ന്യൂഡല്ഹി: കരിഞ്ചന്തയിലെ വില്പ്പന തടയുന്നതിനും രാജ്യത്തെ പാചകവാതക വിതരണ ശൃംഖല കുറ്റമറ്റതാക്കുന്നതിന്റെയും ഭാഗമായി മേയ് ഒന്ന് മുതല് നടപ്പിലാക്കുന്ന പരിഷ്കാരങ്ങള് സാധാരണക്കാരായ ഉപഭോക്താക്കളെ സംബന്ധിച്ചിടത്തോളം അതീവ പ്രധാനമാണ്. സിലിണ്ടറുകളുടെ ദുരുപയോഗം തടയുന്നതിനും യഥാര്ത്ഥ ഗുണഭോക്താക്കള്ക്ക് സേവനം ഉറപ്പാക്കുന്നതിനുമായി എണ്ണക്കമ്പനികള് നിര്ണായക മാറ്റങ്ങള്ക്ക് ഒരുങ്ങുകയാണ്.
സിലിണ്ടറുകള് കരിഞ്ചന്തയിലേക്ക് മറിച്ചുവില്ക്കുന്നത് തടയാന് ബുക്കിങ്ങുകള് തമ്മിലുള്ള സമയപരിധി വര്ധിപ്പിച്ചിട്ടുണ്ട്. നഗരപ്രദേശങ്ങളില് ഒരു സിലിണ്ടര് വാങ്ങി 25 ദിവസം കഴിഞ്ഞാല് മാത്രമേ അടുത്ത ബുക്കിങ് അനുവദിക്കൂ. ഗ്രാമപ്രദേശങ്ങളില് ഈ ഇടവേള 45 ദിവസമായി ഉയര്ത്തിയിട്ടുണ്ട്.
വിതരണത്തിന് ഒടിപി (DAC) നിര്ബന്ധം
സിലിണ്ടര് വീട്ടിലെത്തുമ്പോള് ലഭിച്ചിട്ടുണ്ടെന്ന് ഉറപ്പുവരുത്താന് ഡെലിവറി ഓതന്റിക്കേഷന് കോഡ് (DAC) സംവിധാനം കര്ശനമാക്കി. ബുക്ക് ചെയ്യുമ്പോള് രജിസ്റ്റര് ചെയ്ത മൊബൈലിലേക്ക് വരുന്ന ഒടിപി കോഡ് വിതരണക്കാരന് നല്കിയാല് മാത്രമേ സിലിണ്ടര് കൈപ്പറ്റാന് സാധിക്കൂ. അതിനാല് നിലവില് മൊബൈല് നമ്പര് ലിങ്ക് ചെയ്യാത്തവര് ഉടന് തന്നെ ഗ്യാസ് ഏജന്സിയുമായി ബന്ധപ്പെട്ട് അത് പുതുക്കേണ്ടതാണ്.
ആധാര് ഇ-കെവൈസി (e-KYC)
പ്രധാനമന്ത്രി ഉജ്ജ്വല യോജന ഗുണഭോക്താക്കള് ഉള്പ്പെടെയുള്ളവര് ആധാര് അധിഷ്ഠിത ബയോമെട്രിക് ഓതന്റിക്കേഷന് പൂര്ത്തിയാക്കണമെന്ന് നിര്ദ്ദേശമുണ്ട്. കെവൈസി നടപടികള് പൂര്ത്തിയാക്കാത്തവര്ക്ക് സബ്സിഡി തടസ്സപ്പെടാന് സാധ്യതയുണ്ട്.
വില വ്യതിയാനം
എല്ലാ മാസവും ഒന്നാം തീയതി എണ്ണക്കമ്പനികള് വില പുതുക്കാറുള്ളതിനാല് മേയ് ഒന്നിനും ഗാര്ഹിക-വാണിജ്യ സിലിണ്ടറുകളുടെ വിലയില് മാറ്റമുണ്ടാകാന് സാധ്യതയുണ്ട്. അന്താരാഷ്ട്ര വിപണിയിലെ വിലനിലവാരം അനുസരിച്ചായിരിക്കും ഇത് തീരുമാനിക്കുക.
ഉപഭോക്താക്കള്ക്ക് തങ്ങളുടെ ബുക്കിങ് നിലയും അടുത്ത ബുക്കിങ് എന്ന് സാധിക്കുമെന്ന വിവരങ്ങളും MyLPG പോര്ട്ടല് വഴി ഓണ്ലൈനായി പരിശോധിക്കാവുന്നതാണ്. വിവരങ്ങള് കൃത്യമായി അപ്ഡേറ്റ് ചെയ്യുന്നത് വഴി അവസാന നിമിഷത്തെ ബുദ്ധിമുട്ടുകള് ഒഴിവാക്കാം.