ടൈറ്റാനിക്ക് കപ്പൽ മുക്കിയ ഭീമൻ മഞ്ഞുമലയ്ക്ക് പിന്നീടെന്ത് സംഭവിച്ചു?⭐
അറിവ് തേടുന്ന പാവം പ്രവാസി
👉അന്റാർട്ടിക്കയുടെ സമീപത്തും , ആർട്ടിക് വൃത്തത്തിലും , അറ്റ്ലാന്റിക് സമുദ്രത്തിന്റെ വടക്കന്‍ മേഖലകളിലുമെല്ലാം മഞ്ഞുമലകൾ രൂപമെടുക്കാറുണ്ട്. അതുകൊണ്ട് തന്നെ വെള്ളം തണുത്തുറഞ്ഞ ഭീകരൻ മഞ്ഞുമലകൾ പുതിയ സംഭവമൊന്നുമല്ല . എന്നാൽ ഇക്കൂട്ടത്തിൽ ചരിത്രത്തിൽ സ്ഥാനം പിടിച്ച ഒട്ടേറെ മഞ്ഞുമലകളുമുണ്ട്. അതിൽ ഏറ്റവും പ്രശസ്തമാണ് ടൈറ്റാനിക്കിന്റെ തകർച്ചയ്ക്ക് വഴിവച്ച വടക്കൻ അറ്റ്ലാന്റിക്കിലെ മഞ്ഞുമല. ടൈറ്റാനിക്കിനെക്കുറിച്ച് ഒട്ടേറെ പഠനങ്ങൾ നടന്നിട്ടുള്ളത് പോലെ തന്നെ അതിന്റെ നാശത്തിനു കാരണമായ മഞ്ഞുമലയെക്കുറിച്ചും പഠനങ്ങൾ നടന്നിട്ടുണ്ട്.
ഒട്ടേറെ ആഘോഷങ്ങളോടെയാണ് വൈറ്റ് സ്റ്റാർ ലൈൻ എന്ന കപ്പൽ കമ്പനി ടൈറ്റാനിക്കിനെ നിർമിച്ച് പുറത്തിറക്കിയത്.ലോകത്തിലെ ഏറ്റവും സുരക്ഷിതമായ ആഢംബരക്കപ്പൽ എന്നു വിശേഷിപ്പിക്കപ്പെട്ട ടൈറ്റാനിക്ക് ഒരിക്കലും തകരില്ലെന്നും കമ്പനി പ്രഖ്യാപിച്ചിരുന്നു.കപ്പൽ ഗതാഗതത്തിൽ തങ്ങളുടെ പ്രതിയോഗികളായ കുനാർഡ് എന്ന കമ്പനിയുടെ വൻകിട കപ്പലുകളോട് കിടപിടിക്കാൻ ലക്ഷ്യമിട്ടാണ് വൈറ്റ് സ്റ്റാർ ലൈൻ ടൈറ്റാനിക്ക് നിർമിച്ചത്.വടക്കൻ അമേരിക്കയുടെയും , യൂറോപ്പിന്റെയും വലിയ ശ്രദ്ധ നേടിയ ടൈറ്റാനിക്കിനെ പറ്റിയുള്ള വാർത്തകൾ അന്നത്തെ കാലത്തെ പത്രമാധ്യമങ്ങളുടെ ഒന്നാം പേജിൽ ഇടതടവില്ലാതെ പ്രത്യക്ഷപ്പെട്ടുകൊണ്ടിരുന്നു.
മൂന്നു വർഷത്തോളം ഇടവേളകളില്ലാതെയുള്ള നിർമാണത്തിലൂടെയാണ് ടൈറ്റാനിക്ക് യാഥാർഥ്യമായത്.മേയ് 31നു അയർലൻഡിലെ ബെൽഫാസ്റ്റിൽ നടന്ന ടൈറ്റാനിക്കിന്റെ ‘നീറ്റിലിറക്കൽ’ ചടങ്ങു കാണാനായി ഒരു ലക്ഷത്തോളം ആളുകളാണ് തടിച്ചുകൂടിയത്. ഒടുവിൽ ലോകം കാത്തിരുന്ന ആ നിമിഷം താമസിയാതെ തന്നെ സമാഗമമായി.1912 ഏപ്രിൽ പത്തിനു ഇംഗ്ലണ്ടിലെ സതാംപ്ടണിൽ നിന്ന് 2240 യാത്രക്കാരുമായി ടൈറ്റാനിക് കന്നിയാത്ര തുടങ്ങി.അറ്റ്ലാന്റിക് സമുദ്രത്തിലൂടെ മുന്നോട്ടു നീങ്ങിയ കപ്പലിന്റെ ലക്ഷ്യം അമേരിക്കൻ നഗരമായ ന്യൂയോർക്കായിരുന്നു. എന്നാൽ വിധിയുടെ തീരുമാനം മറ്റൊന്നായിരുന്നു.
ടൈറ്റാനിക്കിനു മരണദൂതുമായി ഒരു ഭീമൻ മഞ്ഞുമല വടക്കൻ അറ്റ്ലാന്റിക്കിൽ കിടപ്പുണ്ടായിരുന്നു.ദുരന്തം തുടങ്ങുന്നതിനു മുൻപ് കപ്പലിലെ ഉദ്യോഗസ്ഥർ ഇതു കാണുകയും കപ്പലിന്റെ ഗതിമാറ്റാൻ ശ്രമിക്കുകയും ചെയ്തു. എന്നാല്‍ അതൊന്നും ഫലപ്രദമായില്ല.കപ്പൽ മഞ്ഞുമലയിലിടിച്ചു. അന്നത്തെ സാങ്കേതികവിദ്യയുടെ ഏറ്റവും വലിയ കൊടിയടയാളമായ ടൈറ്റാനിക്ക് താമസിയാതെ തന്നെ സമുദ്രത്തിന്റെ ആഴങ്ങളിലേക്കു മുങ്ങിപ്പോയി. ആയിരത്തഞ്ഞൂറിലധികം ആളുകൾ ദുരന്തത്തിൽ മരിച്ചു.
ടൈറ്റാനിക് ദുരന്തം കഴിഞ്ഞ് പിറ്റേന്ന് സംഭവ സ്ഥലത്തുകൂടി യാത്ര ചെയ്ത ജർമൻ കപ്പലായ പ്രിൻസ് ആഡല്‍ബർട്ടിലെ നാവികർ, ലോകത്തെ ഞെട്ടിച്ച ഏറ്റവും കുപ്രസിദ്ധമായ ആ മഞ്ഞുമലയുടെ ചിത്രമെടുത്തു.ടൈറ്റാനിക് മഞ്ഞുമലയുമായി ഇടിച്ചിടത്ത് ചുവന്ന പെയിന്റ് അപ്പോഴും പറ്റിയിരുപ്പുണ്ടായിരുന്നു..ആ മഹാദുരന്തത്തിന്റെ അവശേഷിപ്പു പോലെ. പിന്നീട് ദുരന്തത്തിൽ മരിച്ചവരുടെ ശവശരീരങ്ങൾ വീണ്ടെടുക്കാനായി അയച്ച മിനിയ എന്ന കപ്പലിലെ ക്യാപ്റ്റനായ ഡി കാർട്ടറ്റും മഞ്ഞുമലയുടെ ചിത്രമെടുത്തു.
ഒരു ലക്ഷത്തിൽ പരം വർഷങ്ങൾ പഴക്കമുള്ളതായിരുന്നു ഈ മഞ്ഞുമലയെന്നു ഗവേഷകർ പറയുന്നു.മഞ്ഞുമൂടിയ ദ്വീപായ ഗ്രീൻലന്‍ഡിന്റെ പടിഞ്ഞാറൻ തീരത്തു സ്ഥിതി ചെയ്തിരുന്ന ഈ മഞ്ഞുമല ടൈറ്റാനിക് ദുരന്തം നടക്കുന്നതിന് 4 വർഷം മുൻപ് പൊട്ടിമാറി ആർക്ടിക് സമുദ്രത്തിൽ ഒഴുകി നടന്നു. യാത്രയിൽ കൂടുതൽ മഞ്ഞിനെ ആവാഹിച്ച് മഞ്ഞുമല കടുത്തു കരുത്തുറ്റതായി.ഇതിന്റെ നല്ലൊരു ഭാഗം സമുദ്രത്തിനടിയിലും , ചെറിയൊരു ഭാഗം വെളിയിലുമായി സ്ഥിതി ചെയ്തു. കപ്പലിൽ നിന്നു നോക്കുമ്പോൾ ചെറുതായി തോന്നുമെങ്കിലും താഴോട്ട് നല്ല ആഴവും , വ്യാപ്തിയും ഇതു കൈവരിച്ചിരുന്നു. വെള്ളത്തിനു മുകളിൽ തന്നെ 100 അടി പൊക്കവും , 400 അടി വ്യാസവും ഇതിനുണ്ടായിരുന്നു.
ടൈറ്റാനിക് തകർന്ന വർഷം ഗ്രീൻലന്‍ഡിൽ നിന്ന് ഒട്ടേറെ ഇത്തരം മഞ്ഞുമലകൾ വന്നെങ്കിലും അവയിൽ പലതും ആർട്ടിക്കിൽ നിന്ന് അന്റാർട്ടിക്കിലേക്കു പ്രവേശിക്കുന്നതിനിടെ നശിച്ചുപോയി.എന്നാൽ ടൈറ്റാനിക്കിന്റെ ദൗർഭാഗ്യത്തിന് ഈ മഞ്ഞുമല മാത്രം നിലനിന്നു.ദുരന്തത്തിനു ശേഷം ഈ മഞ്ഞുമല കുറച്ചുകാലം കൂടി നിലനിന്നെന്നും തുടർന്ന് അന്റാർട്ടിക് സമുദ്രത്തിലെ ജലത്തിലേക്ക് ലയിച്ചുചേർന്നെന്നും ശാസ്ത്രജ്ഞർ പറയുന്നു.
