മലയാളികൾക്ക് ബാലതാരമായി സുപരിചിതയായ എസ്തർ അനിൽ, ലണ്ടനിലെ തന്റെ പഠനകാലത്തുണ്ടായ ഒരു വിചിത്രമായ അനുഭവത്തെക്കുറിച്ച് വെളിപ്പെടുത്തിയതാണ് ഇപ്പോൾ സിനിമാലോകത്തെ ചർച്ചാവിഷയം. യുകെയിലെ ഒരു പ്രമുഖ മാധ്യമം തന്നെ പുകഴ്ത്തുന്നതിനായി സുഹൃത്തും സഹപ്രവർത്തകയുമായ സാനിയ അയ്യപ്പനെ മനഃപൂർവം താഴ്ത്തിക്കെട്ടി വാർത്ത നൽകിയെന്നാണ് എസ്തർ പറയുന്നത്. 'ദി ക്യൂ സ്റ്റുഡിയോ'യ്ക്ക് നൽകിയ അഭിമുഖത്തിലാണ് താരം ഈ വെളിപ്പെടുത്തൽ നടത്തിയത്.
ലണ്ടൻ സ്കൂൾ ഓഫ് ഇക്കണോമിക്സിൽ നിന്ന് ബിരുദാനന്തര ബിരുദം പൂർത്തിയാക്കിയ എസ്തറിനെ അഭിനന്ദിച്ചുകൊണ്ട് വന്ന ലേഖനത്തിലാണ് സാനിയയെ മോശമായി ചിത്രീകരിച്ചത്. സാനിയ അയ്യപ്പൻ ലണ്ടനിൽ വംശീയ അധിക്ഷേപം (Racism) നേരിട്ടതിനെക്കുറിച്ചും അവിടെ തുടരാൻ കഴിയാതെ മടങ്ങിയതിനെക്കുറിച്ചും പരാമർശിച്ച മാധ്യമം, എസ്തർ വലിയ യൂണിവേഴ്സിറ്റിയിൽ അഡ്മിഷൻ നേടി വിജയിച്ചു എന്ന രീതിയിലാണ് വാർത്ത നൽകിയത്. മറ്റേയാൾക്ക് സ്റ്റാർഡം ഇല്ലാത്തതിനാലും സാഹചര്യങ്ങളോട് പൊരുത്തപ്പെടാൻ കഴിയാത്തതിനാലും പേടിച്ച് ഓടിയതാണെന്ന തരത്തിലുള്ള പരാമർശങ്ങൾ തന്നെ ഏറെ വിഷമിപ്പിച്ചുവെന്ന് എസ്തർ പറഞ്ഞു.
ഒരാളെ മോശമാക്കി തന്നെ പുകഴ്ത്തുന്നതിൽ യാതൊരു യുക്തിയുമില്ലെന്ന് എസ്തർ വ്യക്തമാക്കി. ഈ വാർത്ത തന്നെ ബാധിക്കാതിരിക്കാൻ താരം ഉടൻ തന്നെ സാനിയയ്ക്ക് സന്ദേശമയച്ചു. താൻ പറഞ്ഞ് എഴുതിപ്പിച്ച വാർത്തയല്ല ഇതെന്ന് ബോധ്യപ്പെടുത്താനായിരുന്നു അത്. എന്നാൽ സാനിയ വളരെ പക്വതയോടെയാണ് ഇതിനോട് പ്രതികരിച്ചത്. ബാഹ്യമായ ഇടപെടലുകളാണ് പലപ്പോഴും താരങ്ങളെ ശത്രുക്കളാക്കുന്നത് എന്നും എന്നാൽ തങ്ങൾ ഇന്നും നല്ല സുഹൃത്തുക്കളായി തുടരുന്നുവെന്നും എസ്തർ കൂട്ടിച്ചേർത്തു.
പഠനം പൂർത്തിയാക്കി സിനിമയിൽ വീണ്ടും സജീവമാകാൻ ഒരുങ്ങുകയാണ് എസ്തർ. മലയാളികൾ ആകാംക്ഷയോടെ കാത്തിരിക്കുന്ന 'ദൃശ്യം 3' ആണ് താരത്തിന്റെ റിലീസിനൊരുങ്ങുന്ന ഏറ്റവും പുതിയ ചിത്രം. വിദ്യാഭ്യാസത്തിന് നൽകുന്ന പ്രാധാന്യവും സഹപ്രവർത്തകരോടുള്ള ബഹുമാനവും എസ്തറിന്റെ വാക്കുകളിൽ പ്രകടമാണ്.