരോഗ്യം മനുഷ്യാവകാശമാണെന്നു മനസ്സിലാക്കിക്കൊണ്ട് ഐക്യദാർഡ്ഡ്യം കാണിക്കേണ്ട ചില സമയമുണ്ടാകും. പൊതു വെല്ലുവിളികളെ നേരിടാന്‍ നമ്മുടെ ജനതയുടെ വിപ്ലവ മൂല്യങ്ങളില്‍ അന്തര്‍ലീനമായ മാനുഷിക പരിഗണനകളെ പ്രയോഗത്തില്‍ വരുത്തേണ്ട സമയമാണിത്”.ക്യൂബന്‍ വിദേശകാര്യ മന്ത്രാലയം ഇറക്കിയ പത്രക്കുറിപ്പ്.സന്ദർഭം: കോവിഡ് ബാധിച്ചവർ ഉൾപ്പടെ അറുന്നൂറു യാത്രക്കാരുമായി കരീബിയൻ കടലിൽ അലഞ്ഞ ബ്രിട്ടീഷ് ആഢംബര കപ്പലിനു സ്വദേശം ഉൾപ്പടെ വമ്പൻ രാഷ്ട്രങ്ങളെല്ലാം കരക്കടുക്കാൻ അനുവാദം നൽകാതിരുന്ന ഘട്ടത്തിൽ ക്യൂബ ക്ഷണിക്കയും രോഗബാധിതരെ ഐസൊലേഷനിലാക്കുകയും മറ്റുള്ളവരെ അതതു രാജ്യങ്ങളിൽ എത്തിക്കാൻ ഏർപ്പാട് ചെയ്യുകയും ചെയ്തു. അക്കൂട്ടത്തിൽ ക്യൂബയെ, സോഷ്യലിസത്തെ ശത്രുവായി കാണുന്ന അമേരിക്കക്കാരും.കോവിഡ് പൊട്ടി മുളച്ച ചൈന.പടർന്നു കയറി പിടിച്ചാൽ കിട്ടാതെ വന്നപ്പോൾ പകച്ചു നിൽക്കാതെ നേരിട്ട് സ്വന്തം ജനതയെ രക്ഷിച്ചെടുത്ത ചൈന.അതിനു നേതൃത്വം കൊടുത്ത സർക്കാർ.അവരൊരുക്കിയ സജ്ജീകരണം. ലോകം അത്ഭുതത്തോടെ നോക്കി നിന്നു.പിന്നെയീ കേരളം.ലോകം വാഴ്ത്തുന്നു:ലോക മാധ്യമങ്ങളിൽ. വിവിധ രാജ്യങ്ങളിലെ പാർലമെൻറുകളിൽ കേരളത്തിൻ്റെ കോവിഡ് പ്രതിരോധം അത്ഭുതമാവുന്നു.ഡോളറുകൾ നൽകി ചികിത്സ തേടുന്നയിടങ്ങളിൽ നൽകാത്ത മികച്ച ഭക്ഷണം ഐസൊലേഷനിലെ രോഗികൾക്കു നൽകുന്നു.രോഗിയെ അന്വേഷിച്ചു ചെന്നു ചികിത്സിക്കുന്നു.പൗരന്മാരുടെ ആരോഗ്യത്തിൽ അവരേക്കാൾ താൽപര്യം സർക്കാരിന്.ഏറ്റവും ആധുനിക ചികിത്സ.സ്വകാര്യ മൾട്ടിസ്പെഷ്യാലിറ്റി ആശുപത്രികൾക്കു നൽകാനാവാത്ത ചികിത്സ.എല്ലാം സർക്കാർ ചെലവിൽ.അതെ, അതാണ് വ്യത്യാസം.ഈ മൂന്നിടങ്ങളിലും സർക്കാരുണ്ട്. കച്ചവടക്കാരനായ മുതലാളിത്ത സർക്കാരല്ല.ഭൂമിയിൽ മനുഷ്യസ്നേഹത്തെ വാഴ്ത്തുന്ന, മനുഷ്യൻ്റെ ജീവൻ, ജീവിതം, വിദ്യാഭ്യാസം എല്ലാ ഭരണകൂടത്തിൻ്റെ ഉത്തരവാദിത്വമാണെന്നു കരുതുന്ന സർക്കാർ. പതിനായിരങ്ങളെ രക്ഷിച്ചെടുത്തു പരിപാലിക്കുമ്പോഴും അതിൽ നിന്നു ഒരാൾ വഴുതിപ്പോയാൽ അതുയർത്തി കാട്ടി സർവവും തകർന്നുവെന്നു കൂവുന്നവർ കാണാതെ പോകുന്ന രാഷ്ട്രീയമാണ് കോവിഡ് ലോകത്തിനു മുന്നിൽ തുറന്നു വെച്ചു കൊടുക്കുന്നത്.
ഇതു തന്നെയാണ് മുതലാളിത്ത വ്യവസ്ഥയും സോഷ്യലിസ്റ്റ് നിലപാടും തമ്മിലുള്ള വ്യത്യാസം.ക്യൂബ, ചൈന, കേരളം. ഇവിടങ്ങളിലെ ഭരണ കർത്താക്കൾക്കു ആത്യന്തികമായി ഒരു രാഷ്ട്രീയമുണ്ട്.മാനവിക മൂല്യങ്ങൾ ഉയർത്തിപ്പിടിച്ചു കൊണ്ടുള്ള സഹജാവബോധ രാഷ്ട്രീയം.അതാണവരെ നയിക്കുന്നത്.

 

Advertisements