ഫേസ് ബുക്കിലെ പരസ്യം കണ്ട് ആകർഷകവും വ്യത്യസ്തങ്ങളുമായ ഉല്പന്നങ്ങൾ വാങ്ങുന്നതിനു മുൻപ് ഇതൊന്നു വായിക്കുക

ഫേസ് ബുക്കിലെ പരസ്യം കണ്ട് ആകർഷകവും വ്യത്യസ്തങ്ങളുമായ ഉല്പന്നങ്ങൾ വാങ്ങുന്നതിനു മുൻപ് നിങ്ങളുടെ ന്യൂസ് ഫീഡിൽ വരുന്ന ഫേസ് ബുക്ക് പരസ്യങ്ങളിൽ വീണ്‌ ഉല്പന്നങ്ങൾ വാങ്ങുന്നതിനു മുൻപ് ഒന്ന് ശ്രദ്ധിച്ചാൽ ധനനഷ്ടം ഉണ്ടാകുന്നത് ഒഴിവാക്കാം. അഗ്രസ്സീവ് ആയി വലിയ വിലക്കുറവിൽ ഫേസ് ബുക്ക് പരസ്യങ്ങളിലൂടെ മാർക്കറ്റ് ചെയ്യപ്പെടുന്ന ഉൽപ്പന്നങ്ങളെ ഒന്ന് ശ്രദ്ധിക്കുക. മിക്കതും ഒന്നാം തരം തട്ടിപ്പ് ആയിരിക്കും. ഇപ്പോൾ പേയ്മെന്റ് ഗേറ്റ് വേ ഉൾപ്പെടെയുള്ള ഒരു ഷോപ്പിംഗ് പോർട്ടൽ തട്ടിക്കൂട്ടാൻ മിനിട്ടൂകൾ മതി. പ്രത്യേകിച്ച് യാതൊരു സാങ്കേതിക പരിജ്ഞാനവും ആവശ്യമില്ല. ഷോപ്പിഫൈ പോലെയൂള്ള സർവിസുകളിലൂടെ ‘ഡ്രോപ്പ് ഷിപ്പിംഗ്’’ മോഡലിൽ ഉള്ള ഈ കമേഴ്സ് മാർക്കറ്റിംഗുകാരും ചൂണ്ടയിട്ട് കാത്തിരിക്കുന്നത് ഫേസ് ബുക്കിൽ ആണ്‌. എന്തായാലും ഡ്രോപ് ഷിപ്പിംഗിനെക്കുറിച്ച് സൂചിപ്പിച്ചതു കാരണം അതിനെക്കുറിച്ചും രണ്ട് വാക്ക് പറഞ്ഞേക്കാം. ഏതാനും മൗസ് ക്ലിക്കുകളിലൂടെ നിങ്ങളുടെ സ്വന്തം പേരിൽ ഒരു ഈ കമേഴ്സ് സൈറ്റ് തുടങ്ങാം. നിങ്ങൾ ഒരു ഉല്പന്നവും ഉണ്ടാക്കുന്നില്ല, ഒന്നും വാങ്ങുന്നില്ല, ഒന്നും വിൽക്കുന്നുമില്ല. നിങ്ങളുടെ കൈവശമുള്ളത് ആകെ ഒരു വെബ് സൈറ്റ് മാത്രമാണ്‌. അതിലേക്ക് ആലി എക്സ്പ്രസ് പോലെയുള്ള ചൈനീസ് വെബ് സൈറ്റുകളിൽ നിന്നും ഉല്പന്നങ്ങൾ ചില സ്ക്രിപ്റ്റുകൾ വഴി ഇമ്പോർട്ട് ചെയ്യുന്നു.

ഉല്പന്നങ്ങൾ മാത്രമല്ല യഥാർത്ഥമെന്ന് തോന്നിക്കുന്ന കസ്റ്റമർ റിവ്യൂസും ചിത്രങ്ങളുമെല്ലാം ഉൾപ്പെടെ ആണ്‌ ഇത് ചെയ്യുന്നത്. ഈ സൈറ്റിലൂടെ ആളുകൾ ഓർഡറുകൾ പ്ലേസ് ചെയ്യുമ്പോൾ അവ നേരിട്ട് പ്രസ്തുത ഉല്പന്നങ്ങളുടെ സ്റ്റോക്കിസ്റ്റുകളുടെ അടുത്തേയ്ക്ക് ആണ്‌ എത്തുക. ഓർഡർ സ്വീകരിക്കുന്നതു മുതൽ പാക്കിംഗ്, ഡെസ്പാച്ച്, ഡെലിവറി വരെ അവർ നേരിട്ട് ചെയ്യും. നിങ്ങൾ വെറും ഇടനിലക്കാരൻ മാത്രം. ഇവിടെ ലാഭം എന്താണ്‌ മിനിമം ഇരട്ടി വിലയിൽ ആയിരിക്കും എല്ലാ ഉല്പന്നങ്ങളും ഇത്തരത്തിൽ ലിസ്റ്റ് ചെയ്തിരിക്കുക. അപ്പോൾ ഒരു സംശയമുണ്ടാകും ഇത്രയും വില കൊടുത്ത് ആളുകൾ ഇതൊക്കെ വാങ്ങുമോ ? അവിടെ ആണ്‌ അഗ്രസ്സീവ് ആയ മാർക്കറ്റിംഗ് തന്ത്രങ്ങൾ വിജയിക്കുന്നത്. ഫേസ് ബുക്ക് ന്യൂസ് ഫീഡിലൂടെ കസ്റ്റമേഴ്സിനെ നന്നായി മനസ്സിലാക്കിക്കൊണ്ട് ഉല്പന്നങ്ങളുടെ പരസ്യങ്ങൾ വരുമ്പോൾ നൂറു പേരിലേക്ക് പരസ്യം കാണിച്ചാൽ അതിൽ രണ്ടു പേരെങ്കിലും വാങ്ങിയാൽ അപ്പോഴും ലാഭമാണ്‌. പരസ്യം കാണുന്ന നൂറുപേരിൽ വളരെ ചുരുക്കം പേർ മാത്രമേ ഈ പറഞ്ഞ ഉല്പന്നത്തിന്റെ യഥാർത്ഥ വിലയും ഗുണനിലവാരവുമൊക്കെ ഒന്ന് സേർച്ച് ചെയ്ത് നോക്കി കണ്ടെത്താൻ മിനക്കെടൂ. ഡ്രോപ് ഷിപ്പിംഗ് സ്റ്റോറുകളിലെ ഉൽപ്പന്നങ്ങളും അത്തരത്തിൽ ആയിരിക്കും തെരഞ്ഞെടൂക്കപ്പെടുക. ഉദാഹരണമായി “ ലൗവ് ബേഡ്സിന്റെ കാലിൽ ഇടുന്ന ആർട്ടിഫിഷ്യൽ ഡയമണ്ട് റിംഗ്സ്” പോലെയുള്ള ഉല്പന്നങ്ങൾ വളരെ ചെറിയ ഒരു കൂട്ടം കസ്റ്റമേഴ്സിനെ വ്യക്തമായി ടാർഗറ്റ് ചെയ്തുകൊണ്ട് അവരുടെ ന്യൂസ് ഫീഡിൽ എത്തിച്ചാൽ മേൽ കീഴ് നോട്ടമില്ലാതെ അവർ അത് വാങ്ങാനുള്ള സാദ്ധ്യതകളുണ്ട്.