തിരുവനന്തപുരം: തിരുവനന്തപുരം ജില്ലയിലെ പോത്തൻകോട് ചന്തവിളയിൽ അർദ്ധരാത്രിയിൽ വീടുകയറി വയോധികയെ ആക്രമിച്ച സംഭവം പ്രദേശവാസികളെ ഞെട്ടിച്ചിരിക്കുകയാണ്. ചന്തവിള കുറട്ടൂർ സ്വദേശി ലീല എന്ന വയോധികയ്ക്കു നേരെയാണ് ആക്രമണം ഉണ്ടായത്. അക്രമികൾ ഇവരുടെ വീടും സമീപത്തെ കടയും പൂർണമായും തകർത്തു. അങ്ങേയറ്റം ക്രൂരമായ ഈ സംഭവം നടന്നത് ഇന്നലെ അർദ്ധരാത്രിയോടെയാണ്.
വീട്ടിൽ തനിച്ചുറങ്ങിക്കൊണ്ടിരുന്ന ലീലയുടെ വീടിന്റെ വാതിൽ ചവിട്ടിപ്പൊളിച്ചാണ് അക്രമികൾ അകത്തുകയറിയത്. തുടർന്ന്, യാതൊരു പ്രകോപനവുമില്ലാതെ കമ്പിവടികൾ ഉപയോഗിച്ച് ഇവർ ലീലയെ മർദ്ദിക്കുകയായിരുന്നു. ശരീരമാസകലം മാരകമായി പരിക്കേറ്റ ലീലയുടെ ഇരുകാലുകൾക്കും ഗുരുതരമായ പരിക്കുകൾ പറ്റിയിട്ടുണ്ട്. അക്രമികൾ ഏകദേശം വെളുപ്പിന് ഒരു മണിയോടെയാണ് അക്രമം നടത്തിയത് എന്നാണ് ലീല പറയുന്നത്.
ആക്രമണത്തിന് ശേഷം അക്രമികൾ കടന്നുകളഞ്ഞു. കടുത്ത വേദനയും പരിക്കുകളും കാരണം ലീലയ്ക്ക് എഴുന്നേൽക്കാൻ പോലും സാധിച്ചിരുന്നില്ല. ദീർഘനേരം വീട്ടിൽ തന്നെ കിടന്ന ലീല, വെളുപ്പിന് അഞ്ചു മണിയോടെ ഇഴഞ്ഞ് റോഡരികിൽ എത്തി. ഈ അവസ്ഥയിൽ ഇവരെ കണ്ട നാട്ടുകാരാണ് വിവരം പോലീസിൽ അറിയിക്കുന്നത്.
തുടർന്ന് പോത്തൻകോട് പോലീസ് സംഭവസ്ഥലത്തെത്തി സ്ഥിതിഗതികൾ വിലയിരുത്തുകയും ലീലയെ ആശുപത്രിയിലേക്ക് മാറ്റുകയും ചെയ്തു. അയൽവാസികളുമായി ലീലയ്ക്ക് നിലനിൽക്കുന്ന തർക്കങ്ങളാണ് ഈ ആക്രമണത്തിന് പിന്നിലെന്ന പ്രാഥമിക നിഗമനത്തിലാണ് പോലീസ്. സംഭവത്തിൽ കേസെടുത്ത് അന്വേഷണം ആരംഭിച്ചു.